37 CAJ YACHACUY
Bibliaga parlamunmi aruypaj guellaypäpis
¿‘Maychoraj arüman. Aycataraj chay trabajucho pagamanga’ nir imaylapis yarpachacushcanquichu? Ichanga caytapis nishcanqui ‘Jehovata sirvinäpaj y familiäta manteninäpäpis imanoparaj tiempöta aypächïman’ nir. Bibliaga consejamanchi imanotaj tiempunchita camacächishwan.
1. ¿Imatataj Biblia nin aruypaj?
Cushi cushila arucunanchitami Dios munan. Palabran cayno nin: “Runapäga mas alli caycan arushancunawan imatapis allita rurar cushisha goyäcuptin” (Eclesiastés 3:22). Diosninchega manami jamarashgalachu cacun, paynola ganas ganasla arucurga cushichishunmi.
Ali aroj runa carpis, ama gongashwanchu, Jehovata adurashganchimi imapitapis más puntacho caycanman (Juan 6:27). Payta aduranapaj tiempunchita raquerga, manami jaguiramäshunchu micuyniynaj.
2. ¿Imatataj Biblia nin guellaypita?
Guellayga yanapämanchimi, pero chayta ashicuycarla cacushwanchu (Eclesiastés 7:12). “Chararashgalayquiwan contentacäriy” ninmi Bibliaga; chauraga guellaylaman yarparäcur caycashwanchu (leiriy Hebreos 13:5). Imaypis mastaraj ashinapaj, mastaraj rantipacamunapaj yarpachacuycarga, pipa jaganmanpis chayashwanchi (Proverbios 22:7). Waquincunaga hasta guellayraycur puclapäcun ‘suertë captin ilajpita rico runaman ticrarëman’ nir. Mana ali ¿au?
3. ¿Ali shongu carga imataraj guellayninchiwan rurashun?
Noganchega Jehová rurashgannola rurashwan, ‘ima-ayca cashanpita waquincunata yanapänapaj’ (1 Timoteo 6:18). Cushicuypämi congregaciunpa gastuncunapaj guellayninchita raquiptinchi y desgraciapa pasaj hermanunchicunata yanapanapäpis. Jehovaga cushicunmi waquincunata ichiclawanpis yanapaptinchi. Ali shongulanchiwan pï maytapis juclami yanaparcushun, y chayraycurga quiquinchicunapis cushicushunmi (leiriy Hechos 20:35).
SHUMAJ YACHACURCUNAPAJ
Yachacushun imanirtaj trabajunchilacho mana cacushwanchu y charashganchilawan imano contentacunapaj.
4. Jehovapaj aruycashganchino arushun
Jehovata amatar cuyarga musyashunmi maycho y imano arunapäpis. VIDEUTA ricapäcuy y caycunapita parlapacäriy:
¿Imano arucoj runataj cargan Yeyson?
Ali arucoj carpis, ¿chaylachochuraj cacoj?
Leipäcuy Colosenses 3:23, 24 y caypita parlapacäriy:
¿Imanirtaj ‘llapan boluntäninchiwan’ arushwan?
Ganas ganasla arucuptinchipis, Jehovata adurashganchimi imapitapis más puntacho caycanman.
5. ¿Imanoraj cawayninchi canga charashganchilawan contentacurga?
Runacunaga guellayta tarinanraycur punupäcunnachu, pero Bibliaga tantiachimanchi chayno mana canapaj. Leipäcuy 1 Timoteo 6:6-8 y caypita parlapacäriy:
¿Chauraga imatataj consejacuycan Biblia?
Cashgalanwan cushishga cawacushun. VIDEUTA ricapäcuy y caypita parlapacäriy:
¿Imanirtaj cay familiacunaga walcalawan cawacurpis cushi cushila carcaycan?
Guellayninchi captinpis mastaraj ashirga, ¿alichuraj canman? Jesusga shumajmi chaypita tantiachicurgan. Leipäcuy Lucas 12:15-21 y caypita parlapacäriy:
¿Imatataj yachacunqui Jesús tantiachicushganpita? (15 caj versiculuta ricapäcuy).
Leipäcuy Proverbios 10:22 y 1 Timoteo 6:10 textuwan tincuchiy. Nircur caycunapita parlapacäriy:
Imataj más aliga canman, ¿Jehovapa amigo cashganchi o guellaylapaj wanushganchi? ¿Imanir?
¿Guellaylapaj wanojcunaga imamanraj chayanga?
6. Jehovaga imatapis faltachimäshunchu
Ushapacashga caycarpis imata rurashganchichomi ricacämunga Jehovaman yäracushganchi o mana. VIDEUTA ricapäcuy musyapäcunayquipaj ima pruebalapapis pasar imano valurcharcunapaj nircur caycunapita parlapacäriy:
¿Imacunapataj pasargan hermanulanchi?
Ali valurcharcur, ¿imatataj rurargan?
Leipäcuy Mateo 6:25-34 y caypita parlapacäriy:
¿Imatataj Jehová aunicun imaycapitapis más puntata payta sirvejcunata?
WAQUINCUNA NIPÄCUN: “Aruptërämi familiä micun, chaymi nogapäga sasa caycan lapan reuniuncunaman aywanäpaj”.
¿Bibliacho ima yachacushgayquitaj convencishunqui imaycapitapis Jehovata puntaman churashganchi alapa ali cashganta?
ICHIC YACHACUY
Trabajunchi guellayninchi captenga yanapämanchi, ichanga chaycunaraycurga Jehovapita raquicäcushwanchu.
Yarpänapaj
¿Imaraj yanapämashwan trabajunchilacho mana cacunapaj?
¿Imanoraj cawacushun charashganchilawan contentacurga?
Jehová aunimanchi imatapis mana faltachimänanchipaj, ¿imata rurartaj gamga chayman yäracunquiman?
MASLATA YACHACUNAYQUIPAJ
¿Guellayga mana alichuraj? Caypita yachacuy.
“¿Guellayraycurchuraj ima mana alipis caycan?” (jw.org paginapita yachachicuy)
Yanapacoj runa captinchi Jehovapa shongunta cushichinchi.
“¿Imataj Biblia nin yanapacoj captinchi?” (jw.org paginapita yachachicuy)
¿Mana alichuraj caycan guellayraycur puclaptinchi?
“Ima nintaj Biblia: Guellaylapaj puclaypita” (¡Ricchayna!, marzo 2015)
Yachacuy imanotaj guellaylapaj puclaj y suwacoj runata, Biblia yanapargan cambiananpaj.
“Caballucuna correj competenciacuna alapa gustamaj” (Wilacamoj, 1 noviembre quilla, 2011)