24 CAJ YACHACUY
Jehovanoga manami pipis perdunacunchu
“TAYTA DIOS, gamga canqui allimi, imapitapis perdunajmi. Amatarmi cuyanqui gamman mañacamojcunataga” (SAL. 86:5, TDI).
42 CAJ CANCIÓN Diosnïta mañacurishaj
IMAPITA YACHACUNAPAJa
1. ¿Imataj rey Salomonga nergan Eclesiastés 7:20 textucho?
REY Salomonga nergan: “Cay pachachöga manami pipis canchu allillata ruraj, juchata mana imaypis ruräga” (Ecl. 7:20). ¡Y chayga rasunmi! Lapanchi juchasapa canchi (1 Juan 1:8). Chaymi lapanchi ashinchi Dios perdunamänanchipaj y waquincunapis.
2. ¿Imanotaj ricacunchi ali amigunchi perdunamaptinchi?
2 ¿Imaylapis ali amigunchita ofendiycushcanchicu? Aumi, chaynochi cashga. Ichanga amistäninta mana ogranapäga shongupitami ‘disculpaycalämay’ nirchi perdunninta ashishcanchi. ¿Imanotaj ricacunchi amigulanchi perdunamaptinchega? ¿Manachu shongunchipis ancashyärin y alapa cushicunchi? Au, chaynomi.
3. ¿Imapitataj canan parlarcushun?
3 Lapanchimi munanchi Jehová más ali amigunchi cananpaj, pero achca cutimi pantarinchi rurayninchicho o parlayninchiwanpis. Chauraga, ¿imanirtaj seguro caycanchi Jehová perdunamänanchipaj? ¿Imanirtaj ninchi Jehovapa perdunninga runacunapa perdunninwan mana tincushganta? ¿Pïcunatataj Jehová perdunaycun?
JEHOVAGA LISTO CAYCAN PERDUNAMÄNANCHIPAJ
4. ¿Imanirtaj seguro caycanchi Jehová listo caycashganta perdunamänanchipaj?
4 Bibliaga nimanchi Jehovaga listo caycan perdunamänanchipaj. Sinaí jircacho Jehová Moisesta musyachicurgan imano Dios cashganta. Juc angelwan Moisesta nergan: “¡Yahweh! ¡Yahweh! Kuyapäkuq y perdonakuq Diosmi kä. Imapitapis juklaqa mana rabyakuqmi kä. Pasaypa kuyakuqmi kä. Promitishqätaqa imaypis cumplïmi. Waranqanpa waranqanpa tsaytsika runakuna kaptinpis kuyapämi. Mana cäsukamar jutsata ruraptinpis perdonämi” (Éx. 34:6, 7). Jehovaga cuyacoj y cuyapäcojmi, imaypis listo caycan arrepenticojcunata perdunaycunanpaj (Neh. 9:17; Sal. 86:15).
Jehovaga altantumi caycan ima pasamashganchita canan imano runa canapaj. (5 caj parrafuta ricay).
5. Salmo 103:13, 14 wilacushganno, ¿imanotaj Jehová ricamanchi noganchipita lapanta musyar?
5 Jehovaga Camacojninchi captinmi shumaj reguimanchi. Aumi, jucninchi jucninchipita lapanta musyan y chayga almiraypämi (Sal. 139:15-17). Payga musyanmi juchasapa cashganchiraycur imacunacho pantashganchita. Y mana chaylachu, altantumi caycan maycho y pïcunawan winashganchi canan imano runa canapaj. Chauraga imano cashganchita shumaj musyarmi Jehovaga cuyapämanchi (Sal. 78:39; leiriy Salmo 103:13, 14).
6. ¿Imanirtaj ninchi Jehovaga perdunamänanchipaj munashganta?
6 Jehovaga mayna musyachicurgan perdunamänanchipaj munashganta. Payga musyanmi Adanpa culpanraycur lapan runacuna juchayoj cashpanmi wanushganta (Rom. 5:12). Y manami pipis runa masinta ni quiquintapis juchapita y wanuypita libracuyta camäpacunchu (Sal. 49:7-9). Ichanga Diosninchi cuyapämashpanchimi Juan 3:16 nishganno, cuyashga japalan Wamranta cachamurgan noganchiraycur wanunanpaj, chaynopa juchapita y wanuypita libramänanchipaj (Mat. 20:28; Rom. 5:19). Jesusga noganchiraycur wanurgan, payman yäracojcuna salvacärinanpaj (Heb. 2:9). Jehovapa shongunga mayraj nanaycurgan cuyashga Wamranta runacuna alapa nacachir wanuchiptin. Pay perdunamänanchipaj mana munaptenga, Wamran wanunanpaj manami cachanmanchu cargan.
7. Wilacaramuy unaycho pïcunatataj Jehová perdunashganta.
7 Bibliaga wilacunmi achca runacunata Jehová perdunashgantami (Efes. 4:32). Gampis yarpanquichi rey Manasesta pasashganta. Payga mana ali runa cargan, Jehovapa contrancho imaycacunata rurargan. Marca masincuna luta dioscunata adurapäcunanpaj mandargan y quiquinpa wamrancunatapis rupachergan chay luta dioscunapaj. Jina mana pengacuypaj Jehovapa templunchopis juc iduluta churargan. Chayno rurashganpita Bibliaga nin: “Tsayno mana alikunata rurarmi TAYTA DIOSTA pasaypa rabyanätsirqan” (2 Crón. 33:2-7). Pero Manasés shongupita arrepentido caycaptinmi Jehová perdunaycurgan y yapay rey cananpaj churargan (2 Crón. 33:12, 13). Rey Davidpis jatun juchata rurashganta yarpanquichi, payga juc soldadunpa warminwan punucurgan y runanta wanuchinanpaj mandargan. Pero David jatun juchata rurashganta cuentata gocur arrepenticuptin Jehová perdunaycurganmi (2 Sam. 12:9, 10, 13, 14). Chauraga imaypis seguro caycashwan Jehová perdunamänanchipaj munashganta. Y Paypa perdunninga manami tincunchu runacunapa perdunninwan.
JEHOVAPA PERDUNNINGA IMAWANPIS TINCUNCHU
8. ¿Imanirtaj ninchi Jehovalami más ali juez cashganta y chayno cashpan imata ruran?
8 Jehovaga “kay patsacho taq lapan runakunapa jueznin” caycan (Gén. 18:25). Imanomi juc ali juez leycuna ima cashganta shumaj tantian, chaynolami Jehovapis ali Juez caycan. Y mana chaylachu, payga camacächin ima leycuna cananpaj (Is. 33:22). Pipitapis Jehovalami shumaj musyan ima ali cashganta y ima mana ali cashgantapis. Juc ali juez pitapis sentenciata wilacunanpäga, puntata shumajraj musyapacaramun ima ayca pasashganta. Y caychoga manami pipis canchu Jehovanoga, paylami lapanta musyan.
9. ¿Imacunatataj Jehová cuentaman churan pitapis perdunananpaj?
9 Jehovaga manami runacunanochu juzgan. Payga imaypis lapanta musyan cawayninchicho ima ayca pasashganta (Gén. 18:20, 21; Sal. 90:8). Runacunaga ricärishganlapita o wiyashganlapita juzgan, Jehová ichanga manami chaynochu. Payga shumajmi musyan imano cashganchita, maycho y pïcunawan winashganchita, y imacunawan luchaycashganchitapis. Jina shongunchicho ima caycashgantapis ricanmi. Aumi, payga musyan imata rurananchipaj munashganchita, ima yarpaycashganchita y ima munaycashganchitapis. Jehovapa ricayninchoga imapis pacarashga caycanchu (Heb. 4:13). Chaymi Jehová noganchipita lapantaraj musyaycur perdunamanchi.
Jehovaga alilatami ruran, pitapis igualpa rican y sobornuta manami chasquinchu. (10 caj parrafuta ricay).
10. ¿Imanirtaj ninchi Jehovaga imaypis alilatami ruran? (Deuteronomio 32:4).
10 Jehovaga imaypis alilatami ruran. Payga lapancunata igualpa rican. Chaymi pitapis perdunaycunanpäga manami ricanchu cuyaylapaj, guellayyoj, reguishga o yachaj runa cashganta (1 Sam. 16:7; Sant. 2:1-4). Payga ni ima sobornutapis chasquinchu (2 Crón. 19:7). Jina pitapis corriginanpaj captenga corrigiycunmi (Éx. 34:7). Chauraga Jehovano Juezga manami pipis canchu, payga shumaj reguimanchi y cawayninchicho ima ayca pasashganta musyanmi (leiriy Deuteronomio 32:4).
11. ¿Imanirtaj Jehovapa perdunninga imawanpis tincunchu?
11 Escrituras Hebreas nishganta escribejcunaga musyapäcurganmi Jehovapa perdunninga imawanpis mana tincushganta. Chaymi öraga perdunpita parlar juc libro nin “chay palabrawanmi tantiachicoj juchayoj cajta Dios perdunashgantami”. Y caytapis nin: “Chay palabraga manami imaypis tantiachicojchu juc runa runa masinta perdunashganta” (Sinónimos del Antiguo Testamento, traducción y adaptación de Santiago Escuain). Jehovalami munayniyoj caycan shongupita arrepenticojta perdunaycunanpaj. ¿Y imanotaj ricacunchi Jehová perdunamaptinchega?
12, 13. 1) ¿Imanotaj ricacunchi Jehová perdunamaptinchi? 2) ¿Jehovaga rätulapächuraj pitapis perdunaycun?
12 Jehová perdunamashganchipita convencido caycarga, mana yarpachacuylapa alina cawar galaycunchi y conciencianchipis acusamanchinachu. Pay perdunamaptinchilami chayno ricacunchi, runacuna perdunamaptinchi ichanga manami chaynochu ricacunchi (Hech. 3:19). Jehová perdunamaptinchega yapay amigun canapaj puedinchi. Chauraga ricaynincho imaypis mana juchalicushganchino caycanchi.
13 Jehová pitapis perdunaycuptenga, yapayga chay juchapita acusanchu ni castiganchu (Is. 43:25; Jer. 31:34). Payga “patsapa juk kuchunpita jukaq kuchunyaq jitariqnömi” juchacunata jitarin (Sal. 103:12).b Jehová chayno perdunacoj captinmi payta ‘gracias’ ninchi y cuyayculanchimi (Sal. 130:4). Pero ¿pïcunatataj Jehová chayno perdunaycun?
¿PÏCUNATATAJ JEHOVÁ PERDUNAYCUN?
14. ¿Imatataj canancama yachacushcanchi Jehovapa perdunninpita?
14 Canancama yachacushganchi Jehová pitapis perdunaycunanpäga manami ima jucha rurashganpitachu canga. Camacojninchi, Juezninchi y leycunata gomashganchi captinmi, payga musyanmi pitapis perdunaycunanpaj o manapis. Chauraga, ¿imatataj Jehová cuentaman churan pitapis perdunaycunanpaj?
15. Lucas 12:47, 48 textucuna wilacushganno, ¿imataj Jehová cuentaman churan pitapis perdunaycunanpaj?
15 Jehovaga cuentaman churan pipis juchalicuptin apropósito cashganta o manapis. Jesús chaypitami parlacaramurgan Lucas 12:47, 48 (leiriy) textucunacho. Dios chiquishgan ruraycuna pasaypa mana ali cashganta musyaycarpis pipis ruraycuptenga, alapami juchalicun. Y sasami canman Jehovapis perdunaycunanpaj (Mar. 3:29; Juan 9:41). Pero öraga imatapis ruraycur-raj cuentata gocunchi rurashganchega mana ali caycashganta. Chayno captenga, ¿Jehová perdunamäshunchuraj? Aumi. Mä ricärishun imanirmi chayta ninchi.
Shongupita arrepenticuptinchega, Jehová perdunamäshunmi. (16 y 17 parrafucunata ricay).
16. ¿Imanotaj musyanchi pipis rasunpa arrepentido caycashganta, y imanirtaj chayta ruranman?
16 Jina Jehovaga cuentaman churan juchayoj caj rasunpachush arrepentido caycan o manachu. Pipis rasunpa arrepentido caycaptenga manami munashganlatachu ruranga, sinoga calpachacunga yarpayninpis y rurayninpis alina cananpaj. Jina mana alicunata rurashganpita alapami pësacun y laquicunpis. Pero manami chaylachu, Jehová mandashgancunata mana ruraycashgantapis cuentata gocun y gueshyaycaj runa japuy caycan. Yapay yarparcushun Manaseswan Davidman, paycuna shongupita arrepenticäriptinmi Jehová perdunaycurgan (1 Rey. 14:8). Chauraga Jehová perdunaycunanpäga juchayoj cajga manami laquicunmanlachu mana alicunata rurashganpita, sinoga ruraynincunacho claro ricacämunman rasunpa arrepentido caycashganta.c Ricärishun ima mastaj Jehová cuentaman churan.
17. ¿Ima mastataj Jehová shuyaran perdunamänanchipaj, y chayga imanotaj yanapämanchi yapay mana juchalicunapaj? (Isaías 55:7).
17 ¿Ima mastataj Jehová cuentaman churan pitapis perdunaycunanpaj? Jehovaga shuyaran juchayoj caj unay mana ali rurashgancunata jaguirinanpaj y pay munashganno cawar galaycunanpaj (leiriy Isaías 55:7). Jina luta yarpashgancunata cachaycunmanmi, Jehová munashganno yarpänanpaj (Rom. 12:2; Efes. 4:23). Shongupita calpachacunman alita yarpaj y alita ruraj runa cananpaj (Col. 3:7-10). Ichanga ama gongashunchu Jehová perdunamänanchipaj y juchanchicunapita limpiamänanchipäga Jesús wanushganmanmi yäracunanchi. Chauraga imaycanopapis alicunata ruranapaj calpachacuycashganchita Jehová ricaptenga, payga perdunamanchimi (1 Juan 1:7).
JEHOVAGA MUNAYCUNMI PERDUNASHUNAYQUIPAJ
18. ¿Imatataj Jehovapa perdunninpita yachacushcanchi?
18 Cay yachachicuycho yachacushganchita waquilanlata yarpärishun. Jehovano perdunacojga manami pipis canchu. ¿Imanirtaj chayta ninchi? Juc, payga imaypis listo caycan perdunamänanchipaj. Ishcay, shumaj reguimanchi y noganchipita lapanta musyan, jina cuentata gocunmi shongupita rasunpa arrepentido caycashganchita. Y quimsa caj, Jehová perdunamaptinchega lapan juchanchicunata gongaycunmi. Chayga yanapämanchi pay ali ricamänanchipaj y conciencianchipis ali cananpaj.
19. ¿Imanirtaj laquishgala caycashwanchu juchasapa cashpanchi imalachopis pantarir?
19 Juchasapa cashpanchi öraga imalachopis pantarishunmi. Pero shacyächimanchi Perspicacia para comprender las Escrituras, volumen 1, página 209 cajcho nishganta musyar, chaycho nin: “Jehovaga cuyapäcojmi y manami munanchu sirvejnincuna juchasapa cashganraycur lapan pantashgancunapita pësacuycarla caycänanpaj. (Sl 103:8-14; 130:3.) Pipis Jehová mandashgancunata cäsucunanpaj imaycanopapis calpachacuycaptenga, cushicunmanmi alita ruraycashganpita. (Flp 4:4-6; 1Jn 3:19-22.)”. ¡Chaycho nishganga alapami shacyächimanchi!
20. ¿Imacunapitataj gatejnin yachachicuycho parlashun?
20 Jehovatami alapa agradecicunchi juchanchicunapita arrepenticuptinchi perdunamänanchipaj listo caycashganta. Pero ¿imanotaj payno perdunacoj cashwan? ¿Imacunachotaj runa masinchita perdunashganchi tincunmi Jehovapa perdunninwan y imacunachotaj mana igualanchu? ¿Y imanirtaj ali canman chayta shumaj tantiarcunapaj? Gatejnin yachachicuycho chaycunapita parlarcushun.
45 CAJ CANCIÓN Shongücho imaraj caycan
a Bibliachoga wilamanchi juchancunapita arrepenticojcunataga Jehová perdunaycunmi. Pero öraga ‘nogaga manami merecëchu perdunamänanpaj’ nirchi yarpashwan. Cay yachachicuychoga tantiarcushun imanirmi seguro caycashwan Jehová juchanchicunapita perdunamanchi rasunpa arrepenticuptinchi.
c MASLATA TANTIARCUNAPAJ: Pipis rasunpa arrepentido caycaptenga pësacun unaycho mana alicunata rurashganpita. Jina calpachacun yarpayninpis y rurayninpis alina cananpaj.