¿Imanotaj mushoj congregaciuncho yachacashwan?

Nicolas y Céline matrimoniutaga mandapäcurgan Franciapita sucursal juc congregaciunman yanapänanpaj. Paycuna wilacären imano sienticushganta: “Galananlachoga cushishgami carcaycargä, pero nircur amigöcunata wamayar laquicurna galaycärergä. Mushoj congregaciuncho manaraj ali amigucunata tarishgärächu cargan”.a ¿Imaraj yanapäshunqui mushoj congregaciuncho yachacänayquipaj? ¿Imanoraj waquincuna yanaparcushunquiman? ¿Ima bendiciuncunata chasquinquiman mushoj congregaciuncho caycar y imanotaj waquincunata shacyächinquiman?

IMATA RURANQUIMAN YACHACÄNAYQUIPAJ

1. Jehovaman yäracuy (Sal. 37:5). Japonpita Kazumi cristiana 20 watapa congregaciunnincho caycargan, pero runan juc marcamanna arunanpaj aywaptin paypis juc congregaciunmanna aywargan. ¿Imataj payga rurargan Jehovaman yäracur caycänanpaj? Cayno nin: “Jehovata shongupita mañacur wilapargä japalä sienticushgäta, manchacashga y laquishga cashgätapis. Jehovaga imaypis calpata gomargan”.

¿Imata yanapäshunqui Jehovaman más yäracunayquipaj? Imanomi juc planta ali cananpaj yacutaraj y abonotaraj winanchi, chaynolami yäracuyninchiwanpis rurashwan. Naga parlashganchi Nicolas, payga yarpachacurganshi Abrahán, Jesús y Pablo Jehovata sirvishganman y chayshi payta yanapargan Jehovaman yäracunanpaj. Gampis goyay goyay Bibliata leinayquipaj tiempuyquita jorguptiquega yanapäshunqui ima cambiucuna captinpis aguantanayquipaj, y mushoj congregaciuncho caycajcunatapis shacyächinayquipaj.

2. Ama tincuchiychu unay congregaciunniquita mushoj congregaciunniquiwan (Ecl. 7:10). Jules cristiano Estados Unidosman tiyaycaptinna, chaycho ricargan jucno costumbricuna caycashganta. Pay nin: “Lapancuna imaycacunata tapupämargan cawaynëpita”. Pero marcancho chayno mana captin pay mana ali sienticurgan y hermanucunapita witicurgan. Ichanga ichic ichiclapa hermanucunata reguirga jucnopana yarpar galaycurgan. Paymi nin: “Maypita carpis lapanchi igualmi canchi, y yarpayninchi jucno captinpis ali chasquinacushun”. Chaymi unay congregaciunninchita mushoj cajwan tincuchishwanchu. Anne-Lise jutiyoj precursora cayno nin: “Noga mushoj congregaciunman aywacuptë mushoj cosascunata yachacuytami munä”.

Ancianucunapis unay congregaciunninta manami tincuchinmanchu mushoj congregaciunninwan. Ima ruraycunapis jucno ruracaptenga manami ninanchu mana ali cashganta. Chaymi imatapis manaraj consejar shumajraj musyapäcaramunman (Ecl. 3:1, 7). Imatapis yachachiyta munarga ruraynincunawanmi yachachinman (2 Cor. 1:24).

3. Hermanucunawan shuntacay (Filip. 1:27). Juc mushoj marcacho yachacäcunayquipaj alapa sasa captinpis, alichi canman chay marca chayaycurla rasla juc congregaciunta ashinayqui, reuniunman aywanayquipaj. Hermanucuna mana ricashuptiquega, ¿imanoraj musyanga yanapäshunayquipaj? Lucinda paniga ishcay warmi wamranwan Sudáfrica naciunman aywacärergan y cayta rurashganta wilacun: “Amigöcunami consejamargan mushoj hermanucunawan reguinacunäpaj, chaymi tucuy hermanucunawan predicapäcoj cä y reuniuncunachopis comentapäcoj cä. Jina wasëtapis camaripargä predicaciunpaj reuniunta ruracänanpaj”.

Mushoj hermanucunawan predicaciuncho ocupado caycarga jucniqui jucniqui shacyächinacunqui Diospa wilacuyninta apanayquipaj. Ancianucunaga Anne-Lise panita nergan lapan hermanucunawan predicananpaj. Payga nin: “Chayta rurar hermanucunawan rasla reguinacärergä”. Jina imaypis listula caycaptiqui congregaciuncho yanapacunayquipaj pichapacuycho o imalachopis, hermanucuna ricanga paycunawan yachacashgayquitana. Cada cadala chaynola más calpachacuptiqui, paycunaga familiantanomi ricashunquipaj.

4. Ali amigucunata ashiy (2 Cor. 6:11-13). Waquincunawan amigo cayta munarga paycunapaj yarpachacuy. Chaypäga reunión manaraj galaycamuptin o usharcuptin paycunawan parlapacuy reguinacunayquipaj. Jina jutintapis umachicurcuy. Gam cuyacoj y shacya shacyala captiqui, y jutintapis yarparaptiquega paycunaga raslachi amiguyquicunaman ticranga.

Gam cashgayquino imaypis canayqui. Lucinda rurashganno ruray, payga nin: “Hermanucunata invitaj canchi wasinchiman shamunanpaj, chayta rurar cananga achcajcunawan amigo capäcö”.

‘JUCNIQUI JUCNIQUIPIS SUMAJ CHASQUINACUY’

Waquin hermanucunaga juc congregaciunman aywacuptin puntalachoga manchacunmi pitapis mana reguiptin. Chaura, ¿imanotaj yanapanquiman pipis congregaciunniquiman shacamuptin? Apóstol Pabluga nergan: “Jucniqui-jucniquipis sumaj chasquinacur jamachinacunqui Jesucristo chasquishushayquino” (Rom. 15:7, TDI). Ancianucunaga Jesús cashganno canman y mushoj cajcunata ali chasquicärinman (“Imata ruranquiman mushoj congregaciunman pasanayquipaj” recuadruta ricay). Lapancunami hasta wamracunapis, chayraj chayamoj hermanucunata yanapanman wasincho caycajcunano sienticunanpaj.

Jina mushoj hermanucunata wasinchimanpis invitashwan y imalachopis yanaparcunapaj nishwan. Juc cristiana tiempuntash jorgurgan chayraj chayamushgan cristianata reguichinanpaj tiyashgan marca imano cashganta y carrutapis maypita tomananpaj. Chaylaraj chayamushgan cristianaga chaytami alapa agradecicurgan y yanaparganpis rasla yachacänanpaj.

ESPIRITUAL CAJCHO POGUNAYQUIPAJ CALPACHACUY

Gam juc mushoj congregaciuncho caycaptiquega, capaz manchacunquiman y yarpachacunquimanpis. Cayman yarpäshun: waquin chucluscunaga winaycashgancho garantaraj jaguinan maypapis vuelananpaj, chaynolami gampis yarpachacuyniquicunata jaguiriptiquega maycho caycarpis Diosta sirvir cushishga caycanquipaj. Nicolas y Céline cayno nipäcun: “Juc sitiuman yanapacoj aywacärir yachacurgä tucuy clase runacunawan yachacänäpaj y Diosta sirvir imacuna pishiycämashgancunachopis mejoranäpaj”. Jean-Charles cristianupis cayta wilacun: “Juc mushoj congregaciunman aywacushgäga wamräcunata yanapashgä espiritual cajcho masraj calpachacärinanpaj. Walca quillacunalacho warmi wamrämi reuniuncho asignaciunta ruraycarganna y olgu wamräpis congregaciunwan predicar galaycurganna”.

Juc congregaciunman yanapacunayquipaj aywayta mana puedirpis, ricashganchi yanapacuycunata mayganlatapis practicaman churanquiman, chayno ruraptiqui congregaciunniquichopis ali ricacunquipaj. Jehovaman yäracuy, hermanucunawan shuntacay, imaypis listo caycay congregaciuncho imalachopis yanapacunayquipaj y waquincunawanpis amistäta ruray. ¿Yarpashgayquinachu mushoj cajcunata yanapänayquipaj? Chayta ruraptiquega hermanunchicunata cuyashgayquita ricacämunga, jina yanapäshunqui espiritual cajcho pogunayquipaj (Juan 13:35). Chayta rurarga “Tayta Dios munashqan sacrificiukunata payman apaqno kaykantsi” (Heb. 13:16).

Sasacunapa pasarpis achca cristianucuna mushoj congregaciunnincho rasla yachacashga y cushishga carcaycan. ¡Gampis chayta rurayta puedinquimi! Anne-Lise nin: “Juc congregaciunman aywacushgämi yanapämashga más hermanucunawan reguinacunäpaj”. Kazumi cristiana convencidami caycan “juc mushoj congregaciuncho caycaptinchi Jehová imaycanopapis yanapämäshun”. Y Jules cristianupis cayno nin: “Achca amigucunata tarishcä. Cananga japalä sienticönachu y cay mushoj congregaciuncho alapa yachacashgana caycä”.