03 CAJ YACHACUY
¿Bibliaman yäracushwanchuraj?
Bibliacho tarinchi ali wilacuycunata y shumaj consejucunatapis. Y chay lapanta yachacuyta munarga, öraga tapucunquichi: “Bibliaga unay librunami, ¿imanir-raj yäracöman consejuncunaman y ali wilacuynincunamanpis?” ¿Rasunpachuraj Biblia yanapämanchi canan y shamoj tiempuchopis cushishga cawacunapaj? Aumi, maychicaj runacuna chayman yäracärin. ¿Imataj yanapäshunqui Bibliaman yäracunayquipaj? Ricärishun.
1. ¿Rasunpachuraj Biblia wilacamushganga?
Bibliacho escribiraycashgancunaga ‘lapanpis rasun cajlami caycan’ (Eclesiastés 12:10). Runacunapita y marcacunapita parlaptenga, rasuntami wilacamun (leiriy Lucas 1:3 y 3:1, 2). Yachaj runacuna nipäcun Bibliacho caycaj sitiucuna y imayca pasashgancunaga rasunpa cashgantami.
2. ¿Imanirtaj Bibliaman yäracushwan unay libro caycarpis?
Bibliaga mayna wilacurgan canan tiempucho imacuna pasananpaj. Chayno captinpis unay wichan runacunaga Biblia wilacushgantami yäracärejchu. Ichanga canan wichan imaycata estudiaj runacunaga nipäcun Biblia rasun cajta wilacamunganta. Aumi, “imaycamapis mana ushacajmi caycan” Diospa Palabranga (Salmo 111:8).
3. ¿Imanirtaj yäracushwan shamoj tiempupaj Biblia parlaptenga?
Shamoj tiempucho ima pasananpaj “achca wata pishiycaptinmi” Biblia wilacurgan (Isaías 46:10). Imacuna cananpaj y imano cumplicänanpäpis achca wata pishiycaptinmi wilacurgan. Canan wichan imacuna pasananpaj y runacuna imano cawananpäpis nergan. Gatejnin parrafucunacho yachacushun Bibliacho caycaj profeciacunapita. ¡Chaycunaga cushichishunquimi!a
SHUMAJ YACHACURCUNAPAJ
Yachacushun imano Biblia nishganga tincunmi imaycata estudiaj runacuna nishgancunawan y waquin profeciacunatapis ricarcushun.
4. Imaycata estudiaj runacuna nishgancunaga, Biblia nishganwanmi tincun
Jatuncaray uywacunapa janancho Pacha caycashgantami unay runacuna yarpapäcoj. VIDEUTA ricapäcuy.
Job libro wilacamushganta ricäriy, 3.500 watacunanomi pasargan escribicashganpita. Leipäcuy Job 26:7 y caypita yachacäriy:
‘Imapis mana cashgancho Pacha warcushga’ caycan Biblia niptenga, ¿ima nishwantaj?
Yacuwan ima pasanganta runacuna yachacushganta, chaylaraj 200 watacunanomi pasashga. Biblia ichanga unaynami wilacurgan chay lapanpita. Leipäcuy Job 36:27, 28 y caycunapita yachacäriy:
Biblia wilacamun yacuwan ima pasanganta, ¿ima ninquitaj chaypita?
¿Cay textucunaga yanapäshunquichu Bibliaman yäracunayquipaj?
5. Ima pasananpaj cajtami Biblia wilacurgan
Leipäcuy Isaías 44:27-45:2 y caypita yachacäriy:
Biblia mayna wilacurgan Babilonia marca imano ushacänanpaj.
539 watacho Jesús manaraj shamuptin, Ciro jutiyoj runashi soldaduncunawan Babilonia marcata ushacächergan. Y chayta rurananpäga, mayuntaräshi chaquircachergan, y puncuncuna quicharashga captinshi, mana peliaylapa yaycupäcurgan. 2.500 watacunanami pasashga Babilonia marcata ushacächishganpita, y canancama ragälami caycan. ¿Ima mastataj Biblia wilacurgan?
Leipäcuy Isaías 13:19, 20 y caypita yachacäriy:
¿Cay profeciaga imanotaj cumplicargan?
Babilonia marcapa pampacashga ruinacuna, Irak naciuncho
6. Canan wichan ima pasananpaj Biblia wilacurgan
Bibliaga nin “ultimu tiempucho” o ushanan junajcunachona cawaycanchi (2 Timoteo 3:1). Canan wichanpaj Biblia wilacushganta ricärishun.
Leipäcuy Mateo 24:6, 7 y caypita yachacäriy:
¿Imataj Biblia wilacurgan ushanan junajcunacho pasananpaj?
Leipäcuy 2 Timoteo 3:1-5 y caycunapita yachacäriy:
Biblia nishganno, ¿ushanan junajcunacho runacuna imanoshi capäcunman?
Y gamga, ¿chayta ricashcanquichu?
WAQUINCUNA NIPÄCUN: “Bibliaga cuentucunalami, manami yäracuypächu”.
¿Imanirtaj gamga Bibliaman yäracunqui? Wilacamuy.
ICHIC YACHACUY
Imaycata estudiaj runacuna nishgancunaga, Biblia nishganwanmi tincun. Lapan profeciacunapis cumplicaycan. Chaymi Bibliaman yäracunchi.
Yarpänapaj
¿Biblia wilacamushganga rasunpachuraj cashga?
¿Imanirtaj ninchi imaycata estudiaj runacuna nishgancunaga Biblia nishganwanmi tincun?
¿Bibliaga wilacunchuraj shamoj tiempupaj? ¿Imanirtaj chayta ninqui?
MASLATA YACHACUNAYQUIPAJ
¿Biblia wilacamushganga tincunchuraj imaycata estudiaj runacuna nishgancunawan?
¿Imanirtaj ninchi “ushanan junajcunacho” cawaycanchi?
“Bibliapa sojta wilacuynincuna cumplicaycanna” (Wilacamoj, 1 mayo quilla, 2011)
¿Imataj Biblia wilacurgan Grecia naciunta pasananpaj, y imanotaj cumplicargan?
‘Profetacuna wilacushgancuna’ yäracuyninchitami mirachin (5:22)
Leircuy imano juc runa Bibliapita yachacur galaycushga.
a Bibliacho caycaj profeciacunaga, shamoj tiempucho Dios imata rurananpaj cajta wilacamun.