Demoniucunaga ‘wanushgacunapa alman puriycan’ nir engañacun
Bibliami nin ‘may chaychopis runacunata Diablo engañaycashganta’ (Apocalipsis 12:9). Satanasga demoniuncunawan Biblia nishganman yäracunanchita mana munanchu. Paycunaga munan wanojcunapa alman may chaycho puriycashganta creinanchita, cielucho o infiernucho caycashganta creinapäpis. ¿Imanotaj chayta ruran?
Luta religiuncunawan
Lapan runacuna uywacunapis caway vidayojmi caycan
Achca religiuncuna yachachin pipis wanucuptin alman may chaycho caycashganta. Paycunapäga pipis wanuptin cuerpun alpaman cutin, alman ichanga puriycashganta nipäcun.
Biblia chaytaga manami yachachinchu. Adanta imano Dios camashganpita cayno nin: “Tsaypitanami alpapita runata TAYTA DIOS kamarkur kawananpaq senqanpa [jämayninta] pükarqan. Tsaynöpami kawaq runa kananpaq kamarqan” (Génesis 2:7). Caychoga manami ninchu Adanpa senganman juc almata pücashganta sinoga cawananpaj jämayta pücashganta.
Bibliacho uywacunatapis “alma” niptenga cawayninpaj parlaycan (Génesis 1:20, 21, 24, 30).
Bibliacho “alma” niptenga runacunapa cawayninpämi parlaycan y cawaj runaga wanunmi, chaymi Biblia claro tantiachimanchi pipis wanuptin chaylacho ushacashganta. Chaypita Biblia cayno nin:
“Juchata ruraj caj almaga wanungami” (Ezequiel 18:4, TNM).
“Paymi ichanga munayniyoj caycan almata Gehenacho ushacächinanpaj” (Mateo 10:28, TNM).
Bibliaga nimanchi wanuptinchega ushacanchimi manami nimanchichu alma yargushganta ni purishganta
Waquin textucunachopis Bibliaga wilacun animalcunapis y runacunapis wanurga alpalaman cutin (Eclesiastés 3:19, 20). Chauraga pipis wanuptin imatapis musyanchu ni imatapis mayanchu (Eclesiastés 9:5, 10).
Bibliata leiptiqui manami juc textulachopis tarinquichu wanushgacunapa “alman yargushga” nishganta. Chauraga pipis ‘castäcunapa almanta ricashcä’ niptenga Biblia nishganwan tincunchu. Diablumi chayno runacuna yarpänanta munan. Luta religiuncunapis chaytami yachachicun (Proverbios 6:16-19; 1 Timoteo 4:1, 2).
Demoniucunapa ruraynincuna
Quiquin demoniucunami wanushga castanchicuna cawaycashganno tucuyta ruran
Satanasga imaycatami ruran brujucunawan runacunata engañananpaj. Waquin brujucunaga wanushga runacunapa almanwanshi parlacärin y chaytami runacunata creichipäcun, pero Bibliaga nin wanojcunaga imatapis rurannachu (Eclesiastés 9:5, 6, 10).
¿Pero pïcunawantaj chay runacuna parlaycan? ¡Demoniucunawanmi! Pipis ninmanchi ‘wanushga castäpa vozninta wiyashcä’, pero rasun cajchoga demoniucunaga wanushga castanchipa parlashgan japuy parlamunman. Jina paycunaga musyapäcunmi castanchicuna imano cashganta, imano parlashganta y imata rurashgantapis (1 Samuel 28:3-19).
‘Cayta wacta ricashcä’ nejcuna
Wanushgacunapita parlar achca marcacunacho runacuna nipäcun ‘cayta wacta ricashcä’ nir. Chaypa guepanchopis Satanasmi caycan, payga manami munanchu Bibliapita rasunpa cajta runacuna yachacärinanta (2 Timoteo 4:4).
Waquincunaga ‘wanushga castä puriycashganta ricashcämi’ nipäcun
África naciuncho runacuna castan wanuptin pasaypa manchacun y marcanchi runacunapis chaynolami manchacärin. Pero castanchicunapa alman captenga, ¿imanirtaj manchacushwan?
Öraga pipis ricashgachi juc runata wanushgan castan nirajta. Cayta masla tantiarcunapaj parlarcushun ishcay cristianucuna imapa pasashganpita. Paycunash juc marcacho Diospita yachachicurcaycaptin juc runa gatiraycargan. Imanir gatiycashganta tapupaptin chay runash nergan: ‘Jucniquimi unay wanushga wauguëno canqui’ nir. Y cutin cutinräshi chayno nergan, pero manami chaynochu cargan. Nircur capazchi cay runaga waquincunata wilapash ‘¡wanushga wauguëwan tincushcämi!’ nir.
‘Cayta mayashcä, sueñuynëcho cayta revelamashga’ nipäcuptin
Supaycunaga runacunata engañananpaj imatapis ricachin, wiyachin o sueñuchinpis
Pilapis wilapäshushcanquichi ‘Cayta ricashcä, cayta mayashcä, sueñuynëpis manchacuypaj cashga’ ¿imaraj canga? nir. África naciuncho Marein jutiyoj warmi chacaypa punushgan horashi wanushga awilanpa vozninta wiyaj. Y manchacushpan gaparayparaj cämanpita sharcoj, chayraycu familiantapis mana punuchejchu. Tiempuwan juiciuntapis ograrganshi.
Chauraga, wanushgacunapa alman rasunpa captenga ¿castancunata manchachinmanchuraj? Manami ¿au? Chay manchachicoj almacunaga quiquin demoniucunami carcaycan.
Waquin demoniucunaga imatapis ruranmanchi pipis gueshyanpita aliyarcunanpaj. Sierra Leona naciunpita, juc warmi gueshyaycashgan wichanshi sueñuynincho wanushga papänin yuriparcur cayno nergan: ‘Juc arbulman aywanqui, hojanta palarcur yacuwan taluchinqui y upucurcunqui’ nir. Chaynolash rurargan y sänacurganshi.
Juc warmipis wilacurgan chacaypash wanushga runan ali vistishgashi yuripargan.
Chay warmicuna sueñuynincho ima ricashganta y chacaypa ima yuripashgan ¿Diospitachuraj cashga? Manami, Diosninchega chayta yachachimanchichu. Palabranchoga rasun cajlatami wilamanchi (Salmo 31:5). Demoniucunami ichanga imaycanopapis lulacur runacunata engañan.
Lapan demoniucunapita ¿mayganlapis alicunata ruranchuraj? Manami. Runacunata yanapajno captinpis, rasunpa cajchoga fiyumi capäcun. Evata yuripar, Diabluga yanapashgantano creichir parlapargan (Génesis 3:1). Pero Diabluta cäsucushganraycu, Eva wanurgan.
Satanás Evata nergan mana wanunanpaj, Eva chayta criergan pero tiempuwan wanurganmi
Fiyu runacunapis pitapis engañayta munarga puntataga ali shimilapami parlapan. Shongun imano cashgantaga juclaga manami musyanchichu. Chaychi Diablupaj parlar Diospa Palabran nin: “Kikin Satanáspis ali ángel tukurmi purin” (2 Corintios 11:14).
Diosninchi pitapis sueñuchinnachu ni imacunatapis ricächinnachu. Biblialawanmi imatapis wilacun, pipis listo caycänanpaj “ali kaqkunata rurapäkunanpaq” (2 Timoteo 3:17).
Jehovaga musyanmi supaycuna chiquimashganchita, chaymi cuyamashpanchi wilapämanchi Diablupa tranpancuna imacuna cashganta.