7 CAJ YACHACHICUY
15 CAJ CANCIÓN Jehovapa Churinta cantarcushun
Imacunata chasquinchi Jehová amatar perdunacoj cashganpita
“Gam [...] perdunacojmi canqui” (SAL. 130:4, TDI).
¿IMATAJ YACHACUSHUN?
Bibliaga shumajmi tantiachicun Jehová perdunashganno manami pipis perdunanmanchu, chayta tantiaycur alapa agradecido caycäshun.
1. ¿Imataj pasanman waquincuna ‘perdunayculämi, yarpachacuychu’ nimaptinchipis?
ÖRAGA pilatapis ofendiptinchi ‘perdunayculämi, yarpachacuychu’ nimaptinchega alinami ricacunchi. Ichanga sasarächi canman musyananchipaj chay runa shongupita perdunamashganchita. Waquincunaga ‘yarpachacuynachu’ nimaptinchipis shongulancho capaz nanaparaycämanchiraj.
2. ¿Ima nintaj Biblia Jehová perdunacoj cashganpita? (Ichic wilacuy nishgantapis ricay).
2 Taytalanchi Jehová perdunashganno manami pï runapis perdunanchu. Chaypaj parlar Salmuta guelgaj runa cayno nergan: “Gam ichanga imapitapis perdunacojmi canqui. Chaymi llapan rispitashunqui” (Sal. 130:4, TDI).a Aumi, Jehová Dioslami chipyaypa perdunamanchi. Noganchipis shongupita perdunananchipaj paypitami yachacunanchi. Bibliacho Escrituras Hebreas nishgancho tantiachicun Jehovalami pitapis mana nanaparaylapa perdunacun.
3. ¿Imanotaj Jehovaga perdunamanchi? (Isaías 55:6, 7).
3 Tayta Jehová pitapis perdunaptenga juchancunata chipyaypa gongaycun, paywan yapay amigun cananpaj. Manami ratulapächu perdunamanchi sinoga pantashganchicunata lapanta gongaycunmi. ¿Manachu chayno captin masraj cuyayculanchi Taytalanchi Jehovata? (Leiriy Isaías 55:6, 7).
4. ¿Imanotaj Jehová tantiachimanchi rasunpa perdunacoj cashganta?
4 Jehová perdunamashganchega manami runacuna perdunamashganchinochu. Chaymi Palabranchoga payga achca tincuchicuycunata churashga rasunpa perdunacoj cashganta shumaj tantiachimänanchipaj. Canan yachacushun imanotaj Jehová juchanchicunata perdunan y yapay paypa amigun cananchipäpis munan. Chaypita yachacurga Payta masraj valurashun y cuyashunpis.
JEHOVÁ JUCHANCHICUNATA APACUNMI
5. ¿Imatataj Jehová juchanchicunawan ruran?
5 Öraga Bibliacho juchapita parlarga lasaj guepiwanmi tincuchin. Rey Davidpis nergan: “Jutsa rurashqäpita nakar manami awantänatsu. Lasaq qepita apariraqnömi kaykä” (Sal. 38:4). Salmo 25:18 y 32:5 textucuna wilacun Jehovaga “perdunanmi” juchancunapita lapan arrepenticojcunata. Hebreo rimaycho “perdunanmi” niptenga, “jogarcun” o “apacun” ninanmi. Juc calpasapa runa lasaj guepinchita apachimashgannomi, Jehová juchanchicunata lasaj guepino cashganta jogarcur apacun.
Juchanchita jogarcur apacun (Sal. 32:5).
6. ¿Imanotaj juchanchicunata Jehová perdunamanchi?
6 ¿Imanotaj Jehová juchanchicunata perdunamanchi? Salmo 103:12 texto tantiachicun inti yargamushganpita juc caru ladupana jegarcushgannomi “noganchïpitapis juchanchïcunataga caruman jitarisha” (TDI). Inti yargamunan caj inti jeganan cajwanga pasaypa carumi caycan. Chauraga cay texto tantiachimanchi, Jehovaga perdunamaptinchega juchalicushganchiman yarpaylapis yarpannachu. ¡Chaypitaga ‘graciaslä’ nishwanmi Jehová Diosninchita!
“Inti yagamunanpita inti yagananga fiyupa caruchömi caycan” (Sal. 103:12, TDI).
7. ¿Imataj Biblia wilacun Jehová imano lapan juchanchicunata perdunamashganchipita? (Miqueas 7:18, 19).
7 Jehová juchanchicunata caruman jitariptin manami yarparaycanchu pantashganchicunaman. Rey Ezequías Tayta Jehovata cayno nergan: “Gamga lapan juchäcunataga guepayquimanmi jitarishcanqui” o ichic nota nishgannopis, “juchäcunataga manami ricaycanquinachu” (Is. 38:9, 17, TNM nota). Chauraga Jehová juchanchicunata guepanman jitarishgannomi chaycunaman yarparaycannachu. Rey Ezequías nishganpitaga ‘gampäga mana juchalicushgänomi caycä’ nirpis traducicanman. Masraj tantiarcunapaj Miqueas 7:18, 19 (leiriy) textucho wilacun Jehová perdunamaptinchi lamarpa más hondunman lapan juchanchicunata jitarishganno cuenta caycan. Unay tiempuchomi, imacunapis jatun lamarman jegacuptinshi manami facilchu cargan yapay jorgunanpaj.
“Gamga lapan juchäcunataga guepayquimanmi jitarishcanqui” (Is. 38:17, TNM).
“Jutsa rurashqäkunata jitarpuy mas hondunnin lamarman” (Miq. 7:19).
8. ¿Caycamayaj imatataj yachacushcanchi?
8 Caycamayaj yachacushcanchi Jehová perdunamaptinchega juchanchicunata apacushgannomi caycan, chaymi ancashlana sienticunchi. Rey David nishganno ricacunchi, paymi nergan: “Cushishami cawanga llapan juchanpita perdunasha caj runaga. Cushishami cawanga Tayta Dios mana jusgashan runaga” (Rom. 4:6-8, TDI). ¡Jehovaga shongupita perdunacojmi!
JEHOVÁ JUCHANCHICUNATA ILGÄCHINMI
9. ¿Ima ruraywantaj Jehová tincuchin perdunamashganchita tantianapaj?
9 Bibliaga masla tantiachimanchi, Jesús wanushganraycu arrepenticuptinchega Jehová lapan juchanchicunata ilgächin. Biblia nin Jehová perdunamaptinchega juchanchicunapita maylamashganchino caycanman (Sal. 51:7; Is. 4:4; Jer. 33:8). Quiquin Jehová Dios cayno wilacun: “Jutsaykikuna pukano kaptinpis rajunöraqmi yoraq kankipaq. Granätiman tinishqano kaptinpis yoraq milwanöraqmi kankipaq” (Is. 1:18). Yuraj ropanchi puca colorwan tiñicaptenga sasami canman maylanapaj, pero Jehová juchanchicunata perdunamaptinchega shumaj maylamashganchino captin manami ni ichic juchalanchipis quedanchu.
“Jutsaykikuna pukano kaptinpis rajunöraqmi yoraq kankipaq” (Is. 1:18).
10. ¿Imano mastaj Jehová yachachicun perdunacoj cashganta?
10 Pasajcho yachacushganchino, juchanchicunaga jagawanmi tincun (Mat. 18:32; Luc. 11:4). Chauraga waran waran Jehovapa contrancho juchacunata rurarga paypa jagan cashganchinomi caycan. Ichanga Pay perdunamaptinchega lapan jaganchicuna pägashgana cashgannomi caycan. Jehová perdunamashganchipitaga yapay yapay cuentata mañamäshunnachu. ¿Manacu alapa cushicunchi chayno Jehová perdunamashganchipita?
“Mayjina jaqä kaykaptikipis ruwakamaptikimi lapanta perdonashqä” (Mat. 18:32).
11. ¿Imawantaj Biblia tantiachicun juchanchicuna borrashga cananpaj cajta? (Hechos 3:19).
11 Jehovaga juchanchicunata manami perdunamanchilachu sinoga chipyaypa borrarejno juchanchicunata ilgärachinmi (leiriy Hechos 3:19). Cayta tantiananchipäga cayman yarpäshun: unay wichan tintataga rurananpaj carbonta, gomata y yacutapis taluchej; chaymi pipa jagan papelcho guelgashga captinpis fácil-la borracaj, chaynopa ima jagancuna borracaptenga jagaynajtanona ricacurgan. ¡Jehová chayno perdunamashganchipita alapa agradecicunchi! (Sal. 51:9).
“Llapan juchayquita Tayta Dios perdunashunquipaj [o ilgächengapaj]” (Hech. 3:19, TDI).
12. ¿Imata yachacunchi Jehová juchanchita perdunamashganchita pucutaywan tincuchiptin?
12 Isaías 44:22 textucho wilamanchi imawantaj Jehová tincuchin juchanchicunata perdunamaptinchi, chaycho nin: “Lapan jutsa rurashqaykikunatami perdonashqä. Pukutayta elqätsishqänömi jutsaykikunata elqätsishqä”. Jehová perdunamaptinchi pucutayta ilgächishgannomi juchanchicunata ilgächin, y manami pipis ricaylatapis puedinnachu.
“Pukutayta elqätsishqänömi jutsaykikunata elqätsishqä” (Is. 44:22).
13. ¿Imanotaj sienticunchi juchanchicunata Jehová perdunamaptinchi?
13 Caycama yachacushganchi Jehová chipyaypa perdunamashganchita. Pay manami munanchu unay juchalicushganchiman yarpararga pasaypa laquishga caycänanchipaj, juchanchiraycu jaganchicunataga yawarninwanmi Jesús pägashgana. Chipyaypa borrashganno juchanchicunata ilgärachinmi y juchaynajtanona ricamanchi. Shongupita arrepenticuptinchega Jehová perdunamanchi.
AMIGUNTANOMI JEHOVÁ YAPAY CHASQUIMANCHI
Jehová Diosninchi perdunamashganchiraycu paywan ali amigo cayta puedinchimi. (14 caj parrafuta ricay).
14. ¿Imanirtaj Jehová perdunacoj cashganman yäracushwan? (Fotucunatapis ricay).
14 Jehová perdumaptinchega yapaynami amiguntano chasquimanchi. Chaymi unay rurashganchi juchacunamanga yarparaycashwannachu, ‘Jehová nanaparämangachi o castigamangachi’ nirpis cacushwanchu. Jehovaga chayta rurananpaj yarpaylapis yarpanchu. Paymi unaycho profetan Jeremiasta cayno nergan: “Llapan juchancunatami perdunashaj. Chayno perdunaycorga mananami yarpäshänachu ima jucha rurashancunatapis” (Jer. 31:34, TDI). Chay textupitaga quiquin apóstol Pablupis caytami guelgamurgan: “Mananami yarpäshänachu ima jucha rurashancunatapis” (Heb. 8:12, TDI). ¿Imatataj yachacunchi chaypita?
‘Mananami yarpäshänachu juchayquicunata’ (Jer. 31:34, TDI).
15. Jehová perdunamaptinchega, ¿imatataj mana rurangachu?
15 Bibliachoga ‘yarpäshämi’ niptenga manami umanchicho yarpayla yarpananchipajchu parlaycan sinoga imalatapis ruranapaj. Jesús wanushgan junaj laduncho caycaj suwacoj runa Jesusta cayno nergan: “Tayta, gam mandayta gallaycur nogata yarpäramanqui ari” (Luc. 23:42, 43, TDI). Chay hora suwacoj runaga manami Jesús yarparänanlapächu mañacuycargan, sinoga cawarachimunanpämi ruwacuycargan. Y Jesús chaytami aunirgan. Chauraga Bibliacho Jehová juchanchicunaman manana yarparänanpaj niptenga, ¿ima ninantaj chay? Paymi juchanchicunata chipyaypa gongaycurna imatapis rurangachu nacachimänanchipaj ni castigamänanchipaj.
16. Biblia nishganno, ¿imanotaj sienticunchi Jehová perdunamaptinchi?
16 Jehová perdunamashganchipita Biblia nishganta maslata tantiarcushun. Juchasapa captinchimi Biblia nin ‘jutsa rurayga patronnintsi’ japuy caycan. Ichanga Jehová perdunamaptinchega “jutsa ruraypa munayninpita jorqushqana” caycanchi (Rom. 6:17, 18; Apoc. 1:5). Cadenashga runa librashgana caycaptin cushi cushila ricacun, chaynolami sienticunchi Jehová Dios juchanchicunata imano perdunamashganchita musyar.
“Jutsa ruraypa munayninpita jorqushqana” caycanchi (Rom. 6:18).
17. ¿Imawantaj Bibliaga tincuchin Jehová perdunamashganchita? (Isaías 53:5).
17 (Leiriy Isaías 53:5). Bibliaga tincuchin juchasapa cashganchita wanuchicoj gueshyawan. Chayno captinpis Jehovaga gueshyapita aliyächimashganchinomi Jesuspa wanuyninwan juchanchicunapita libramashcanchi, chaynopa yapay Paypa amigun cananchipaj (1 Ped. 2:24). Pï runapis fiyu gueshyapita aliyarcurga alapami cushicurcun, chaynolami cushicunchi Jehová juchanchicunata perdunamashpanchi ali nawilanwan ricamaptinchi.
“Yawarlana ushashqa karmi aliyätsimashqantsi” (Is. 53:5).
IMANOTAJ YANAPÄMANCHI JEHOVÁ PERDUMASHGANCHI
18. ¿Imatataj Biblia yachachimanchi Jehová perdunacoj cashganpita? (“Imanotaj Jehová perdunamanchi” nej recuadrutapis ricay).
18 ¿Caycama, imatataj Biblia yachachimanchi Jehová perdunacoj cashganpita? Jehová perdunamaptinchega juchanchicunata chipyaypami gongaycun. Chayraycu paywan amigo cayta puedinchi. Payga amatar cuyacoj y laquipäcoj Taytanchi cashpanmi perdunamanchi, manami ali runa cashganchipitachu (Rom. 3:24).
19. 1) ¿Imapitataj agradecido caycälanchi? (Romanos 4:8). 2) ¿Imapitataj juc caj yachachicuycho yachacushun?
19 (Leiriy Romanos 4:8). ¡Alapa agradecidumi caycälanchi Salmo 130:4 nishganno Jehová “imapitapis perdunacoj” cashganpita! Y Jesuspis cayta nergan: “Runa mayikita mana perdonaptikimi itsanqa qamkunatapis [Jehová] mana perdonashunkipaqtsu” (Mat. 6:14, 15). Chauraga Dios perdunacoj cashgannomi piwanpis perdunacoj cananchi. Juc caj yachachicuycho yachacushun Jehová perdunacoj cashganno perdunacoj cananchipaj.
46 CAJ CANCIÓN Gracias, Jehová
a Cay texto hebreo rimaycho “perdunacojmi” niptenga Jehová chipyaypa perdunamashganchipita parlaycan. Salmo 130:4 texto Traducción del Nuevo Mundo Biblialami chayta tantiachicun, waquin Bibliacuna manami.