Nacaycunapa pasaycaj warmicunata yanapananpaj
“ ENTERO munducho maychicaj warmicuna y jipash wamracunapis magapäcush cargan, fiyu runacuna insultaypa parlapan y nacachipäcun. Gamta, ¿chayno pasashushgayquicu? Caychomi yachacushun Dios warmicunapaj yarpachacushganta y pay imata ruranga warmicuna manana nacananpaj”.
Chaynomi nin jw.org paginanchicho “Seguridad para la mujer: ¿Qué dice la Biblia?” nej yachachicuycho y ushanan cajchomi caycan copiata jorgunanchipaj. Estados Unidos naciunpita juc hermana Stacy jutiyoj cayno wilacun: “Marcächo autoridäcuna juc sitiuta camacächish magash warmicunata chapänanpaj. Chayman juc nanawan cay yachachicuypita copiata jorgur apacurgä”.
Chay sitiucho aroj más copiacunata mañacurgan chaycho tiyaj warmicunata aypunanpaj. Chaymi 40 copiacunata chay yachachicuypita y 30 tarjetacunata jw.org paginanchipita aypurgan. Juc cutichona encargashga warmi nergan chaycho caycaj warmicunata imano Bibliapita yachacushganchita yachachinanpaj.
Juc caj sitiucho magash warmicunata chapänanpaj cajman Stacy ishcay hermanacunawan aywapäcurgan. Chaycho paycunata pichga trataducunata shumaj chasquipäcurgan y mastapis mañacurgan. Chaycho aroj warmi nergan: “Caycho tiyaj warmicuna cay folleto shumaj yanapanga”. Yapay cutiptin chaycho tiyaj warmicuna juntacargan Bibliapita imano yachachishganchita ricananpaj y ishcay cajcuna nipäcurgan Salón del Reinuman aywapäcunanpaj chay ushanan semanalacho.
Stacy wilacun: “Cay folletuga warmicuna shumaj chasquishganpita alapa cushichiman. Cay yachachicuy warmicunapaj copiata jorgurir Diospa ali wilacuyninpita apaycächinchi. Cay warmicuna Diospa ali wilacuyninta shumaj chasquishganpita alapa cushichimashganchi y Jehovapis bendecimäshun jw.org paginanchicho yargamushga yachachicuywan waquincunata yachachiptinchi”.