¿Puntata Bibliapita yachacushganchita masraj yachacuycashwanchuraj?

1. Bibliapita rasunpa cajta yachacuyta galaycur, ¿imanotaj sienticushcanqui?

BIBLIAPITA yachacur galaycushganchega yanapämashcanchi cushish cananchipaj. Yachacushganchicho tantiashcanchi Diospa jutin Jehová cashganta, paywan amigo cananchipäpis galaycushcanchi (Is. 42:8). Jina wanushgacunaga mana mayaycashganta musyarir manana laquicunchinachu cuyashga castanchi nacaycashganta (Ecl. 9:10). Yachacushganchipis Jehová cay pachata paraisuman ticrachinanpaj cajta. Chaychoga manami 70 o 80 watacunala cawashun sinoga imaycamayajpis.Chayta musyarir manami yarpachacunanchichu shamoj watacuna imano cananpaj cajta (Sal. 37:29; 90:10).

2. Pogushga cristiano carpis, ¿imanirtaj puntata Bibliapita yachacushganchipita más yachacuycäshun? (2 Pedro 1:12, 13).

² Achca watapana Testigo carpis manami gongashwanchu puntata Bibliapita yachacushganchita, cayga alapa valuryoj cashganta. Chaymi apóstol Pedro ishcay caj cartanta pogush cristianucunata escribergan, paycuna shumaj yachacushgana caycaptinpis (leiriy 2 Pedro 1:12, 13, TDI). Chay wichan congregaciuncho fiyu runacuna y lutan yachachicojcuna carcaycargan, chaymi Pedruga cristianucunapa yäracuynin sinchiyänanpaj yanapargan mana alicunaman mana ishquinanpaj (2 Ped. 2:1-3). Pedruga cristianucunata puntata yachacushganta yarpächergan Jehovata mana cacharinanpaj.

3. Lapanchi puntata Bibliapita yachacushganpita, ¿imanirtaj mastaraj yachacushwan? Juc tincuchicuywan parlacaramuy.

³ Achca watapana Jehovata sirviycarpis punta yachacushganchipita masta yachacuycäshun. Cay tincuchicuyman yarpäshun. Yanucuyta yachaj mama y wamranpis sopata yanucuyta yachan. Pero mamaga achca cuti yanucushganpita más yachacun cada jachacunata imano utilizananpaj, más mishqui sopata yanucunanpaj. Chaynolami yachacojcuna Bibliapa textuncunapita yachacun, ichanga pogushga cristianucuna reguishga textucunaman shumaj yarpachacurcur masraj yachacunman practicaman churananpaj. Paycuna bautizacushganpita imaycacunapami pasargan y Jehovata sirvishganchoga imaycacunatapis rurar yanapacurgan. Puntata Bibliapita yachacushganman yarpachacurga mastarämi yachacushwan, canan wichan vidanchicho practicaman churanapaj. Canan yachacushun puntata Bibliapita yachacushganpita imataraj más yachacunman achca watapa Jehovata sirvejnincunapis.

JEHOVÁ CAMAMAJNINCHIMI

4. Jehová camamashganchi cashganta musyarga, ¿yanapämashganchicu?

⁴ Hebreos 3:4 nin: “Tayta Dios kamaptinraq lapanpis kaykan”. Aumi, Jehová Dios camamashganchi, payga cuyacoj, yachaj y poderyoj caycan. Jehovaga camamajninchi car noganchipita lapanta musyan. Payga alapa cuyamanchi y musyanmi imata rurananchi cushishga cawananchipaj. Jehová camamashganchi cashganta musyarga, ¿yanapämashganchicu? Aumi, Jehová camamajninchi cashganta musyar yanapämashcanchi cushishga cananchipaj.

5. Jehová camamajninchi cashganta musyarmi, ¿imata yachacunchi? (Isaías 45:9-12).

⁵ Jehová camamajninchi cashganta musyarmi yachachimanchi humilde cananchipaj. Job pasashganman yarpäshun. Nacashgan horacho quiquilanman yarpargan y waquincuna ali ricanalanpaj cajman yarpargan y Jehová yarpächergan paylami camamajninchi y lapanta puedej cashganta (Job 38:1-4). Chaynopa Job cuentata gocurgan Jehová alilata rurashganta y payga manami imaypis mana alitaga ruranchu. Chaymi profeta Isaías tiempuwanga cayno escribergan: “Manca rurajta mituga manami ninchu: ‘¿Imanirtaj cay-nirajta ruraycämanqui?’ nir” (leiriy Isaías 45:9-12, TDI).

6. ¿Imanirtaj yarpachacushwan Jehová yachaj y poderyoj cashganman? (Fotucunatapis ricay).

⁶ Juc cristianuga achca tiempupa Jehovata sirviycarpis, Jehovapa Palabrancho consejunta ashinanpaj trucan quiquilanman yäracur galaycunmanchi (Job 37:23, 24). Chayno mana pasamänanchipaj, tiemputa jorgunanchi Jehová yachaj y alapa poderyoj cashganman yarpachacunapaj (Is. 40:22; 55:8, 9). Chaynopa tantiashun Jehová noganchipita más musyaj y yachaj cashganta y humildipis cashun.

7. Rahela Jehovapa marcancho cambiuta chasquinanpaj, ¿imamantaj yarpachacurgan?

⁷ Eslovenia naciunpita Rahela hermananchi, Jehovapa marcancho chayraj cambiucuna chasquinanpaj Jehová camacoj cashganman yarpachacuycargan. Pay cayno wilacun: “Jehovapa marcancho pushaj hermanunchicuna ima cambiucunapita wilacämuptin öraga sasami cargan chasquinäpaj. 2023 Jehovapa testiguncunata Pushajcunapa pusaj caj wilacuynin videucho wilacamurgan munaj caj shapranta winachinanpaj, chayta wiyashga carpis juc reuniuncho discursamoj turinchi shaprayojta ricar jucnomi sienticurgä. Chaymi Jehovata mañacurgä chay cambiuta chasquinäpaj”. Rahela hermananchi tantiargan lapanta camamajninchi Jehová marcantapis ali pushaycashganta. Gampajpis sasachi canman cambiucunata chasquinayquipaj, chaymi tiemputa raquinayqui Jehová poderyoj y yachaj cashganman shumaj yarpachacunayquipaj (Rom. 11:33-36).

¿IMANIRTAJ NACAYCUNATA DIOS PERMITIN?

8. Jehová nacaycunata permitiycashganta musyar, ¿imanotaj yanapämashcanchi?

⁸ ¿Imanirtaj nacaycunata Dios permitin? Waquin runacunaga cay tapucuypa respuestanta mana tarirmi Diospita rabiacun y waquincunana ‘Dios manami canchu’ nir yarpapäcun (Prov. 19:3). Ichanga, gam tantiashgayqui juchayoj cashganchiraycu nacaycashganchita y manami Jehovaga nacachimanchichu. Jina yachacushgayqui Jehová pacienciacoj cashganta, chaymi maychicaj runacuna paypita yachacurcaycan y musyapäcunpis pay nacaycunata ushacächinanpaj cajta (2 Ped. 3:9, 15). Caycunapita musyar yanapäshushgayqui Jehovawan más amigo canayquipaj.

9. ¿Imaytaj yarpachacunanchi imanirtaj Jehová permitiycan nacaycunata?

⁹ Jehová lapan nacaycunata ushacächinanpaj cajta pacienciawan shuyaränanchi. Ichanga nacashganchi hora o cuyashganchi castanchi wanuptin capazchi yarpashwan: “¿Imanirtaj Jehová cay nacaycunata ushacächinrächu?” nir (Hab. 1:2, 3). Chay laquesacunapa pasar, Bibliapita yachacushganchita yarpachacushun imanirtaj Jehová ali runacunapis nacananta permitiycanraja (Sal. 34:19). Jina yarpänanchi, Jehová munaycanmi nacaycunata chipyaypa ilgachinanpaj cajta.

10. Anne hermananchi maman wanushganpita jaucala sienticunanpaj, ¿imamantaj yarpargan?

¹⁰ Dios imanirtaj nacaycunata permitishganta musyarga pruebacunapa pasarpis aguantashun. Mayotte islapita hermananchi Anne, cayno wilacun: “Mamä wanushganpitaga, alapami laquicurgä. Ichanga quiquëmi cutin cutin yarpargä Jehová mana nacaycächimashganchita. Chaypa trucan payga munan lapan nacaycunata ushacächinanpaj cajta y cuyashga castanchi wanushgacunatapis cawarachimunanpaj cajta. Caycunaman yarpaptëga jaucalanami sienticö y alapami cushicö”.

11. Jehová imanir nacaycunata permitishganta musyar, ¿yanapämanchicu runacunata más yachachinanchipaj?

¹¹ Jehová imanirtaj nacaycunata permitishganta musyar más runacunata Diospita yachachishun. Pedro tantiachergan Jehová pacienciacoj cashganta y munanpis lapan runacuna juchancunapita arrepenticur cawayninta salvacärinanpaj cajta, chaymi cayno escribergan: “Tayta Dios munashqanno santu kawapäkuy” (2 Ped. 3:11). Jehová munashganno cawarga imaypis runacunata yachachicuycäshun. Noganchipis cuyacoj taytalanchi Jehovano runacunata cuyanchi y paycuna paraisucho tiyananpaj cajta munanchi. Jehová pacienciacoj cashpanmi, predicashgayqui sitiucho runacunata tiemputa goycan. Paycuna Jehovata reguir paylata adurananpaj. Gam Jehovawan aruycanqui y runacunata yanapaycanqui manaraj ushacay junaj shamuptin Jehovata reguinanpaj (1 Cor. 3:9).

USHANAN JUNAJCUNACHONA CAWAYCANCHI

12. Cay ushanan tiempucho Biblia nishganno cumplicaycashganta ricar, ¿imapita seguro caycanchi?

¹² Bibliaga yachachimanchi ushanan junajcunacho runacuna imano cananpaj cajta (2 Tim. 3:1-5). May chaycho runacuna imano cawashganta ricarga musyanchimi Biblia wilacushganno cumplicaycashganta. Runacunapa ruraynincuna más peor cashganta ricar, segurumi caycanchi Diospa Palabran wilapamashganchega rasunpa y yäracuypaj caycan (2 Tim. 3:13-15).

13. Lucas 12:15-21 nishganga, ¿imamantaj yarpächimanchi?

¹³ Ushanan tiempucho cawaycashganchita musyarga yanapämanchi riccha ricchala caycar más ali cajcunalata rurananchipaj. Chaymi Lucas 12:15-21 (leiriy) textucunacho Jesús juc tincuchicuywan yachachicurgan tiempunchita camacächir más ali cajcunalata rurananchipaj. ¿Imanirtaj chay rico runa “upa runa” cargan? Chay runaga imaycancunaraycu manami upa carganchu, sinoga quiquilanpaj yarpar tiempunta manami raquirganchu Dios munashganno rurananpaj. Chaymi rico carpis, ‘Tayta Diospäga wacsami caycargan’. ¿Imanirtaj tiempunta más ali camacächinman cargan? Jehová nergan: “¡Kanan tsakaymi wanunkipaq!”. ¿Imatataj caypita yachacunchi? Ushanan tiempo shamunanpaj ichiclana pishin, chaymi cayman yarpänanchi: “¿Ruraynëwancu ricachicuycä Diosta más sirviycashgäta? ¿Wamräcunata yanapaycä Diosta sirvinanpaj o juc cosascunata rurananpaj niycä? Tiempöta, calpäta y guellaynëtapis ¿quiquë munashgannocu utilizaycä o Jehová munashgannocu utilizaycä?”.

14. Hermananchi Miki pasashganman yarpaptinchi, ¿imanirtaj ushanan tiempucho cawaycashganchiman yarpänanchi?

¹⁴ Ushanan tiempucho cawaycashganchiman yarpaptinchega yanapämäshun cawayninchicho ali cajcunalata acrananchipaj. Chaynomi yarpargan hermananchi Miki. Pay cayno wilacun: “Colegiuta usharir universidäman aywanäpaj munargä uywacunapita estudianäpaj. Ichanga precursora regular caytapis munargä, necesitashgan sitiuman yachachicoj aywanäpaj. Pogush hermanunchicuna shumaj yarpächimargan ‘universidächo estudiaptiquega y precursora canayquipaj tiempuyqui aypangachuraj’ nir. Jinapis yarpächimargan paraíso ichiclana pishiycashganta y chaycho achca uywacunapita más yachacunäpaj canga. Chaymi decidirgä walca tiempula imalatapis estudianapaj, cayga yanapämargan juc aruyta tarinäpaj y precursora regularnopis yanapacunäpaj. Tiempuwanna Ecuador naciunman aywacurgä lapan tiempöwan yachachicunäpaj”. Cananga hermananchi Miki runanwan Ecuador naciuncho yanapacuycan congregaciuncunata watucojno.

15. ¿Imata yachacunchi Santiago pasashganpita? (Fotucunatapis ricay).

¹⁵ Mana uticaypa yachachicuycäshun pipis mana wiyamaptinchipis, tiempuwanna capazchi wiyacuyta munapäcunga. Yarpäshun Jesuspa wauguin Santiago ima pasashganta. Santiaguga Jesusta ricargan imano winashganta, Mesiasman ticrashganta y waquincunapita más ali yachachicushgantapis. Chay lapanta ricaycarpis manami Jesuspa discipulunman ticrarganchu, sinoga Jesús cawarimushganpitarajmi discipulunman ticrargan. Chaypita pogush cristiano carganb (Juan 7:5; Gál. 2:9). Chaynolami familianchicuna o waquin runacuna Bibliapita yachachicuptinchi mana wiyayta munaptenga mana uticaylapa yachachicuycäshun. Ushanan tiempucho cawaycashganchita musyarmi masraj runacunata Diospita yachachinanchi. Capazchi tiempuwanraj chay runacuna ali wilacuyta chasquipäcunga y waquincunana jatun nacay wichanchoraj chasquipäcunga.c

JEHOVÁ YACHAYCÄCHIMASHGANCHITA IMAYPIS AGRADECIDO CAYCÄSHUN

16. Bibliapita yachachicuycuna, ¿imanotaj yanapashushgayqui? (“Yachacushgayquipita waquincunata parlapay” nej recuadrutapis ricay).

¹⁶ Jehovapa marcancho Bibliapita ali yachachicuynincuna caycan, Jehovapa sirvejnincunapaj y Diosta mana reguejcunapajpis. Ushanan semanacho shumaj discursucuna caycan, jw.org paginanchicho videucuna caycan y más yachachicuycunapis, jina revistacunapis caycan mana Testigo cajcunapaj. Cay yachachicuycuna testigo cajcunatapis yanapämanchi Jehovata más cuyananchipaj, Palabranman más yäracunanchipaj y ali yachachicoj cananchipäpis (Sal. 19:7).

17. Puntata Bibliapita yachacushgayqui, ¿imacunachotaj yanapäshunquiman?

¹⁷ Achca watapana Jehovata sirvirpis pushaj hermanunchicuna Bibliapita shumaj tantiashganpita wilapämaptinchega cushicunchimi. Chayno captinpis agradecido caycanchi puntata Bibliapita yachacushganchita, cay yachacuycunapitaga lapanchi más yachacuyta puedinchi. Pero quiquinchi munashgalanchiman yarparga ima cambiucunatapis rurananchipaj nimaptinchega sasami canman. Chay hora humilde cananchi y yarpänanchi quiquin Jehová marcanta pushaycashganta. Payga camamajninchi, yachaj y poderyoj car imaypis alilatami ruran. Chaymi noganchi o cuyashga castanchi o amigunchi ima problemacunapa pasaycashganta pacienciacoj cananchi y yarpänanchi imanir Jehová nacaycunata permitiycashganta. Ushanan tiempuchona cawaycashganchita y cay mundo ushacänanpaj ichiclana pishiycashganta musyar, shumaj yarpänanchi imata rurananchi guellayninchiwan y tiempunchiwanpis. Jehová yachachimashganchita yachacuycäshun, chaynopa ali decisiuncunata acrashun y Jehovatapis cäsucushun.