¿Yachacushgayquicu charashgayquilawan cushishga caycänayquipaj?

1. Pipis contento caycarga, ¿imamantaj yarpanman?

¿CHARASHGALAYQUIWAN contentuchu caycanqui? Pipis contento caycarga manami rabiashgachu caycanga, sinoga Jehová bendicishganman yarpar jaucala y cushishgami caycanga. Contento caycarpis imaypis yarpachacushun cawayninchiwan imata rurananchipaj cajman y más Jehovata sirvinanchipäga calpachacushun (Rom. 12:1; 1 Tim. 3:1). Chayno captinpis, munashganchino carguta manaraj chasquirpis cushishgami caycänanchi.

2. Pipis descontento carga, ¿imamantaj chayanman?

² Charashganchicunalawan mana contento carga capazchi mana alita rurar galaycushwan. Chaynomi waquincunaga arular cacun mana nestashgancunata rantinanpaj. Y waquincunaga munashgalanta munar hasta suwacuymanpis chayashga, chayga laquicuypämi caycan. Paycunaga capazchi cayno yarpapäcurgan: “Cananmi cayta munä”, “Cayga nogapajmi” o “Cay guelleyta ratula apacushaj, nircur cutichishaj” nir. Imatapis jucpata aparga suwacuycanmi, chaytaga manami Jehovata gustanchu (Prov. 30:9). Waquincunana carguta munashganta mana chasquishganraycu Jehovata manana sirvinnachu (Gál. 6:9). Chauraga juc cristiano, ¿imanopataj chayta ruraycunman? Capazchi charashgancunalawan mana contentacur ichic ichiclapa chayman chayargan.

3. Filipenses 4:11, 12 textupita, ¿imata yachacunchi?

³ Öraga manami facilchu canman charashgalanchiwan contento cananchipaj, pero yachacuyta puedinchi charashgalanchiwan contentacunanchipaj. Pablo carcelcho wichgarashga caycarganpis, cayno nergan: “Imäpis kashqalanwan kushishqa kawaytami yachakushqä” (leiriy Filipenses 4:11, 12). Charashgalanchiwan contento cananchipaj sasa captenga, Pabluno yachacuyta puedinchi charashganchicunalawan cushishga cananchipaj. Chaymi canan quimsa yanapacuycunapita yachacushun imapa pasarpis charashgalanchiwan contento caycänanchipaj.

SHONGUPITA AGRADECIDO CASHUN

4. Agradecido caycarga, ¿imanotaj sienticushun? (1 Tesalonicenses 5:18).

⁴ Imapitapis agradecido carga más cushishgami cashun (leiriy 1 Tesalonicenses 5:18). Cayman yarpäshun, shongupita agradecido carga cawanapaj captenga, manami yarparäcular cacushunchu mana charashganchita ashinanchipaj. Canan tiempo Jehovata sirvishganchicho cushishga caycarga calpachacushun más alita rurananchipaj, manami yarparäcushunchu ima carguta chasquiyta munar. Chaymi Jehová Palabran Bibliacho yachachimanchi mañacushganchicho Payta agradecicunanchipaj. Agradecido captinchega Jehová “Diosninchi jauca cawayta” gomäshun (Filip. 4:6, 7, MT).

5. Israelitacunaga, ¿imapitataj Jehovawan agradecido caycanman cargan? (Dibujutapis ricay).

⁵ Israelitacunaman yarpäshun, paycunaga Egiptucho micushgalanman yarpar Jehovapa contran jamurpaypa mana alita parlapäcurgan (Núm. 11:4-6). Chunyaj jircacho cawananpaj mana fácil captinpis israelitacuna, Jehová paycunapaj imaycacunata rurashganman yarpanman cargan chaynopa cushishga cananpaj. Egipto runacunapa ashmaynin car pasaypa nacachir aruchishganta ricar, Jehová chunca plaga castiguwan Egiptupita jorgamurgan. Yargushgan junajcho egipto runacunata mañacärergan guellayta, gorita y ropacunatapis (Éx. 12:35, 36). Jina Jehová poderninwan Puca lamarta ishcayman raquirir israelitacunata Faraonpa maquinpita salvargan. Chunyaj jircacho cada junaj maná tantata micunanpaj Jehová camaripargan. Chaurasga, ¿imanirtaj israelitacuna micuypita jamurpargan? Paycuna micupäcunanpaj carganmi, ichanga Jehová lapan goshganpita manami agradecido caycarganchu.

6. ¿Imata rurananchi agradecido cananchipaj?

⁶ ¿Imata yanapämäshun agradecido cananchipaj? Puntataga, cada junaj ali cajcuna pasamashganchilaman yarpänanchi, capazchi chay ali pasashganchipita juc ishcaylatapis anotarcushwan (Lam. 3:22, 23). Ishcay caj, cada junaj waquincuna noganchipaj rurashganpita agradecicushun y masraj Jehovata (Sal. 75:1). Quimsa caj, agradecicoj amigunchicunawan juntacashun, amigunchicuna agradecido captenga noganchipis agradecidumi cashun, ichanga amigunchicuna mana agradecido captenga noganchipis mana agradecido runa cashun (Deut. 1:26-28; 2 Tim. 3:1, 2, 5). Waquincunata ali rurashganpita agradecicunapaj yarparga mana rabiacushunchu mana charashgachicunaman yarpar.

7. Hermananchi Aci, ¿imata rurashga más contenta caycänanpaj?

⁷ Indonesia naciunpita, Aci jutiyoj hermananchi ima pasashganpita yachacushun. Pay wilacun: “COVID-19 gueshya wichancho waquincuna ali cawashganta ricar ‘nogapita más ali cawaycan’ nir yarpargä, y chaypita descontenta sienticurgä” (Gál. 6:4). Chayno mana yarpananpaj, ¿cay hermana imata rurashga? Payga cayno nin: “Jehovata sirvishgächo ali pasamashganman y imano cada junaj Pay bendicimashganman yarpargä. Chaycunapita Jehovata agradecicurgä y shongücho más cushishga sienticurgä”. Noganchipis cawayninchicho hermana Aci rurashganno ruraptinchi mana alicunapa pasaptinchipis agradecidumi caycäshun.

SONGUPITA HUMILDE CASHUN

8. ¿Baructa imata pasargan?

⁸ Profeta Jeremiaspa secretariun Baruc, juc tiempucho cawayninwan cushishga manami caycarganchu. Payga Jeremiasta yanapargan israelitacunata wilacunanpaj, Jehovata mana cäsucushganpita mana aliman chayananpaj. Jehová munashganno rurananpaj trucan Baruc quiquinpa munayninta rurayta munargan. Chaymi profeta Jeremiaswan Jehová Baructa cayno nergan: “Gamga imayca alicunata ashiycanqui. Chaycunata ama ashiychu” (Jer. 45:3-5, TNM). Jehovaga Baructa tantiachiyta munargan cawayninwan cushishga caycänanpaj y payga Jehovapa consejunta chasquirgan, chaynomi Jehovapa ricaynincho alimi caycashga.

9. 1 Corintios 4:6, 7 textupita, ¿imata yachacunchi? (Fotucunatapis ricay).

⁹ Capazchi juc hermano achca watapa Jehovata sirviycan o habilidoso runa caycan o ali aruycan Jehovata sirvishgancho, chaymi cayno yarpar galaycunman: “Noga chay carguta chasquëman” o “cayta wacta ruranäpaj nimanman” nir. Pero pay munashganta capazchi waquincuna chasquipäcun. Chay horacho mana rabiacunanpaj apóstol Pablo nishganman yarpanman 1 Corintios 4:6, 7 (leiriy) texto nishganman. Imalachopis habilidoso captinchi o ima carguta chasquiptinchipis manami merecinchichu, sinoga Jehová cuyamashpanchimi chaycunata regalutano gomanchi (Rom. 12:3, 6; Efes. 2:8, 9).

10. Humilde runa cananchipaj, ¿pïmantaj yarpananchi?

¹⁰ Jesús humilde runami cargan, pay rurashganman yarparga noganchitapis yanapämäshun humilde cananchipaj. Jesús autoridäyoj y Diospa churin carpis apostolnincunapa chaquinta maylapargan. Chaypita apóstol Juan cayno escribergan: “Jesús musyarqanmi lapantapis munayninman Taytan churashqanta. Tsaynöpis musyarqanmi pay kaqpita shamushqanta y pay kaqman kutikunanpaq kashqanta, […] discïpulunkunapa chakinta maylaparqan” (Juan 13:3-5). Capazchi Jesús yarpanman cargan ‘nogapa chaquëta maylapämanman’ nir. Diospa churin carpis manami yarparganchu ali wasicho tiyananpaj, imaycayoj cananpaj o imapitapis mana nacananpaj (Luc. 9:58). Jesús shongupita humilde cargan y charashgancunalawan cushish contento caycargan. Noganchipis payno cashun (Juan 13:15).

11. ¿Dennis hermanunchita imata yanapargan mana rabiashga caycänanpaj?

¹¹ Países Bajos naciunpita hermanunchi Dennis wilacun Jesusno humilde cananpaj calpachacushganta, pero öraga paypaj sasami caycan humilde cananpaj. Pay cayno nin: “Pipis ima carguta noga munashgäta chasquiptin rabiacur yarpä ‘chay carguga nogapämi caycan’ nir. Chayno yarpaptë humilde canäpaj temacunapita yachacö. Celularnëcho JW Library^® aplicaciuncho humilde canapaj cajpita achca textucuna marcashga caycan, chayno rasla tarinäpaj y yaparir yaparir leinäpaj. Jina celularnëcho churashcä humilde canapaj temapita discursucunata wiyanäpaj.a Yachacushcämi ima rurashgäcunapis Jehovata alabananpaj caycashganta, manami noganchita alabamänanchipaj. Jehová lapanta ruran y paywan arurpis ichiclatami ruranchi”. Ima cargutapis munashganchita mana chasquerga laquishga sienticuptinchi, chay horacho calpachacushun shongupita humilde cananchipaj. Chayno rurarga Jehovawan más amigo cashun y más cushishga caycäshun (Sant. 4:6, 8).

MUSHOJ PACHACHO CANANPAJ CAJMAN YARPACHACUNANCHI

12. Canan tiempo cushish cananchipaj, ¿imamantaj yarpänanchi? (Isaías 65:21-25).

¹² Jehová mushoj pachata aunimashganchicunaman shumaj yarparga yanapämäshun canan tiempo charashganchicunalawan cushish cananchipaj. Jehová Isaías librucho tantiachimanchi imayca problemacunapa pasaycashganchita musyashganta, pero pay aunimanchi cay lapan nacachimashganchicunata ushacächinanpaj cajta (leiriy Isaías 65:21-25). Paraisuchoga lapanchipämi shumaj wasinchi canga, cushishgami arucushun, micuyninchipis sano y mishquilami canga. Quiquinchita y wamranchicunata imapis nacachimänanchipaj cajman manami imaypis yarparaycäshunnachu (Is. 32:17, 18; Ezeq. 34:25). Chaynopa shumaj cawacunanchipaj Jehová aunimashganchita cumplingami.

13. 1) Canan tiempo, ¿ima nacaycunapataj pasaycanchi? 2) Chaycunapa pasar, ¿imanirtaj paraisuman yarpänanchi?

¹³ Canan ushanan tiempucho cawashganchiraycu alapa nacanchi, chaymi más ali caycan paraisuman yarpachacunanchipaj (2 Tim. 3:1). Jehová cada junaj yachachimanchi, calpata gomanchi y yanapämanchi cay nacaycunata aguantananchipaj (Sal. 145:14). Jina Jehová shamoj tiempupaj aunimashganchiman yarpaptinchi yanapämäshun nacaycaptinchipis jaucala cananchipaj. Capazchi canan tiempo junaj junaj alapa arurpis micunalanchipaj aypämanchi, pero chaynola manami imaypis cawashunchu. Jehová aunimanchi lapan nestashganchicunatami paraisuchoga camaripämänanchipaj (Sal. 9:18; 72:12-14). O capazchi cada junaj nanaycunawan caycanchi, laquicuycarla caycanchi, fiyu gueshyawan nacaycanchi, pero chaynolaga manami imaypis nacashunchu. Jehová aunimanchi paraisuchoga manami gueshyapis ni wanuypis canganachu (Apoc. 21:3, 4). Cay aunicuycunaman yarparga yanapämanchi canan tiempo rabiashgala mana caycänanchipaj. Chaymi pipis nacachimaptinchi, ima gueshyawan captinchi, cuyashga castanchi wanuptinpis o ima problemacunapa pasarpis jaucala y cushishgala cawacuyta puedinchimi. ¿Imanir? Canan tiempo “ñacaycunaga päsajllami” caycan y paraisuchoga lapan nacaycuna chipyaypa ushacanga (2 Cor. 4:17, 18, TDI).

14. ¿Imamantaj yarpänanchi Jehová aunicushganman masraj yäracunanchipaj?

¹⁴ Paraisucho imano cawananchipaj cajman yarpaptinchi yanapämäshun canan tiempo cushishga cananchipaj. ¿Imamantaj yarpänanchi Jehová aunicushganman masraj yäracunanchipaj? Paraisuman yarparänanchi, chaychona caycashganchino yarpashwan. Capazchi guellay mana aypamaptinchi, chay hora yarpäshun paraisuchoga manana guellayta nestashunnachu ni wacchacunapis canganachu. O ima carguta mana chasquishganchiraycur laquishga caycaptinchi, yarpäshun paraisuchoga mana ushacaj cawayta tarir juchaynaj car manami nestashunnachu ima cargutapis cushishga cananchipaj (1 Tim. 6:19). Imayca problemanchicuna captin capazchi sasa canman shamoj tiempucho imano cawacunanchipaj cajman yarpänanchipaj. Cada cadala paraisuman yarpachacuptinchi problemanchicunalaman manana yarparar cacushunnachu.

15. ¿Imata yachacunchi Christa hermananchipita?

¹⁵ Once caj parrafucho parlashganchi Dennis hermanunchipita, canan Christa warminpita parlashun. Payga cayno wilacun: “Fiyu gueshyawan caycä, imayca cuerpöpis nanan, calpaynaj ricacö, puriytapis puedëchu. Chayraycu silla de ruedasta utilizä y camalächo caycä. Chaylaraj doctorman aywargä y nimargan cay gueshyäpita imaypis mana aliyanäpaj cajta. Chay hora noga yarpargä: ‘Chay doctorga paraisupita manami musyanchu’ nir. Paraisucho imano cawanäpaj cajmanmi yarpachacö y jaucala sienticö. Canan tiempo cay fiyu gueshyata imaycanopapis aguantashaj, pero paraisuchoga imaycamayajpis cushishgami cawacushaj”.

‘JEHOVATA RISPITAJCUNATAGA MANAMI IMAPIS PISHENGACHU’

16. 1) ¿Imanirtaj David nergan Jehovata rispitajcunataga imapis pishichengachu? 2) Noganchega, ¿imata yachacunchi?

¹⁶ Cushishga caycarpis imayca problemacunapa pasashunmi. Rey Davidpis imayca problemacunapa pasashga: Quimsa churincuna wanurgan, paypita lutanta parlapäcurgan, amiguncunapis traicionargan, jina achca watapa gaticachar wanuchiyta munapäcurgan. Chaycunapa pasaycarpis cushishgami caycargan. Y Jehovapita parlar cayno nergan: “Payta rispitajcunataga manami imapis pishengachu” (Sal. 34:9, 10, TDI). ¿Imanirtaj chayta David nergan? Pay cawaynincho ricargan Jehová problemancunata mana ilgachiptinpis nestashgancunata manami pishicherganchu (Sal. 145:16). Davidno noganchipis seguro caycanchi imayca problemacunapa pasarpis Jehová imaypis yanapämäshunmi.

17. Imayca problemacunapa pasaycarpis, ¿imanirtaj cushishga caycashwan?

¹⁷ Imayca problemacunapa pasaycaptinchipis Jehovaga munan cushishga cawacunanchitami (Sal. 131:1, 2). Cananga musyanchimi imano cushishga cawananchipaj cajta. Calpachacushun shongupita agradecido y humilde cananchipaj, y mushoj pachacho cananpaj cajman yarpachacushun. Chaynopa nishun: “kushishqa kawaytami yachakushqä” (Filip. 4:11).