¿Diospäga alichuraj lapan fiestacuna?

Jehovapäga alimi caycan waquincunawan juntacarcur cushi cushila micupacunanchita y danzapacunanchitapis. ¿Chauraga ima fiestacunataj paypäga mana ali caycan? Jehovata cuyashpanchega, ¿imacunata rurartaj cäsucushun?

1. ¿Ima fiestacunapis alichuraj caycan Diosninchipaj?

Unaypitana Diosta mana sirvej runacuna may chaycho fiestacunata camacächimushga. Waquin fiestacunaga luta religiuncuna rurashganmi caycan. Y achca marcacunapa fiestancunacho y costumbrincunachoga Biblia mana mandacushganta rurapäcun. Wanushga castancunata cantachicärin o diancunachopis destinunpaj yarpachacärin. Paycunawan talucänanchita mana munarmi Jehová cayta niycalämanchi: “Paycunapita yargucäriy. Imatapis impüruyächicujcunata ama yatapäcuychu” (2 Corintios 6:17).a

2. ¿Ima ninraj Jehová runacunaraycur ruracashgan fiestacunapita?

Cay munducho runacunaga “runa mayilanman” yäracärin, paycunano mana canapämi Jehová wilapämanchi (leiriy Jeremías 17:5). Waquin marcacunachoga mayna gobernantincunaraycur y naciunnincunaraycur fiestacunata camacächin. Banderancunatapis ichichipäcun y himnucunatapis cantapäcun (1 Juan 5:21). Waquincunapis fiestata rurapäcun politicacho partiduncunaraycur o imano cawapäcunanpaj derechuncunaraycurpis. Runacunaraycurla imaycata rurarga, ¿imanoraj Jehová ricacun?

3. ¿Juc fiestacho imacuna captintaj Diospäga mana ali canga?

Bibliaga pasaypa mana ali cashganta nin, pipis ‘upyallar puricuptin’ y “fistacunacho tucuyta” ruraptinpis (1 Pedro 4:3). Aumi, ima fiestacunachopis upyapacular runacuna cacärin y ofendinacurpis pelialata ashipäcun. Noganchi ichanga Diosta cuyashpanchi yarpaylapis yarpanchichu chaycunacho caycänapaj.

SHUMAJ YACHACURCUNAPAJ

4. ¿Ima fiestacunachopis Jehovata respetapäcunchuraj?

Leipäcuy Efesios 5:10 y caycunapita parlapacäriy:

• ¿Imamanrätaj yarpachacunanchi ima fiestatapis ruranapaj o mana?

• ¿Ima fiestacunataj marcayquicho ruracämun?

• ¿Jehovapäga alichuraj chay fiestacuna?

Imaylapis tapucushcanquichu, ¿imataraj Jehová nin cumpleañucunapita? Bibliaga manami wilacunchu unaycho Diosta sirvejcuna cumpleañunraycur imatapis rurashganta, ichanga wilacunmi Diosta mana aduraj ishcay runacuna dianraycur fiestata rurashganta. Leipäcuy Génesis 40:20-22 y Mateo 14:6-10. Nircur caycunapita parlapacäriy:

• ¿Imataj pasargan cay ishcay cumpleañucunacho?

• Chay ishcay fiestacho wanuyla cashga captenga, ¿imataraj Jehová nin cumpleañucunapita?

Chayno captinpis, ichanga cayno tapucuycanquiraj: “¿Rasunpachuraj mana ali caycan cumpleañüta ruraptë o marcäpa maygan fiestanlamanpis aywaptë?”. Leipäcuy Éxodo 32:1-8. Nircur VIDEUTA ricapäcuy y caycunapita parlapacäriy:

VIDEO: Ima fiestacunapis Diospaj mana ali cashgan (5:07)

• ¿Imanirtaj ‘cayga alichuraj Diospäga’ nir yarpachacushwan?

• ¿Imacuna rurartaj shumaj yarpachacushwan?

¿Imanotaj musyashwan maygan fiestapis Diospäga ali o mana ali cashganta?

• ¿Biblia yachachicushganwanga tincunchuraj? Musyapacaramuy maychotaj chay fiestacuna camacashga.

• ¿Runacunaraycurlachuraj chay fiestacuna ruracämun? Noganchicunaga Jehová Diosninchilamanmi yäracunchi, paylami ali cawayta tarichimäshun.

• ¿Ima ruraycunataj chay fiestacunacho ricacämun? Mana ali ruraycunataga melanashwanmi.

5. Calpachacuy creenciayquita waquincuna respetananpaj

VIDEO: Respetulawan creencianchipita parlashun (2:01)

Leipäcuy Mateo 7:12 y caycunapita parlapacäriy:

• Leishganchiman yarpar, ¿Diosta mana sirvej maygan castanchitapis nishwanchuraj ima fiestatapis mana rurananpaj?

• Familianchicunawan fiestacunacho mana caycarpis, ¿imatataj rurashwan paycunata cuyarga y respetarga?

6. Jehovaga cushi cushila cananchitami munan

Mayraj Jehová cushicun familianchicunawan y amigunchicunawan juntacarcur imalatapis ruraptinchi. Leipäcuy Eclesiastés 8:15 y caypita parlapacäriy:

• Chauraga Biblia nishganno, ¿imano cawacunanchitataj Dios munan?

Jehovaga munan sirvejnincuna cushi cushila juntacärir imalatapis rurananta. Öraga waquincuna danzapärinraj. VIDEUTA ricapäcuy, mä imanotaj jatun asambleanchicunachopis cushicuypaj ruraycunata ricanchi.

VIDEO: Imanotaj chasquinacunchi jatun asambleanchicunacho (5:40)

Leipäcuy Gálatas 6:10 y caycunapita parlapacäriy:

• ¿Fiestacunatarächuraj rurashwan waquincunawan cushi cushila juntacänapaj?

• ¿Pitapis regalo goyta munarga dian chayamuptinrächuraj goshwan, o shongupita rurarchuraj imay junajpis goshwan?

• Achca Testigucunami wamrancuna cushicunanpaj imaycata rurapäcun, regalutapis rantipäcun. Gampis wamrayoj carga, ¿ima regalulamanpis yarpaycanquichu?

ICHIC YACHACUY

Jehovaga munan familianchiwan y amigunchicunawan cushi cushila pasananchitami, ichanga mana alichi canman marcanchicho maygan fiestalamanpis aywaycur tucuyta ruraptinchi.

Yarpänapaj

• Ima fiestapis ali o mana ali cashganta ninapäga, ¿ima tapucuycunataraj ruracushwan?

• ¿Imanoparaj familianchita parlapashwan maygan fiestatapis imanir mana rurashganchita?

• ¿Imanirtaj nishwan Jehovaga munan waquincunawan cushi cushila pasananchita?

MASLATA YACHACUNAYQUIPAJ

Leinayquipaj caycan imanir cristianucunaga waquin fiestacunaman aywanchu.

“¿Imanirtaj Jehovapa testiguncunaga lapan fiestacunaman aywanchu?” (jw.org paginapita yachachicuy)

Yachacuy imanirtaj Diosninchega cumpleaño ruraycunata chasquinchu.

“¿Imanirtaj Jehovapa testiguncunaga cumpleañuncunata camacächinchu?” (jw.org paginapita yachachicuy)

Ricay imanotaj wamracuna Jehovata cäsucur Navidad fiestaman aywanchu.

Jehová amatar cuyashunqui (11:35)

Lapan Testigucunami Navidad fiestata ruranchu. ¿Laquicärinchuraj chayraycur?

“Laquicärinanpa trucanga cushicärinmi” (Wilacamoj, 1 diciembre quilla, 2012)