Juc tapucuylawan achcajta yanapayta puedinquimanmi

Mari y Juana tiyashgan naciunmanga achca runacunami chayan Filipinas naciunpita, y paycunaga Diospita yachachicoj. COVID-19 gueshya wichan, Mari yachachicurgan achca runacunata manami pay tiyashgan naciunlapita sinoga achca naciuncunapita. ¿Pero imanopataj chayta rurargan?

Mari tapurgan Bibliapita yachacuycajcunata: “¿Reguinquicu pilatapis yachacuyta munajta?”. Aumi niptenga, “mä reguichimay” nerganmi. Chay tapucushganlapita achca runacunata Bibliapita yachachir galaycushga. ¿Imanir? Bibliapita yachacuycajcunapa familiancuna o reguishga amiguncuna Bibliapita yachacuyta munanmanmi. ¿Imata pasashga Mari wilacushganpita?

Bibliapita yachacuycaj Jasmin jutiyoj warmi, chuscu reguishga amigancunata Marita reguichirgan, Bibliata más yachacuyta munajcunata. Jucnin cajga cargan Kristina, paytaga alapa gustargan Bibliapita yachacuy y cada semana ishcay cuti yachacurgan. Mari tapurgan Kristinata: “¿Reguinquicu pilatapis Bibliapita yachacuyta munajta?”, payga nergan: “Aumi, yanasäcuna caycanmi. Reguichishayqui”. Walca tiempulacho chuscu amigancunata payta reguichirgan. Tiempuwanna Kristina más amiguncunata reguichirgan, paycunapis waquin amiguncunatana Marita reguichirgan.

Kristinaga munargan castancuna Bibliapita yachacunanta. Chaymi nergan Andrea wamranta Bibliapita yachacunanpaj. Ichanga pay nergan: “Testigucuna sectami. Manami Cristuman creinchu, paycuna antiguo testamentulamanmi yäracun”. Ichanga, juc cutila Bibliapita yachacushganpitaga cuentata gocurgan manami yarpashgannochu cashganta. Bibliata estudiaycashgan hora paymi nergan: “Biblia nishganga, ¡rasun cajmi caycan!”.

Tiempo pasariptin Andrea ishcay yanasancunata Marita reguichirgan Diospita yachacunanpaj. Andreapa tían cargan Angela, payga gapra car Andreawan Mari yachacuptin wiyaycarganlami. Juc junajshi Angelaga Andreata nergan Mariwan Bibliata yachacunanpaj. Angelataga Bibliapita yachacushganga alapa gustaycurgan. Juc quilla manaraj pasaptin, payta achca textucunata umalachona charaycargan, jina nerganpis juc semanacho ¡chuscu cuti Bibliapita yachacunapaj! Andreapa yanapacuyninwan, Angelaga cada reunión zoompa conectacoj.

Kristinawan Mari yachacur caycaptin, runan Josué wiyaycargan. Mari cuentata gocurir payta tapurgan: “¿Gampis Bibliapita yachacuyta munanquichu?” Payga nergan: “Wiyayla wiyashaj, ama imatapis tapupämaychu, chauraga aywacushämi”. Ichanga pichga minutos pasariptin Josué tapucur galaycurgan Marita, jina Bibliapita más yachacuyta munaycashganta nergan.

Mari juc tapucuylata rurashganpita, achca runacunata Bibliapita yachachir galaycurgan. ¡Paycunaga chuscu naciunpita 28 runacunami cargan! Lapancunata yachachiyta mana puedir, waquin hermanucunata nergan yachachinanpaj.

Mariwan puntata yachacoj Jasmin, abril 2021 bautizacurgan. Kristinaga mayo 2022 bautizacushga, cananga naciunnin Filipinascho caycan familiancunawan. Kristinapa ishcay yanasancuna Marita reguichishganpis bautizacärishgana. Chaypitaga Angelapis bautizacurgan y cananga precursora regular caycan. Kristinapa runan Josué, wamran Andrea y waquin yachacojcunapis Bibliata ali yachacuycanmi.

Jesuspa y apostulcunapa tiempuncho waquincuna amiguncunata o familiancunata Jesuspita yachachicurgan, chaynopa achcajmi cristianuman chayargan (Juan 1:41, 42a; Hech. 10:24, 27, 48; 16:25-33). Gamwan Bibliata yachacuycajcunata capaz tapurinquiman: “¿Pilatapis reguinquicu más Bibliapita yachacuyta munajta?” nir. Chayno tapucunayquipäga manami sasachu caycan, pero chayta ruraptiquega achca runacunata yachachiyta puedinqui.