Juc ángel fiyuman ticrargan
Satanás culebrawan Evata parlapargan, payta cäsucur Evaga Diospa contranchomi churacargan
Jehová camashgan angelcunaga alilatami rurapäcoj. Nircur ichanga jucnin caj pasaypa mana alita rurar galaycurgan. Payga Satanás Diablo caycan. Payga munargan runacuna Diosta adurananta trucan payta adurananpaj. Mä ricärishun imataj pasargan.
Edén jardinchoga achca frutayoj yöracunami cargan. Jehovaga Adantawan Evata nirganmi mayganpitapis palarcur micupäcunanpaj. Ichanga mandargan juc yörapa wayuyninlata mana micunanpaj. Jina nergan micurga wanupäcunanpaj (Génesis 2:9, 16, 17).
Juc cuticho, Evata juc culebra yuriparcur parlapargan. Rasunpa cajchoga quiquin Satanasmi parlaycargan. Satanás Evata nergan chay yörapa wayuyninta micurga Diosno yachaj cananpaj, jina mana wanunanpaj nergan. Pay nishgancunaga yangala cargan, lulacuycarganmi. Chayno captinpis, Satanasta cäsucurgan y chay frutata Adanta yawachergan (Génesis 3:1-6).
Chay rurashganwan claro ricacan Satanás lulacoj y mana cäsucoj cashganta. Evata nergan ‘Diosta ama cäsucuychu manami wanunquichu’. Pero manami chaynochu cargan. Paycunaga wanurganmi. Satanás ichanga manami wanurganchu pero juchata rurashganpita wanungapämi. Ushacashgancamaga runacunata lulacur engañaycan, y imaycacunatapis ruraycan runacuna Diosta mana cäsucunanpaj (Juan 8:44).
Waquin angelcunapis fiyuman ticrargan
Waquin angelcunapis mana alicunata rurayta galaycurgan. Paycunaga Pachacho caycaj cuyaylapaj warmicunata ricapargan y paycunawan cacuyta munapäcurgan. Chaypämi cielupita urämur runaman ticrargan. Paycuna rurashganga Diospa munayninpa contranchomi caycargan (Génesis 6:1, 2; Judas 6).
Mana ali angelcuna cay pachaman shamurgan warmicunawan cacunanpaj
Chay wichanchoga runacuna pasaypa nacapäcurgan. Chay angelcunapa yurishgan wamrancunaga jatuncaray runa magacoj y wanuchicojpis capäcurgan. Tiempuwanga may chaycho pasaypa mana ali ruraycunala miraycush, chayraycu Jehová lapan mana ali rurajcunata loco tamyawan ushacächish. Noewan familiancunalami salvacärirgan (Génesis 6:4, 11; 7:23).
¿Imataj pasargan chay mana ali angelcunawan? Chay hora mana wanushga captinpis, ¿imanotaj Jehová paycunata castigargan? Jehovaga cielucho jinala familiancho chasquergannachu y yapay runaman ticrapäcunantapis permitirgannachu. Pero juicio junajchomi si ushacächishga canga (2 Pedro 2:4; Judas 6).
Satanás cielupita gargushga cargan
Satanaswan demoniucuna cielupita gargushga cargan
1914 wata wichan cielucho guerra cashga. Apocalipsis libruga wilacunmi ima pasashganta: “Jana patsachönami guërrata rurarqan Miguel [Jesucristo] jutiyuq angilwan tsay puka dragón. Miguelta yanaparqan angilninkuna y dragontanami yanaparqan qatiraqnin angilkuna. Dragonta y qatiraqnin angilkunatapis guërracho vincirkurmi jana patsapita jitarpamurqan. Tsay jatunkaray dragonqa diablu nishqan Satanásmi. Paymi maytsaychöpis runakunata engañaq unay culebra kaykan. Payta y qatiraqnin angilkunata vincipäkuptinnami Tayta Dios kay patsaman jitarpamurqan”.
¿Nircur imataj pasashga? Caytapis wilacunmi Biblia: “¡Jana patsacho taqkuna, kushikäriy!”. Ali angelcunaga cushicärirganchi Satanaswan demoniucuna cielucho manana caycashganpita. Cay pachacho caycajcunawanga ¿imataj pasanman cargan? Bibliaga nin: “¡Wawalaw, kay patsacho y lamarcho kaqkuna! Jana patsapita jitarpamushqa karmi diablu fiyupa rabyashqa puriykan. Pay musyanmi walka tiempulana runakunata engañananpaq kashqanta” (Apocalipsis 12:7-9, 12).
Aumi, Satanaswan demoniucuna runacunata pasaypa nacachir engañaycarla carcaycan. Diospa contrancho caycar pasaypa fiyumi capäcun.