Imanirtaj agradecicunchi Jehová perdunamashganchita

1, 2. ¿Imanirtaj runacunaga laquicuypaj pasashgan mozuno caycanchi?

JUC mozo laquicuypaj pasashganpita parlarcushun. Paytashi wilapäcun papänincuna wanupäcushganta. Taytancunaga rico captinpis mana valej cajcunalachoshi guellayninta ushargan, jina achca runacunapa jaganman chayapäcurganshi. Chauraga ima herencialatapis cay mozo chasquirganchu, chaypa trucan taytancunapa jagancunata jucla pägananmi. Ichanga guellayninpis canchu pägananpaj.

² Cay mozunolami canan wichan runacunaga caycanchi. Unay taytanchicuna Adanwan Evaga juc shumaj paraisuchomi cawapäcurgan (Gén. 1:27; 2:7-9). Chaychoga alichi cawacärinman cargan, pero lapan charashgancunataga ograpäcurganmi. ¿Imataj pasargan? ¿Ima herenciatataj miraynincunata jaguipashga? Biblia cayno wilacun: “Jutsatapis wanuytapis juk runala kay patsaman apamushqanpitami lapan runakunapis jutsata rurar wanupäkun” (Rom. 5:12). Jucha ruraypis y wanuypis Adanpita chasquishganchi herencia japuynomi caycan. Jucha rurayga piwanpis jaga tucushganchinomi caycan, quiquinchicunala pägaytaga imanolapapis puedinchichu (Sal. 49:8).

3. ¿Imanirtaj jucha rurayga jaga japuy caycan?

³ Jesusmi nergan jucha rurayga jaga japuy cashganta (Mat. 6:12; Luc. 11:4). Chaymi juchata ruraptinchega, Jehovata jagata päganapaj caycajnomi. Jehovacush imatapis noganchipaj mana ruranmanchu cargan, jucha ruraypita päganapaj wanuylaman chayar cawarimuytapis puedishwanchu (Rom. 6:7, 23).

4. 1) ¿Imanoraj cawayninchi canman cargan Diosninchi mana yanapämaptinchega? (Salmo 49:7-9). 2) Bibliacho juchapita parlar, ¿imacunapätaj parlaycan? (“¿Ima nintaj Biblia juchapita?” nej recuadrutapis ricay).

⁴ Adanwan Eva lapan ograshgancunataga manachi quiquinchicunala yapay tariyta puedishwanchu (leiriy Salmo 49:7-9). Diosninchi mana yanapämaptinchega, wanurpis manachi cawarimushwanchu ni imaycamapis cawayta puedishwanchu, uywacunanomi wanur ushacashwan cargan (Ecl. 3:19; 2 Ped. 2:12).

5. ¿Imatataj Jehová rurashga jaganchita pägananpaj? (Garancho caycaj dibujuta ricay).

⁵ Galanancho parlashganchi mozupita yapay parlarcushun. ¿Imanoraj payga ricacunman juc rico runa niptin ‘lapan jagayquicunata noga pägaycushaj’ nir? Payga shongupita agradecicunmanchi rico runata. Juchanchicunaga jaga japuynomi caycan, chaymi Taytalanchi Jehová jaganchita pägashgannomi imaycacunataraj rurashga juchanchicunapita perdunashga cananchipaj. Chayga juc regalo japuyno cashga, chaypaj parlar Jesús cayno nergan: “Runakunata kuyashpanmi juklayla Tsurinta Tayta Dios kachamurqan. Tsaymi pipis payman yärakuq kaqqa mana ushakanqatsu, sinöqa mana ushakaq kawayta tarinqa” (Juan 3:16). Cay textuta leir cuentata gocunchi Jehovaga munan paywan amigo cananchita.

6. ¿Imacunapitataj canan yachacushun, y imanirtaj chaypita yachacushun?

⁶ Jehovaga imaycata rurash juchanchicunata perdunamänanchipaj. Chaypita shumaj tantiananchipäga canan yachacushun imaraycurtaj Jehová perdunamanchi, imacunata rurashga perdunamänanchipaj y imatataj chasquishun perdunamashganchipita. Chaycunapita yachacurga cushishga Jehovata alapa agradecicushun noganchiraycu rurashganpita.

JEHOVÁ MUNAN AMIGUN CANANCHIPAJ

7. 1) ¿Imataj ograpäcurgan Adanwan Eva? 2) ¿Imatataj munayculanchi lapanchicuna? (Romanos 5:10, 11).

⁷ Adanwan Evaga juchalicushganraycu manami wanurganlachu, sinoga Jehovawan ali amistänintapis ograrirganmi. Galananlachoga Jehovapa cuyashgan wamrancunami cargan (Luc. 3:38). Ichanga mana cäsucushganraycu Jehovaga wamrantano manana chasquergannachu, chayga pasargan wamrancuna manaraj yuriptin (Gén. 3:23, 24; 4:1). Juchasapa cashganchiraycu Diospa contran caycashganchino ricacunchi, chaymi Jehovaga amiguntano chasquimänanchita munayculanchi (leiriy Romanos 5:10, 11). Chaypita parlar juc libro nin, Jehová perdunamashganchi pipis “contrancho caycaptin amistäcunanpaj imaycata rurashgannomi caycan”. Contrancho caycajtano ricamaptinchipis Diosninchi amiguntano chasquimänanchipaj imaycacunata rurash. ¿Imanotaj chayta rurash?

IMACUNATA JEHOVÁ RURASHGA PERDUNAMÄNANCHIPAJ

8. ¿Imatataj Jehová noganchipaj rurashga?

⁸ Adán juchata rurashganpita Jehovapa amigun cargannachu. Pero juchayoj captinchipis Jehovaga shumaj camacächishga paypa amigun cananchipaj. Romanos 3:25 nin: “Tayta Diosninchïmi camacächisha Jesucristo [...] wañur yawarninta mashtayninpa perdunasha cananchïpaj” (TDI). Chaynopa Diospa ricaynincho ali caycänanchita puedinchi.

9. ¿Imatataj israelitacuna ruraj Jehová juchancunata perdunananpaj?

⁹ Israelitacuna cawashgan wichan, mandaj sacerdote lapan israelitacunapaj cada wata uywacunata altarcho rupachipäcoj. Jehovaga chayta rurananpaj mandargan, chaynopa juchancunata perdunananpaj y paywan amigo cananpäpis. Chayno captinpis uywacunapa yawarninlawan manami runacunapa juchancunata chipyaypa perdunashga canmanchu cargan. Pero israelitacuna shongupita arrepenticuptin y uywacunata sacrificiutano apaptin Jehová perdunarganmi (Heb. 10:1-4). Cutin cutin sacrificiucunata rurashganga yarpächergan juchancunapita chipyaypa perdunashga cananpaj y juc juchaynaj runapa yawarnintaraj necesitashganta.

10. ¿Imatataj Jehová rurashga juchanchicunata chipyaypa perdunamänanchipaj?

¹⁰ Chauraga juchanchicunata Jehová chipyaypa perdunamänanchipaj, ¿imatataj rurashga? Bibliami nin: Wamran Jesusta mandargan “juk kutilami atska runakunapa jutsankunapita” wanunanpaj (Heb. 9:28). Aumi, Jesusga cay Pachaman shamurgan “runakuna rayku wanur atskaqta salvananpaqmi” (Mat. 20:28). Pero, ¿imanirtaj Jesús wanunanraj cargan?

JUCHANCHIRAYCU JESÚS WANUNANRAJ CARGAN

11. 1) Biblia nishganno, ¿imapätaj juc päguta ruracänanraj cargan? 2) ¿Imanirtaj Jesusla wanunanrämi cargan?

¹¹ Bibliaga nimanchi juc päguta ruracänanrämi cargan juchanchicunata Jehová perdunamänanchipaj y paywan amigo cananchipäpis. Adanwan Eva juchaynaj car mana wanuypa cawanman cargan, ichanga juchalicushganraycu chaytami ogrargan. Chauraga juchaynaj runalami noganchiraycu wanunanraj cargan Jehová perdunamänanchipaj (1 Tim. 2:6). ¿Imanirtaj Jesusla chayta ruranan cargan? Payga juchaynaj carmi cay Pachacho imaycamapis cawanman cargan, chayno captinpis payga listo caycargan noganchiraycu wanunanpaj. Jesusnoga manami pï runapis carganchu chayta rurananpaj.

12. ¿Imanirtaj Jesuspa wanuyninlawan salvacuyta tarinchi?

¹² Maslata tantiarcushun imanirtaj Jesuspa wanuyninlawan salvacuyta tarinchi: 1) “Payqa manami ima jutsatapis rurarqantsu” (1 Ped. 2:22), 2) chaymi mana wanunmanrächu cargan, 3) chayno captinpis listo caycargan noganchiraycu wanunanpaj (Heb. 10:9, 10). Galananchoga Adán juchaynaj runa cargan, chaynolami Jesuspis juchaynaj cargan (1 Cor. 15:45). Chauraga wanuyninlawan Jesusga tarichimanchi lapan Adán ograshganta (Rom. 5:19). Chaymi Biblia nin Jesusga ‘qepa kaq Adán’ cashganta. Chauraga salvaciunta tarinanchipaj Jesuslami noganchiraycu “juk kutila kikin wanurqan” (Heb. 7:27; 10:12).

13. ¿Imacunataj Jehová rurashga paywan amigo cananchipaj?

¹³ Canancama yachacushcanchi Jehová rurashganga juchanchicunata perdunamänanchipaj y paywan ali amigo cananchipäpis. Payga Wamranta noganchiraycu wanunanpaj cay Pachaman cachamurgan. ¿Imanirtaj Jesús wanunanraj cargan? Paypa yawarninlawan juchanchicunapita chipyaypa perdunashga cananchipaj. ¿Imacunata chasquinchi Jehová perdunamashganchipita? (Efes. 1:7; Heb. 9:14).

JEHOVÁ LIBRAMASHGANCHI JUCHAPITA Y WANUYPITA CHAYMI ALI RICASHGANA CAYCANCHI

14. ¿Cananga imacunapitataj yachacushun?

¹⁴ Perdunamänanchipaj Jehová lapan rurashganpita, juchapa munayninpita y wanuypitapis pay libramanchi, jina juchaynajtanona ali nawilanwan ricaycämanchi. Cananga chaycunapita yachacushun, chaynopa Jehovapa perdunninta masraj valuranapaj.

15, 16. 1) Biblia nishganno Jesús wanushganraycu, ¿imapitataj librina caycanchi? 2) Chayraycu, ¿imanotaj sienticunchi?

¹⁵ Jesús noganchiraycu wanushganpita librina caycanchi juchapita y wanuypitapis. Apóstol Pedro caynomi nergan: “Unay ayluykikuna kawashqannömi qamkunapis jutsata rurar kawapäkurqayki. Tsayno karkaykaptiki manami qellaywantsu ni qoriwantsu Tayta Dios rantishushqanki, sinöqa Jesucristupa yawarninwanmi [chaynopa libre cananchipaj]. Sänu carnishta sacrificiupaq pishtaptin yawarninta jichashqannömi Jesucristupis noqantsi rayku yawarninta jichashqa” (1 Ped. 1:18, 19).

¹⁶ Jesús wanushganraycu juchapita y wanuypitapis librina car manami nacashunnachu (Rom. 5:21). Shongupita Jehovata y Jesustapis agradecicunchi, librina cananchipaj noganchiraycu yawarninta jichashganpita (1 Cor. 15:22).

17, 18. 1) Ali nawilanwan Jehová ricamaptinchi, ¿imamantaj mana yarparaycannachu? 2) ¿Ima bendiciuncunatataj chasquishun?

¹⁷ Jehovaga juchaynajtanona ali nawilanwan ricamaptinchi juchayoj cashganchita manami yarparaycannachu. Pero, ¿alilata ruraj cashganchipitachu juchaynajtanona Jehová ricamanchi? o ¿‘jucha rurashganchega Jehovata imapis gocunchu’ nishwanchuraj? Manami. Chayno captinpis Jehová y Jesús salvamänanchipaj rurashganman yäracuptinchi Jehová perdunamäshun (Rom. 3:24; Gál. 2:16).

¹⁸ ¿Ima bendiciuncunatataj chasquishun Jehová ali nawilanwan ricamashganchipita? Waquin cristianucunataga Jehovami acrashga cielucho Jesuswan gobernamunanpaj, chaynopa Jehovapa wamrancuna cananpaj (Tito 3:7; 1 Juan 3:1). Jehová juchancunata perdunashganpita paycuna imaypis manami juchalicushgannomi caycan. Chaymi Diospa Gobiernunman yaycuyta puedin (Rom. 8:1, 2, 30). Waquin cristianucunapis juchancunata perdunashga cashganpita y Diospa amigun cashganpita cay Pachachomi tiyapäcunga (Sant. 2:21-23). Achca cristianucuna shuyarpaycan cay Pachacho cawananpaj, paycuna Armagedón guerrapita salvashga car mana imaypis wanunganachu (Juan 11:26). Lapan wanushga ali rurajcunata y mana ali rurajcunatapis Jehová cawarachimungami (Hech. 24:15; Juan 5:28, 29). Tiempuwanpis cay Pachacho cawajcunataga, Diosninchega wamrantanomi “lapan kamashqankunatapis mana ushakänanpaq mushuqman tikratsinqa” (Rom. 8:21). Yachacushganchino, Jehovaga shumaj camacächishga juchaynajna wamran cananchipaj. ¡Chayga alapa cushicuypämi!

19. Jehová y Jesús noganchiraycu rurashganpita, ¿imatataj chasquishcanchi? (“Jehová perdunacoj Dios” nej recuadrutapis ricay).

¹⁹ Naga parlashganchi mozuga lapan charashgancunata ogrargan y jagantapis pägayta puedirganchu, chaynolami noganchipis caycarganchi. Chayno captinpis Jehová juchanchicunata perdunamänanchipaj imaycacunata rurashga y wamran Jesuspis noganchiraycu wanushga. Jesucristuman yäracuptinchi juchapita y wanuypitapis librashga canchi. Jina Jehová perdunamaptinchi juchaynajtanona ricamanchi, pero masraj cushicunchi cuyacoj Taytalanchi Jehovawan ali amigo cashganchipita.

20. ¿Imatataj ricärishun gatejnin yachachicuychoga?

²⁰ Shongupita cushicunchimi Jehovawan Jesús noganchiraycu lapan rurashganpita (2 Cor. 5:15). Imanoraj caycashwan paycuna mana yanapämaptinchi, wanuylachomi ushacashwan cargan. Gatejnin yachachicuychoga ricärishun cada ununchita imano Jehová perdunamanchi.