Congregaciunninchicho yanapacushun

May chaychomi caycan Jehovata aduranapaj Wasicuna, chaychomi cushi cushila Jehovata sirviycanchi. Lapan congregaciuncunata ricaj hermanucunapis cushi cushila pushaycämanchi. Imayca ruranapaj captinpis ganas ganasla arur yanapacuycanchi. ¿Imanotaj yanapacuycanqui gampis?

1. ¿Imanotaj tiempuyquita ali camacächir congregaciuncho yanapacunquiman?

Congregaciunchoga imaycami caycan yanapacunapaj. Gueshyaycajcuna o edayashga hermanucunaga manachi japalancunaga puedingachu reuniunman aywayta. Rantipacamojpis aywanga yanaparcuptinchirächi (leiriy Santiago 1:27). Diospa Wasin pichapacunapaj captin o alchachipäcuptinpis imayca caycan yanapacunapaj. Diosta cuyashpanchimi y hermanunchicunata cuyashpanchimi quiquinchicuna nishwan ‘mä imachotaj yanapacöman’ nir; chayno carga pitapis cushichishunmi (Salmo 110:3).

Y masraj caycan congregaciunninchicho yanapacunapaj. Waquin hermanucunaga ali calpachacärishganraycur siervo ministerialno o ancianunopis yanapacäriycan. Warmicunapis olgucunapis precursor regular capäcun. Achca hermanucunapis yanapacurcaycan Diospa Wasincuna may chaycho sharcachishgancho. Nircurpis waquincunaga Diospita masraj predicayta munar juc marcacunapa aywacärin.

2. ¿Imanopataj guellayninchiwan o ima charashganchicunawanpis yanapacushwan?

Biblia cayno nin: “TAYTA DIOSTA adorar imayquipis cashganpita [...] ofrendata apay” (Proverbios 3:9). Cushicuypämi aycalawanpis congregaciunninchicho yanapacuptinchi y Diospa ali wilacuynin may chayman chayananpaj yanapacuptinchipis (leiriy 2 Corintios 9:7). Imayca desgraciacunapa pasaj hermanunchicunata yanapänapäpis listumi caycanchi. Waquincunaga ganashganpita “aycalatapis” raquipäcunmi (leiriy 1 Corintios 16:2). Guellayninchita apachicushwan jinan congregaciunninchipita o donate.jw.org paginapitapis. Jehovapa voluntänin ruracänanpäga yanapacuycäshunmi.

SHUMAJ YACHACURCUNAPAJ

3. Aycalawanpis yanapacushwanmi

Mayraj Jehovawan Jesús cushicun imaycanchicunawanpis cushi cushila yanapacuptinchi. Juc cutichomi Jesús ricargan imano juc waccha warmi ishcay monedalanta winashganta. Leipäcuy Lucas 21:1-4 y caycunapita parlapacäriy:

• ¿Yanapacunapäga achca guellayninchirächu canman?

• ¿Imanotaj Jehovawan Jesús ricacun aycalawanpis cushi cushila yanapacuptinchi?

Apachicushganchi guellay imapaj cashganta, VIDEUTA ricapäcuy. Nircur caypita parlapacäriy:

VIDEO: Ima chararashganchitapis shongupita Diosninchita goshun (4:47)

• ¿Apachicushganchi guellayga imanotaj yanapacun entero munducho congregaciuncunata?

4. ¿Gampis yanapacuyta munanquichu?

Unaypitana Jehovata sirvejcunaga imaycancunawan yanapacärergan. Leipäcuy 2 Crónicas 34:9-11 y caypita parlapacäriy:

• ¿Imatataj lapan israelitacuna rurapäcurgan ‘Jehovapa templunta’ cuidapäcunanpaj?

Canan wichanpis, ¿chaynolachuraj rurapäcun Jehovapa testiguncuna? Mä VIDEUTA ricapäcuy. Nircur caycunapita parlapacäriy:

VIDEO: Jehovata aduranapaj wasicunata cuidashun (3:31)

• ¿Imanirtaj Diosta aduranapaj Wasitaga pichapacunanchiraj y alchachinapaj captenga alchachinanchiraj?

• ¿Imanoraj yanapacunquiman gampis?

5. Hermanucunaga calpachacunmanmi más cargucunata chasquinanpaj

Bibliaga wilacunmi imanotaj olgu caj cristianucuna calpachacärinman congregaciuncho ima cargulatapis chasquipäcunanpaj. Juc hermano imano chayta rurashganta ricärishun, VIDEUTA ricapäcuy. Nircur caypita parlapacäriy:

VIDEO: Hermanucuna, calpachacäriy espiritual cajcho pogunayquipaj (5:19)

• ¿Imacunatataj Ryan jutiyoj waugui rurargan congregaciunnincho masraj yanapacunanpaj?

Biblia wilacunmi imacunatataj mayna ruraycanman pipis siervo ministerial o anciano cayta munarga. Leipäcuy 1 Timoteo 3:1-13 y caycunapita parlapacäriy:

• Chauraga siervo ministerialcuna y ancianucunapis, ¿imano runataj capäcunman?

• Familiancunapis ¿imanotaj capäcunman? (4 y 11 versiculucunata ricapäcuy).

• Chay hermanucuna Biblia nishgannola ruraptenga, ¿imanoraj congregaciunnin caycanga?

ICHIC YACHACUY

Jehová Diosninchega cushicunmi tiempunchiwanpis y imayca charashganchicunawanpis congregaciunninchicho yanapacuptinchi.

Yarpänapaj

• ¿Imanotaj congregaciunninchicho yanapacushwan tiempunchiwan y calpanchiwanpis?

• ¿Imanotaj congregaciunninchicho yanapacushwan imayca charashganchicunawanpis?

• ¿Imacunata rurartaj gampis yanapacunquiman?

MASLATA YACHACUNAYQUIPAJ

Ima ninraj Dios canan wichan diezmucunata apanapaj o mana.

“¿Imatataj Biblia nin diezmupita?” (jw.org paginapita yachachicuy)

Bibliaga wilacunmi olgucuna congregaciuncho cargucunata chasquinanpaj. ¿Warmicunaga chay cargucunata chasquiyta puedinmanchuraj?

“Congregaciuncho Jehová camacächishgan cargucuna” (Wilacamoj, febrero quilla, 2021)

Yachacuy imanotaj waquin Testigucunaga ali valurcharcur, cristiano masincunaman publicaciunta apapäcun.

Congo marcaman publicaciunninchi chayan (4:25)

Yachacuy imanotaj Testigucunaga imayca ruraycunacho guellayta utilizanchi, ¿waquin religiuncunanochuraj ruranchi?

“¿Imanotaj guellaytaga Testigucuna aypaycächin lapan ruraycunapaj?” (jw.org paginapita yachachicuy)