Diospäga alita ruraj runa cashun yäracuptinchi y alicunata ruraptinchi

1. ¿Imataraj öraga tapucushwan Abrahanpita yachacur?

ACHCA runacuna Abrahanpita wiyashga captinpis, manami shumajga payta reguinchu. Noganchimi ichanga ali reguinchi pay pï cashganta. Bibliaga nin “yäracoj cajcunapaga Abraham papäninno caycan” (Rom. 4:11, TDI). Chaymi Abrahanpita yachacur capaz öraga cayno tapucunchi: ‘¿Nogapis Abrahanno ali yäracoj runa cämanchuraj?’ nir. Au, lapanchi puedishwanmi.

2. ¿Imataj yanapämäshun Abrahanno ali yäracoj canapaj? (Santiago 2:22, 23).

² Abrahanno ali yäracoj runa cananchipäga paypitarämi yachacunanchi. Payga Diosman alapa yäracur imaypis cäsucurgan, marcanta jaguirgan, carpacunacho achca watacunapa cawargan y churin Isaactapis sacrificiutano goycunanpaj listo caycargan. Chaymi yäracushganraycur y alicunata rurashganraycur Jehová ali nawilanwan ricargan y amigunmanpis ticrargan (leiriy Santiago 2:22, 23). Jehovaga munan noganchipis ricaynincho ali caycänapaj y ali amigunmanpis ticranapaj. Chaymi Pabluta y Santiagutapis guelgachimurgan Abrahanpita. Canan yachacushun Romanos 4 caj capitulucho y Santiago 2 caj capitulucho imata wilacushganta Abrahanpita.

3. ¿Maygan textupitataj Pabluwan Santiaguga parlargan?

³ Pablo y Santiago Génesis 15:6 textupita parlar nergan Abrahán Jehovaman yäracushganpita alita ruraj runa ricashga cargan. ¿Ima ninantaj chayga? Abrahán alicunata rurashganpitami y imapitapis mana culpayoj captinmi Jehovata cushichirgan. Chaura Abrahán juchasapa captinpis, Jehovapa ricaynincho alita ruraj runa cargan, chayta musyarga almiraypämi. Gampis munanquichi Jehová chayno ricashunayquipaj, y calpachacurga puedinquimi. Canan ricärishun imanirtaj Jehová chayno Abrahanta ricargan y imataj noganchipis rurashwan chayno ricamänanchipaj.

JEHOVAMAN YÄRACUSHUN ALI RICAMÄNANCHIPAJ

4. ¿Imano runataj cashganchita Pablo nergan?

⁴ Romacho caycaj cristianucunata Pablo nergan lapanchi juchasapa cashganchita (Rom. 3:23). Chaura juchasapa captinchega, ¿imanotaj ali nawilanwan Dios ricaycalämanchi? Chaypita maslata tantianapaj apóstol Pabluga Abrahanpita parlargan.

5. ¿Imanirtaj Jehovaga alita ruraj runatano Abrahanta ricargan? (Romanos 4:2-4).

⁵ Canáan marcacho tiyaycaptinmi Jehová Abrahanta alita ruraj runatano ricargan. ¿Imanirtaj chayno ricargan? Chayga manami carganchu Moisés chasquishgan Leycunata cäsucushganpitachu (Rom. 4:13). Israelitacunaga chay Leycunata chasquirgan Abrahán cawashganpita 400 watacuna pasariptinraj. Chaura Abrahán Diosman yäracur cäsucushganpita Jehovapa ricaynincho alita ruraj runa cargan (leiriy Romanos 4:2-4).

6. ¿Imanirtaj pipis juchasapa captinpis Jehovaga alita ruraj runatano rican?

⁶ Nircur Pabluga shumaj tantiachicurgan pipis Diosman ‘yärakushqanpitami’ Jehovapa ricaynincho alita ruraj runa cashganta (Rom. 4:5). Jina parlarganpis imano David cushicushganta yäracushgalanpita Jehová runacunata ali ricashganta y manami imatapis rurashganpitachu, cayno nergan: “Kushishqami kawan Tayta Dios perdonashqan runa. Paypa jutsankunataqa Tayta Dios manami yarparannatsu. Kushishqami kawan jutsaynaqtana Tayta Dios rikashqan runa” (Rom. 4:6-8; Sal. 32:1, 2). Chaura pipis Diosman yäracur juchancunapita arrepenticuptin, Jehovaga alita ruraj runatanona rican y pantashgantaga yarparannachu.

7. ¿Imanirtaj unay sirvejnincunata alita ruraj runatano Jehová ricargan?

⁷ Abrahán, David y waquincunapis Diospa ricaynincho alita ruraj runacuna captinpis, paycunaga jinala juchasapa capäcurgan. Chayno captinpis ali yäracoj runacuna cashganraycur, Jehovaga alita ruraj runacunatano ricargan (Efes. 2:12). Chaymi Romano cristianucunata Pablo cartacushgancho nergan Jehovapa amigun canapäga payman yäracunanchiraj. Noganchipis chayta ruraptinchega Jehová ali ricamäshun, Abrahanta y Davidta ricashganno.

DIOSMAN YÄRACUSHGANCHEGA RURAYNINCHICUNACHORAJ RICACÄMUNMAN

8, 9. ¿Imatataj waquin ali tucoj religiosucuna nipäcurgan Pablo y Santiago nishganpita?

⁸ Achca watacunapa waquin ali tucoj religiosucunaga nipäcurgan señor Jesucristulaman yäracur salvaciunta tarinapaj. Gampis wiyashcanquichi waquincuna cayno nishganta, “Jesusta chasquicuy salvo canayquipaj” nir. Paycunaga Romanos 4:6 textuta cuentaman churan chayno ninanpaj, chaycho Pablo nergan yäracushgalanchipita Tayta Diosninchi runacunata ali ricashganta, manami imatapis rurashganpitachu. Y waquincunana nipäcun, salvacunanchipäga iglesiacunamanraj aywashwan y ali ruraycunataraj rurashwan. Chaypäga Santiago 2:24 textuman yarpapäcun, chaycho nin: “Manami yärakushqalantsipitatsu Tayta Dios salvamantsi, sinöqa payman yärakur alita rurashqantsipitami”.

⁹ Waquin Bibliapita musyajcunaga nipäcun Pabluga yäracuylapita parlaycashganta y Santiaguna ali ruraycunalapita. Juc estudioso runapis nergan: “Santiaguga manami tantiarganchu imanir Pablo nishganta pipis yäracushgalanpita salvaciunta tarinanpaj”. Pero Pabluwan Santiaguga Jehovapa espiritunwanmi Bibliata guelgargan (2 Tim. 3:16). Chauraga, ¿imataj jucnin jucnin tantiachicuyta munaycargan? Canan chaycunapita yachacushun.

10. ¿Ima ruraycunapitataj Pablo parlaycargan? (Romanos 3:21, 28; dibujucunatapis ricay).

¹⁰ Romanos 3 y 4 capitulucunacho ali ruraycunapita Pablo parlarga, israelitacuna chasquishgan Ley ima nishganpita parlaycargan (leiriy Romanos 3:21, 28). Waquin judío caj cristianucunapäga sasami cargan tantiarcunanpaj unay chasquishgan Leycuna manana vigente cashganta, y chaycho mandashgancuna manana cäsucunanpaj. Chaymi, Pabluga Abrahanpita parlarmi nergan salvaciunta tarinapäga canga Diosman yäracushganchipitami y manami unay Ley nishganta cäsucushganchipitachu. ¿Imataj caypita yachacunchi? Noganchitapis Jehová ali nawilanwan ricamänanchipäga payman y Jesusmanpis yäracunanchi.

11. ¿Ima ali ruraycunapitataj Santiago parlaycargan?

¹¹ Santiago 2 caj capitulucho ali ruraycunapita parlaptin, manami parlaycanchu unay Ley mandashganta ruranapaj Pablo parlashganpita. Santiaguga parlaycan canan wichan Diosta sirvishganchicho imacunata rurashganchipita. Chayta rurashganchichomi claro ricacämun Jehovaman lapan shongunchiwan yäracushganchita o manapis. Mä ishcaylata ricärishun.

12. ¿Ima nirgantaj Santiago Diosman yäracushganchipita y rurayninchicunapitapis? (Dibujucunatapis ricay).

¹² Santiaguga nergan lapan cristianucuna pï maytapis igual ricänapaj. Chauraga, pipis rico cajta respetar ali ricaptin y wacchacunata manacajman churaptenga, Diosman yäracushganga yangalapämi caycan (Sant. 2:1-5, 9). Nircurpis nergan pipis yäracoj masinta ropaynajta o micanaycajta ricaycar mana yanapaptenga, “Diosmanmi yärakuykä” nirpis ruraynincunacho mana ricacämuptin, “¿imapaqtaq yärakushqantsipis välin?”. Chaymi Santiago nergan: “Runa mayintsita mana yanapaptintsiqa Tayta Diosman yärakushqantsipis manakaqlapaq kaykan” (Sant. 2:14-17).

13. ¿Pipitataj Santiago parlargan Diosman yäracur alicunata rurashganta? (Santiago 2:25, 26).

¹³ Santiaguga parlamunmi Rahab jutiyoj warmi Diosman yäracur imata rurashganpita (leiriy Santiago 2:25, 26). Chay warmiga Jehová pï cashganta mayargan y israelitacunata yanapaycashgantapis musyargan (Jos. 2:9-11). Chaymi Jehovaman yäracur ishcay espía israelitacunata wasincho pacaycurgan mana wanuchinanpaj. Chayta rurashganraycurmi juchasapa captinpis y mana israelita warmi captinpis, Jehovaga Abrahantano ali ricargan. Rahab rurashganpita yachacunchi Diosman yäracushganchega rurayninchicunachomi ricacämunman.

14. ¿Imatataj Pabluwan Santiaguga tantiachicurgan?

¹⁴ Yarparcushun caycama Pablo y Santiago imacunata tantiachicushganta. Pablo unay judío caj cristianucunata nergan salvaciunta tarinapäga manami cangachu unay Ley mandashgancunata cäsucushganchipitachu. Santiaguna cristianucunata nergan Diosman yäracushganchega rurayninchicunachomi ricacämunman.

15. ¿Imacunata rurartaj Diosman yäracushganchi ricächicunchi? (Fotucunatapis ricay).

¹⁵ Jehovaga manami mañamanchichu Abrahanno wasinchita y marcanchitapis jaguirinapaj ali nawilanwan ricamänanchipaj. Sinoga imayca ruraycuna caycan Diosman yäracushganchita ricächicunapaj. Payga cushicunmi chaylaraj reuniuncunaman aywajcunata ali chasquiptinchi, nacaycaj hermanucunata yanaparcuptinchi o imalatapis ruraptinchi familianchicunata yanaparcunapaj (Rom. 15:7; 1 Tim. 5:4, 8; 1 Juan 3:18). Jina Diosman yäracushganchega ricacämun runacunatapis cushi cushila yachachicuptinchi (1 Tim. 4:16). Musyanchimi Jehovapa aunicuynincuna rasunpa cumplicunanpaj y pay rurashgancuna imaypis ali cashganta. Chaura Diosman yäracushganchi rurayninchicunacho ricacämuptenga, paypa ricaynincho alita ruraj runa cashun y amigunmanpis ticrashun.

IMA SHUYARASHGANCHEGA YÄRACUYNINCHITA SINCHIYÄCHIN

16. Abrahán ima shuyarashganga, ¿imanotaj yäracuyninta sinchiyächirgan?

¹⁶ ¿Ima mastataj yachacunchi Romanos 4 caj capitulupita? Abrahanno noganchipis seguro caycashwan ima shuyarashganchi cajcunata rasunpa chasquinapaj. Jehová cayta Abrahanta aunirgan: “Qam kaynikipami kay patsacho lapan casta runakunapis bendicionnïta chaskipäkunqa”. ¡Abrahanpäga chayga cushicuypächi cargan! (Gén. 12:3; 15:5; 17:4; Rom. 4:17). Pero Abrahán 100 watayojna y Sarapis 90 watayojna caycar wamran manaraj yuriptin, paycunaga yarpachacurganchi Jehová aunishganta manana cumplinanpaj. Chayno captinpis “promitishqanta Tayta Dios imanöpa cumplinanpaq kashqanta mana tantiyarpis Abrahamqa criyirqanmi” (Rom. 4:18, 19). Y tiempuwanga Abrahán ima shuyarashgan cumplicurgan, wamran Isaac yurirgan (Rom. 4:20-22).

17. ¿Imanirtaj seguro caycanchi Jehová alita ruraj runatano ricamänanchipaj y amigunmanpis ticranapaj?

¹⁷ Noganchipis munanchi Jehová alita ruraj runatano ricamänanchipaj y amiguncunapis canapaj. Chaymi, Abrahanpita parlarmi Pabluga nergan: “Abraham yäracushanpita Tayta Dios alli ricashanta rimar manami payllapächu rimaycan. Noganchïpäpis rimaycanmi. Noganchïtapis allimi ricamäshun taytanchi Jesucristuta cawarachimoj Tayta Diosman yäracushaga” (Rom. 4:23, 24, TDI). Chaypäga Abrahanno Diosman yäracushganchi rurayninchicunacho ricacämunman y shuyarashwan aunishgantapis cumplinanpaj. Gatejnin caj yachacuycho ricärishun Romanos 5 caj capitulucho imata shuyarashganchicunapita Pablo parlashganta.