VIDANPITA WILACUY
Jehová yanapamaptinchirämi imatapis vencishun
ESTRASBURGO marcacho (Francia naciuncho) 28 de enero 2010 wata caycashgäpita yarpä, chay tiempuga alapa gasaycargan. Chay naciunmanga manami aywargäcu pasiaj, sinoga aywargä Europacho más mandaj juezcunaman Jehovapa testiguncunata defendinäpaj. Francia autoridäcuna Jehovapa testiguncunata exigipäcurgan 64 millones eurosta (257 millones de soles) pagananpaj pero chayga gobiernupa leyninpa crontranchu caycargan. Nogacuna defendinapämi tribunalman aywapäcurgä, manami guellay asuntulapaj aywapäcurgachu sinoga Jehovapa jutinta defendinapaj, Jehovapa testiguncunata ali ricamänanchipaj y chaynopa jaguimänanchipaj Jehovata libre aduranapaj (1 Sam. 17:47). Mä maslata wilaparcushayqui.
1999 watacho Francia naciunpita autoridäcuna donaciunninchicunapita impuestuta pagananpaj hermanucunata mañacurgan. Donaciunninchicuna 1993 y 1996 watapita cargan. Chaymi Francia autoridänincunaman chay problemacunata alchanapaj aywapacurgä. Pero autoridäcunaga manami cäsupäcämarganchu, chaypita Testigucunapa guellayninta apacärirgan 4.500.000 eurosta (18 millones de soles). Chay guellayta cutichimananchipäga Europacho más mandaj juezcunaman aywapäcurgä. Pero paycuna manaraj imatapis decidir nipäcämargan gobiernupa abogaduncunawan juc juezman aywapäcunäpaj chaynopa acuerduman chayanapaj.
Nogacunaga yarpapäcurgä chay jueza nipäcamangachi cay asuntuta arreglanapaj Gobiernuta pagapäcunapaj. Pero decidido caycarganchi ni ichiclatapis mana pagananchipaj, pagaptinchega Jehovapa ricaynincho mana alimi caycanman cargan. Chay guellayga hermanucunapa contribuciunninmi cargan Jehovapa Gobiernunta yanapäcunanpaj (Mat. 22:21). Chay juezcuna nimashganchilapitami chay reuniunman aywapäcurgä.
2010 watacho Testigucunata defendej abugaducunawan carcaycä Europapita más mandaj juezcunapita naupancho.
Juezcunapa shumaj localnincho juntacärirgä. Yarpapäcushgäno pasargan, juezaga nipäcamargan gobiernuta waquin caj impuestuta pagapäcunapaj. Chaymi juezta tapucärergä: “¿Musyanquichu Franciapa gobiernun 4.500.000 eurosta quitapäcamashgantana?” nir.
Payga ‘¿ima?’ nergan, manami musyarganchu autoridäcuna chayta rurashganta. Juezaga tapupargan gobiernupa abogaduncunata ‘¿chayga rasunchu?’ nir, ‘aumi’ niptenga, juezaga alapa rabiacurgan, y paycunata gayapar reuniunta ushargan. Chay hora cuentata gocärirgä juiciuta gananapaj Jehová yanapaycämashganta. Chaypita nogacunaga alapa cushishga chay reuniunpita yargupäcurgä. ¡Shumajmi cashga!
30 de junio 2011 wata, Europacho más mandaj juezcunaga Francia Gobiernuta nipäcurgan impuestuta manana mañamänanchipaj y apacushganpita más guellayta cutichipäcamänanpaj. Chay juezcuna decidipäcushgancunaga yanapaycan canancama Francia hermanunchicunata Jehovata libre sirvipäcunanpaj. Juc tapucuylawan Francia autoridäcunataga vencipäcushgä, y chayga David juc rumilawan Goliat-ta vencishganno cashga. Jehová Davidta yanapashganno nogacunatapis yanapäcamashga (1 Sam. 17:45-47).
Manami caylatachu ganapäcushgä. Luta religiosucuna y Gobiernucuna michämaptinchipis 1.225 juiciucunata 70 naciuncunacho ganapäcurgä. Cayta ganapäcushgäcunaga yanapämanchi Gobiernucuna testigucunata derechunchicunata reconocimänanchipaj juc religión cashganpita, chaynopa predicanapaj mana michamänanchipaj jina politicaman mana meticushganchita y yawarcunata mana chasquishganchitapis respetananpaj.
Chauraga, ¿imanopataj noga yanapacur galaycurgä Jehovapa testiguncunata defendej abugaduno Europa naciuncho? Mä wilapäshayqui.
TAYTÄCUNAGA LAPAN SHONGUNWAN JEHOVATA SIRVIRGAN
Taytäcunaga George y Lucille Galaad Escuelapita 12 caj claseman aywashga. Y 1956 wata Etiopía naciuncho sirviycaptin noga yurishcä, ‘wilacoj Felipeman’ yarpar jutichipämargan Philip (Hech. 21:8). Chay naciuncho yurishga mayor caj panë Judy y shulca caj wauguë Leslie. Juc wata pasariptin Etiopía autoridäcunaga mandapäcamargan manana reuniuncunaman aywanapaj y predicaj manana yargunapaj. Wamralä cashgäraycu taytäcunawan predicaj y reuniunman pacapaylapa aywapäcuptë alapa gustamaj. Pero 1960 watacho chay naciunpita aywacärinäpaj nipäcamargan.
1959 watacho Nathan Knorr (ichoj laducho) familiäta watucuycan Adís Abeba, Etiopía naciuncho.
Familiäwan Wichita marcaman (Kansas, Estados Unidos naciuncho) aywapäcurgä. Misiunero manana captinpis taytäcunaga ganas ganasla predicaj y shongupita Jehovata sirvej, chaynolami sirvipäcunäpaj hermanöcunatapis yachachimaj. 13 watayoj caycaptë bautizacurgä y quimsa wata pasariptin Perú naciuncho Arequipa marcaman aywapäcurgä masraj predicapäcunäpaj.
1974 watacho 18 watayoj caycaptë, Perú naciuncho dirigej hermanucuna nimargan chuscu hermanucunawan precursor especialno sirvipäcunäpaj. Mandapäcamargan sierracho mana Testigo cashgan marcacunacho predicapäcunäpaj, chaycho Jehovapa wilacuyninta quechua y aymara parlajcunata yachachicurgä. Maypa aywarpis carrupa rurinchu punupäcoj cä y chay carruta “El Arca” nishgan jutichipäcurgä. Chay marcacunacho predicapäcuptë runacunata Bibliawan yachachipäcurgä Jehová mana alicunata ushacächinanpaj y shamoj tiempucho waccha cayga, gueshyapis y wanuypis manana canganapaj (Apoc. 21:3, 4). Achcajmi Jehovapa wilacuyninta chasquergan. Chayman yarpar alapa cushicömi.
1974 watacho, “El Arca” nishgan carruga.
ESTADOS UNIDOS BETELCHO ARUR GALAYCURGÄ
1977 watacho Jehovapa testiguncunata pushaj Albert Schroeder wauguinchi Perú naciunman visitaj shamushga. Pay animamargan solicitudnëta mandanäpaj Estados Unidos Betelcho arunäpaj. Y chaytami rurargä. Walca quilla pasariptin 17 de junio 1977 watacho, Brooklyn Betelcho arur galaycurgä. Chaycho chuscu wata arurgä pichapacuycho y edificiuta alchachir.
1979 watacho, casaracushgä junaj.
Junio 1978 watacho Nueva Orleans marcacho (Luisiana, Estados Unidos naciuncho) jatun asambleaman aywargä, chaycho reguirgä Elizabeth Avallone panita. Taytäcunano paypa taytancunapis Jehovata shongupita cuyaj. Elizabeth chuscu watana precursora regularno sirviycargan, y wanunancama chayno Jehovata sirviyta munargan. Reguinacur galaycärergä y 20 de octubre 1979 watacho casaranacärirgä, nircur ishcäcuna Betelcho arur galaycärergä.
Casaracärishgäpitaga Brooklyn Spanish congregaciunchomi yanapacärergä, chaycho hermanucunaga alapami cuyapäcämashga. Canancamayaj chuscu congregaciuncunachomi yanapäcärirgä, chaycho hermanucunaga alapa cuyapäcämaj y animapäcämaj Betelcho sirvipäcunäpaj. Alapami agradecicärë hermanucunata y familiäcunata edayashga taytäcunata cuidar yanapämashganpita.
1986 watacho waquin Betelcho arojcunawan Brooklyn Spanish congregaciuncho carcaycargä.
ABOGADUNO YANAPACUR GALAYCURGÄ
1982 watacho enero quillacho nimargan Betelcho abogaduno Jehovapa testiguncunata defendinäpaj. Quimsa wata pasarcuptin nipäcamargan universidäman aywanäpaj, abugaduno papelnëta jorgunäpaj. Universidächo yachacushgä imano Jehovapa Testiguncuna achca juiciucunata ganashga, Estados Uniduscho y waquin naciuncunachopis. Chayga yanapashga waquin naciuncunacho runacunapa derechuncunata respetapäcunanpaj.
1986 wata, 30 watayoj caycaptë mozularaj caycar nimargan Betelcho abogaducunapa dirigej caycanäpaj. Cushicurgämi chay jatun cargucho yanapacunäpaj nimaptin, pero alapa yarpachacurgä ‘¿alichuraj rurashaj?’ nir.
1988 watacho, abugaduno yanapacunäpaj papelnëta jorgurgä, pero mana cuentata gocurgächu universidächo estudiashgäpita Jehovapita carupacuycashgäta. Universidäman aywajcunaga ayvecis yachaj tucärin, guellayta más cuyayta yachacärin, chayga nogatapis pasamargan. Pero warmë Elizabeth yanapämargan Jehovaman yapay guelicunäpaj. Yachacushgämi ali cawanapäga manami yachaj cashganchilapitachu, sinoga Jehovawan amigo cananchi y hermanunchicunata cuyananchi.
JEHOVATA LIBRE SIRVINAPAJ JUZGADUCHO DEFENDIPÄCUSHGÄ
Universidäta usharcur lapan tiempöwan abogaduno Betelcho y may chaychopis Jehovapa testiguncuna libre Jehovata sirvipäcunanpaj defendir yanapacurgä. Chaycho yanapacur alapami cushicurgä, pero imaylapis cambiucuna captenga sasanomi cashga. Chaynomi cashga 1990 watacho pushaj hermanucuna nipäcamaptin chay watapita publicaciunninchicuna gratisla aypunanchipaj. Congregaciuncho hermanucuna imano chayta rurananpaj nogacuna wilapänämi cargan. Pushaj hermanucuna chayno decidishganga yanapämashganchi congregaciuncunacho y Betelcho más fácil aruycänapaj jina autoridäcuna mana impuestuta cobramänanchipaj. Waquincunaga manchacur yarpapäcurgan ‘¿maypitataj guellayta jorgushun publicaciuncunata ruranapaj?’ y ‘¿imanopataj predicashun?’ nir. Pero chayga manami pasashgachu. 1990 watapita más Jehovapa Testiguncuna mirashga y runacunapis guellayta manami paganrajchu publicaciuncunata chasquinanpaj. Noga cuentata gocurgä Jehovapa yanapacuyninwanrämi y pushaj hermanucunata cäsucuptinchi cambiucunaga ali yargun (Éx. 15:2; Mat. 24:45).
Abogadunchicuna ali captinpis hermanunchicuna ali portacushganmi yanapashga achca naciuncunacho Jehovata libre sirvinanchipaj. Chayga pasargan 1998 wata Cuba naciuncho, Jehovapa Testiguncunata Pushaj quimsa hermanucuna warmincunawan aywargan juc asambleaman. Nogacuna autoridäcunawan parlaptëpis, Pushaj hermanucuna ali portacushganpita autoridäcuna cuentata gocurgan politicaman manami meticushganchita.
Ayvecisga libre predicanapaj “ley nishganpita välicur ali noticiacunata defendinapaj” juiciuman aywanchi (Filip. 1:7, TNM). Achca watapami Europacho y Corea del Sur naciuncho autoridäcuna obligamänanchipaj munargan soldado cananchipaj. Chayraycurmi Europacho 18.000 hermanucunata y Coreacho 19.000 hermanucunata carcelargan.
7 de julio 2011 watacho, Bayatyan hermanunchi Armeniapa autoridänincunawan juiciuman aywargan, chay juiciutaga Europacho más mandaj juezcunami ricargan. Paycuna nipäcurgan autoridäcunata cuartelman mana aywayta munajcunataga mana obligapäcunanpaj, sinoga imalachopis yanapacunanpaj ninanpaj. Tiempo pasarcuptin 28 de junio 2018 watacho Corea del Sur naciuncho más mandaj juezcuna chaynopis rurananpaj nipäcurgan. Chayga pasargan joven hermanunchicuna feninraycu soldaduno mana sirviyta munashganraycurmi.
Lapan naciuncunacho Betelcho cajcunaga yanapacärë hermanucunata Jehovata libre sirvipäcunanpaj, y chaypäga autoridäcuna michaycaptin defendipäcö. Chayta rurar alapami cushicärë. ¿Imanir? Juiciuta ganar o mana ganarpis autoridäcunaga Jehovapita yachacäringami (Mat. 10:18). Juezcuna, autoridäcuna, periodistacuna y waquin runacunapis utilizashganchi textucunata leipäcunmi y juiciucho Bibliapita parlapaptinchi wiyapäcunmi. Ali shonguyoj runacunaga Jehovapa testiguncunata reguipäcun y cuentata gocärin yachachishganchega Bibliacho caycashganta, chaymi waquincunaga Testigucunawan Bibliata estudiar galaycärin y bautizacärinpis.
¡GRACIASLÄ, JEHOVÁ!
40 watapami yanapacushgä achca naciuncho caycaj Betelcunacho hermanunchicunata Jehovata libre sirvipäcunanpaj, chaypäga más mandaj autoridäcunawan y juezcunawanmi parlapäcushgä. Jehovata libre sirvipäcunanpaj defendej hermanucunataga alapami cuyä. Jehovaga alapami bendicimashga, chaypitaga alapami cushicö.
Elizabeth warmëga cuyacuywanmi yanapämashga 45 watapa imayca problemacunapa pasashgächo, ayvecisga warmëga gueshyanraycu fuerzayniynaj ricacan, chayno carpis payga yanapämanmi. Chayno pay cashganpitaga alapami almiraycö.
Noga Elizabethwan cuentata gocärishgä manami fuerzanchipitachu o yachashganchipitachu rurashganchicunaga ali yargun, sinoga David nishganno “TAYTA DIOSMI kuyashqan kaqkunata imaypis yanapan” (Sal. 28:8). Aumi, Jehová yanapamaptinchirämi imatapis vencishun.