2 CAJ YACHACHICUY
19 CAJ CANCIÓN Jesús cenashganta yarpänanchipaj
Alistacuycäshunna Conmemoración junajpaj
“Qamkuna rayku wanushqäta yarpapäkunki” (LUC. 22:19).
¿IMATAJ YACHACUSHUN?
Canan ricashun imanirtaj Jesús wanushgan junajta yarpashwan, imataj cananlapita ruraycashwan chay junajpaj y imanirtaj waquincunatapis chaypaj invitashun.
1. ¿Imanirtaj Jesuspa wanuyninta cada wata mana gongaypa yarpanchi? (Lucas 22:19, 20).
JEHOVAPA testiguncunaga cada wata mana gongaypa Jesús wanushgan junajta yarpapäcun. Quiquin Jesusmi mandashga chayta ruranapaj (leiriy Lucas 22:19, 20). Chaymi cananlapita shuyaraycanchi chay junaj mayna chayamunanta. Ricärishun imanirtaj chay junajta shuyaraycanchi.
2. ¿Imacunaraycurtaj Conmemoración junaj chayamunanta munayculanchi?
2 Conmemoración junajchoga yarpachacunchi Jesús wanushgan alapa valuryoj cashganta, y chaypita imano agradecicunapäpis (2 Cor. 5:14, 15). Jina hermanunchicunawanpis shuntacanchi shacyächinacunapaj (Rom. 1:12). Cada wata achca gasacashga hermanucunapis Conmemoraciunman shapäcamun, y chay junajcho cuyacuywan chasquishganchiraycur waquincunaga congregaciunmanpis cutimunanpaj calpachacärin. Achcajmi chay reuniunman shamojcuna chaycho ricashganpita y wiyashganpita Bibliapitapis yachacur galaycärin. Caycunaraycurmi Jesús wanushgan junajga mana gongaypaj caycan.
3. ¿Imano caycashganchitataj Conmemoración junajcho ricacan? (Fotutapis ricay).
3 Jina chay junajcho ricacan Jehovapa sirvejnincuna may chaychopis juc shongunola caycashganchita, chaymi munayculanchi mayna chay junaj chayamunanta. Jehovapa testiguncunaga may chaychopis shuntacan Inti jegarcuycaptin. Chay reuniunchoga Jesús wanushganpita juc shumaj discursuta wiyanchi, ishcay cantacunatapis cantanchi, tantawan vinutapis pasachin y chuscu cuticho “amén” ninchi oraciuncunata rurashganpita, chayga ninan chayno cachun. Chay chacaylacho entero munducho caycaj congregaciuncuna chayta ruran. Jehovawan Jesusga alapachi cushicärin sirvejnincuna may chaycho chay lapanta ruraycashganta ricar.
Conmemoración junajcho ricacämun Jehovapa sirvejnincuna juc shongunola cashganchita. (3 caj parrafuta ricay).f
4. ¿Imataj canan yachacushun?
4 Canan yachacunapaj cajchoga cay tapucuycunata contestashun: ¿Imatataj cananlapita ruraycashwan Conmemoraciunta masraj valuranapaj?, ¿imanotaj waquincunata yanapashwan chay reuniunman shamunanpaj? y ¿imanotaj yanapashwan gasacashga hermanucunata? Caycunata musyarga yanapämäshun chay junajpaj camaricushgala caycänapaj.
¿IMATATAJ CANANLAPITA RURAYCASHWAN CONMEMORACIUNTA MASRAJ VALURANAPAJ?
5. 1) ¿Imanirtaj Jesús wanushganman yarpachacushun? (Salmo 49:7, 8). 2) Wilacamuy imataj yachacushcanqui ¿Imanirtaj Jesús wanurgan? nej videupita.
5 Conmemoración manaraj chayamuptin Jesús noganchiraycur wanushganman yarpachacuptinchega, yanapämäshun shongupita masraj valuranapaj pay rurashganpita. Quiquilanchega juchapita y wanuypitapis manami imaypis libracushwanchu cargan (leiriy Salmo 49:7, 8; jina ricay ¿Imanirtaj Jesús wanurgan? nej videuta).a Chaymi Jehovaga cuyashga Wamranta cachamurgan chaycunapita libramänanchipaj (Rom. 6:23). Jehovawan Jesús amatar cuyamashganchita cada cadala yarpachacurga, shongupitami alapa agradecido caycashwan. Gatejnin parrafucunacho ricashun imataj noganchicunaraycur Jehovawan Jesús rurargan. Pero puntataga parlarcushun imanirtaj Jesús wanunan cargan.
6. ¿Imataj Jehová rurargan juchanchicunapita libramänanchipaj?
6 Jesús wanushganga juc pago japuy cargan wanuypita y juchapita libramänanchipaj. Jehovaga Adanta juchaynajta camargan wamrancunawan imaycamapis o imayyajpis cawacunanpaj. Pero juchalicuptin Adanga chay lapanta ogrargan y miraynincunapis juchasapana yurirgan. Chaymi Adán rurashganpita libramänanchipaj Jesús juchaynaj cawayninta noganchiraycur gorgan. Payga Pachacho caycar “manami ima jutsatapis rurarqantsu ni pitapis lulaparqantsu” (1 Ped. 2:22). Adán ograshganga alapa valuryoj cargan, chaymi Jesuspa wanuyninraj chaywan tincurgan (1 Cor. 15:45; 1 Tim. 2:6).
7. Wilacamuy ima sasacunapataj Jesús pasargan.
7 Jesús cay Pachacho caycar imayca pruebacunapa pasarpis Taytan Jehovata imaypis cäsucurgan. Wamrala caycar Pachacho caycaj juchasapa taytan y mamantapis cäsucurgan (Luc. 2:51). Mozuyarcuycaptinna waquincuna imaycatapis rurarganchi taytan Joseta y mamantapis mana cäsucunanpaj y Jehovapitapis raquicäcunanpaj. Mayorna o rucuna caycaptin Satanaspis quimsa cuticho tentargan Jehovata jaguinanpaj (Mat. 4:1-11). Satanasga imaycanopapis munargan Jesús juchalicunanpaj, noganchiraycur mana wanunanpaj.
8. ¿Ima nacaycunatataj aguantargan Jesús?
8 Runacunata yachachishganchopis tucuy pruebacunapa pasargan. Fiyu runacunaga pasaypa chiquirgan y wanuchiytapis munargan (Luc. 4:28, 29; 13:31). Discipuluncuna cutin cutin pantarcuptinpis, paycunawan pacienciacoj cargan (Mar. 9:33, 34). Wanunanpaj sentenciashgana caycaptin, pasaypa magapäcurgan, ashlipargan y burlacärerganpis. Nircur juc suwacoj runatano guerucho clavaycurgan, chayga alapa laquicuypächi cargan (Heb. 12:1-3). Y wanunanpäna caycaptin Jehová cachaycurgan quiquilan ushananyaj aguantananpaj (Mat. 27:46).b
9. ¿Jesús noganchiraycur wanushganman yarpachacurga imanotaj sienticunchi? (1 Pedro 1:8).
9 Jesús noganchiraycur wanushganga alapa valuryojmi caycan, payga imayca sasacunapa pasargan. Chaymi noganchiraycur lapan rurashgancunaman yarpachacurga shongupita payta masraj cuyayculanchi (leiriy 1 Pedro 1:8).
10. ¿Imanotaj Jehová sienticurgan Wamran pasaypa nacashganta ricar?
10 ¿Imatataj Jehová rurargan juchapita y wanuypita libramänanchipaj? Cielucho Jesuswan achca watacunapa caycar alapa cuyanacurpis, Jehovaga Wamranta cachamurgan noganchiraycur wanunanpaj (Prov. 8:30). ¿Imanotaj Jehová sienticurgan Wamran Pachacho caycar pasaypa nacashganta ricar? Shongunpis alapachi nanargan Wamranta runacuna magapäcushganta, burlapäcushganta y ashlipäcushganta ricar.
11. ¿Imanotaj musyanchi Jehová pasaypa laquicushganta Wamran wanuptin?
11 Tayta mamacuna musyapäcunmi wamran wanucuptin pasaypa laquicuypaj cashganta. Wanojcuna cawarimunanpaj cajman yäracurpis, jinalami laquicunchi cuyashga aylunchi wanushganpita. Chaywanga cuentata gocunchi Jehová pasaypa laquicushganta, 33 watacho Wamran pasaypa nacashganta y wanushganta ricar (Mat. 3:17).c
12. ¿Imacunata rurartaj listo caycäshun Conmemoración junaj chayamunancama?
12 ¿Imatataj ruraycashwan Jesús wanushgan junajta yarpänapaj chayamunancama? Familianchiwan o japalanchi Bibliapita yachacunapaj hora, alichi canman Guía de estudio para los testigos de Jehová nishgan folleto o waquin publicaciuncunapis chay temapita maslata yachacunapaj.d Jinamanpis Imano yachacunapaj: Ali Cawanapaj y Yachachicunapaj reuniunninchipaj nej publicaciuncho yargamoj textucunatapis leiriy. Y chay junajpaj videutapis ama gongaychu ricayta. Chay lapancunata rurarga listumi caycäshun waquincunatapis yanapänapaj chay junaj reuniuncho caycänanpaj (Esd. 7:10).
¿IMANOTAJ WAQUINCUNATA YANAPASHWAN CONMEMORACIUNMAN SHAMUNANPAJ?
13. ¿Imatataj rurashwan waquincunapis Conmemoraciunman shamunanpaj?
13 ¿Imatataj rurashwan waquincunapis Conmemoraciunman shapäcamunanpaj? Predicaciuncho runacunata invitaciuncunata aypushun, jinamanpis reguishganchicunapa jutincunata invitaciuncho guelgashwan, paycunaga caycanman familianchicuna, aroj masinchicuna, estudiaj masinchicuna y waquincunapis. Invitaciunninchicuna ushacaptenga, jw.org paginanchicho yargamoj invitaciunta ricananpaj nishwan. Capazchi waquin runacuna shapäcamunmanpis (Ecl. 11:6).
14. ¿Imaraj canman öraga pilatapis quiquinchi invitaciunta goycuptinchi?
14 Ricärishun imaraj canman quiquinchiraj reguishganchi cajcunata invitaciunta aypuptinchi. Juc cristiana mana Testigo caj runanta cada wata Conmemoraciunman aywananpaj invitargan, pay ichanga manash munarganchu. Pero juc cuticho cay cristiana almiracurgan runan ‘Conmemoraciunman aywashun’ niptin. ¿Imanirtaj canan ichanga aywayta munargan? Juc reguishga ancianushi wasinman aywaycur invitaciunta goycurgan. Chaypita pacha cada watashi runanga Conmemoraciunman aywashga.
15. Pilapis Conmemoraciunman aywayta munarga, ¿ima tapucuynincunataj canman?
15 Pilapis puntata Conmemoraciunman shamuptenga imayca tapucuynincunalapis caycangachi. Chaymi ali canman yarpachacunapaj imano contestanapaj (Col. 4:6). Öraga caycunata tapucunman: “¿Imataj chaycho ruran? ¿Ayca horataj canga? ¿Imanotaj visticöman? ¿Paganchirächu yaycunapaj? ¿Guellaytapis mañacunchuraj?”. Capazchi tapupashwan ima tapucuynilanpis canman, y chayno captenga shumaj tantiarcachishun ima musyayta munashganta. Nircur Jesuspa wanuyninta yarpäshun y ¿Imanötaj congregakäyä? nej videucunatapis ricarcachishwan. Jina Cushishgala imaypis cawanapaj librupa, 28 caj yachacuycho maslata wilacun chaypita.
16. ¿Ima mastataj yachacuyta munanman Conmemoraciunman shamojcuna?
16 Conmemoraciunman shamojcunaga capaz maslata yachacuyta munanga, imanir juclayla o mana pipis tantata micunchu y vinuta upunchu. O ayca cutitaj Jesús wanushganta yarpapäcunchi. Y ‘¿cada reuniuncho chaynolachuraj rurapäcun?’ nirpis tapucunmanchi. Discursamoj hermano chaycunapita shumaj yachachimashganchita wiyarpis, capaz mastaraj yachacuyta munanman. Chaypäga jw.org paginanchicho “¿Por qué los testigos de Jehová celebran la Cena del Señor de forma diferente a otras religiones?” nej yachacuywan tapucuynincunata contestashwan. Chauraga imaycanopapis calpachacushun Conmemoración junaj manaraj chayamuptin, chay junajcho y pasashgana captinpis ali shongu runacunata yanapänapaj (Hech. 13:48).
GASACASHGA HERMANUCUNATAPIS YANAPÄSHUN
17. ¿Imanotaj ancianucunaga gasacashga hermanucunata yanapacunman? (Ezequiel 34:12, 16).
17 Conmemoración wichancho ancianucunaga altanto caycanman gasacashga hermanucunapita, y paycunawan cuyacoj capäcunman (leiriy Ezequiel 34:12, 16). Chaymi Conmemoraciunpaj pishiycaptin paycunata watucunquiman o telefunulapapis gayacunquiman. Paycunaman yarpachacushgayquita y imanopapis yanapacuyta munashgayquita niriy. Ama gongaychu Conmemoraciunman invitanayquipaj y shamuptenga cuyacuywan chasquicuy. Conmemoración pasashgana captinpis paycunawan cada cadala parlapacäriy, y imanolapapis yanaparcuy Jehovapa amigun cananpaj y congregaciunman cutinanpaj (1 Ped. 2:25).
18. ¿Imanotaj lapanchi gasacashga hermanunchicunata yanaparcushwan? (Romanos 12:10).
18 Lapanchimi gasacashga hermanucunata yanaparcushwan Conmemoraciunman shacäramunanpaj. Chaypäga paycunawan cuyacoj cashun, respetuwan tratashwan y necesitashgancho yanaparcushwan (leiriy Romanos 12:10). Paycunapäga alapa sasachi caycan reuniunman yapay shamunanpaj. Capazchi yarpachacun hermanucuna imano chasquinanpaj cajman.e Chaymi shumaj yarpachacushwan imata ninapaj mana pengachinanchipaj y mana laquichinapäpis (1 Tes. 5:11). Paycunaga cuyashga hermanunchicunami caycan, y alapami cushicunchi paycunawan Jehovata yapay juntula aduraptinchi (Sal. 119:176; Hech. 20:35).
19. ¿Imanotaj yanapämanchi Jesús wanushganta yarpaptinchi?
19 Alapami cushicunchi Jesús mandamashganchipita cada wata wanushganta yarpänapaj. Chay junajta yarparga noganchita y waquincunatapis yanapämanchi (Is. 48:17, 18). ¿Imano? Jehovata y Jesustapis masraj cuyanchi. Alapa agradecicunchi noganchiraycur lapan rurashganpita. Hermanunchicunawan juntula caycanchi, y waquin runacunatapis yanaparcunchi imata rurananpaj Jesús wanushganraycur bendiciuncunata tarinanpaj. Chaymi camaricushgala shuyaraycäshun Conmemoración junajta, chayga mana gonganapaj junajmi caycan.
¿IMA NINQUITAJ?
¿Imatataj rurashwan Conmemoraciunta masraj valuranapaj?
¿Imanopataj waquincunatapis yanapashwan Conmemoraciunman shacäramunanpaj?
¿Imanotaj yanapacushwan gasacashga hermanunchicunata?
18 CAJ CANCIÓN ¡Salvaycalämashcanqui!
a Cay yachacuycho caycaj videucunata y yachachicuycunatapis tarinayquipaj, jw.org paginaman yaycurir ashishgayqui cajcho ashiy.
b Ricay “Liejcuna tapucärishgan” Wilacamoj revista, abril 2021 watapita.
d “Imacunapita yachacunapaj” nej recuadruta ricay.
e Ricay fotucunata y “¿Imatataj rurargan hermanucuna?” nej recuadrutapis. Gasacashga hermano pengacurpis valurcharcur Salunman yaycun. Hermanucuna cuyacuywan chasquiptin payga alapa cushicun.
f FOTUCUNAPITA WILACUYCUNA: Japón naciuncho Jehovapa testiguncuna Conmemoraciunta rurarcaycan, waquin marcacunacho y naciuncunachopis hermanunchicuna alistacurcaycan Conmemoraciunta rurapäcunanpaj.