Liejcuna tapucärishgan
¿Ima ‘yarpayta’ Jehová entero pachacho gobiernucunaman churanga?
Jatun nacay galaycunanpaj Apocalipsis 17:16, 17 cayno wilacun: “Rikashqayki chunka waqrakuna y mantsariypaq uywapis tsay wayrapakuq warmita [o mañosa warmi] fiyupami chikipäkunqa. Tsaymi lapan imaykantapis apakur qarapächulata kachaykunqa. Tsaypitanami aytsanta mikupäkunqa y putsuq kaqtanami rupatsipäkunqa. Tsaypita Tayta Dios yarpayta qoshqannölami tsay chunka waqrakuna wilanakur uywata munayninta qonqa. Tsaymi tsay uywa munayniyuq kanqa Tayta Dios nishqannöla lapanpis cumplikänanyaq”. Publicaciunninchicho yachacushcanchi Jehová gobiernucunata yarpayninta gonga lapan luta religiuncunata ushacächinanpaj.
Cay textucunapita canan shumaj tantiashcanchi. Jehová yarpayninta gobiernucunata gonga chaynopa gobiernucunaga autoridäninta manchariypaj puca uywata gonanpaj. Caycuna, ¿imanotaj cumplicanga? Masta tantiananchipaj cay tapucuycunapa respuestanta yachacushun.
¿Picunapajtaj cay profecía parlaycan? Cay profeciaga parlan mañosa warmipita y juc caj jutin caycan ‘jatuncaray Babilonia marca’ caytaga tincuycächin entero pachacho luta religiuncunawan. Entero pachacho lapan runacuna jauca cawacuyta munar 1919 wata camacächishga Sociedad de Naciones nishgan, canan tiempucho reguinchi Organización de las Naciones Unidas nishganno. Cayga tincuycächin manchariypaj puca uywawan (Apoc. 17:3-5). Y chunca wagracunata tincuycächin entero pachacho caycaj gobiernucunawan y chay gobiernucunaga manchariypaj puca uywata yanapan.
¿Imanotaj ricacan Apocalipsis librucho mañosa warmi manchariypaj puca uywawan? Mañosa warmiga manchariypaj puca uywata montaraycan paypa munayninta rurananpaj.
¿Imata pasanga mañosa warmita? Manchariypaj puca uywa chunca wagracunawan mañosa warmita chiquinga, lapan riquezancunata guechunga y mana ali rurashgantapis lapanpa naupancho musyachicunga y Jehová nishganno castigashga canga y ilgächishga canga (Apoc. 17:1; 18:8). Chaynomi lapan luta religiuncuna ushacanga. Luta religiuncuna manaraj ushar Jehová yarpayninta entero pachacho gobiernucunata gonga chaynomi gobiernucunaga rurananpaj cajga unay manami pasashgachu.
¿Imata Jehová ruranga gobiernucuna rurananpaj? Yachacushganchino Jehová entero pachacho gobiernucunaman yarpayninta churanga. Chay chunca wagracuna poderninta y autoridäninta manchariypaj puca uywata gonga. Chay manchariypaj puca uywaga Naciones Unidas caycan (Apoc. 17:13). Chauraga, ¿quiquin entero pachacho gobiernucuna decidenga caycunata rurananpaj? Manami, cay profeciacho nimanchi quiquin Jehová imatapis entero pachacho gobiernucuna rurananpaj rurachenga (Prov. 21:1; Isaías 44:28 textuwan tincuchiy). ¿Entero pachacho gobiernucunaga autoridäninta Naciones Unidas ichic ichiclapa gonga? Manami, ilajpitami canga. Entero pachacho gobiernucuna autoridäninta manchariypaj puca uywata goptinraj Jehová munashganno manchariypaj puca uywaga lapan luta religiuncunata atacanga ushacächinanpaj.
Chauraga, ¿ima pasananpaj cajta shuyarashwan? Manami shuyarashwanchichu noticiacunacho ricananpaj entero pachacho gobiernucuna ichic ichiclapa Naciones Unidas nishganta yanapananpaj. Más bienga ilajpita Jehová yarpayninta entero pachacho gobiernucunaman churanga, chaynomi autoridäninta Naciones Unidasta gonanpaj. Chayta pasar musyashun jatun nacay galaycunanpaj caycashganta. Cayga ilajpita pasanga, chaymi “mayaq mayaqla” caycäshun (1 Tes. 5:6).