Jucha rurajcunata imano ricänanchitataj Jehová munan

1. Lapan runacuna, ¿ima ruranantataj Jehová munan?

JEHOVÁ camamashcanchi quiquinchi acracunapaj imata ruranapäpis, chaytaga waran waranmi ruraycanchi. Ali caj ima decidishganchega caycan hermanunchicunawan junto Jehovata sirvinanchipaj aunicushganchimi. Jehová munan lapan runacuna chayta rurananpaj, payga runacunata cuyashpanmi ali cawananchita munan. Jina mana raquicaylapa sirvinanchitami munayculan y chaynopa imaycamapis cawacunapaj (Deut. 30:19, 20; Gál. 6:7, 8).

2. Jorgushga cajcuna, ¿imata ruranantataj Jehová munan? (1 Juan 2:1).

² Jehovaga pitapis obliganchu payta sirvinanpaj, payga jaguin quiquincuna imatapis decidicunanpaj. ¿Pero imataraj ruranman ancianucuna maygan cristianupis jatun juchata ruraptin? Mana arrepenticuptenga congregaciunpitami jorgushga canman (1 Cor. 5:13). Jehovaga munayculan cuticäramunantami, chayraycu Wamrantapis cachamurgan juchanpita arrepenticojcuna perdunashga cananpaj (leiriy 1 Juan 2:1). Cuyacoj Taytalanchi Jehovaga imaycatarämi ruran jucha rurajcuna arrepenticärinanpaj (Zac. 1:3; Rom. 2:4; Sant. 4:8).

3. ¿Imapitataj canan yachacushun?

³ Jehovanola noganchipis ali shongulanchiwan shuyarashwan jucha rurajcuna arrepenticunanta, imano chayta ruranapaj canan yachacushun. Puntata yachacushun imatataj rurapäcurgan Corinto congregaciuncho juc hermano jatun juchata rurashganraycu. Jina tantiarcushun imatataj Pablo nergan hermanucuna imata rurapäcunanpaj jatun jucha ruraj runa arrepenticuptin. Y jucha rurajcunata Jehová imano ricashgantapis yachacushunmi.

IMATAJ PASASH JUC HERMANO JATUN JUCHATA RURAPTIN

4. ¿Imataj pasaycargan Corinto congregaciuncho? (1 Corintios 5:1, 2).

⁴ (Leiriy 1 Corintios 5:1, 2). Quimsa caj viajincho caycaptinmi, apóstol Pabluman chayargan laquicuypaj wilacuy: Corinto congregaciuncho juc hermanuga madastanwan cacuycargan. Pasaypa pengacuypaj captinmi Diosta mana chasquicoj runacunapis jamurpar galaycärergan. Jucha rurajta ricaycarpis capazchi ali tucärishpan imatapis rurapäcurganchu y congregaciuncho jinala cacunanta permitipäcurgan. Laquipäcoj cashganta yarpapäcurchi imatapis niparganchu. Ichanga Jehová mana permitinchu pipis juchata ruraycälar cacunanta. Jucha ruraj runata, imatapis mana niparga lapan congregaciuntapis pengaymanchi churaycargan. Diosta mana sirvej runacunapis mana alitachi parlanman cargan Jehovapa marcanpita. Chay jucha rurajta mana jorgurga waquincunapis paynola juchata rurarpis galaycärinmanchi cargan. ¿Chaura imata consejacurgan Pablo?

5. ¿Congregación imata rurananpätaj Pablo ali claro wilacurgan? (1 Corintios 5:13; dibujutapis ricay).

⁵ (Leiriy 1 Corintios 5:13). Diosmi Pabluta wilacächergan cartancho tantiachicunanpaj mana arrepenticoj runata congregaciunpita jorgunanpaj. Chay congregaciuncho hermanucuna, ¿imataraj rurapäcunman cargan? Pabluga nergan paywan mana juntacänanpaj ni micupäcunalanpäpis (1 Cor. 5:11). Chayta rurapäcurga parlalacho cacärinmanchi cargan. Chauraga Pabluga niycargan chay jucha ruraj runawan imaraycurlapis mana juntacärinanpaj. Chaynopa mana alicuna congregaciuncho manana cananpaj cajta (1 Cor. 5:5-7). Chaynoparaj chay jorgushga runa cuentata gocunman Jehovata laquichishganta y cutimunanpäpis aliraj yarpachacunanpaj.

6. ¿Imanotaj chasquipäcurgan Pablo cartacushganta y chay juchata ruraj runapis imata rurargan?

⁶ Corinto congregaciunta Pablo cartacushganpitaga yarpachacurganchi ‘¿cartacushgäta cäsucäringachuraj o manachuraj?’ nir. Chay wichanlacho Pablupaj Tito cushicuypaj wilacuyta apamurgan: Corinto congregación Pablo nishgannolami rurargan, chay juchata ruraj runata jorgupäcurgan (2 Cor. 7:6, 7). Pablo cartacushganpita juc ishcay quillacunano pasarcushgancho juchata ruraj chay runaga lapan mana alicuna rurashgancunata cachaycur arrepenticurgannashi cargan. Aumi Jehovata cäsucur galaycurgan (2 Cor. 7:8-11). Chayta musyarga, ¿imata rurananpätaj congregaciunta Pablo nergan?

ARREPENTICOJ RUNATA IMANOTAJ CHASQUIPÄCUNAN CARGAN

7. ¿Imatataj rurargan chay juchata ruraj runa congregaciunpita jorgushga captin? (2 Corintios 2:5-8).

⁷ (Leiriy 2 Corintios 2:5-8). Pabluga nergan: “Tsay runata corrigipäkushqayki alinami kaykan”. Chay runa corrigicur arrepenticushgana cargan. ¿Imaraycu?, anyapashganta cäsucushganpitami (Heb. 12:11).

8. ¿Imata rurananpätaj congregaciunta Pablo consejacurgan?

⁸ Chauraga chay runapa parlar Pablo congregaciunta mandargan “perdonar shakyätsipäkuy” y ‘payta kuyar ali shimilaykipa parlapäkuy’ nir. Pabluga manami niycarganchu congregaciuncho ali chasquishgala cananpaj, sinoga munaycargan chay runata shongupita perdunar ali nawilanwan ricapäcunanpaj. Chayta rurapäcuptinraj congregaciuncho hermanucuna Dios munashganno cuyacuywan y cushi cushila chasquircaycanman cargan.

9. ¿Imanir-raj waquincunapäga sasa cargan arrepentido hermanuta perdunananpaj?

⁹ Biblia mana wilacuptinpis capazchi waquincunaga cushicärerganchu chay runa congregaciunman yapay cutimuptin. Rabiashga imachi carcaycargan culpanraycu congregaciuncho problemacuna pasashganpita. Diosta cäsucuycarla sirvej cristianucunaga olgurpis nipäcurganchi ‘chaynoga congregaciuncho canmanchu, imanirtaj permitiycashwan chay runa cutimunanta’ nir (Lucas 15:28-30 textuwan tincuchiy). ¿Chauraga imanirtaj alapa ali canman cargan chay arrepenticoj hermanuta lapan hermanucuna cuyacuywan chasquipäcunanpaj?

10, 11. ¿Imaraj pasanman cargan ancianucuna chay arrepentido runata mana perdonapäcuptin?

¹⁰ ¿Imanoraj ricacunman cargan chay arrepentido hermanuta ancianucuna mana permitiptin congregaciunman cutimunanpaj? o cutimushgana carpis ¿hermanucuna cuyacuywan mana chasquiptin? Chayno carga laquicuylapitachi Diosta sirviytapis munanmannachu cargan, ‘jatun juchätaga Dios imaypis perdunamangachu’ nirpis yarpanmanchi cargan.

¹¹ ¿Ima mastaj pasanman cargan cuticamoj hermanuta mana perdunapäcuptenga? Paycunapis Jehovapa favorninta ograpäcunmanchi cargan. Jehovanola perdunacoj mana carga, Satanasnomi pasaypa fiyu y mana laquipäcoj carcaycanman cargan. Jinamanpis Diablupa maquincho paycuna caycarga quiquincunachi micharcaycanman chay runa Jehovata manana sirvinanpaj (2 Cor. 2:10, 11; Efes. 4:27).

12. Jehovanola perdunacoj cananpaj, ¿imamantaj congregaciunga yarpachacärinan cargan?

¹² ¿Chauraga imanotaj congregación Corinto Jehovanola perdunacoj capäcunman cargan? Satanaspa contrancho churacar y Jehová perdunacoj y laquipäcoj cashganman yarparmi. Mä ricärishun imatataj Bibliata escribejcuna Jehovapita nipäcurgan. David nergan: “Alilata ruraqmi y perdonakuqmi kanki” (Sal. 86:5). Miqueaspis nergan: “Tayta Dios, qamnöqa manami juk dios kantsu. Kuyashqayki runakuna perdonta manakushuptikiqa perdonankimi. Jutsa rurashqankunatapis qonqankimi” (Miq. 7:18). Profeta Isaiasna cayta escribergan: “Jutsa rurashqaykita kachapäkuy. Manakaqkunata yarpachakunaykipa trukanqa TAYTA DIOSMAN kutikäriy. Diosnintsi karmi kuyapäshunki. Payqa imaypis perdonashunkimi” (Is. 55:7).

13. ¿Imanirtaj ali cargan chay arrepentido runata congregaciunman cutichipäcamunanpaj? (“¿Imayraj juchayoj runa Corinto congregaciunman cutimurgan?” nej recuadruta ricay).

¹³ Jehová cuyapäcoj cashgannolami Corinto congregaciunga cushi cushila y cuyacuywan chasquipäcunan cargan juchanpita arrepenticoj hermanuta. Chay cuticamoj hermanuta chasquerga Pablo nishgannopis lapanchomi cäsucurcaycargan (2 Cor. 2:9). Jorgushga cashganpitaga walca tiempulachomi arrepenticur cutimurgan. Chaymi ancianucunaga manami achca tiempurächu shuyaranman cargan chay arrepentido runata congregaciunman cutichipäcunanpaj cajta.

IMANOTAJ JEHOVANOLA ALITA RURAJ Y CUYAPÄCOJ CASHWAN

14, 15. ¿Imataj yachacunchi Corinto congregaciuncho ima pasashganpita? (2 Pedro 3:9; fotutapis ricay).

¹⁴ Corinto congregaciuncho juchata ruraj runawan ima pasashgantaga Jehová escribichishga canan wichan ali yachacunanchipaj (Rom. 15:4). Jehovaga manami permitinchu pipis juchata rurarla cawacur congregaciunnincho cacunanta. Waquincunaga ninmanchi ‘Jehovaga lapanchiwanpis laquipäcojmi, mana arrepenticojcunapis jinala congregaciuncho cacunman’ nir. Pero manami chaynochu. Jehovaga laquipäcojmi, pero munashgalanchita ruracunanchitaga manami cachapämäshunchu. Jehovaga musyanmi imataj ali y imataj mana ali caycan, pitapis laquipashganraycurlaga leynincunata trucachingachu (Jud. 4). Jehovacush mana arrepenticojcunata jorgunmancu, lapan congregaciunpis mana alicunamanchi chayanman cargan (Prov. 13:20; 1 Cor. 15:33).

¹⁵ Jehovaga manami munanchu pipis wanuylacho ushacänanta. Chaypa trucanga munayculanmi lapan runacuna arrepenticur salvacunanta. Laquipaycunmi ima luta ruraycunatapis jaguiriycur shongupita arrepenticur favorninta ashejcunata (Ezeq. 33:11; leiriy 2 Pedro 3:9). Chaymi Jehovaga Corinto congregaciunta Pabluwan wilacächergan chay arrepenticoj runata perdunapäcunanpaj y yapay chasquipäcunanpaj.

16. Corinto congregación pasashganpita, ¿imata yachacunqui Jehová imano cashganta?

¹⁶ Corinto congregación pasashganga yachachimanchi Jehová cuyapäcoj y alita ruraj Dios cashganta (Sal. 33:5). Cayta musyar Jehovatapis más alabayta munanchi, lapanchi juchayoj carmi necesitanchi Dios perdunamänanchita. Agradecido caycanchi cuyay Wamran noganchiraycu wanushganpita perdunashga cananchipaj. Cushicunchimi sirvejnincunata Jehová cuyashganta, ali cananta munashgantapis.

17. ¿Imata yachacushun gatejnin caj yachachicuycunacho?

¹⁷ Canan wichan pipis jatun juchata ruraptin, ¿imanotaj ancianucunaga Jehová cuyacoj cashganno jucha rurajcunata arrepenticunanpaj yanapanman?, ¿imataraj rurapäcunman congregaciuncho hermanucuna; ancianucuna jucha rurajta jorgupäcuptin o cutichipäcamuptinpis? Caycunapita yachacushun gatejnin caj yachachicuycunacho.