Imano parlashganchichomi ricacämun Jehovata cuyashganchi

Jehovaga shimiyojta camaycalämashcanchi. ¿Piwanpis parlarga imano parlapacunanchitaraj Jehová munan? Alicunalata parlananchitami (leiriy Santiago 1:26). Chauraga ali parlashganchiwanga Jehovata cushichinchi.

1. ¿Imanotaj alicunalata parlaj runa cashwan?

Biblia cayno nin: “Shacyächinacushgayquinöla jucniqui jucniquipis tantiyachinacur shacyächinacäriy” (1 Tesalonicenses 5:11). Ichanga pilapis yarpachacuycarla cawar mana ali ricacuycan, ¿imanoraj payta parlapanquiman?, ¿imanoraj shacyächinquiman? Imalatapis ninquiman cushicunanpaj. Bibliapita juc textulatapis amanu charanquiman paycunapäno. Imapita y imano parlapänayquipaj cajman yarpachacuptiquega pipis agradëcicungami (Proverbios 15:1).

2. ¿Imano parlaycunata mana parlashwanchu?

Biblia nin: “Ama imatapis lutancunata rimapäcuychu” (leiriy Efesios 4:29). Shiminchipitaga yargunmanchu mana ali palabracuna, ofendiyparaj, insultayparaj pitapis parlapäshunchu. Pipa washantapis ni jagayächiypapis parlapashwanchu (leiriy Proverbios 16:28).

3. ¿Imataj yanapämäshun alicunalata parlanapaj?

Öraga ima yarpashganchicunami shiminchipita yargun (Lucas 6:45). Chauraga alimi canga umanchicho ali yarpaycunala captin, shongunchipis limpio captin; chayno captenga, waquincunataga shacyaycächishunmi y cuyapaycäshunmi (Filipenses 4:8). Öraga ima ricaycashganchipis o pïcunawan juntacaycashganchipis mana alitami parlachimashwan (Proverbios 13:20). Imatapis manaraj parlar shumajrämi yarpachacunanchi; sinoga pajta pilatapis ofendirishwan. Diospa Palabran cayno nin: “Mana tantiyacuj runacuna rimashganga cuchilluwan tucsishganömi shongunman chayaycun. Tantiyacuj runa rimashganmi ichanga jampino caycan” (Proverbios 12:18).

SHUMAJ YACHACURCUNAPAJ

4. Pajta lutanta parlarishwan

Öraga ‘imanir-raj chayta niycurgä’ nir laquicunchi (Santiago 3:2). Leipäcuy Gálatas 5:22, 23 y caypita parlapacäriy:

• Bibliacho leishganchipita, ¿mayganraj pishiycäshunquiman ‘Jehová caycho yanapaycalämay’ ninayquipaj? Chayno Biblia nishgannola cawacurga, ¿imano runamanraj ticrachishunqui?

Leipäcuy 1 Corintios 15:33 y caypita parlapacäriy:

• ¿Ima rurashgayquicuna y piwan juntacushgayquega mana alita parlachishunquimanchuraj? ¿Imanoparaj chayga canman?

Leipäcuy Eclesiastés 3:1, 7 y caypita parlapacäriy:

• ¿Imayraj ali canman lutanta parlanapaj trucan upälacunapaj?

5. Pipa washantaga ama parlaychu

VIDEO: Alilata parlar ‘lutancunata rimapäcuychu’ (4:07)

• ¿Imanirtaj cay hermanuga calpachacuyta munargan waquincunapita alilatana parlananpaj?

• ¿Imataj yanapargan cambiananpaj?

Leipäcuy Eclesiastés 7:16 y caypita parlapacäriy:

• ¿Imamanraj yarpachacushwan pipa washantapis parlayta munarga?

Leipäcuy Eclesiastés 7:21, 22 y caypita parlapacäriy:

• Pilapis washayquita rimaptin, ¿Biblia nishganga imata ruranayquipätaj yanapäshunqui? ¿Imanirtaj chayga ali canman?

6. Familiayquitaga ali shimilapa parlapay

VIDEO: Cuyapänacurmi familianchiwan ali goyäcushun (3:08)

• ¿Ima rurashgayquicunataj yanapäshunqui familiayquita ali parlapänayquipaj?

Leipäcuy Efesios 4:31, 32 y caypita parlapacäriy:

• ¿Imano parlaptinchirätaj wasi rurincho jauca cawayla canga?

Jehovaga cuyapaylapa Churin Jesuspita parlargan. Leipäcuy Mateo 17:5 y caypita parlapacäriy:

• ¿Jehovanola gampis imanotaj familiayquita parlapanquiman?

ICHIC YACHACUY

Ima nishganchiwanga pitapis wagachishwan o shacyächishwanpis. Chaymi naupataga yarpachacushwanraj imata y imano parlanapäpis.

Yarpänapaj

• ¿Imanotaj parlashgayquicunawanga waquincunata yanapanquiman?

• ¿Imano mana parlanapätaj calpachacushwan?

• ¿Imaraj yanapämäshun pitapis shacyächiylapa y ali shimilapa parlapänapaj?

MASLATA YACHACUNAYQUIPAJ

¿Imaraj yanapämäshun shacyächiylapa parlanapaj?

Yachaj runacunano parlay (8:09)

Yachacuy imaypis upacunano mana parlanayquipaj.

“¿Imaraj pasanman mana alicunalata parlarga?” (jw.org paginapita yachachicuy)

Yachacuy imatataj ruranquiman jucpa jucpa wajtancho parlar mana galaycunayquipaj.

¡Cuento purichej cashunchu! (2:36)

Leiy imanotaj juc runata Jehová yanapargan mana ali parlaycunata jaguirinanpaj.

“Cuentata gocurgä mana ali caminupa aywaycashgäta” (Wilacamoj, 1 agosto quilla, 2013)