“Japaläga manami imaypis cashgächu”

TAYTÄCUNAPITA YACHACÖ

Taytäcunaga católico cargan. Ichanga Bibliacho Diospa jutin Jehová cashganta musyarir, paycuna cushi cushila Jehovapa testiguncuna cananpaj decidirgan. Papänëga carpinterumi cargan, pero Testiguna car Jesuspa imagincunata rurayta jaguirirgan y wasinta Salón del Reino cananpaj ticrachirgan. Chayga cargan Filipinas naciuncho, Manila marca, San Juan del Monte caceriucho.

Yurishcä 1952 watachomi, y taytäcunaga chuscu mayor wauguëcunata quimsa mayor panëcunata Jehovapita yachaycächishganno nogatapis Jehovapita yachachimaj. Tiempuwan Bibliapita cada junaj juc capituluta leinäpaj nimaj. Jinapis waquin publicaciuncunawan yachachimaj. Öraga wasëcho posadachej betelitacunata y congregaciuncunata watucamojtapis. Paycunaga ali experienciancunapita wilapamaptin alapa cushicärergä y chayga shacyächipäcamaj lapan shonguwan Jehovata sirvinapaj.

Papänë mamänëwanga Jehovata cuyar imaycatami ruraj. Ichanga mamänë 1971 watacho gueshyawan wanurgan, y papänëwan precursorno sirvir galaycärergä. Pero 1973 watacho 20 watayoj caycaptë paypis wanurgan. Japalä y laquishga ricacurgä. Chayno mana caycänäpaj Bibliapita yachacushgä wanushgacuna sharcamunanpaj cajta, chayga yanapämargan cushi cushila Jehovata sirviycänäpaj. (Heb. 6:19). Chay watacho precursor especialno sirvinäpaj nipäcamargan. Palawan provinciacho, Coron jutiyoj caru islaman aywanäpaj nimargan.

JAPALÄ SIRVIPTË SASAMI CARGAN

Coron islaman chayargä 21 watayoj caycaptë. Chaychoga alapa manami carganchu achqui, yacu, carrucuna y motucunapis. Ciudächo winashga car japalämi sienticurgä. Familiäta y amigöcunatapis wamayaj cä. Coron islachoga walca hermanucunalami cargan y yanagamaj precursorga mana carganchu, chaymi avecis japalämi predicaj cä. Cada pagas wagar-raj cielupa goylarcunata ricaraj cä y öraga asignaciunnëta cacharir cuticuyta munaj cä.

Japalä y laquishga sienticushgä hora masrämi Jehovata mañacoj cä. Bibliapita y publicaciuncunapita shacyächicoj wilacuycunata yachacushgäman yarpachacoj cä. Masga Salmo 19:14 texto nishganman cutin cutin yarparaj cä, y cuentata gocurgä Jehová “tsapämaqnï y salvamaqnï” cashganta. Jinapis Wilacamoj revistacho “Usted nunca está solo”a nishganman yarparaj cä y chay yachachicuyta cutin cutin liej cä. Japalä car Diospa Palabranta shumaj liej cä, leishgäman yarpachacoj cä y lapan shongüwan Jehovata mañacoj cä. Chaycunami yanapämashga Jehovata sirvir caycänapaj.

Coron marcaman chayar japalä anciano car lapan reuniuncunata nogala ruraj cä, Estudio de Libro de Congregación estudiananchipaj, Escuela del Ministerio Teocrático nishganta, Reunión de Servicio nishgantapis, semana ushananchona discursamoj cä y nircur Wilacamoj revistapitapis yachachicamoj cä. Chay lapanta rurar ocupado car manami japalä sienticurgächu.

Coron marcacho tiempuwanga estudiantëcuna bautizacurgan, chayga alapa cushicuypämi cargan. Chayno caycaptinpis alapa sasami cargan predicaciunman aywanäpaj. Caru captin chaquilapa aywaj cä, chaymi mana musyargächu chacacäcuptenga maycho quedacunäpaj. Chay congregaciunpa achca territoriun cargan, aywanäpaj caru captin botiwan marcan marcan aywaj cä, ayvecisga lamar pulchajyar sharcamoj. ¡Y nogaga nadaytapis yachargächu! Chay lapanpa pasashgäpitaga Jehovami yanapaycämargan. Cuentata gocurirgä juc marcacunachopis yanapacunäpaj sasa captinpis listo caycänapaj.

PAPÚA NUEVA GUINEA

1978 watacho Australia naciunpita, norte caj Papúa Nueva Guinea naciunman chayargä, chaychoga achca jircacunami can. Chay marcachoga tres millones runacunami tiyan y 800 rimaycunami can, pero casi lapan runacuna parlapäcun tok pisin rimayta.

Port Moresby marcacho inglés congregaciuncho yanapacuycargä. Ichic tiempulachomi tok pisin rimayta yachacur galaycurgä congregaciuncho yanapacunäpaj. Yachacushgäpita chay rimayta predicaciunchopis parlaj cä y tiempuwanna discursamoj cä. Manaraj juc wata captin Papúa Nueva Guinea marcacho yanapacuycaptë, tok pisin rimaycho achca congregaciuncunata watucamunäpaj nimargan.

Congregaciuncunami caru marcacunacho caycaptinmi, achca asambleacunata ruranä cargan, chaymi mana jamaypa viajaj cä. Galananchoga rimayninta y costumbrincunata mana yachar japalämi sienticurgä. Chay marcachoga congregaciuncuna caycargan juc lado juc laducho, carganpis achca jircacuna. Chaymi cada semana tacsha sagra aviunwan viajaj cä, chay hora manchacashga caycargä lamarpa botiwan viajashgäno.

Manami lapanpäga teléfono carganchu, chaymi hermanucunata cartacunalawan imatapis wilaj cä. Achca cutimi cartä manaraj chayaptin noga puntata chayaj cä, chaymi chay marcacunaman chayar runacunata tapucoj cä maycho hermanucuna caycashganta musyanäpaj. Paycunawan tincuriptë cushishgami chasquipäcamaj, calpachacushgätapis valurargan. Chay lapanwan cuentata gocurgä Jehová alapa yanapaycämashganta y cuyamashgantapis, chayga shacyächimargan payman guelicunäpaj.

Bougainville isla reuniuncho juc waugui warminwan cushishga tapumargan: “¿Nogacunapita yarpanquicu?” nir, noga nergä “aumi”. Paycunata Port Moresby marcacho Bibliapita unayna yachachergä, tiempuwanga juc wauguiwanna yachacuycashga. ¡Cananga bautizacushgana caycargan! Chayta musyarir alapa cushicurgä Jehová bendeciycämashganta. Chayno cargan quimsa wata Papúa Nueva Guinea naciuncho caycaptë.

TACSHA FAMILIÄWAN JEHOVATA SIRVË

1978 wata, Coron marca islacho Jehovata cuyaj Adel panita reguirgä, paymi cargan ali y arucoj warmi. Payga Samuel y Shirley wamrancunata japalan ashmaycargan; jina edayashga mamantapis cuidaycargan, y precursora regularpis carganmi. Mayo 1981 watacho, Filipinas naciunman cutergä paywan casacunäpaj. Ishcäcuna precursor regularno Jehovata sirvir galaycärergä y familiäcunatapis cuidapäcurgä.

Familiayoj caycaptëpis, 1983 watacho precursor especial canäpaj yapay nimargan, Linapacan islacho, Palawan provinciacho yanapänapaj. Chaycho Testigucuna mana captin familiäcunawan chayman aywapäcurgä. Juc watano pasariptin suedrä wanurgan. Alapa laquishgala mana carcaycänäpaj runacunata yachachinapaj calpachacärergä. Chay runacuna Diosman yäracur mirar galaycuptin juc Salunta necesitapäcurgä juntacänapaj, chaymi tacshala localta sharcachipäcurgä. Tiempuwanna 110 runacuna Jesuspa wanuyninta Yarpänapaj reuniunman aywapäcurgan. Chaypita waquincunapis bautizacärerganmi.

Nircur 1986 wata, Culion islacho sirvinäpaj nipäcamargan, chaycho cargan tacshala marca lepra gueshyawan tiyaj runacuna. Chay marcacho carcaycaptë warmëtapis precursora especial cananpaj nergan. Galaycunanchoga manchacärergä chay gueshya contagiamänanpaj yarpar. Ichanga chaycho caycaj hermanucuna nipäcamargan chay runacuna vacunashga caycashganta, y mana manchacunapaj. Waquinnincuna juc panipa wasinman aywapäcurgan reuniuncunaman. Runacuna paycunata jucnopa ricargan, chaymi Dios mana cuyashganta sienticurgan. Nogacuna alapa cushicärergä paycunata ali wilacuycunata yachachicur, paycunapis cushish sienticurgan shamoj tiempucho sano cananpaj cajta musyar (Luc. 5:12, 13).

Wamräcuna Culion islacho yachacänanpaj, ishcay panicunata Coron marcapita invitapäcurgä paycunawan ali amigo capäcunanpaj. Samuel y Shirley ishcay panicunawan waquincunata yanapacurgan Diosta reguinanpaj y chayta rurar cushishga sienticärergan. Paycuna achca wamracunata yachachergan y warmëwanna chay wamracunapa taytancunata yachachipäcurgä, hasta 11 familiacuna yachacur galaycurgan. Chaypita ichic tiempulachona achca runacuna Jehovaman yäracur bautizacuptin mushoj congregación camacargan.

Galaycunanchoga chay marcacho nogalami anciano cargä. Chaymi sucursalpita hermanucuna nimargan Culion islacho caycaj pusaj hermanucunawan reuniunta ruranäpaj. Jina nimarganpis Marily marcaman aywanäpaj, chaynola isgun hermanucunawan reuniunta ruranäpäpis. Chay marcaman chayanapäga quimsa horatano viajapäcurgä botiwan. Reunión ushariptin familiäcunawan achca horatano chaquilapa aywapäcurgä Halsey marcaman chayanäpaj y chaycho Bibliapita runacunata yachachicärinäpaj.

Tiempuwanna Marily y Halsey marcacunacho achca runacuna Diosman guelicur Testiguman ticrargan, chayraycu cada marcacho Salunta sharcachipäcurgä. Linapacan islacho ruracashganno hermanunchicuna y ali shonguyoj runacuna charashgancunawan yanapacurgan y hasta quiquincunapis tiempunta raquirgan Salunta sharcachir arunanpaj. Marily marcachoga Salón cargan 200 runacunano juntacänapaj y chaytaga jatunyachiytapis puedejmi asambleacuna ruracänanpaj.

LAQUICUR JAPALÄ SIENTICUSHGÄ, NIRCUR CUSHISHGA CASHGÄ

1993 watacho wamräcuna mozuna caycargan, noga Adelwan congregaciunta watucur galaycurgä Filipinas naciuncho. Nircur 2000 watacho, Escuela de Entrenamiento Ministerial nishgancho yachachicoj canäpaj invitamargan. Noga yarpaj cä ‘chaytaga puedëmanrächu’ nir, ichanga Adel imaypis shacyächimaj Jehovapa poderninwan chayta ruranäpaj (Filip. 4:13). Adel nimashganga alimi cashga, paypa saludnin mana ali caycaptinpis Jehová yanapaptin payga precursorano yanapacurgan.

2006 watacho, yachachicojno caycaptë warmëta doctorcuna nergan párkinson gueshyawan caycashganta, chayga alapami laquichimargan. Chaymi warmëta nergä yachachicojno mana canäpäna payta cuidanäpaj, warmëmi ichanga nimargan: “Chayno ama rurashunchu, Jehovami yanapämäshun. Chaypa trucan doctorcunata ashipaycalämay gueshyawan yanapämänanpaj”. Chaypita warmëga mana quejacuylapa Jehovata sirvir siguirgan. Puriyta mana puediptin silla de ruedaswan predicaj, y parlayta mana puediptin juc o ishcay palabralawan reuniuncunacho comentaj. Chaymi hermanucunapis achca mensajicunata warmëta apachej shacyächinanpaj ali ejemplo cashganpita. 2013 watacho warmë wanuptin laquicuypämi cashga. Cuyacoj y ali warmimi cargan, paywanga 30 watacunami casaracushga cawapäcurgä, pero wanushganpitaga yapaymi laquishga y japalä sienticurgä.

Laquishgala mana caycänapäga, warmë munashgannomi Jehovata masraj sirvinäpaj calpachacurgä. Chaymi sucursal nimargan tagalo rimaycho congregaciuncunata watucamunäpaj, y chayta rurargä 2014 watapita 2017 watacama. Chay rimaycho jinapis watucamurgä Taiwán, Estados Unidos y Canadá naciuncunacho. Nircur 2019 watachoga Diospita Yachachicojcunapaj Escuelacho yachachergä inglés rimaycho, chayga cargan India y Tailandia naciuncunacho. Chauraga más ocupado Jehovata sirvircaycaptëga más cushishmi sienticö.

JEHOVAGA MANAMI JAGUIMASHGANCHICHU

Cada congregación sirvishgächoga raslami yachacaj cä. Hermanucunaga ali y cuyacojmi cargan. Jehová imaypis yanapämashgantami ricargä, chaymi payman lapan shongüwan yäracö. Cananga Filipinas naciuncho juc congregaciuncho precursor especialno sirviycä. Caychoga hermanucuna alapami cuyapäcaman, y cushishgami sienticö. Jinapis alapami cushicö Samuel y Shirley mamanno Jehovata ali sirviycashganpita (3 Juan 4).

Imayca pruebacunapami pasargä, warmë gueshyaptin ichic ichiclapa más peoraycashganta y wanushgantapis ricargä. Jina caru marcacunacho sirvishgäpis sasami cashga. Ichanga Jehovaga “manami noqantsipita karuchötsu kaykan, sinöqa nawpantsichömi kaykan” (Hech. 17:27). Chaymi Jehovataga alapami agradecicö, carucho Payta sirvir caycaptinchipis yanapämanchimi (Is. 59:1). Payga chapämajnë y salvamajnëmi cashga, y nogawanga imaypis caycashga. Aumi, japaläga manami imaypis cashgächu.