¿Bibliaga yanapamangachuraj?

Bibliaga manami waquin librucunanochu. Camamajninchipa consejuncunata tarinchi (2 Timoteo 3:16). Wilacushganga yanapashunqui. Rasun cajchoga, “Tayta Diospa palabran kawaq karmi munayniyuq kaykan” (Hebreos 4:12). Cay libruga cawayniquicho caycunachomi yanapashunqui: imano ali cawanayquipaj y Diospita y awnicuynincunapita musyanayquipäpis (1 Timoteo 4:8; Santiago 4:8).

Ali cawanayquipaj consejucuna. Bibliaga cawayniquicho yanapashunquiman ali consejucunawan.

• Runa masiquicunawan ali goyänayquipaj (Efesios 4:31, 32; 5:22, 25, 28, 33).

• Ali saludyoj canayquipaj (Salmo 37:8; Proverbios 17:22).

• Ali cajta ruranayquipaj (1 Corintios 6:9, 10).

• Guellay asuntuchopis (Proverbios 10:4; 28:19; Efesios 4:28).a

Asia sitiupita chaylaraj majachacashga jovincunapaj sasa cargan ishcancuna yachacänanpaj y parlapäcunanpaj, Bibliapa consejuncuna ali canganta cuentata gocärirgan. Chaymi Bibliacho yachacushgannola rurapäcurgan. Y ¿imanotaj yanapacushga? Vicente cayno wilacun: “Bibliacho yachacushgä casado vidächo yanapamashga imatapis cuyacuywan alchanäpaj”. Warminpis caynomi nin: “Bibliacho caycaj yachachicuycuna yanapäcamashga. Cananga juc yarpaynola y cushishgala runäwan cawapäcö”.

Diospita ali yachacunayquipaj. Vicente caynopis nin: “Bibliata leishpä, Jehovapita más cercala sienticö”. Vicente wilacushganga musyachicun Diospita yachacunanpaj Biblia yanapashganta. Manami chaylachu, consejuncunata casucuptiqui yanapashunqui Diospa amigun canayquipaj. Jina Palabranchomi yachacurinqui shamoj tiempucho mana ushacaj cawayta tarinayquipaj (1 Timoteo 6:19). Chaynoga manami ima librupis yachachishunquichu.

Bibliata leiyta galaycuptiquiga ichicla ichiclapa yachacanqui, chayga yanapashunqui ali cawanayquipaj y Dioswan ali amigo canayquipaj. Bibliata leirpis lapanta mana tantiarga imatapis tapucunquiman. Chayno captinga, unay Etiopía runa rurashganman yarpachacuy. Cay runaga Diospa Palabranpita más yachacuyta munargan, chaymi Jesuspa gatejnin Felipiga “Tsay liyiykashqaykita ¿tantiyankiku?” nir tapurgan. “Tsawraqa Etiopía runa kayno nirqan: ‘Pipis mana tantiyatsimaptinqa ¿imanöparaq tantiyashaq?’”, chayno nirmi Felipita ruwacurgan shumaj tantiachicunanpaj (Hechos 8:30, 31, 34). Chaynola gampis más yachacuyta munarga jw.org paginacho mañacuyta puedinqui juc Jehovapa testigun watucashunayquipaj. Jina Biblia mana chararga Jehovapa testiguncunapa reuniunninman aywar juc Bibliata mañacuyta puedinqui, y cay librumi yanapashunqui ali cawanayquipaj.