Demoniucunaga wanuchicojmi
Satanás demoniuncunawan chiquicoj y wanuchicoj capäcun. Unaycho Jobpa uywancunata Satanás wanuchergan. Jina lapan wamrancuna juc wasicho shuntacashga caycaptin wanuchinanpaj ‘ilajpita löcu wayrawan’ chay wasita juchuchergan. Nircur “Jobta gueshyachiran manchariypaj gueriwan. Gueripäcuran chaqui-puntapita umancama” (Job 1:7-19; 2:7, TDI).
Jesús cawashgan wichanchopis demoniucunaga waquin runacunata gaprayächergan y upayächirgan (Mateo 9:32, 33; 12:22). Demoniucunaga juc runata nacachergan y “rumikunawan takakuraykar” purichergan (Marcos 5:5). Jina juc wamratapis “supay saqtariykur fiyupa siksikyätsirqan” (Lucas 9:42).
Unayga demoniucuna runacunata gueshyachir nacachirganmi y juccunata sajtaycurpis sicsicyächergan
Canan wichanpis Satanaswan demoniucuna chaynolami rurarcaycan. Cielupita gargushga cashganpitami masraj pasaypa mana alicunata rurarcaycan. Waquin runacunata imayca gueshyacunawan nacachin, punucushgan hora manchachin y punuchinpischu. Waquin warmicunatapis violaypano abusapäcun, waquincunatapis locuyayman chayachipäcun; jina imaycata rurapäcun runacuna quiquincuna wanuchicunanpaj o juccunata wanuchinanpaj.
Canan wichanpis jinalami demoniucunaga imaycatami rurapäcun runacuna runa masinta wanuchinanpaj; waquincunatapis punuylatapis punuchinchu
Surinan naciunpita Lintina jutiyoj warmi wilacurgan juc demonio 16 ayluncunata wanuchishganpita, jina quiquintapis locuyächirgan y 18 watacunano nacachergan. Pasashganpita caynomi nin: “Demoniucunaga cushicunmi runacunata wanunancama nacarcachir”.
Jehová ichanga sirvejnincunata libranmi Satanaspa tranpancunapita (Proverbios 18:10).