Imata rurashwan ali amigo cananchipaj

¿IMAYLAPIS problemacunapa pasar japalayqui sienticushcanquicu? Bibliaga nin ushanan tiempucho runacuna alapa nacananpaj cashganta. Chayno captinpis manami japalanchega caycanchichu (2 Tim. 3:1). Diospa Palabran nin ima nacaycho captinpis ali amigucuna caycan yanapämänanchipaj (Prov. 17:17).

ALI AMIGO CARGA IMATATAJ RURASHUN

Apóstol Pablupa ali amiguncunaga yanagaj y tucuynopa yanapacoj (Col. 4:7-11). Romacho wishgaraycashgancho, waquin amiguncunata encargargan pay mana puedishganta rurananpaj. Jucnin caj ali amiguga cargan Epafrodito, payga apargan Pablo necesitashgancunata (Filip. 4:18). Tiquicupis Pablo escribishgan cartacunata congregaciuncunaman aypurgan. Carcelcho caycashgancho amiguncunapa yanapacuynincunawan congregaciuncho caycar hermanucunata shacyächirgan. Y noganchi, ¿imata rurashwan ali amigo cananchipaj?

Canan wichanpis ali amigucuna listo caycan yanapämänanchipaj. Yarpäshun Elisabet cristiana imapa pasaycashganta, payga España naciuncho precursorano caycargan. Maman cáncer gueshyawan captin yanasan mensajicunata apargan Bibliapita chaynopa shacyächinanpaj. Payga nin chay mensajicunata chasquirerga ali sienticushganta y manana japalan caycashganta (Prov. 18:24).

Ali amigo captinchega hermanunchicunata yanapacushun Jehovata sirvinanpaj. Chaynopa paycunawan ali amigo cashun. Chaypäga capazchi chachayashga hermanunchicunata ‘acu reuniunpa’ o ‘predicaciunpäpis aywananchipaj yanagäshayqui’ nirishwan, chayta rurarga shacyächinacushun (Rom. 1:12). Ichanga hermanunchicuna wasinpita mana yarguyta puediptenga, ¿imanopataj yanaparcushun?

WASINPITA YARGUYTA MANA PUEDEJCUNAPA ALI AMIGUN CASHUN

Waquin hermanunchicunaga gueshyanraycu reuniuncunaman manami aywayta puedinchu. Chaypa pasaycargan David hermanunchi, cáncer gueshyaraycu sojta quillapa hospitalman aywar reuniuncunamanpis aywarganchu. Ichanga pay warminwan zoomlapa reuniunta wiyaj.

¿Imanotaj paycunata hermanunchicuna shacyächergan? Waquin hermanunchicuna reunión ushariptin hermanunchi Davidta y warmintapis zoomlapa shacyächej y ali comentashganpita felicitaj. Chay lapanpita David Lidia warminwan hermanunchicunapita cuyashga sienticurgan.

Capaz tiempunchita camacächishwan wasinpita yarguyta mana puedejcunawan yachachicunapaj. Chayta ruraptinchega paycunaga cuyashgami sienticunga (Prov. 3:27). Paycunawan yachachicushwanmi cartalapa o celularlawanpis. Jina ancianucuna predicaciunpaj caj reuniuncunata zoompa cananpaj camacanmanmi. Chay reuniunpita David nin: “Hermanunchicunawan Bibliata yachacushgäpita y oraciunta wiyashgäpitapis warmëwan cushishgami sienticärergä”. Gamwan Bibliata yachacuycajta ninquiman wasinpita mana puedej hermanupa wasinman aywanapaj. Chayta manaraj rurar shumaj yarpachacunquiman pilatapis peligruman mana churanayquipaj.

Wasinpita yarguyta mana puedej hermanunchicunata yanapacuptinchi, paycunapita noganchipis yachacuyta puedinchi y paycunawanpis ali amigo cashun. Paycuna Diospa Palabranta ali yachachicojta ricar almiracunchimi. Hermanucunata chayno yanapacuptinchi más ali amigucunata tarishun (2 Cor. 6:13).

Apóstol Pablo cushicurgan Tito amigunwan caycashganpita (2 Cor. 7:5-7). Noganchicunapis amigunchicunata manami parlashganchilawan animashwan sinoga junto paycunawan caycashganchimi, y rurayninchicunawan imaycanopapis yanaparcushwanmi (1 Juan 3:18).

AUTORIDÄCUNA CHIQUIMASHGANCHI WICHAN AMIGUNCHICUNAWAN YANAPÄNACUSHUN

Rusia hermanunchicunapita yachacushwanmi, paycunaga jucnin jucninta yanapänacun. Ricärishun hermanunchi Serguéi y warmin Tatiana imacunapa pasashganta. Puntataga policiacuna wasinman yaycurir ashergan ima publicaciunninchicuna cashganta, nircur ishcanta comisariaman apargan tapupänanpaj, chaypitaga Tatianata libre cacharirgan. Serguéi cayno wilacun: “Tatiana wasinman cutimuptinna mana manchacoj paninchi chayargan payta animananpaj. Chaypita waquin hermanunchicuna chayargan wasincho churapacächinanpaj y pichapacuychopis yanapacunanpaj”.

Serguéi caytapis nin: “Alapami gustaman Proverbios 17:17 texto: ‘Ali amïguqa amïgunta manami imaypis kacharintsu. Ima nakaycho kaptinpis wawqintanömi yanapan’. Sasa tiempucunapa pasaycaptë canan ricashcä cay texto rasunpa cajta. Quiquiläpitaga manami puedëmanchu, sinoga Jehová gomash ali amigucunata ladücho caycänanpaj, chaynopa paycuna yanapäman mana alipa pasaycaptë”.a

Canan ushanan tiempucunachoga ali canman ali amigucunata charaptinchi, y jatun nacay tiempucunachoga masrämi necesitashun ali amigunchicunata. Chaymi cananlapitana amigunchicunawan yanapänacur shacyächinacushun (1 Ped. 4:7, 8).