¿Canan wichan runacuna imano cananpaj Bibliaga wilacurganchuraj?

Biblia ima nishgan

Biblia mayna wilacurgan cada cadala runacuna mana ali comportacärinanpaj y runamasintapis mana ali tratananpaj (2 Timoteo 3:1-5).a Pero Bibliapis wilacurgan lapan runacuna chayno mana cananpaj, waquin runacunaga Dios munashganno ali comportacärinanpaj y ali yarpänanpaj cajpitapis wilacurganmi (Isaías 2:2, 3).

Cay tapucuycunapita yachacushun:

¿Imatataj Biblia wilacurgan canan wichan runacuna imano comportacärishganpita y imano yarpashganpita?

Biblia wilacun runacuna imano cashganpita y chaynoga capäcun quiquilanpaj munaj runa carmi. Chaymi runacunaga imatapis lutala ruran, quiquilanman yarpan y Dios munashganta rurananpaj trucan shongun munashgalanta ruran (2 Timoteo 3:2-4).

Biblia nishgannolami cumplicaycan. Canan runacunaga quiquincuna munashgalanman yarpan, ima convienishgalanman, cushishgala cashganman, y cawaynincho imata rurananpaj cajlaman. Chaymi cay runacunaga cayno yarpapäcun; “puntata noga, nircurpis noga, chaypitapis noga”. Waquin runacuna quiquilanpaj yarpar o imatapis munar manami agradecicunchu ni valuranchu waquin paycunapaj ima rurashganpita, ni ali cajcunatapis cuyanchu (2 Timoteo 3:2, 3).

Quiquilancuna munashgalanman yarpar Biblia nishganno runacunaga cayno capäcun:

Guellaylapaj wanoj. Waquin runacunaga guellaytami alapa cuyan. Chaymi nipäcun “guellaynëraycurmi ima charashgäcunapis caycan y cushi cushilapis cawacö” (2 Timoteo 3:2).
Orgulloso o runa tucoj. Waquincunaga ‘ima charashgancunapitami alagacun’ chaymi, ‘runa tucun y orgulloso’ capäcun (2 Timoteo 3:2, 4). Paycunaga “cayta wacta rurä yachaj runa cashgäraycu y guellaynëpis achcami caycan”, nir carcaycan.
Tumpacoj. Maychopis achca runacunami runamasincunata tumpan lutancunata parlar, Diospita mana cajcunatapis parlapäcun (2 Timoteo 3:2, 3). Cayno runacunaga waquincunata y Diostapis ashlipäcun.
Tantiayta mana munaj. Waquin runacunaga capäcun “traicionëru”, “tantiacuyta mana munaj” (2 Timoteo 3:2-4). Chayno runa cashgan ricacämun waquincunawan imalachopis acuerduman mana chayaptin y ima aunishgantapis mana cumpliptin.
Magacoj runa. Canan wichan waquin runacunaga imalapitapis fiyupami piñacärin y chayraycu runamasinta magan o wanuchinpis (2 Timoteo 3:3).
Cäsucuyta mana munaj. Jesús mayna wilacurgan canan wichan imaypitapis masraj runacuna ‘mana alicunata rurananpaj’ cajpita y más runacuna Diospa mandatuncunata mana cäsucunanpäpis (Mateo 24:12). Jina wilacurgan mana ali runacuna shuntacarcur mana alicunata rurananpäpis (Lucas 21:9).
Familianta mana cuyaj. Waquincuna “mamanta y taytanta mana cäsukuq” y “kuyakuynin” mana captinmi, familiantapis ima necesitashganta mana camaripanchu y hasta magapäcunpis (2 Timoteo 3:2, 3).
Diosman yäracoj tucärej. Diosman yäracoj tucoj runacunaga cadalami más miraycan (2 Timoteo 3:5). Chay runacunaga Dios mandashganta cäsucunanpaj trucan iglesiancho pushajnin rinrin munashgalanta niptinmi más cäsucärin (2 Timoteo 4:3, 4).

¿Imanoraj waquincuna sienticärin quiquilanpaj imatapis munaj runacunata ricar?

Quiquilanpaj imatapis munaj runacunaga alapami nacan yarpachacuywan y laquicuywanpis (Eclesiastés 7:7). Achca runacuna guellaylata cuyar waquincunata imaycanopapis engañan. Mana cuyacoj runacunaga familianta nacachin, magan y maspis. Chayraycu chay familiacho tiyajcunaga alapa yarpachacuywan, laquicuywan nacapäcun y hasta wanucuytapis munan. Aumi cay traicionero runacunaga cuyashgan castancunapa shonguntapis pasaypami laquichin.

¿Imanirtaj runacuna cada cadala más mana ali runaman ticran?

Biblia wilamanchi imanir runacuna más mana aliman ticran:

Canan wichan runacunapa cuyacuyninga ushacaycan, chaymi Diosta y runamasintapis cuyanchu. Chayraycu quiquincunalaman más yarpachacärin (Mateo 24:12).
Satanasta cielupitami cay pachaman gargapäcamushga (Apocalipsis 12:9, 12). Chaypitana imaycata ruraycan runacuna quiquilancunaman yarpar imatapis rurananpaj (1 Juan 5:19).

¿Imatataj rurashwan mana alicunata ruraj runacunapa chaupincho cawaycarpis?

Diospa palabran nin: “Tsayno kawaq runakunawanqa ama juntakaytsu” (2 Timoteo 3:5). Cayga manami ninchu runacunapita witicunapaj, sinoga niycan quiquilanman yarpaj y Diosta mana cäsucoj runacunapa amistäninta mana ashinapaj (Santiago 4:4).

¿Lapan runacunachuraj cada cadala más peor-raj comportacäringa?

Biblia mayna wilacurgan ali shongu runacunaga alapa nacananpaj y laquicunanpaj fiyu runacuna “melanaypaq mana alikunata rurapäkuptin” (Ezequiel 9:4). Chaymi cay ali shongu runacunaga quiquin munashgalanman yarpänanpaj trucan, caway vidancho Diospa leyninta cäsucun. Chayga ricacan imano coportacärishgancho y imano warmi o runa cashgancho (Malaquías 3:16, 18). Paycunaga pimaywanpis jaucala cawapäcun, guerrachopis yanapacunchu ni protestatapis ruranchu (Miqueas 4:3).

¿Lapan runacunachuraj más fiyuman ticranga?

Manami lapan runacunachu fiyu runaman ticranga, Diosninchimi ichiclacho paycunata ushacächenga (Salmo 37:38). Bibliacho “mushuq patsa” niptenga Diosta cäsucoj y alilata ruraj runacunapämi parlaycan, paycunaga imaycamapis jaucala cawapäcunga (2 Pedro 3:13; Salmo 37:11, 29). Chay pasananpaj cajpita segurumi caycanchi, canan tiempucho achca runacunata Biblia yanapargan cambiananpaj y Dios munashgannöpis cawananpaj (Efesios 4:23, 24).

a Biblia wilacurgan “ultimu tiempucho” runacuna imano cananpaj y chayraycu “aläpa nakananpaq kashqanta” (2 Timoteo 3:1, TDW). Caypita masta musyayta munarga cayta leiriy “¿Cuál es la señal de ‘los últimos días’ o de ‘los tiempos finales’?”.