38 CAJ YACHACUY
Cawayta goycalämashganchipita Diosta agradëcicushun
Imacunapa pasarpis cawayninchichoga cushi cushilami caycanchi, imalapitapis waquincunawan mayna asicuycanchi. ¿Imacunata rurar-raj Diosninchitaga cawaypita agradëcicushwan y imanir-raj chayta rurashwan?
1. ¿Nishwanchuraj ‘quiquëpa cawaynïwan imatapis ruräman’?
Manami. Cawayninchitaga cuidashwanmi, Taytalanchi Jehovami goycalämashcanchi. Camacojninchi captinmi Bibliapis cayno nin: “Gamlla pï-maytapis cawachinqui” (Salmo 36:9). “Paymi cawananchïpaj jämaytapis gomanchi. [...] Nistashanchïcunatapis camaripämanchi” (Hechos 17:25, 28). Aumi, Payraycurmi cawanchi. Y cushi cushila goyäcunanchipaj camaycalämashcanchi (leiriy Hechos 14:17).
2. ¿Imacunata rurar-raj cawaypitaga agradëcicushwan?
Mamayquipa pachancho winar galaycamushgayquitaga Jehová mayna ricargan. Chaypita agradëcicur, Diosta sirvej David jutiyoj runa cayno nergan: “Gamga ricaycämarayquimi mamäpa pachancho aychallaraj wiñaycashäta” (Salmo 139:16). Amatar Jehová cushicun cawayninchita cuidaptinchi (leiriy Mateo 10:29-31). Pero mayraj laquicun runacuna wanuchinacäriptin, o pilapis ‘cawaynëwan ushashaj’ niptin (Éxodo 20:13).a Jinamanpis ¿imanoraj Jehová ricacun cawayninchita peligruman churaptinchi, o waquincuna peligrucho caycaptinpis mana wilapaptinchi? Diosninchitaga cawaypita agradëcicunchi imapitapis cuidacurmi y waquincunatapis peligrucunapita wilaparmi.
SHUMAJ YACHACURCUNAPAJ
Imacunata rurartaj Jehovata ‘graciaslä cawaypita’ nishwan. Ricärishun.
3. Cuerpuyqui sano cananpaj calpachacuy
Cristianucunaga aunicushcanchi Jehovalata sirvinapaj, chaymi cawayninchega paylapaj caycan. Lapan cuerpunchega juc sacrificiuno Diosninchipaj canman; mana cuidarga, ¿imataraj goycashwan? Leipäcuy Romanos 12:1, 2 y caycunapita parlapacäriy:
¿Imanirtaj cuerpuyqui sano cananpaj calpachacunquiman?
¿Imacunata rurartaj cuerpuyquita cuidanquiman?
4. Ima peligrupitapis cuidacunanchimi
Bibliaga nimanchi cawayninchita cuidanapaj. VIDEUTA ricapäcuy y yachacäriy imano cuidacunapaj maycho caycarpis.
Leipäcuy Proverbios 22:3 y parlapacäriy imanotaj jucninchi jucninchi yanapacushwan ali seguro cawanapaj...
... wasinchicho caycar.
... trabajucho caycar.
... puclacunaman aywar.
... carrucho aywaycar o manejaycarpis.
5. Itipa cawayninta manaraj yuriptinpis cuiday
Davidpis escribergan Jehová imano manaraj yurej iticunapa cawayninta alapa valorashganta. Leipäcuy Salmo 139:13-15, 17 y caypita parlapacäriy:
Jehovapäga, ¿imaytaj iti cawar galaycun, mamanpa pachalancho caycaptin o yuriptinraj?
Unaycho israelitacunata Jehová mandargan gueshyaj warmicunata cuidananpaj, pachancho caycaj itinta mana shulunanpaj. Leipäcuy Éxodo 21:22, 23 y caycunapita parlapacäriy:
Runacuna peliaycashgancho gueshyaj warmita pasapacuptin, ¿chay runata ima pasananpätaj Jehová mandargan?
Chauraga, ¿imanoraj rican pipis adrede shuluptenga?b
Y gam, ¿ima ninquitaj Dios chayno yarpashganpita?
Caway vidata valoraj warmipis öraga shuluytami yarpan. Leipäcuy Isaías 41:10 y caypita parlapacäriy:
Juc warmita itinta shulurinanpaj niptenga, ¿pï yanapänanpätaj mañacunman? ¿Imanir?
WAQUINCUNA NIPÄCUN: “Quiquëpitami canman shulunäpaj o manapis. Caway vidäwanga imatapis ruracömanmi”.
¿Rasunpacu Jehová alapa valoran gueshyaj warmita y pachancho caycaj itinpa cawayninta? ¿Imanir?
ICHIC YACHACUY
Cawaypita ‘graciaslä’ Jehovata nishun. Biblia nimanchi cawayninchita y waquincunapa cawayninta cuyanapaj, respetanapaj y cuidanapaj.
Yarpänapaj
¿Imanirtaj ninchi Jehová caway vidanchita valorashganta?
¿Imanoraj Jehová ricacun juc runa adrede wanuyninta ashiptin o waquinta wanuchiptin?
¿Caway vidayquipita imapitataj Jehovata ‘graciaslä’ ninquiman?
MASLATA YACHACUNAYQUIPAJ
¿Imanopataj agradëcicushwan Jehovata caway vidata gomashganchipita?
¿Unaycho juc warmi shulushganpita Diosga perdunangachuraj?
“Adrede juc warmi shuluptin, ¿ima nintaj Biblia?” (jw.org paginapita yachachicuy)
¿Alichuraj canman cushichimashganchi ruraycuna caway vidanchita peligruman churaptinchi?
Juc runa adrede wanucuyta yarpaptin, ¿imataraj ruranman? Bibliapa consejuncunaga yanapanmanmi.
“¿Bibliaga yanapäshunquimanchuraj wanuylaman yarparäcuptiqui?” (jw.org paginapita yachachicuy)
a Laquicuycarla cawacojcunapäga Jehová yarpachacunmi (Salmo 34:18). Payga musyanmi imaraycur waquincunaga nin ‘alapana nacaycä, wanurpis wanucömanna’. Wanucuyta munajcunataga yanapayta munanmi. Chaypita leinapaj caycan cay shumaj tema: “¿Bibliaga yanapäshunquimanchuraj wanuylaman yarparäcuptiqui?”, cayga yuriycämun “Maslata yachacunayquipaj” nishgancho.
b Pipis unaycho shulushganpita alapa mana yarpachacunmanchu, Jehovaga perdunaycungami. “Maslata yachacunayquipaj” nejcho caypita más yachacunqui, “Adrede juc warmi shuluptin, ¿ima nintaj Biblia?”.