“Juk shonqula jawka kawapäkuy”
APÓSTOL Pablo Éfeso cristianucunata cayno consejargan: “Kuyanakur imapitapis pacienciakäriy. Espíritu Santu yanapashushqaykinöla yärakuq mayikikunawan juk shonqula jawka kawapäkuy” (Efes. 4:2, 3).
Pablo nergan Diospa santo espiritun yanapämaptinchiraj yäracoj masinchicunawan juc shongunola cawacushun. Chayno captinpis ali goyänanchipaj cada ununchimi calpachacunanchi.
Cayta tantiananchipaj cayman yarpäshun. Pipis juc ropata regalashuptiqui gampitami canga shumaj cuidanayquipaj. Chauraga ropayqui malogracaptenga garashojniquita manami ninquichu ‘gam ropäta malograshgayqui’ nir.
Chaynolami Jehová santo espiritunta regalutano gomashganchi yäracoj masinchicunawan juc shongunola cananchipaj, pero maquinchichomi caycan paycunawan ali apanacunanchipaj. Chauraga congregaciuncho piwanpis mana ali apanacuptinchi, cayman yarpäshun: “¿Rasunpacu calpachacuycä paywan ali apanacärinapaj?”.
JUC SHONGUNOLA JAUCA CAWACUNANCHIPAJ CALPACHACUSHUN
Yachacushganchino Pablo nergan ayvecisga yäracoj masinchicunawan juc shongunola cawananchipaj calpachacunanchirämi y masraj congregaciuncho pipis ofendimaptinchi. Imalapitapis ofendimaptinchega, ¿raslacu ofendimajninchi cajman aywaycur parlashwanchuraj? Manami. Ofendimajninchiwan manaraj parlar alirämi yarpänanchi: “¿yanapämangachuraj ali apanacunäpaj o más problemacuna canga?” Öraga más alimi canga ofendimajninchita perdunananchipaj (Prov. 19:11; Mar. 11:25).
Ofendimajninchiwan manaraj parlar alirämi yarpänanchi: “¿yanapämangachuraj ali apanacunäpaj o más problemacuna canga?”.
Pablo nergan: “kuyanakur imapitapis pacienciakäriy” (Efes. 4:2). Cay textupita juc libro tantiachicun “waquincuna imano cashgantapis cuyananchipaj”. Chauraga manami gongashwanchu yäracoj masinchicuna y noganchipis juchayoj cashganchita. Lapanchi calpachacunchi Tayta Dios munashganno cawacunanchipaj (Efes. 4:23, 24). Pero juchayoj carga imalachopis pantashun (Rom. 3:23). Caycunaman yarparga jucninchi jucninchi cuyanacur perdunanacushun juc shongunola cawacunanchipaj.
Cada cadala mayganpis ofendimashganchita alchaptinchi o shongulanchichopis perdunacuptinchi yäracoj masinchicunawan ‘juk shonqula jawka kawashun’ (Efesios 4:3). “Juk shonqula jawka kawapäkuy” cay texto niptenga Colosenses 2:19 textuwan tincuchin cuerpunchipa ancunwan. Cuerpunchicho mogunchicunataga ancunchi chararan juclachashga caycänanpaj. Chaynola yäracoj masinchicunata cuyaptinchi ima problemacunapis yuriptin lapan shongunchiwan perdunacurga juntula y jaucala cawacushun.
Chaurasga pipis ofendimaptinchi o imatapis rurar rabianachimaptinchi cuyapaylapa ricashun, manami jamurpashunchu (Col. 3:12). Juchayoj car öraga noganchipis waquincunata ofendishcanchi. Cayman yarpaptinchega yanapämäshun cristiano masinchicunawan juc shongula jauca cawacunanchipaj.