Congregaciunninchicunaga ali camacashgami caycan

Jehovaga munan imapis ordenado canantami (1 Corintios 14:33). Chaymi lapan congregaciunnincunaga ali camacashga caycan. ¿Imanirtaj chayta ninchi? ¿Imanotaj yanapacushwan chayno ali camacashgala cananpaj?

1. ¿Pitaj lapan congregaciuncunapa pushacojnin caycan?

“Congregaciunpa umanga Cristumi” (Efesios 5:23, TNM). Quiquin Jesusmi cielupita ricaycämun congregaciuncunacho imapis ali camacänanpaj. Carguntapis gosh ‘tantiaj y yäracuypaj esclavuta’, paycunaga ali aroj ancianucunami, y Jehovapa testiguncunata Pushajcuna nirpis reguinchimi (leiriy Mateo 24:45-47). Unaynolami cay ancianucunaga may chaycho congregaciuncunata ali camacächir pushan (Hechos 15:2). Paycunaga munacärishgalanta manami ruranchu, quiquin Jehová y Palabran yanapänanta ashin y musyapäcunmi paycunapa janancho Cristo caycashganta.

2. ¿Pïcunataj ancianucunaga y imatataj rurapäcun?

Ancianucunaga ali shongulanwan Diosta sirvejcunami, Bibliapita ali yachachicojcunami y congregaciuncunacho hermanucunata täpajcunami. Yanapacärishganpita guellayta mañacärinanpaj ‘trucanga lapan voluntänincunawanmi’ arupäcun, manami “guellay raycula” (1 Pedro 5:1, 2). Siervo ministerialcunapis yanapacärinmi ancianucunata, espiritual cajcho pogurcäriptenga tiempuwanga ancianumanpis ticrapäcunmanmi.

Jina Jehovapa testiguncunata Pushajcunaga waquin ancianucunata cargunta gon congregaciunta watucärinanpaj. Chaynopa waugui panicuna shacyächishga cananpaj. Cay watucamojcunami pipis ancianuno y siervo ministerialno yanapacuyta munaptin acran (1 Timoteo 3:1-10, 12; Tito 1:5-9).

3. Testigo carga, ¿imatataj ruranchi jucninchi jucninchi?

Lapanchimi congregaciunninchicho “TAYTA DIOSTA alabapäcuy” Biblia nishganta ruranchi. Puncun puncun Jehovapita yachachicurpis paytaga alabayculanchimi (leiriy Salmo 148:12, 13).

SHUMAJ YACHACURCUNAPAJ

4. Jesusga ali pushacoj y shacyächicojmi

Jesusga yanapaycalämänanchipämi aunimanchi. Leipäcuy Mateo 11:28-30 y caycunapita parlapacäriy:

• ¿Imano pushacojninchitaj Jesusga? ¿Imano ricacunanchitataj munan?

VIDEO: Ancianucuna yanapacun Nepal naciuncho terremoto captin (4:56)

Bibliaga ali claro wilacun ancianucuna imano yanapacunanpaj.

Leipäcuy Isaías 32:2 y 1 Pedro 5:1-3 y caycunapita parlapacäriy:

• Jesusga shacyächejmi waquincunata. ¿Imanotaj ricacunqui Jesusno ancianucunapis shacyächicoj capäcuptin?

• ¿Ima mastataj ancianucuna rurapäcun Jesusnola cananpaj?

5. Yachachicärishgannolami ancianucunaga cawapäcun

VIDEO: Ancianucuna, ¡ali pushacoj capäcuy! (7:39)

Jesusga alimi wilacamurgan pushacoj hermanucuna imano yanapacamunanpaj. Leipäcuy Mateo 23:8-12 y caypita parlapacäriy:

• ¿Imanotaj ancianucuna canman Biblia nishganno? ¿Curacuna o pastorcunaga Biblia nishganno ali pushacojchuraj capäcun?

1. Ancianucunaga Jehovata cuyarmi familianta yanapan.

2. Congregaciuncho lapan hermanucunapaj yarpachacärin.

3. Diospita yachachicuycarlami carcaycan.

4. Ali yachachicojmi capäcun. Pichapacuychopis yanapacärinmi.

6. Ancianucunatami yanapacunchi

Bibliaga wilacunmi ganas ganasla ancianucunata yanapacunapaj. Leipäcuy Hebreos 13:17 y caypita parlapacäriy:

• ¿Imanir-raj Bibliaga nin cushi cushila ancianucunata cäsucunapaj? ¿Gampäga alichu chayga caycan? ¿Imanir?

Leipäcuy Lucas 16:10 y caypita parlapacäriy:

• Imalachopis yanapacunapaj captenga, ¿imanirtaj ancianucunata yanapashwan?

ICHIC YACHACUY

Congregaciunpa uman japuymi Jesús caycan; y autoridänintaga ancianucunapis respetapäcunmi. Y shacyächicoj ancianunchicunataga noganchipis ganas ganaslami yanapacunchi.

Yarpänapaj

• ¿Pitaj lapan congregaciuncunata pushaycan?

• ¿Imanopataj ancianucuna yanapacurcaycan congregaciuncho?

• ¿Imachotaj jucninchi jucninchipis yanapacuycanchi?

MASLATA YACHACUNAYQUIPAJ

Ricäriy imanotaj Jehovapa testiguncunata Pushajcuna y ancianucunapis alapa yarpachacärin cristiano masincunapaj.

Sasacunapa pasar imanotaj hermanuncunata shacyächergan (4:22)

Yachacuy imanotaj yanapacärin congregaciuncunata watucojcuna.

May chaypa aywar imanotaj cawan watucamoj waugue (4:51)

Leiriy congregaciuncho ima ruraynincunataj warmicunapaj caycan.

“¿Jehovapa testiguncunacho warmicunaga yachachicärinchu?” (Wilacamoj, 1 setiembre quilla, 2012)

Yachacuy imatataj ancianucuna ruran hermanuncunaraycur.

“Ancianucuna yanapämanchi cushishgala Diosta sirvinapaj” (Wilacamoj, 15 enero quilla, 2013)