Ancianucunata ashinanchi yanapämänanchipaj

1. Jehová sirvejnincunata cuyar, ¿imatataj paycunapaj rurashga?

JEHOVÁ lapan sirvejnincunata alapa cuyashpanmi cuyashga wamranta cachamurgan wanunanpaj. Y paycunata cuidananpaj ancianucunata encargargan (Hech. 20:28). Dios munan ancianucuna paycunata cuyacuylawan tratananpaj. Y Jesusta acrargan congregaciunta pushananpaj, chaymi ancianucuna Jesusta cäsucur congregaciuncho caycaj hermanucunata shacyächin y yanapan mana jaguiypa Jehovata sirvipäcunanpaj (Is. 32:1, 2).

2. Ezequiel 34:15, 16 nishganno, ¿pïcunapätaj Jehová más altanto caycan yanapananpaj?

² Jehová altantumi caycan lapan sirvejnincunata yanapananpaj, pero masrämi jucha rurashganraycu laquishga caycajcunata. Chaymi Jehová ancianucunawan paycunata yanapayta munan (leiriy Ezequiel 34:15, 16). Chauraga, ¿imatataj rurananchi yanapämänanchipaj? Payta mañacunanchi y ancianucunapa yanapacuyninta ashinanchi (Efes. 4:11, 12).

3. ¿Cay yachachicuyga lapanchicunata yanapämanchichuraj?

³ Canan yachacushun imano Jehová ancianucunawan yanapämanchi payta mana jaguiypa sirvinanchipaj. Cay temacunapita yachacushun: ¿imaytaj ancianucunata ashishwan yanapämänanchipaj?, ¿imanirtaj yanapämänanchipaj ashishwan? y ¿imanotaj ancianucuna yanapämashwan? Canan wichan capazchi ima problemacunapapis manaraj pasaycanchirächu pero imayca problemacunapa pasaptinchi cay yachachicuy yanapämäshun ancianucunapa yanapacuyninta ashinanchipaj, chaynopa Jehová ancianucunawan yanapämashganchita valurashun.

IMAYTAJ ANCIANUCUNATA ASHISHWAN YANAPÄMÄNANCHIPAJ

4. Santiago 5:14-16, 19, 20 textucunacho, ¿imapita parlaycan? (Fotucunatapis ricay).

⁴ Discípulo Santiago tantiachergan imano Jehová ancianucunawan yanapämanchi. Payga cayno nir escribergan: “Mayqaykipis qeshyar imarqa mayor wawqikunata qayatsinki” (leiriy Santiago 5:14-16, 19, 20). Cay textucho nin cay gueshyaj runaga ancianucunata gayananpaj, manami juc doctortachu. Y chay runaga juchanpita perdunashga captin aliyashgana ricacunga. Chauraga cay textucho discípulo Santiago tantiachimanchi juc cristiano juchata ruraptin juc runa gueshyawan caycajno caycashganta. Cayman yarpäshun: pilapis gueshyawan caycarga doctorman aywar gueshyanpita wilapan y doctor nishganta cäsucunan. Chaynolami juc cristiano juchata ruraptin ancianucunata ashinan problemanpita wilananpaj, paycuna Bibliawan consejashganpita cäsucunan Jehovawan yapay amistänanpaj.

5. ¿Imanopataj musyashwan Jehovawan ali amigo caycashganchita?

⁵ Santiago capítulo 5 nimanchi unayno Diosta manana sirviycashganchipa cuentata gocur ancianucunata ashinanchi yanapämänanchipaj, manami shuyarashwanchu Jehovapa amistäninta ogrananchitaraj. Capazchi yarpashwan ‘Dios munashganno cawaycä’ nir, ichanga Biblia nimanchi chayno yarparga quiquilanchimi engañacuycanchi (Sant. 1:22). Chayno pasargan Sardis marcacho caycaj hermanucunata. Paycuna yarpapäcurgan Dios munashganno ali cawar caycashganta, pero Jesús nergan Jehovapa ricaynincho mana ali caycashganta (Apoc. 3:1, 2). Chauraga, ¿imanopataj musyashwan Jehovawan ali amigo caycashganchita? Chaypäga yarpachacunanchi bautizacushganchi wichan ‘¿Jehovata igual-lachuraj cuyaycä o manacu?’ nir (Apoc. 2:4, 5). Y caycunaman yarpachacunanchi: “¿Unaynochu cushi cushila Bibliata liyë y leishgäman yarpachacö? ¿Mana jaguiypa reuniuncunaman aywaycä y chaypäga ali tantiarcur preparacuycä? ¿Unaynochu ganas ganaslawan predicaciunmanpis yargö o juc cosascunata rurayta munä? ¿Guellaylatacu ashir cacö?”. Caycunaman yarpachacuptinchi cuentata gocushun Jehovata sirviycanchi pay munashganno o manapis. Capazchi alita ruranapaj calpachacurpis mana puedinchinachu o Jehová mana munashganta rurashganchina, chay hora ancianucunata ashinanchi yanapämänanchipaj.

6. Jatun juchata ruraptinchi, ¿imata rurananchi?

⁶ Pipis jatun juchata ruraptin mana arrepenticurga congregaciunpita jorgushga canman. Chauraga jatun juchata ruraptinchi ancianucunawanmi parlananchi (1 Cor. 5:11-13). Yapay Jehovawan amigo cananchipaj juchanchipita arrepenticunanchirämi, chayta ruraptinchega Jehová perdunamäshun (Hech. 26:20). Juchanchipita arrepentido caycarga ancianucunawanmi parlashun.

7. ¿Pïcunatataj más ancianucuna yanapan?

⁷ Ancianucunaga manami jatun juchata rurajcunalatachu yanapan sinoga mana ali munaynincunawan luchaycajcunatapis yanapanmi (Hech. 20:35). Capazchi luchaycanqui mana ali munashgayquiwan y venciyta mana puedishgayquitapis sienticunqui. Y chayga más sasaraj caycan Bibliapita manaraj yachacur drogata micushgayquiraycu o shogushgayquiraycu, galapacho caycaj ganra ruraycunata ricashgayquiraycu, o jucwan jucwan cacushgayquiraycurpis. Chayno captenga ama laquicuychu, manami japalayquichu caycanqui. Ancianucunapis caycan yanapäshunayquipaj, maygan ancianutapis mana ali munashgayquipita wilanquiman. Paycuna wiyashunqui y consejashunqui imata ruranayqui mana ali munashgayquita vencinayquipaj, yarpächishunquipis mana ali munashgayquita mana ruranayquipaj calpachacuptiqui Jehová gamta alimi ricashunqui (Ecl. 4:12). Capazchi mana ali munayniquita venciyta mana puedishgayquita yamacashgana caycanqui, pero ancianucunata yanapäshunayquipaj ashishgayqui. Paycuna yarpächishunqui ‘gam quiquilayqui munashgalayquita rurayta mana munanquichu sinoga Jehovata cushichiyta munanqui’ nir (1 Cor. 10:12).

8. ¿Lapan pantashganchicunalatacu ancianucunata wilananchi?

⁸ Öraga manami lapan pantashganchicunata ancianucunata wilananchirächu. Capazchi maygan hermanunchicunawanpis rimanacur jagayachinacushgayqui. Chay pasashgayquipita manami ancianucunawanrächu parlanayqui, sinoga Jesús nishganno ruranayqui amistanayquipaj (Mat. 5:23, 24). Jina publicaciunchopis yachacunquiman pacienciacoj canayquipaj rasla mana rabiacunayquipaj. Capaz caycunata rurashgayquina pero chay problemata alchayta puedinquichu, chauraga ancianucunata yanapashunayquipaj ashinquiman. Unay wichan chaynomi pasargan ishcay cristianacunata Evodia y Síntique. Paycuna problemancunata alchayta puedipäcurganchu, chaymi apóstol Pablo juc hermanuta nergan paycunata yanapananpaj. Chaynolami congregaciunniquichopis juc anciano yanapäshunquiman (Filip. 4:2, 3).

IMANIRTAJ ANCIANUCUNATA ASHISHWAN YANAPÄMÄNANCHIPAJ

9. Ancianucunawan parlanapäga pengacurpis, ¿imanirtaj paycunawan parlananchi? (Proverbios 28:13).

⁹ Mana ali munayninchicunata venciyta mana puedirga o jucha rurashganchipita ancianucunawan parlanapaj mana fácil captinpis valurta jorgunanchi paycunawan parlanapaj. Ancianucunawan parlanapäga pengacurpis jucha rurashganchipita wilananchi. Jehová paycunata churashga yanapämänanchipaj chayno paypa ricaynincho ali caycänanchipaj. Chaymi ancianucunawan parlaptinchega Jehovaman yäracuycanchi y payta cäsucuycanchi. Segurumi caycanchi Jehová yanapämänanchipaj chay mana ali cajcunata jaguinanchipaj (Sal. 94:18). Jatun juchata rurashga carga ancianucunata wilananchi y chay juchatapis manana rurashwannachu, chaynopa Jehovapa cuyacuyninta y perdunnintapis chasquishun (leiriy Proverbios 28:13).

10. Juchanchicunata pacaptinchi, ¿imaraj pasamashwan?

¹⁰ Yachacushganchino juchanchicunapita ancianucunata wilapaptinchega quiquinchipämi ali canga, pero juchanchicunata pacaptinchi quiquinchimi nacashun. Mä yarparcushun rey David ima pasashganpita. Pay jucha rurashganpita mana wilacushganraycu pasaypa laquishga caycargan y cuerpunpis nanargan, payga musyargan Jehovapa ricaynincho mana ali caycashganta (Sal. 32:3-5). Pipis ima gueshyawan caycarga mana jampiptenga peoranmanmi, chaynolami pipis juchanpita ancianucunata mana wilapaptin Jehovapa favornintapis ograrinmanmi (Is. 1:5, 6, 18).

11. Ima juchapita mayarga ancianucunata mana wilapaptinchi, ¿imaraj pasanman?

¹¹ Juchanchicunata pacaptinchi waquincunata nacachishun y congregaciunchopis Jehovapa santo espiritun manami yanapämäshunchu (Efes. 4:30). Chauraga pipis congregaciuncho juchata rurashganta mayarga ancianucunawan parlananpaj nirishwan.a Pipis jucha rurashganpita ancianucunata mana wilacurga noganchipis juchayoj cashun (Lev. 5:1). Jehovata cuyarga ancianucunata wilashun, chayta ruraptinchega congregaciuncho ima juchapitapis limpio caycanga y juchata rurajtapis yanapashun Jehovawan yapay amigo cananpaj.

IMANOTAJ ANCIANUCUNA YANAPÄMASHWAN

12. ¿Imanotaj ancianucuna yanapanman pipis juchata ruraptin?

¹² Jehová ancianucunata Bibliawan yachachin pitapis congregaciuncho juchata ruraptin yanapananpaj (1 Tes. 5:14). Capazchi imatapis rurashgayqui chaymi Jehovawan mana amigo canquinachu. Ancianucunawan parlashgayqui hora paycuna yanapäshunayquipaj tapupashunqui imata yarpashgayquita y sienticushgayquitapis musyananpaj (Prov. 20:5). Y capazchi imano winashgayquiraycu manchacunqui y pengacunqui ancianucunawan parlanayquipaj. Chayno captinpis ima pasashushgayquipita wilacuy y chay horacho lutanta parlaptiquipis ama yarpachacuychu (Job 6:3). Ancianucunaga imatapis nishunquichu laquichishunayquipaj, chaypa trucanga shumajla wiyashunqui y Bibliawan ali consejashunqui (Prov. 18:13). Ancianucunaga musyapäcun jucha rurajta yanapananpaj tiemputaraj necesitashganta, öraga achca cutirämi parlanan yanapananpaj.

13. ¿Imata más rurartaj ancianucuna yanapämashwan? (Fotucunatapis ricay).

¹³ Ancianucunaga manami munanchu gam jucha rurashgayquipita más peor-raj laquicunayquita. Más bienga gampa shongupita mañacunga, paycuna gampaj mañacuptin alapa yanapäshunqui shonguyquipis jaucalana sienticunga. Ancianucunaga Bibliawan shogashunqui y yanapäshunqui yapay Jehovawan amigo canayquipaj (Is. 57:18). Chayga ‘aceitita umaykiman winaparkushushgaykinomi’ caycanga (Sant. 5:14-16). Y Bibliapa consejuncunaga calpata goshunqui ali cajta ruranayquipaj, chayga canga quiquin Jehová parlapaycashushgayquino ‘Kaypami näniqa. Kay ali nänipa ayway’ nir (Is. 30:21).

14. Gálatas 6:1 nishganno, ¿imanotaj ancianucuna jucha rurajta yanapanman? (Fotucunatapis ricay)

¹⁴ (Leiriy Gálatas 6:1). Cay textucho ‘juchapita’ parlarga tantiachicun pipis pantashgalanta ruraptin o jatun juchatapis ruraptin. Ancianucuna yäracoj masincunata cuyashpanmi ali shimilapa y pacienciawan corrigin. Cay textuchopis ‘tantiyatsipäkuy’ niptin griego rimaycho ninan mogacushga tulu sitiuman cutichinanpaj. Ali doctorga mana nanachiylapami mogacushga tulunta cashganman yachaylapa cutichipan, chaynolami ancianucunaga yäracoj masinta shongunta mana nanachiylapa corrigin. Ancianucuna pilatapis Bibliawan consejarga yarpananmi quiquinpis juchayoj cashganta, paycunaga mana ali tucuylapa consejanan más bienga laquipäcoj y humilde canman (1 Ped. 3:8).

15. Problemanchicuna captenga, ¿imata rurashwan?

¹⁵ Jehová yachachishgannola ancianucuna ruranman, chaymi pï hermano problemancunapita wilapaptin manami pitapis wilapanmanchu. Paycuna Bibliawan consejanan manami quiquinpa yarpayninlapitachu, chaynopa lasaj guepinchita apajnomi caycan (Prov. 11:13; Gál. 6:2). Waquin ancianucunaga cuyapacoj, pacienciacoj y waquincunaga unaypitana ancianuno sirviycan y waquincunana chaylaraj. Chauraga problemanchipita maygan ancianuwanpis parlashwanmi. Pero munashgalanchita wiyananchita munar manami juc juc ancianucunatarächu problemanchipita wilacunanchi. Chayta rurarga Diospa Palabranta mana chasquicojnomi caycashwan y munashgalanta wiyaj runano caycashwanpis (2 Tim. 4:3). Maygan ancianuta problemanchicunapita wilapaptinchi capazchi tapumashwan: ‘¿Maygan ancianutapis wilacushgayquinacu y imatataj nishushgayqui?’ nir. Y juc anciano humilde carga capazchi anciano masinta ashinman yanapananpaj (Prov. 13:10).

¿IMATA RURANANCHI CADA UNUNCHI?

16. ¿Quiquinchi imata rurananchi?

¹⁶ Problemanchipita ancianucunata wilacuptinchi paycuna consejamashun wiyamashunpis, pero manami nimäshunchu ‘cayta wacta ruranayqui’ nir. Cada junaj Jehovata cuyarga y cushichiyta munarga Pay munashganno parlashun y rurashunpis (Rom. 14:12). Cäsucoj carga Jehovami yanapämäshun ali decisiunta acrananchipaj. Ancianucunaga Bibliawan tantiachimäshun imata Jehová yarpan pasashganchipita, pero quiquinchimi decidinanchi imata ruranapaj. Bibliapa consejashganta imano practicaman churananchipaj yarpaptinchega yanapämäshun Jehová yarpashganno yarpänanchipaj, chaynopa ali cajta decidishun (Heb. 5:14).

17. ¿Imatataj Jehová munan rurananchipaj?

¹⁷ Jehová juc cuyacoj michicojno cuidamanchi, chaymi shongupita alapa agradecidumi caycanchi. Payga cuyashga wamranta cachamushga noganchiraycu wanunanpaj, chaynopa imaycamayajpis cawananchipaj (Juan 10:11). Jehová cayno nir aunicurgan: ‘Ali mitsikuqkunata churashaq qamkunata shumaq rikashunayquipaq’. Jehová aunicushganta cumplirgan, chaymi congregaciuncho ancianucunata churashga shumaj ricämananchipaj (Jer. 23:4). Chauraga unayno Jehovata mana sirviycaptinchi o pay mana munashganta imatapis ruraycaptinchi mana manchacuypa ancianucunata ashishun yanapämänanchipaj. Jehová ancianucunata regalutanomi gomashcanchi, chaymi paycunata ashinanchi yanapämänanchipaj.