Canancama Jehová yachaycächiman

1927 watacho yurishcä ichic marcacho Chicago marcapa cercalancho (Illinois, Estados Unidos naciuncho). Taytäcunaga pichga wamrayojmi cargan: Jetha, Don, Karl, Joy y nogapis. Lapancunami Jehovata shumaj sirviyta munapäcurgä. Jetha panëga 1943 ishcay caj Galaad escuelaman aywargan. Wauguëcunaga Betelmanmi aywargan Brooklyn (Nueva York) marcacho, Don 1944 watacho, Karl 1947 watacho y Joy wauguëga 1951 watacho. Lapan familiäga Jehovata sirvinanpaj calpachacushganta ricar nogapis calpachacurgämi.

FAMILIÄGA JEHOVAPITA YACHACUN

Taytäcunaga Bibliatami liej y Diosta cuyajmi, nogacunatapis Diosta cuyanäpämi yachachipäcamargan. Ichanga taytäga Punta caj Jatun Guerracho Europaman aywargan. Papänë cutimushganpita mamänëga cushishga caycargan y “unayno acu iglesiaman” nergan. “Yanagäshayqui, pero manami yaycushächu”, papänë contestargan. Mamänë tapucurgan “¿imanir?”. Papänë nergan: “Guerracho caycaptëmi curacuna armacunata bendecishganta ricargä. Juc religiunlapita car ishcay banducunata wanuchinacärinanpaj, ¿imanoparaj Dios bendicinman?”.

Yapaychona mamanë iglesiacho caycaptin, ishcay Testigucuna wasëman shamurgan y ishcay librucuna Luz nishgan ricachiptin taytäga chasquirganmi. Chay librucunaga Apocalipsispitami tantiachicurgan. Nircur mamanë chay librucunata ricar leirgan. Juc cutichona periodicucho wilacuyta ricargan, chay librucunawan juc Saloncho Bibliapita yachachicärishganta. Chaymi mamänëga chay Salonman aywargan, y libruta ricachir tapucurgan: “¿Caychocu cay libruwan yachachicärin?”. Juc edayashga warmi nergan: “Aumi, pasaycalämuy”. Semananchona nogacunata mamanë pushapäcamargan, chaypita pacha mana faltaypa aywapäcurgä.

Juc cuticho reuniuncho caycar, pushaj hermano nimargan Salmo 144:15 textuta leinäpaj, chaycho nin Jehovata sirvejcunaga cushishga cawacärishganta. ¡Chay textuga alapa gustamargan! Jina gustamarganpis cay textucuna: 1 Timoteo 1:11, chaycho nin Jehová cushishga Dios cashganta, y Efesios 5:1 textucho nin Dios cashganno cananchipaj. Chauraga cuentata gocurgä Jehovata sirvinapaj imata ruraptëpis cushishgala ruranämi, jina payta sirviptë agradecido canäpaj. Chaycunaman yarparaptëmi yanapämashga Jehovata mana jaguiypa sirvinäpaj.

Congregaciunga Chicago marcachomi caycargan, caru captinpis calpachacärirgämi aywanäpaj. Reuniuncunaman aywarmi Bibliapita masraj yachacurgä. Juc cuticho panë comentargan, y comentaptin noga nergä: “Chaytaga nogapis musyargämi. ¿Imanirtaj maquëta jogargächu?”. Chaypita masraj yachacunapaj calpachacurgä y maquëta jogarcur parlanäpäpis. Chaycunami yanapämargan hermanöcunamanpis Jehovaman masraj guelicunäpaj. Chaymi 1941 watacho bautizacurgä.

JEHOVÁ ASAMBLEACUNACHO YACHACHIMARGAN

Yarpämi juc asamblea, Cleveland (Ohio) marcacho 1942 watapita. Hermanucunaga tolducunata sharcachergan, chaynomi asambleapa cercalancho quedacunapaj. Estados Unidos naciuncho, 50 marcapitapis hermanucuna lapan discursucunata telefonupa wiyapäcurgan. Ishcay caj Jatun guerra wichan caycargan, y Jehovapa testiguncunata masraj chiquir galaycurgan. Chaymi hermanucunaga wilanacärergan cada pagas tolducuna caycashgancho jiruruypa carrucunata churacänapaj. Cada carrupa rurincho juc hermano mayaj mayajla caycargan, chayno pilapis yaycuptin carrupa achquita achquiyänanpaj y bocinantapis tucananpaj. Chayta mayaycur waquin hermanucuna jucla shamuycur yanapacunman cargan. Chay horacho yarpargä: “Jehovapa sirvejnincunaga imapäpis listumi caycan”. Imapis pasarganchu, chaymi tranquilula punoj cä.

Tiempo pasariptin chay asambleaman yarpar cuentata gocurgä mamänëga ni ichiclapis manchacurganchu. Payga Jehovapa sirvejnincunaman lapan shongunwan yäracurgan. Pay yäracushganta imaypis gongashajchu.

Chay asambleapäga mamänë chayraj precursorano yanapacur galaycurgan. Chaymi precursorcunapaj discursucunata shumaj wiyargan. Wasëman cutimurna, mamanë nergan: “Manami munächu precursorano sirviyta jaguinäpaj. Pero ¿imanotaj ruräman, wasëcho imayca ruraycunapis caycaptin?”. Paymi nipäcamargan yanapanapaj, nogacuna “aumi” nipäcurgä. Chaynomi desayunuta manaraj upur cada uno ishcay cuartucunata pichapäcurergä. Mamanë predicaj manaraj yargur, wasëga limpio y churapacush caycashganta ricaj. Imayca rurananpaj caycaptinpis, payga ali atiendipäcamaj. Y colegiupita chayamuptin junto micupäcoj cä. Öraga tardipa paywan predicaj yargupäcoj cä, chaynomi tantiacärergä precursor lapan rurashganta.

PRECURSORNO SIRVIYTA GALAYCÖ

16 watayoj caycaptëmi precursorno sirviyta galaycurgä. Papänë Testigo mana captinpis juc pagascho predicaciuncho imano aywashgäta tapumargan. Wilapashgä “calpachacuycaptëpis ni jucnaylata manarä tarëchu Bibliata estudiayta munajcunata” nir. Chaymi, papänëta tapurgä: “¿Munanquimanchuraj nogawan Bibliata estudiayta?”. Payga ichicla yarpachacur “aumi” nimargan. Cushicurgämi papänëta Bibliata yachachiyta galaycuptë. Chaytaga manami gongächu.

“La verdad os hará libres” libruwan yachacur galaycärergä. Cada cadala yachachiptë papänëga tapupamaj, chayga yanapämargan publicaciuncunacho ashir shumaj tantiacunäpaj, chaynopa ali yachachicunäpäpis. Juc cuticho papänë chay librupita juc parrafuta leir nimargan: “¿Imanotaj seguro caycanqui rasunpa cashganta?”. Noga nergä: “Canan tantiachinäpaj manami musyächu. Pero yapaypaj shumaj tantiacushaj contestanäpaj”. Chaymi mana musyashgäcunata librucunacho shumaj tantiacunäpaj yachacurgä. Chayno rurar ishcäcunatami yanapämargan Jehovaman masraj yäracunäpaj. Papänë yachacushganta cäsucurgan, y 1952 watacho bautizacurgan.

BETELCHO MASRAJ YACHACURGÄ

17 watayoj caycaptë juc marcacho tiyar galaycurgä. Panë Jethaa misionerano sirvir galaycurgan, y wauguë Don Betelman aywargan. Paycuna Jehovata cushishgala sirvishganta ricar nogapis paycunano sirviyta munargä. Chaymi Betelman y Galaad Escuelaman aywanäpaj solicitudnëcunata apachicurgä y Jehovapa maquincho cachaycurgä. Y 1946 watacho Betelman aywanäpaj invitapäcamargan.

Betelcho caycar imaycacunata ruranäpaj yachacurgä. Chaycho arurgä librucunata imprimir, guellayta manejar y waquin naciuncunapita cosascunata chasquicur y apachicurpis. Canancama 75 watana Betelcho caycashgäpita masga gustaman cada tuta Bibliapita yachachicushganta y waquin discursucunapis.

Shulca caj wauguëpita Karl alimi yachacurgä, payga 1947 watacho Betelman chayargan. Payga yachacushganta shumajmi tantiacoj, jina ali yachachicoj cargan. Juc cuticho discursuta ruranäpaj achcata leimurgä, pero mana musyargächu imano ruranäpaj. Chaymi wauguëta tapucurgä “¿imanoraj ruräman?”, paymi nimargan: “Joel, ¿ima temapitataj yachachicuyta munanqui?”. Chauraga cuentata gocurgä tema nishganno textucunata acraycur yachachicunäpaj. Wauguë chayno yachachimashgantaga manami gongächu.

Betelcho cushishga caycänapäga calpachacunanchirämi Diospita yachachicunapajpis. Chaynopa ali shonguyoj cajcunata tarir cushicunchi. Juc cuticho Bronx, Nueva York marcacho predicaycaptinchi juc warmita watucunapaj cutishgä, payga Wilacamoj y ¡Despertad! revistacunata chasquicurgan. Payta nirganchi Bibliapita yachachicuycashgäta. Payga nergan: “Bibliapita captenga pasaycalämuy”. Diospa Gobiernunpita y paraisupitami shumaj tantiachicurgä textucunawan, chayta wiyar payga cushicurgan. Chaymi juc caj semana cutipäcuptë payga amiguncunawan caycargan. Tiempuwanga pay runanwan bautizacurgan y chaypitaga mana jaguiypa Jehovata sirvirgan.

WARMËPITA ALAPA YACHACÖ

Casaracuytami munargä, ichanga chunca watarämi pasargan warmëta reguinäpaj. Jehovatami alapa ruwacoj cä ali warmita tarinäpaj, jinapis casaracushgana caycar imata ruranäpaj yarpachacoj cä.

1953 watacho, Estadio de los Yankees sitiucho asamblea cargan, y chaychomi Mary Aniol panita reguirgä. Payga Galaad escuelaman, ishcay caj clasiman aywargan panëwan. Nircur Caribe islacunacho misionerano panëta yanagaj. Payga cushi cushilami parlapämaj misionerano sirvishganpita y yachachicushganpitapis. Ishcäcuna masraj reguinacur y cuyanacur galaycärergä. Y 1955 watacho casaracärergä. Mary warmëga Jehovapa regalunnomi cargan, ali aroj warmimi cargan. Imacho y maychopis Jehovata cushi cushilami sirvej y waquincunata imalachopis yanapaj. Payga Jehovapaj cajcunata puntaman imaypis churaj (Mat. 6:33). Casaracushgana caycar Sucursal nimashga congregaciuncunata watucamojno sirvinapaj, y chaycho quimsa watami sirvipäcushgä. Y 1958 watacho ishcäcunata Betelman invitapäcamargan.

Mary warmëpitaga alapami yachacurgä. Chaylaraj casaracushga caycar wilanacärirgä 15 versiculucunata Bibliapita leinapaj. Leishgäcunapita y yachacushgäcunapita imano practicaman churanapaj parlacärej cä. Payga wilapämaj Galaad escuelacho yachacushganpita y misionerano yachacushganpitapis. Chayga yanapämargan shumaj tantiarcur-raj imatapis yachachicunapaj y panicunata shacyächir alipa parlanäpäpis (Prov. 25:11).

Cuyashgalä warmëga 2013 watacho wanurgan. ¡Mayraj paywan tincuyta munaycö! Chaycama Jehovapita jinala yachacunäpaj y fiel canäpaj calpachacushaj (Prov. 3:5, 6). Shamoj tiempuman yarpachacuptëga Jehová sirvejnincunapaj imaycacunataraj ruranga, chayman yarpar alapami cushichiman. Jinapis ali Camacojninchi Jehovapitaga imaycacunaraj caycan yachacunapaj. Canancama Jehová cuyapämashganta y yachachimashgantapis imanopapis pagayta puedëchu.