Sadocno valiente cashun

1, 2. ¿Pitaj cargan Sadoc? (1 Crónicas 12:22, 26-28).

CAYMAN yarpay, 340.000 runacunanoshi juntacärergan Davidga Israel marcacho rey cananpaj. Hebrón marcapa cuchuncunacho quimsa junajcunana wiyacaycargan runacuna cushishgala Jehovata alabar aywaycajta (1 Crón. 12:39). Chaychopis Sadoc jutiyoj juc mozu caycargan, ichanga alapa reguishga carganchu. Chayno captinpis Jehovami munargan payta reguinapaj (leiriy 1 Crónicas 12:22, 26-28). ¿Pitaj cargan Sadoc?

² Sadocga juc sacerdotimi cargan, paymi Abiatar mandaj sacerdotiwan aroj. Jina Jehovapa voluntäninta shumaj tantiaj y alapa yachaj runami cargan (2 Sam. 15:27). Chaymi runacunaga payman aywaj consejucunata ashir. Jinapis, valiente runami cargan. Cay yachachicuychoga valiente cashganpitami yachacushun.

3. 1) ¿Imanirtaj valiente cananchi? 2) ¿Imataj canan yachacushun?

³ Cay ushanan wichan, Satanasga imaycanopapis Jehovaman yäracushganchita ushacächiyta munan (1 Ped. 5:8). Chaymi valientimi cananchi Jehovaga Satanasta y payno mana cäsucojcunatapis ushacächishgancama (Sal. 31:24). Quimsami caycan Sadoc valiente cashganpita yachacunanchipaj.

DIOSPA GOBIERNUNTA YANAPASHUN

4. ¿Imanirtaj valiente cananchi Diospa Gobiernunta yanapacunapaj? (Fotutapis ricay).

⁴ Jehovapa sirvejnincunaga valiente canman, lapan shongunwan Paypa Gobiernunta yanapacunanpaj (Mat. 6:33). Cay caway vidacho valiente cananchi Jehovata cäsucunapaj y ali wilacuynincunata yachachicunapaj (1 Tes. 2:2). Cay munducho politicaraycu runacunaga pasaypa raquicashga cawapäcun, y paycunawan mana talucänapaj valiente cananchi (Juan 18:36). Chaymi achca Jehovapa testiguncuna guellayraycu nacapäcun, magashga capäcun y carcelchopis wichgashga capäcun politicacunata y guerracunachopis mana yanapacushganpita.

5. Davidta yanapänanpaj, ¿imanirtaj Sadoc valiente canman cargan?

⁵ David mushoj rey cashganta celebrananpaj Sadoc Hebrón marcaman aywargan. Paymi Davidta defendinanpaj listo caycargan (1 Crón. 12:38). Payga Davidta y israelitacunata defendinanpaj y chiquicojnincunawanpis peliananpaj manami manchacurganchu. Ichanga sacerdote cashganraycu capazchi ali peliaj soldado carganchu, chaymi valientirämi canman cargan.

6. ¿Imatataj Sadoc Davidpita yachacurgan? (Salmo 138:3).

⁶ Sadocga valiente runa cananpaj yachacurganmi ali amigucunapita. David amigunpis chaynomi cargan. Payga mana manchacur “Israel soldädukunata guërracho [...] pelyapäkunanpaq” pushargan, chaymi lapan israelitacuna rey cananpaj churargan (1 Crón. 11:1, 2). Davidga Jehovalaman yäracur, paytaga imaypis mañacurgan enemiguncunapita defendinanpaj (Sal. 28:7; leiriy Salmo 138:3). Jina Sadoc valiente cayta yachacurganmi Jehoiadapita, peliayta yachaj Benaya wamranpita, y 22 ayluncunapa mandajnin runacunapita (1 Crón. 11:22-25; 12:26-28). Chay lapan runacuna decidido caycargan rey Davidta yanapänanpaj.

7. 1) Canan wichan, ¿pïcuna valiente cashganpita yachacushwan? 2) ¿Imata yachacunqui Nsilu hermano videupita?

⁷ Valiente canapaj alimi canman waquincuna Jehovapa Gobiernunta defendinanpaj valurwan ima rurashgancunaman yarpachacur. Reyninchi Jesucristuga cay mundo politicacunaman manami jaticäcurganchu. Payga ali cajcunata rurananpaj imaypis Jehovaman yäracurgan (Mat. 4:8-11; Juan 6:14, 15). Canan wichanpis achca valiente mozo hermanunchicuna ni politicamanpis yaycunchu. Paycuna ima pasashgancunapita musyanayquipaj jw.orga nishgan paginacho tarinquiman.

HERMANUNCHICUNATA YANAPAY

8. ¿Imacunachotaj ancianucunaga valiente capäcunman?

⁸ Jehovapa sirvejnincuna jucninchi jucninchi yanapanacärinchi. Öraga ichanga chayta ruranapaj valiente cananchi (2 Cor. 8:4). Chayno canman guerracuna pasaptin; ancianucunaga calpachacun hermanucunata shacyächinanpaj, yanapänanpaj y publicaciuncunata, Bibliata, ropata y micuytapis hermanucunata mana pishinanpaj. Quiquincunapa vidan peligrucho caycaptinpis, ancianucunaga chaycunata rurapäcun Diospa uyshancunata alapa cuyashpanmi (Juan 15:12, 13). Chaymi nishwan paycunaga Sadocno valiente capäcushganta.

9. 2 Samuel 15:27-29 wilacushganno, ¿imataj David nergan Sadoc rurananpaj? (Dibujutapis ricay).

⁹ Absalón rey cananta munar taytan Davidta wanuchiyta munaycargan (2 Sam. 15:12, 13). Chaymi David jucla Jerusalenpita gueshpicunman cargan y yanapajnincunata nergan: “¡Jerusalénpita jukla aywakushun! […] Absalón chayamuptinqa manami mayqantsipis qeshpiyta kamäpakushunpaqtsu” (2 Sam. 15:14). Jerusalenpita aywashgancho, David yarpargan pilapis Jerusalencho caycanman cargan, chayno Absalón rurashganpita payta wilapänanpaj. Chaymi Sadocta y waquin sacerdoticunatapis Jerusalenman cutinanpaj nergan (leiriy 2 Samuel 15:27-29). David nishganta rurananpaj peligroso captin, paycunaga tantiacoj runacunami canman cargan. Absalón quiquilanman yarpaj pasaypa fiyu runami cargan. Chaychi David yanapashganta tariptin wanuchinman cargan.

10. ¿Imatataj rurargan Sadoc waquincunawan Davidpa vidanta chapänanpaj?

¹⁰ David amigun Sadocta y Husaita nergan “palaciucho Absalón yanapaqninkunawan imata wilanakushqantapis” wilananpaj (2 Sam. 15:32-37). Paycunami David nishganno rurargan, Husaiga Absalonpa amigun tucurgan y imano Davidta atacananpaj nergan. Nircur Husaiga Sadocta y Abiatarta wilapargan imacuna Absalón rurashganpita (2 Sam. 17:8-16). Paycunaga Davidta wilapargan enemiguncuna atacashgan horacho listo caycänanpaj (2 Sam. 17:17). Chaymi Jehovapa yanapacuyninwan, Sadoc waquin sacerdoticunawanpis Davidpa vidanta chapargan (2 Sam. 17:21, 22).

11. ¿Imanopataj Sadocno valiente cananchi hermanunchicunata yanapänapaj?

¹¹ Chiquimajninchicuna atacamaptinchi y guerracunapa o jatun desgraciacunapa hermanunchicuna pasaptin, Sadocno valiente cashwan paycunata yanapänapaj. Chaypäga: 1) Cäsucoj cananchi. Chayno captinchi hermanunchicunawan juc shongunola cashun. Chaymi sucursalcho dirigej hermanucuna nishganta cäsucunanchi (Heb. 13:17). Paycuna ima nishganta ruranapaj ancianucunapis alcäbula caycanman ima desgracia pasaptinpis (1 Cor. 14:33, 40). 2) Valiente captinchipis, ali tantiacoj cananchi (Prov. 22:3). Manaraj imatapis rurar shumaj tantiarcushun. Cawayninchita peligruman churashwanchu. 3) Jehovalaman yäracunanchi. Jehovaga cuyamashpanchimi ali caycänanchita munan. Chaymi yanapämäshun noganchipis waquincunata yanapänanchipaj.

12, 13. ¿Imataj yachacunchi Víktor y Vitali pasashganpita? (Fotutapis ricay).

¹² Víktor y Vitali ishcay ancianucunapita parlarcushun, paycunaga Ucrania naciuncho hermanunchicunata micuyta y yacutapis aypupäcurgan. Víktor nin: “May chaychopis hermanucunapaj micuyta ashej cä, chayta ruraycaptë cada cadala balacerata wiyaj cä. Juc cutichomi waquin junajcunapaj hermanucuna necesitashganta charananpaj, juc waugui paycunapaj micuyta gorgan. Carrunchiman micuyta winaycaptinchi, cercalacho 20 metroscunano bomba tunishganta ricashgä, manchacuypämi cashga. Chaypita goyayta Jehovata ruwacurgä valurta gomänanpaj hermanucunata yanapänapaj”.

¹³ Vitali cayno nin: “Valurtarämi jorgunä cargan, viajipa aywanäpaj 12 horascunano cashga, caminupa aywaycur cada cadalami Jehovata mañacoj cä”. Payga valiente carpis ali tantiacoj cargan. Caytapis wilacun: “Valiente canäpäga Jehovatarämi yachayninta mañacoj cä shumaj tantiarcur ali decidinäpaj. Chaymi maypa aywanäpaj autoridäcuna nipäcamaptin paycunata cäsucurgä. Yäracuynëpis más gaga japuyno cashga wauguinchicuna imano juntula aruycashganta ricar. Paycunaga maypa aywanäpaj alchapäcurgan y hermanucunapaj micuytapis shuntapäcurgan, jina Viktorta y nogatapis micuyta y maycho tiyanäpäpis gopäcamargan”.

JEHOVAPITA IMAYPIS RAQUICÄCUYCHU

14. Pï amigunchi o familianchi Jehovapita raquicäcuptin, ¿imanotaj sienticunchi?

¹⁴ Pï amigunchi o familianchi Jehovapita raquicäcuptin, pasaypa laquicuypämi caycan (Sal. 78:40; Prov. 24:10). Y paycunata amatar cuyaptiquega nanayga alapachi canga, ¿au? Chaycunapa pasaptiquega Sadoc pasashganman yarpar valurta goshunquimi.

15. ¿Imanirtaj Sadoc calpachacunman cargan Jehovapita mana raquicänanpaj? (1 Reyes 1:5-8).

¹⁵ Sadoc Jehovata cuyashganraycu unay amigun Abiatar Davidpita raquicäcuptinpis, payga manami chayta rurarganchu. Chayga pasargan David auquinna cashgan wichan. Davidpa wamran Adonías rey cayta munar taytanta wanuchiyta munargan, ichanga Jehovaga Salomonta acrarganna rey cananpaj (1 Crón. 22:9, 10). Sadoc Jehovata cäsucurgan, ichanga Abiatarga Adoniasta yanapargan (leiriy 1 Reyes 1:5-8). Chayta rurarga, Abiatar Davidta Jehovatapis traiciunaycargan. Sadocga alapa laquishga ricacurganchi, ¿au? Abiatarwan 40 wata maspis sacerdotino arupäcurgan (2 Sam. 8:17). Paycunaga junto “Tayta Diospa babulninta” cuidapäcurgan (2 Sam. 15:29). Davidga reyno yanapacurgan y juntula Jehovata sirvipäcurgan (2 Sam. 19:11-14).

16. ¿Pïcunapitataj Sadoc yachacurgan valiente cananpaj?

¹⁶ Abiatar Jehovata y Davidta traiciunaptinpis, Sadocga manami chaytaga rurarganchu, chaymi Davidga payman yäracurgan. Adonías traicionananta musyarga, rey David ashergan Sadocta Natanta y Benayata yanapananpaj churin Salomón rey cananpaj (1 Rey. 1:32-34). Sadocga yachacurganchi Natanpita y waquin Jehovapa sirvejnincuna imano valiente cashganpita (1 Rey. 1:38, 39). Salomón rey captinmi “Abiatarpa trukan [sacerdote] kananpaq Sadocta churarqan” (1 Rey. 2:35).

17. Pï cuyashgayquipis Jehovapita raquicäcuptin, ¿imata rurartaj Sadocno canquiman?

¹⁷ ¿Imata rurartaj Sadocno canquiman? Pï cuyashgayquipis Jehovapita raquicäcuptin gamga imaypis Jehovapita raquicäcuychu (Jos. 24:15). Chaypäga Jehová valurta y calpata goshunquipaj. Paytami mañacuy y hermanucunawan juntula capäcuy. Jehovaga rurashgayquita manami imaypis gongangachu, payga bendicishunquimi (2 Sam. 22:26).

18. ¿Imataj yachacunqui Marco y Sidse pasashganpita?

¹⁸ Marco y warmin Sidse ima pasashganta ricärishun. Ishcay jipash wamrancunashi mayorna caycaptin Jehovapita raquicäcurgan. Marco wilacun: “Wamrayquicuna yurishgan junajpita, paycunata alapa cuyanqui. Y chayno cuyashgayquipita ima mana alicunapitapis chapayta munanqui. Ichanga Jehovapita witicuptin shonguyquipis pasaypa nananrämi. Chayno captinpis, Jehová imaypis jaguimashganchichu. Chaymi noga laquicuycashgä hora warmë shacyächiman, y payga laquicushgan hora noga payta shacyächë”. Sidse warminpis nin: “Jehová mana yanapämaptenga aguantämanchu cargan. Pasaypa laquish caycargä, ‘wamräcuna culpäraycu Jehovapita witicurgan’ nir yarpachacurgä. Jinan hora Jehovata wilapargä imano sienticushgäta. Ichic tiempo pasariptin juc nanawan unaypita tincurgä, macalacuycur payga nimargan: ‘Ama laquicuychu, manami culpayquiraycu wamrayquicuna Jehovapita witicushga’. Jehová yanapämaptinrämi paytaga cushi cushila jinala sirviycä”.

19. ¿Imata ruranayquipätaj decidido caycanqui?

¹⁹ Jehovaga munan sirvejnincuna Sadocno valiente canapaj (2 Tim. 1:7). Ichanga, payga munaycan mana quiquilanchiman yäracunanchipaj sinoga paylaman yäracunapaj. Chaymi, sasacunapa pasaycashgayqui hora valiente canayquipaj Jehovata mañacuy. Paymi yanapäshunqui Sadocno valiente canayquipaj (1 Ped. 5:10).