¿Jehová alicunalata rurashgantacu yäracunchi?

1, 2. 1) ¿Imanirtaj waquincunaga autoridäyoj cajcunaman yäracärinchu? 2) ¿Imatataj canan yachacushun?

CANAN wichan achca runacunapäga sasami juc autoridäyoj runaman yäracunanpaj. ¿Imanir? Paycunaga cuentata gocärin leycuna y autoridäcunapis ricucunalata yanapashgantami, ichanga wacchacunataga manami. Chaychi Bibliapis nin: “Runaga runa-masinta mana allita rurananpaj munayniyojmi caycan” (Ecl. 8:9). Pushacoj religiosucunapis mana alicunata rurashganraycur runacunaga Diosman yäracärinnachu. Chaymi estudiantinchicunata yanapashwan Diosman yäracunanpaj y cay Pachacho pushamänanchipaj cajcunamanpis.

² Ichanga manami estudianticunalachu chayta ruranman, sinoga noganchipis. Achca watapana Jehovata sirviycarpis jinalami yäracuycashwan Jehová lapan rurashgancunaga ali cashganta. ¿Imanir? Öraga imalapis canman yäracuyninchita ushacächinanpaj. Chaymi cananga yachacurishun imanoshi Jehovaman yäracushwan: Bibliacho caycaj wilacuycunata leiptinchi, marcancho ima wilacuycunatapis chasquiptinchi y shamoj tiempucho ima pruebacunapa pasaptinchi.

¿IMANOTAJ BIBLIATA LEISHPANCHI JEHOVAMAN YÄRACUSHWAN?

3. ¿Imanirtaj öraga Bibliata leishpanchi sasa canman Jehovaman yäracunapaj?

³ Öraga Bibliata leishpanchimi tapucunchi imanirtaj Jehová waquincunata yanapashga y juccunata castigashganta. Tantiarinapaj, Números libruchoga wilacun juc israelita sábado junajcho yantata shuntashganpita Jehová castigashganta; y ishcay caj Samuel libruchoga wilacun rey David imayca juchacunata rurashganpitapis Jehová perdunashgantami (Núm. 15:32, 35; 2 Sam. 12:9, 13). Öraga caynochi tapucushwan: “¿Imanirtaj David jatun juchata rurashga carpis Jehová perdunashga, ichanga israelita runataga castigargan sabaducho yantata shuntashganlapita?”. Mä ricärishun imacunamantash yarpachacushwan Bibliata leishpanchi hora.

4. Génesis 18:20, 21 y Deuteronomio 10:17 textucunaga, ¿imanotaj yanapämanchi Jehová rurashgancunaga ali cashganta yäracunapaj?

⁴ Öraga Biblia manami wilacunchu ima ayca pasashganta. Musyanchimi Davidga arrepenticushganta juchacunata rurashganpita (Sal. 51:2-4). Pero, ¿ima nishwantaj sabadupaj leyta mana cumplishgan runapita? ¿Shongupitachuraj arrepenticurgan rurashganpita? ¿Unaychopis Jehovata mana cäsucushgachuraj? ¿Mayna consejashga carpis yapay mana cäsucurganchuraj? Bibliaga manami wilacunchu. Pero musyanchimi Jehovaga “manami ima jutsatapis rurantsu” (Deut. 32:4). Runacunaga ricärishganlapita o wiyashganlapita juzgaptenga pantarcunmi. Ichanga Jehovaga ima ayca pasashganta cuentaman churan pitapis juzgananpaj (leiriy Génesis 18:20, 21; Deuteronomio 10:17). Jehová imano cashganta y leynincunatapis shumaj tantiarcuptinchega payman masrämi yäracushun. Bibliata leiptinchi imalatapis shumaj mana tantiarcuptinchega yarpachacushwanchu. Canancama Jehovapita yachacushganchega musyachimanchi pay “rurashqankunaqa lapanpis alimi kaykan” (Sal. 145:17).

5. ¿Imanirtaj öraga pantarcunchi pitapis ali juzganapaj? (“Juchasapa carmi lapantaga tantianchichu” recuadruta ricäriy).

⁵ Juchasapa cashganchiraycurmi juzganapaj pantarcunchi. Diosga quiquin nirajtami camamashcanchi, chaymi mana alicunata chiquinchi (Gén. 1:26). Pero öraga juchasapa cashganchiraycurmi lapanta musyashganchita creirpis juzganapäga pantarcunchimi. Chaytami Jonasta pasargan, payga alapami piñacurgan Nínive marcapita runacunata Jehová perdunaptin (Jon. 3:10–4:1). Jehová laquipäcoj cashganraycur 120.000 ninivitacuna salvacärergan. Chaypita Jonás cuentata gocurgan Jehová alitami rurashganta. Ichanga payga quiquilanman yäracuycargan. Caycho ricanchi Jehová rurashganga ali cashganta, Jonasmi ichanga pantaycurganmi.

6. ¿Jehová lapanta wilapämänanchitachuraj shuyarashwan?

⁶ Ama shuyarashwanchu Jehová lapantaraj wilamänanchipaj. Unaycho Jehovaga waquin sirvejnincunata wilargan imata rurananpaj y paycuna nishgantapis wiyarganmi (Gén. 18:25; Jon. 4:2, 3). Y juccunataga tantiachirganrämi imanir chayta acrashganta rurananpaj (Jon. 4:10, 11). Pero cayga manami ninanchu pay lapantaraj wilapämänanchipaj imanir jucta o wacta rurananpaj. Payga Camacojninchimi caycan, chauraga imatapis ruraptin o imatapis rurananpäna caycaptenga manami shuyaranchu noganchiraj ‘ali cashganta’ ninapaj (Is. 40:13, 14; 55:9).

IMA WILACUYCUNATA CHASQUIPTINCHIPIS JEHOVAMAN YÄRACUSHUN

7. ¿Öraga pïcunamantaj yäracunapaj sasa canman, y imanir?

⁷ Musyanchimi Jehovaga imaypis alicunalata rurashgantami. Pero öraga sasami canman pay acrashgan hermanucuna pushamänanchipaj cajman yäracunanchipaj. Capazchari tapucunchi: “¿Paycunaga Jehová munashgannolachuraj ruraycan o quiquincuna munashgannochuraj ruraycan?” nir. Y unay tiempuchopis waquincunaga chaynochi tapucurgan. Yarparcushun sabadupaj leyta mana cäsucushgan runaman. Capazchari maygan familianlapis tapucurgan ‘¿castalä wanunanpaj Moisesga Jehovatachuraj puntataga tapucurgan?’ nir. Y Uriazpa juc amigunpis nirganchi ‘Davidga rey captinchi munashgalanta ruran, chaychi Uriazpa warminwan punucurgan y pipis castigarganchu’. Ichanga cayta yarpänanchi: Jehovaga waquin runacunamanga yäracunmi chaymi pushamänanchipaj acrashga. Chauraga, paycunaman mana yäracurga ‘¿imanoparaj Jehovaman yäracö?’ nishwan.

8. Hechos 16:4, 5 wilacamushgannola, ¿imanirtaj nishwan canan wichan congregaciuncunaga unaynola ali camacashga caycan?

⁸ Canan wichan Jehovaga pushamanchi ali tantiaj y yäracuypaj esclavuwanmi (Mat. 24:45). Apostolcuna cawashgan wichan cuerpo gobernante rurashganno, chaynolami paycunapis cananga entero munducho predicaciunpita alcäbu caycan y congregaciuncho ancianucunamanpis wilacuycunata apachicamun (leiriy Hechos 16:4, 5). Y ancianucunanami lapan hermanucunata wilapan cumplinanpaj. Chauraga apachicamushgan wilacuycunata y ancianucunatapis cäsucuptinchega Jehovaman yäracuycashganchitami musyachicuycanchi.

9. ¿Ima pasaptintaj ancianucunata cäsucunapaj öraga sasa canman, y imanir?

⁹ Öraga ancianucuna wilacamushganta cäsucunapäga sasami canman. Tantiarinapaj, guepa watacunacho waquin congregaciuncuna y circuitucunapis, ali camacächishga cananpaj waquin publicadurcunatami nipäcurgan juc congregaciunman pasananpaj, chaynopa Saloncunata ali aprovechananpaj. Chauraga noganchitapis chayno nimaptinchega, sasachi canman familianchita y amigunchicunatapis jaguirinapaj ¿au? Ancianucunata Jehovaga manami wilacunchu juc congregaciunman pïcuna pasananpaj y pïcuna quedacunanpaj. Chaymi, öraga sasa canman ancianucunata cäsucunapaj. Ichanga paycuna rurashganmanmi Jehovaga yäracun y noganchipis yäracushwanmi.b

10. Hebreos 13:17 wilacushganno, ¿imanirtaj ancianucuna wilacamushganta cäsucushwan?

¹⁰ Ancianucuna wilacamushganta waquincuna chasquicuyta mana munaptinpis alapa ali canga juc yarpayla juc shongula Taytalanchi Jehovata sirvishpanchega (Efes. 4:2, 3). Jina congregaciunpis winaycämungala ancianucuna wilacamushganta ali shongulanchiwan chasquicuptinchega (leiriy Hebreos 13:17). Chay lapanta rurarga Jehovatami niycanchi ‘gammanmi yäracamö y ricamänanchipaj churashganta ancianucunamanpis’ (Hech. 20:28).

11. ¿Imanirtaj ancianucuna wilacamushgancunaman masraj yäracushwan?

¹¹ Ancianucuna camacächishgancunataga cushi cushilami yanapacunanchi. ¿Imanir? Paycunaga imaypis Jehovapa espiritunta ruwacärin congregaciuncho arunanpaj. Jina Biblia wilacushgannola imatapis rurapäcun y imatapis ruranapaj camacächishga wilacuycunatapis cäsucärinmi. Jehovata amatar cuyapäcun y hermanucuna ali cuidashga cananpaj calpachacärin. Ancianucunaga musyapäcun imano arushganpita Jehová cuentata mañananpaj cajta (1 Ped. 5:2, 3). Caymanpis yarpachacushwan: canan wichan runacunaga raquicashga caycan colorninraycur, religiunninraycur y gobiernuncunaraycur; noganchicunami ichanga rasunpa caj Diosta juc shongula aduraycanchi. Caywanga claro ricanchi Jehová marcanta bendeciycashganta.

12. ¿Imacunataraj ancianucuna rurapäcunman pipis rasunpa arrepentido cashganta musyapacaramunanpaj?

¹² Jehová ancianucunatami congregaciuncunacho churashga hermanucunata yanapänanpaj, Jehová munashganno cawananpaj. Chauraga maygan cristianupis jatun juchata ruraptenga, Jehová shuyaran ancianucuna decidinanpaj congregaciunpita gargushga cananpaj o manapis. Pipis arrepentido cashganta niptenga, ancianucuna tapucärinman: ¿mana alita rurashgantaga rasunpachu chiquin?, ¿chay juchata yapay rurayta mana munannachu? Mana ali amiguncunaraycur juchaman ishquishga carga, ¿paycunapita rasunpachu raquicayta munan? Ancianucunaga Jehovata mañacärin y Biblia ima wilacushgantapis ashircärin, jina juchayoj caj consejucunata imano chasquicushgantapis ricapäcun. Chay lapanta ruraycurna paycunaga musyapäcun imata rurananpaj. Öraga congregaciunpita gargushga canantaraj decidipäcunman (1 Cor. 5:11-13).

13. ¿Imataraj nishwan congregaciunpita castanchita o amigunchita garguriptenga?

¹³ Congregaciunpita pitapis garguriptenga, ancianucuna decidishganta öraga juclami respetanchi. Pero, ¿imaraj canman castanchita o amigunchita garguriptenga? Chay hora sasachi canman ancianucuna decidishganta chasquinapaj. Öraga nishwanpis ‘¿paycunaga shumaj musyapacur-raj Dios munashgannochuraj amigüta o castaläta juzgashga?’ nir. Chayno yarpaptinchega, ¿imaraj yanapämäshun ancianucuna decidishganta ali shongulanchiwan chasquinapaj?

14. Ancianucuna castanchita o amigunchita garguriptenga, ¿imatataj yarpashwan?

¹⁴ Pilapis gargushga cananpaj Jehová camacächishganga congregaciunta y juchayojtapis yanapanmi. Mana arrepenticojta mana garguriptenga congregaciuncho caycajcunata inquitar juchamanpis ishquichinmanmi (Gál. 5:9). Jina, alapa juchalicushganta y Jehovawan yapay amigo cananpaj yarpaynincho y ruraynincunachopis cambiucunataraj rurananpaj cashgantapis cuentata gocunmanchu (Ecl. 8:11). Cayta ama gongashunchu: ancianucunaga shumaj tantiacur-rämi decidipäcun pitapis gargunanpaj o manapis. Paycunaga imaypis yarpapäcun ‘manami runacunapächu juzgashganta’, sinoga Jehovapämi (2 Crón. 19:6, 7).

SHAMOJ TIEMPUPÄMI YANAPÄMÄSHUN

15. ¿Imanirtaj cananlapitana Jehová pushaycalämashganchiman yäracushwan?

¹⁵ Ichiclanami pishin cay mundo ushacänanpaj. Chaymi cananlapitana yäracuycäshun Jehová imano pushaycalämashganchiman. Cayga yanapämäshun jatun nacay wichan maygan wilacuycunapis mana camacajno o sasa captinpis cäsucunapaj. Chay wichanga ama shuyarashwanchu Jehovaraj parlapämänanchipaj, sinoga ancianucunawanmi wilapämäshun imata ruranapäpis. Chauraga, ¿chay wilacuycunaga Jehovapitachuraj shamun?, ¿ancianucunaga alitachuraj ruraycan? nir yarpashwanchu. ¿Jehovamanchuraj lapan shongunchiwan yäracushun? Chayta musyanapäga canan wichan marcan apachicamushgan wilacuycunata imano chasquishganchipitami ricacämunga. Cananlapita mayna apachicamushgan wilacuycunata jucla cäsucuptinchega, yanapämäshun jatun nacay wichanchopis wilacuycunata cäsucunapaj (Luc. 16:10).

16. ¿Ichiclachoga imacunachoraj ricacämunga Jehovaman rasunpa yäracushganchita?

¹⁶ Jina yarpachacunanchi imano ricacunapaj jatun nacay wichan runacunata Jehová juzgaptin. Lapanchimi munanchi castanchicuna y waquin runacunapis Jehovata sirvipäcunanpaj jatun nacay manaraj galaycuptin, chaymi paycunata Diospita parlapanchi. Pero Armagedón chayamuptenga, Jehová Jesustami acrashga runacunata juzgananpaj y paycunata ima pasananpäpis (Mat. 25:31-33; 2 Tes. 1:7-9). Chay wichanga manami noganchipitachu canga pïcuna salvacärinanpaj (Mat. 25:34, 41, 46). Chauraga, ¿Jehovaman yäracushwanchuraj, o pay rurashganga ‘mana ali caycan’ nishwanchuraj? Cananlapitana calpachacushun Jehovaman lapan shongunchiwan yäracunapaj, chayta rurarga shamoj tiempuchopis payman jinalami yäracuycäshun.

17. Cananlapitana Jehová rurashgancunaman yäracurga, ¿imanotaj shamoj tiempucho cawashun?

¹⁷ Mushoj Pachachoga ricashun Jehová canan wichan lapan rurashgancunaga ali cashganta. Chay wichanga luta religiuncuna, guellaylapaj wanojcuna ni maygan gobiernucunapis cangachu runacunata nacachinanpaj. Pipis gueshyanganachu, edayanganachu ni wanunganachu, chay lapancunami ushacanga. Satanaspis demoniuncunawan waranga watacunapa wichgarashga caycanga. Chauraga lapan mana alicuna mana canganachu (Apoc. 20:2, 3). Chay lapancunata ricarga, ¡mayraj cushicushun Jehovaman lapan shongunchiwan yäracushganchipita!

18. Números 11:4-6 y 21:5 textucuna wilacushganno, ¿imatataj yachacunchi waquin israelitacuna rurashganpita?

¹⁸ ¿Mushoj Pachachoga imalapis cangachuraj Jehovaman rasunpa yäracushganchita musyachicunapaj? Yarparcushun israelitacuna ima rurapäcushganta Egiptupita yargurir. Ichic tiempo pasariptinla waquincunaga maná micuypita yamacashgana caycar, Jehovapa contran rimayta galaycurgan ‘Egiptuchoga pescaduta, pepinuta, cebollata micoj canchi’ nipäcurgan (leiriy Números 11:4-6; 21:5). ¿Noganchitapis chaynochuraj pasamashwan? Armagedón pasariptenga achca aruycunami canga cay Pachata ichic ichiclapa juc paraisuman ticrachinapaj. Galananlachoga capazchi cawayninchega manami facilchu canga. Chauraga, ¿chay wichan Jehovapita quejacur galaycushwanchuraj? Canan wichan Jehová lapan gomashganchicunapita agradecido caycarga, shamoj tiempuchopis chaynolami canga.

19. ¿Imataj canan yachacushcanchi?

¹⁹ Jehovaga imaypis alilata ruran, chaymi payman yäracushwan. Jina cay Pachacho pushamänanchipaj churashgan runacunamanpis yäracushwanmi. Isaiasta Jehová ima nishganta ama gongashunchu, payga nergan: “Nogaman yäracamorga salbashanami canquipaj” (Is. 30:15).