Ama cay munducho runacunano ali tucojga cashunchu

CAY munduchoga achca runacuna munapäcun ali ricashga y respetashga canantami. Paycunaga waquincunapita más importante cashgantami creipäcun. Caycunapitaga manami espantacushwanchu, porque Bibliaga nin ushanan tiempucunachoga runacuna ali tucoj y mana agradecicoj cananpaj cajta (2 Tim. 3:2).

Unay wichanpis runacunaga quiquincunalaman yarpaj y ali tucojmi cargan. Chayno cargan Adán y Eva. Paycunaga munargan ali cajta mana ali cajta acrananpaj, chayraycu canancama runacuna nacaycan. Tiempuwanga rey Uziaspis ali tucoj car templucho inciensuta rupachergan, chayta rurananpaj derenchun mana captinpis (2 Crón. 26:18, 19). Fariseucuna saduceucunapis orgulloso car yarpapäcurgan paycunata Dios ali ricashga cananpaj cajta, Abrahanpa miraynin cashganraycu (Mat. 3:9).

Cada junaj cay munducho orgulloso runacunawan caycanchi, chaymi paycunano yarpashwan ali ricashga cananchita (Gál. 5:26). Capaz ima carguyoj cashganchiraycu ali ricashga cayta munashwan. ¿Imatataj rurashwan paycunano mana cananchipaj? Shumaj tantiarcushun ima nintaj Jehová chaypita. Ricärishun ishcay tantiachicuycunata.

Jehovalami musyan jucninchi jucninchipa ima ali cashganta. Ricärishun waquin ejemplucunata.

• Jehovaga olgucunata nin warmilanta cuyananpaj, y warmicunata nin runanta respetananpaj (Efes. 5:33). Jehová nin casacushgacunata ishcalancuna cuyanacunanpaj (1 Cor. 7:3). Wamracunata nin taytancunata respetananpaj y cäsucunanpäpis, y taytacunatana nin wamrancunata cuidananpaj y cuyananpäpis (2 Cor. 12:14; Efes. 6:2).

• Congregaciuncho ancianucunaga ali ricashga ali respetashgami canman (1 Tes. 5:12). Chayno captinpis hermanucunata manami ninmanchu ‘caycho noga mandacö’ nir (1 Ped. 5:2, 3).

• Bibliacho nin autoridäcunata respetananchipaj y cäsucunanchipäpis (Rom. 13:1, 6, 7).

Jehová cuyamashpanchi necesitashganchita gomanchi. Juchayoj car lapanchirämi wanunanchi caycan (Rom. 6:23). Ichanga Jehová cuyamashpanchiraycu imayca alicunata gomanchi (Sal. 103:10, 11). Cuyamashpanchimi lapan bendiciuncunata gomanchi, manami quiquinchi munashganchipitachu (Rom. 12:6-8; Efes. 2:8).

IMARAJ YANAPÄMÄSHUN MANA RUNA TUCOJ CANANCHIPAJ

Cuidacunanchimi Diosta mana sirvej runacunano mana yarpänanchipaj. Öraga yarpar galaycushwan ‘nogata waquincunapitapis más gopäcamanman’ nir. Juc cuticho Jesús nergan quiquilanchiman yarpar galaycushwan. Pay nergan: “Juk runashi üva chakrancho arutsinanpaq tuta tutala minkay ashiq aywarqan. Minkayta tariykurshi juk jornalta pägananpaq parlarkur üva chakranman arunanpaq kacharqan”, nircurshi más mincaycunata ashej aywargan. Pacha chacaycaptinnashi lapan mincaynincunata igual pägargan, hasta juc hora arojcunatapis. Chayta ricarshi tutapita arojcuna rabiar cayno nergan: “¿Imanirtaq tsayjina shanaycho arurkaykaptï paykunatanöla pägarkaykämanki?” (Mat. 20:1-16). Cay tincuchicuywan Jesús niycargan Diospa sirvejnincuna pay goshgancunalawan cushishga caycänanpaj.

Gamraycu imata rurashganta ali shongulayquiwan chasquicuy (1 Tes. 5:18). Apóstol Pablunomi cananchi, payga mañacunman cargan Corinto hermanucunata gastuncunapaj, ichanga mana chayta rurarganchu (1 Cor. 9:11-14). Noganchipis agradecido carga manami shuyashwanchu waquincuna munashganchita gomänanchipaj.

Humilde cananchi. Waquincunaga quiquilanman yarpar pay munashganno lapancuna rurananpaj munan. Chayno ali tucur yarpaptenga venenunomi caycan, ichanga humilde captinchi jampinomi caycan.

Profeta Daniel imano cashganga yachachimanchi humilde cananchipaj. Familianga guellayyoj cargan, y payga cuyaylapaj y yachaj carpis manami ali tucurganchu ni waquincuna ali ricashga cananta manami munarganchu (Dan. 1:3, 4, 19, 20). Chayno humilde cashganpita Jehovaga payta ali nawilanwan ricargan (Dan. 2:30; 10:11, 12).

Diosta mana sirvej runacunanoga manami ali tucoj cashunchu. Chaypa trucanga Jehová cuyamashpanchi imayca bendiciuncunata gomashganchipita agradecido y cushishga chasquicunanchi.