¿Imata rurashwan fiyu runacuna noganchita nacachimaptinchi?

1, 2. Mana alicunata ricapacur, ¿imanotaj runacuna sienticärin y noganchi imacunatataj tapucunchi?

CANAN wichan waquin runacunata mana alipa tratapäcun waccha cashganraycu, may marcapita cashganraycu, colorninraycu o imaraycurpis. Chaynolami gobernanticuna y empresariucunapis imaycata rurapäcun runacunata nacachipäcunanpaj, paycuna rurashganraycurmi noganchi lapalanchi nacapäcunchi.

² Lapanchimi jaucala cawayta munanchi y manami munanchichu mana ali tratamananchipaj. Chayraycu waquin runacuna fiyupa rabianar ayvecisga huelgacunata rurapäcun, jina politicucunata yanapan chay fiyu runacunata ushacächinanpaj aunicuptin. Noganchi ichanga manami chaycunata yanapanchichu, musyanchimi Jehovapa Gobiernulanmi chay mana alicunata ushacächenga (Juan 17:16). Chayno captinpis chay mana alicunata ricar alapami laquichimanchi. Chaychi capaz cayno ninquiman: “¿Imata ruraycöman fiyu runacuna mana nacachimänanpaj? ¿Imata ruraycöman nacajcunata yanapänäpaj?”. Cananga chaypita yachacurishun. Pero puntata yachacurcushun ¿Imanotaj Jehová y Jesús sienticun mana alicunata ricashpan?

JEHOVÁ Y JESUSGA MANAMI PITAPIS NACACHINCHU

3. Fiyu runacuna pitapis nacachiptin ricar, ¿imanirtaj rabiacunchi? (Isaías 5:7).

³ Fiyu runacuna pilatapis nacachiycajta ricar alapami rabiacunchi. ¿Imanirtaj chayno sienticunchi? Biblia nimanchi Jehová camamashganchi quiquintano, payga ali cajta ruran y munan noganchipis ali cajta ruranapaj (Sal. 33:5; Gén. 1:26). Chaymi payga mana munanchu pipis waquincunata nacachinanpaj (Deut. 32:3, 4; Miq. 6:8; Zac. 7:9). Chayno pasargan profeta Isaiaspa tiempuncho. Fiyu israelitacuna waquin caj israelitacunata nacachiycaptin, nacaycajcunapa wagashganta Jehová wiyargan (leiriy Isaías 5:7). Chay fiyu mana cäsucoj israelitacunata Jehová castigarganmi (Is. 5:5, 13).

4. ¿Imanotaj Jesús sienticurgan religiosucuna gueshyaycaj runata mana cuyapaptin? (Dibujutapis ricay).

⁴ Jehovano Jesuspis mana munanchu runa masinta runacuna nacachipäcunanta. Cay pachacho caycar Jesús chayta ricächicurgan. Juc cuticho Jesús cuyapar jampirgan maquinta mana cuyuchej runata sábado junajcho, pushacoj religiosucuna chayta ricar alapa rabiacärirgan. Paycunaga leyta cäsunalanpämi mas yarpachacärej manami cuyajchu ni yanapajchu nacaycaj runata. Chayno chucru shongu mana cuyapacoj cashganpitami Jesusga rabianargan y laquicurganpis (Mar. 3:1-6).

5. ¿Imamantaj yarpäshun rabianashganchi horacho?

⁵ Yachacushganchino Jehová Jesuspis rabiacunmi fiyu runacuna runa masinta nacachishganta ricar. Chaymi ayvecisga noganchipis rabiananchi, chayga manami juchachu (Efes. 4:26). Pero cayman yarpänanchi, rabiacurga chay problemacunata manami ilgachishunchu. Rabiashga carga quiquinchimi gueshyashun manami cushish cawashunnachu (Sal. 37:1, 8; Sant. 1:20). Chauraga, ¿imatataj rurananchi mana ali tratamaptinchi? Chaypäga Jesús pasashganta yachacushun.

IMATARAJ JESÚS RURASHGA FIYU RUNACUNA RUNA MASINTA NACACHISHGANTA RICAR

6. Jesusga cay pachacho caycar, ¿imatataj ricargan? (Dibujutapis ricay).

⁶ Jesusga cay pachacho caycar ricargan fiyu runacuna waquincunata nacachejta. Jesús musyargan religiosucuna achca leycunata cumplipäcunanpaj runacunata nipäcoj, pero runacunapäga manami facilchu cargan cumplinanpaj (Mat. 23:2-4). Jina ricargan Roma autoridäcuna judiucunata nacachishganta, chayshi judiucunaga contranmanpis sharcupäcurgan y Romapa autoridänincunata mana cäsucuyta munapäcojnachu. Chaycunata ricarpis Jesús manami jaticarganchu politicaman judiucunata yanapananpaj y judiucuna Jesusta rey cananpaj churayta munaptin gueshpir aywacurgan (Juan 6:15).

7, 8. Jesús runacuna nacashganta ricar, ¿imanirtaj lapan nacaynincunata mana ushacächirganchu? (Juan 18:36).

⁷ Jesusga manami yaycurganchu politicacunaman judiucunapa problemancunata ushacächinanpaj. ¿Imanir? Payga musyargan runacunaga quiquinpura manami gobernanacuyta puedipäcushganta (Sal. 146:3; Jer. 10:23). Jesusga musyanmi runacuna nacayta mana ushacächiyta puedipäcushganta. Cay munduta Satanás gobernaptin, chaymi pay imaycatapis ruraycan runacuna payno amatar fiyu cananpaj (Juan 8:44; Efes. 2:2). Juchasapa cashpanchimi runacunaga ali cajta rurayta munarpis ayvecisga mana ali cajta rurapäcunchi (Ecl. 7:20).

⁸ Jesusga musyargan Diospa Gobiernulanmi Satanasta y juchata ushacächinanta. Chaymi payga “markan markan purir Tayta Dios mandaykashqanpa ali wilakuyninta wilakurqan” (Luc. 8:1). Jesusmi nergan nacaycajcunata lapan nacaynincuna chipyaypa ushacänanpaj (Mat. 5:6; Luc. 18:7, 8). Payga musyarganmi runacunapa gobiernunga nacaycunata mana ushacächinanpaj, sinoga Diospa Gobiernulanmi ushacächenga (leiriy Juan 18:36).

WAQUINCUNATA FIYU RUNACUNA NACACHIYCAJTA RICAR JESÚS RURASHGANNO RURAY

9. ¿Imanirtaj shongupita yäracunqui Diospa Gobiernunlami lapan nacaycunata ushacächinanpaj cajman?

⁹ Cananpis Satanás y fiyu runacunaga imaycanopämi runa masincunata nacachipäcuycan. Pero ushanan tiempo cashpanmi canan wichanga Jesuspa tiempunpitapis más nacaycuna caycan (2 Tim. 3:1-5, 13; Apoc. 12:12). Chayno cashganpitami canan wichan runacuna huelgacunata rurapäcun nacaycunata ushacächinanpaj, pero noganchiga Jesús rurashganno chaycunaman mana jaticanchichu sinoga yäracunchi Diospa Gobiernulan nacaycunata ushacächinanpaj cajta. Yachacushun hermana Esteycia imata rurashganta. Payga manaraj Testigo car huelgacunaman aywaj nacaycajcunata defendinanpaj. Pero tiempo pasariptin cuentata gocurganmi nacaycajcunata rasunpa mana yanapaycashganta. Pay wilacun: “Huelgacunacho caycashgä hora tapucurgä ‘¿rurashgäwan rasunpacu runacunata yanapaycä?’ nir. Pero canan musyänami Jehovapa Gobiernunla lapan nacaycunata ushacächinanpaj cajta, nogaga waquin nacaycajcunalata yanaparcöman pero shongupitami yäracö Jehová lapan nacaycajcunata yanapanga” (Sal. 72:1, 4).

10. Mateo 5:43-48 texto nishganno, ¿imanirtaj nacaycajcunata defendinapaj huelgacunaman mana aywanchichu? (Fotutapis ricay).

¹⁰ Achca runacuna nacaycajcunata defendinanpaj autoridäcunapa contran sharcur peliapäcun, pero chayta ruranapaj Jesús mana yachachimarganchichu (Efes. 4:31). Jeffrey hermanunchi cayno wilacun: “Ayvecisga huelgacuna ilajpitami peliaman chayan hasta negociucunatapis suwacärin”. Jesús ichanga yachachimarganchi lapan runacunata cuyanapaj noganchino mana yarpaptinpis o chiquimaptinchipis (leiriy Mateo 5:43-48). Chaymi noganchi calpachacunchi Jesús rurashganno rurananchipaj y cawayninchicho lapan yachachishganta cäsucunapaj.

11. Fiyu runacuna nacachimaptinchi, ¿imanirtaj sasa canman Jehovapa Gobiernunman yäracunapaj?

¹¹ Musyanchimi Diospa Gobiernunlami lapan nacaycunata ushacächinanpaj cajta. Chayno captinpis nacachimashganchi hora, sasachi canman Jesús rurashganno rurananchipaj. Chayno pasargan Janiya jutiyoj hermanata, paytashi colorninraycu despreciar nacachipäcurgan. Pay wilacun: “Pasaypa laquishga y rabiashgami caycargä. Chaymi shongücho munargä nacachimajnëcuna masraj nacananpaj. Nircur reguirgä colorninraycu chiquishga cajcunata defendejcunata y yarpargä ‘paycunata yanapaptëga alinami sienticushgä’ nir”. Pero tiempuwanrämi cuentata gocurgan chayno mana ali caycashganta. Pay nin: “Cuentata gocurgä Jehovaman yäracunapaj trucanga runacuna nishganman yäracur galaycurgä, chaymi chay runacunapita witicurgä”. Noganchita fiyu runacuna nacachimaptinchi y waquincunata nacachiycajta ricashganchi, capaz alapa rabianashwan. Pero rabianachimaptinchipis politicacunaman ama jaticashwanchu (Juan 15:19).

12. ¿Imanirtaj shumaj acrashwan imata ricänanchipaj, imata leinanchipaj y imata wiyananchipaj?

¹² Fiyu runacuna nacachimaptinchi o waquincunata nacachiptin, mana rabiacunapäga shumaj acrananchi imata ricänanchipaj, imata leinanchipaj y imata wiyananchipäpis. Internetcho noticiacunaga ayvecisga manami rasunchu, runata manchachinalanpämi y autoridäcunapita quejacunalanpaj yargamun. Jina periodistacunaga ayvecisga manami rasun cajta wilacunchu sinoga quiquin yarpashgancunalatami wilacärin. Waquin caj rasunpa captinpis, chaycunata leir, ricar o wiyapis rabianashwanmi y laquicushwanpis (Prov. 24:10). Y gongashwanmi chay mana alicunata Diospa Gobiernula ushacächinapaj cajta.

13. ¿Imanotaj yanapämäshun Bibliata cada junaj leiptinchi?

¹³ Bibliata cada junaj leishganchi y leishganchiman yarpachacuptinchi yanapämäshun pasaypa mana rabiash caycänapaj. Alicia jutiyoj hermana chaytami rurargan. Pay ricargan marcancho fiyu runacuna waquincunata nacachishganta y chay fiyu runacunata manami castigashgachu cashga, chayta ricar Aliciaga fiyupa rabiacurgan. Pay wilacun: “Chayno sienticurmi yarpargä ‘chay problemacunata Jehovalami ushacächinga’ nir. Nircur leirgä Job 34:22-29 chaycho yachacurgä Jehovataga manami pipis pacapanchu, paylami ali cajta ruran y paylami lapan problemacunata ushacächinga”. Pero Diospa Gobiernun fiyu runacuna rurashganta mana ushacächishganyaj, ¿imata rurapäcushun?

CANAN TIEMPUCHO, ¿IMATATAJ RURAYCÄSHUN?

14. Cay munducho fiyu runacuna caycaptinpis, ¿imata noganchi rurashun? (Colosenses 3:10, 11).

¹⁴ Cay munduchoga fiyu runacuna manami pitapis cuyapanchu chaymi waquincunata nacachipäcun, chayno captinpis noganchiga Jesusno cuyapacoj cananchi. Cuyacoj carga lapancunata respetashun hasta fiyu runacunatapis (Mat. 7:12; Rom. 12:17). Lapan runacunata cuyapaptinchi Jehovaga cushishmi sienticun (leiriy Colosenses 3:10, 11).

15. Bibliapita runacunata yachachishgaga, ¿yanapashunchuraj cambiananpaj?

¹⁵ Nacaycaj runacunataga Biblia wilacushganwanmi yanapashwan. ¿Imanir? Bibliaga nin fiyu runacuna Jehovata reguirga ali runacunaman ticranga (Is. 11:6, 7, 9). Manaraj Testigo car Jaime hermanuga yanapargan fiyu runacunata gobernantita jorgupacunanpaj mana alita ruraycaptin. Paymi nin: “Fiyu runacunapa contran peliarga manami paycunata cambiashwanchu ali cananpaj, ichanga Bibliawan yanapashwanmi. Nogataga Bibliami yanapämashga cambianäpaj”. Bibliata yachacushganpitashi pay decidirgan autoridäcunapa contrancunaman sharcojcunata manana yanapananpaj. Chaymi pilatapis Bibliapita yachachiptinchega yanapangami cambiananpaj runa masinta manana nacachipäcunanpaj.

16. ¿Imanirtaj gam Bibliapita yachachiyta munanqui?

¹⁶ Jesusno noganchipis runacunata wilapayta munanchi Diospa Gobiernulan nacaycunata ushacächinanpaj cajman yäracärinanpaj (Jer. 29:11). Isgun parrafucho wilacushgan Esteyci, cayno nin: “Bibliachomi yachacushcä Dios nacaycunata ushacächinanpaj cajta, chaymi waquincuna nacaycajta y nogata nacachimaptin mana alapa laquicönachu. Jehovami Bibliawan yanapämashga ali sienticunäpaj”. Jehovapa aunicuynincunaman runacunata shacyächinanchipaj shumajraj chaycunapita yachacunanchi. Chaymi Diospa Gobiernunlami nacaycunata ushacächinanpaj cajta seguro caycar escuelanchicho y trabajunchicho waquincunata mana manchacuypa chaycunapita yachachishun.b

17. Cay munducho nacaycuna captinpis, ¿imanopataj Jehová yanapämanchi?

¹⁷ Cay mundo Satanaspa maquincho caycaptinga fiyu runacuna manami ushacangarächu. Pero Jehová aunimanchi Satanasta ushacächinanpaj cajta (Juan 12:31). Cananga Jehová tantiachimanchi imanir nacashganchita y chayta ricar pay alapa laquicun (Sal. 34:17-19). Jina Jesuswanmi yachachimanchi fiyu runacuna nacachimaptinchi imano sienticunapaj y walca tiempulachona Gobiernun lapan nacaycunata ushacächinanpaj cajta (2 Ped. 3:13). Chauraga Diospa Gobiernun mana chämunancama cushishga y lapan shongunchiwan Gobiernunpita yachachicushun (Is. 9:7).