¿Musyashcanquichu?

Jerusalén templucho sacerdoticuna, ¿imata rurapäcoj uywacunapa yawarninwan?

UNAY nación Israelcho sacerdoticuna waranganpa waranganpa chaychicaj uywacunata templucho rupachipäcoj cada wata. Escribej judío runa Josefo jutiyoj escribergan Pascua fiestachoshi israelitacuna 250 mil uyshacunata pishtaj altarcho rupachinanpaj. Chauraga uywacunapa yawarnin mashtacashga caycargan (Lev. 1:10, 11; Núm. 28:16, 19). Y chay yawarga templupita yargunanpaj, ¿imata rurapäcoj?

Herodespa templuncho arqueólogo runacuna ojtiycur taripäcurgan tunelcunata. Chay tunelcunapa uywacunapa yawarnin aywaj, chaynopa templupita yargunanpaj.

Chay tunelcuna imano rurashga cashganpita yachacushun:

• Altarpa chaquincho uchcuyojmi cargan. Unay judiucunapa costumbrincunapita Misná jutiyoj libro wilacun altarpa chaquincho ishcay uchcu esquinancho cashga. Uywacunapa yawarnin chaypa yargoj y altarta maylananpaj yacupis yargoj, chaypita Cedrón ragraman chayaj.

  Unay judiucunapa pasashganpita juc libro wilacun arqueologocuna templupa cercalancho tarishga achca tunelcunata, y chaypa yacupis y uywacunapa yawarninpis templunpita yargushganta. Arqueologocuna tarishganta tincun Misná libro nishganwan.

• Templuman achca yacu chayaj. Sacerdoticuna altarpa chaquin maylananpaj y tunelcuna limpio caycänanpaj achca yacu templuman chayanman cargan. ¿Imanotaj templuman achca yacu chayaj? Templuman yacuta chayachej Jerusalencho caycaj pozucunapita, estanquicunapita y achca sequiacunapitapis. Joseph Patrich arqueólogo runa tantiachergan: “Unay wichanpita cay templulami shumaj camacächishga caycan maypa yacu yaycunanpaj y maypa yargunanpäpis, chayno limpio caycänanpaj”.