¿Imatataj ruranquiman Bibliata leirga más cushicunayquipaj?

Bibliata leirga, ¿uticanquichu o cushicunquichu? Chayga canga imata rurashgayquipita leinayquipaj. Bibliata leiptiqui más cushicunayquipaj caycuna yanapashunqui.

Facil-la tantianayquipaj Bibliata acray. Leishgayqui Bibliacho mana tantiashgayqui palabracuna captinga, mana imatapis yachacunquichu. Ichanga fácil tantianayquipaj palabracuna juc Bibliacho captinga, yanapashunqui yachacushgayquiga shonguyquiman chayananpaj. Jinamanpis chay acrashgayqui Bibliaga yaracuypaj y exacto canman.a

Mushoj yanapacuycunata utilizay. Canan wichan Bibliata leinayquipaj manami papel-lacho caycanchu, sinoga computaduracho, tabletcho, celularchopis o internetpapis leiyta y jorguytapis puedinqui. Chayno Bibliacuna cayno yanapacuycunata charanmi: juc versiculuta waquin Bibliacunawan tincuchinayquipaj o juc temapita waquin versiculucuna nishganta leinayquipäpis. Leiyta mana munarga, grabaciuncunapis can wiyanayquipaj. Waquincuna trabajunman aywajno, ropata tacshajno o imatapis rurajnola grabaciuncunata wiyapäcun. ¿Maygantaj gampa más ali caycan? ¿Chaynochu ruranquiman?

Yachacunayquipaj mastapis ashiy. Bibliata yachacunayquipaj yanapacuycunaga yanapashunqui leishgayquipita más ali tantianayquipaj. Mapacunapis can Bibliacho caycaj sitiucunata ricanayquipaj y chaycho ima pasashganta yarpachacunayquipaj. Jina waquin yachacuycuna cay revistacho y jw.org paginachopis caycan Bibliapa wilacuynincunata tantianayquipaj.

Jucnopapis leiy. Bibliata ushaypa leirga uticanquiman, chaypa trucanga gustashushgayqui tema leinquiman galaycunayquipaj. Diospa reguishga sirvejnincunapita más yachacuyta munarga, jucnin jucninpita ashircur leinquiman. “Bibliacho caycaj ali runacunapita yachacuy” recuadruga yanapashunqui chayno yachacunayquipaj. Temacunapa o imaytaj pasashganpitapis leinquiman. ¿Maygantapis acrarinquiman chayno leinayquipaj?