Gamta Jehová chipyaypa perdunashushgayqui

1, 2. 1) Juchanchipita arrepenticuptinchi, ¿imata ruran Jehová? 2) Perdunamashganchita musyar, ¿imanotaj sienticunchi? (Garancho caycaj fotutapis ricay).

REY David unaycho juchata rurashganpita pasaypa laquishga caycargan (Sal. 40:12; 51:3). Payga shongupita arrepenticurgan y Jehová perdunarganmi (2 Sam. 12:13). Jehová perdunashganta musyar rey David jaucala y cushishga sienticurgan (Sal. 32:1).

² Noganchipis Jehová juchanchipita perdunamashganchita musyar rey Davidno jaucala y cushishga sienticunchi. Jatun juchata ruraptinchipis Jehová perdunamanchi shongupita arrepenticuptinchi, ancianucunata wilapaptinchi y juchata manana ruranapaj calpachacuptinchi (Prov. 28:13; Hech. 26:20; 1 Juan 1:9). Jehovaga juchanchita perdunamaptinchi chipyaypa perdunamanchi, juchanchipita manami imaypis yarpannachu castigamänanchipaj, chayga alapa cushichimanchi (Ezeq. 33:16).

3, 4. 1) Jennifer hermananchi, ¿imanotaj sienticurgan? 2) ¿Imataj canan yachacushun?

³ Öraga capazchi yarpashwan Jehová juchanchipita mana perdunamashganchita. Chaynomi yarpargan hermananchi Jennifer, payta taytancuna wamralapita Jehovapita yachachergan. Pero jipashyarna taytancunapita pacaylapa mana alicunata rurar galaycurgan. Tiempuwanna cambiucunata rurargan, y bautizacurganpis Jehovata sirvinanpaj. Jennifer wilacun: “Jipash caycaptë alapa upyaj cä, jucwan jucwan cacoj cä, imapitapis rasla rabiacoj cä y imaypis guellaylata ashej cä. Chay mana alicunata rurashgäpita arrepenticur Jehovata mañacurgä perdunamänanpaj. Musyämi Jehová perdunamashganta y Jesús juchäraycu wanushgantapis, chayno captinpis shongücho yarpaj cä Jehová juchäpita mana perdunamashganta”.

⁴ Capazchi gampis yarpaycanqui Jehová juchayquicunata mana perdunashushgayquita. Chay hora Jehová cuyacoj y perdunacoj cashganman yarpay, chaynomi rey Davidpis rurargan Jehová perdunashganpita seguro caycänanpaj. Chaymi canan yachacushun imanirtaj seguro caycänanchi Jehová perdunamashganchita, y imataj rurananchi chaypita seguro caycänanchipaj.

IMANIRTAJ SEGURO CAYCASHWAN JEHOVÁ PERDUNAMASHGANCHITA

5. ¿Imataj Satanás munan yarpänanchipaj?

⁵ Jehová cuyamashganchita y perdunamashganchita seguro caycarga, Satanás trampaman manami ishquishunchu. Satanás imaycacunata ruranga Jehovata manana sirvinanchipaj. Payga munan Jehová mana cuyamashganchita ni perdunamashganchita creinanchipaj. Mä yarpäshun Corinto juc cristianupita. Payga juchata rurashganraycu congregaciunpita jorgushga cargan (1 Cor. 5:1, 5, 13). Y tiempuwanna arrepenticurgan. Pero Satanás munargan hermanucuna mana perdunananta y congregaciunmanpis mana cutinanpaj. Hermanucuna mana perdunaptenga chay runa yarpanman cargan Jehová juchanpita mana imaypis perdunashganta. Chayraycu laquishga sienticunman cargan, Jehovatapis manana sirviyta munanmanchu cargan. Canan wichanpis Satanás Jehová mana perdunamashganchita yarpänanchipaj munan, pero noganchega ‘musyanchimi Satanás munan imaykanöpapis jutsaman tunichimänanchipaj’ (2 Cor. 2:5-11).

6. ¿Imataj rurashwan juchata rurashganchipita manana culpayoj caycänapaj?

⁶ Jehová juchanchipita perdunamashganchita seguro caycarga, culpayoj manana sienticushunnachu. Ima juchatapis ruraptinchi laquicunchimi (Sal. 51:17). Juchanchipita laquicuptinchi yanapämäshun mana ali cajcunata jaguirinapaj y ali cajcunalata ruranapaj (2 Cor. 7:10, 11). Juchanchipita arrepenticushgana pasaypa laquishga caycaptinchi Jehovatapis sirviyta jaguirishwanmi. Ichanga Jehová juchanchita perdunamashganchipita seguro caycarga manana culpayoj caycäshunnachu, sinoga jaucala y cushishga Jehovata sirvir caycäshun (Col. 1:10, 11; 2 Tim. 1:3). Canan yachacushun imataj yanapämäshun Jehová perdunamashganchita shongunchicho seguro caycänanchipaj.

¿IMATA RURANQUIMAN JEHOVÁ PERDUNASHUSHGAYQUITA SEGURO CAYCÄNAYQUIPAJ?

7, 8. ¿Imataj quiquinpita Jehová nergan Éxodo 34:6, 7 textucho y imapita seguro caycanchi?

⁷ Jehová quiquinpita nishganman yarpay. Yarparcushun Sinaí jircacho imataj Jehová nergan Moisesta (leiriy Éxodo 34:6, 7).a Pay Moiseswan parlar nergan “kuyapäkuq y perdonakuq Diosmi kä”. Chauraga Jehová cuyapäcoj y perdunacoj car pilapis juchanpita arrepenticuptin perdunangami. Payga alapa cuyapäcojmi.

⁸ Jehová perdunacoj cashganta niptin, ¿creishwanchuraj? Aumi. Payga imaypis lulacunchu, rasun cajlata parlan (Sal. 31:5). Jehová juchayquipita perdunashushgayquita mana seguro caycarga, cayman yarpay: Jehová cuyapäcoj y perdunacoj cashpanmi lapan arrepenticojcunata perdunanmi. Chaymi seguro caycay Jehová juchayquipita gamtapis perdunashushgayquita.

9. Jehová perdunacoj cashganpita, ¿imataj yachachimanchi Salmo 32:5?

⁹ Bibliacho yachachimanchi Jehová perdunamashganchita, chayman yarpay. Rey David Jehovata cayno nergan: ‘Jutsa rurashqäkunapita gamga perdonamashqanki’ (leiriy Salmo 32:5). Hebreo rimaycho cay versículo ‘perdunanmi’ niptenga “jogarcun” o “apacun” ninanmi. Jehová David juchanta perdunargan. Chayga cargan Davidpa hombrunpita lasaj guepita jogarcur apashgannomi, chaypita David ancashlana y cushishga sienticurgan (Sal. 32:2-4). Noganchipis shongupita Davidno arrepenticuptinchega juchanchicuna lasaj guepitano manami caycanganachu y shongunchichopis manami culpayoj sienticushunnachu. Jehová chipyaypa perdunamashganchipita cushishgala sienticushun.

10, 11. ¿Imataj yachachimanchi Salmo 86:5 Jehovapita?

¹⁰ (Leiriy Salmo 86:5). David Jehovata nergan: “Qamqa perdonakuqmi kanki”. Chaymi ima juchatapis ruraptinchi payga manami jucla rabiacunchu, sinoga arrepenticuptinchi perdunamanchimi. ¿Imanir? Biblia Jehovapita nin: “Qamman yärakamuqkunataqa kuyapankimi”. Pasaj yachachicuycho yachacushcanchi Jehová cuyashgan sirvejnincunata alapa cuyashganta. Chaymi cuyashpanmi juchancunapita arrepenticojcunataga Jehová listo caycan perdunananpaj (Is. 55:7). Jehová perdunashushgayquita mana seguro caycarga cayman yarpay: “Pipis juchanpita arrepenticur Jehovata mañacuptin payga listumi caycan perdunananpaj. Chauraga seguro caycay gamtapis juchayquipita Jehová perdunashushgayquina”.

¹¹ Biblia wilamanchi Jehová musyashganta imano cashganchita y juchayoj cashganchitapis, chayta musyar alapa shogamanchi (Sal. 139:1, 2). Cananga yachacushun imata más Biblia wilamanchi Jehová juchanchita perdunamänanchipaj munashganta.

¿IMATAJ JEHOVÁ YARPAN NOGANCHIPITA?

12, 13. 1) ¿Imata Jehová musyan noganchipita? (Salmo 103:14). 2) ¿Imata ruranga Jehová juchanchipita arrepenticuptinchi?

¹² (Leiriy Salmo 103:14). David nergan “alpalapita kashqantsita” Jehová musyashganta. Pay musyanmi juchayoj cashganchita, chaymi shongupita arrepenticuptinchi listo caycan perdunamänanchipaj. Canan chay textupita maslata yachacushun.

¹³ Jehová “musyanmi imano kashqantsita” David escribergan. Jehová Adanta alpalapita camashga chaymi musyan runacuna imano cashganta. Pay musyan imata necesitashgantapis cawananpaj, micunanpaj y pununanpäpis; chaytami juchaynaj runacunapis necesitapäcun (Gén. 2:7). Adán y Eva juchalicushganraycu noganchipis paycunapa miraynincuna car juchayoj canchi y mana alita ruranchi. Salmo 103:14 textucho hebreo rimaycho “musyanmi” niptenga tantiachicun Jehová noganchipaj ali cajta rurayta munashganta. Chauraga Jehová musyan juchanchiraycu imalachopis pantashganchita, pero shongupita arrepenticuptinchi cuyapämashpanchimi perdunamanchi (Sal. 78:38, 39).

14. 1) Salmo 103:12 textucho, ¿imata yachachimanchi Jehová perdunamashganchipita? 2) ¿Imanotaj Jehová Davidta perdunargan y imata chaypita yachacunchi? (“Jehová chipyaypa perdunamanchi” recuadrutapis ricay).

¹⁴ ¿Imata más yachachimanchi Salmo 103 Jehová perdunamashganchipita? (Leiriy Salmo 103:12). David nergan “inti yagamunanpita inti yagananga fiyupa caruchömi caycan” Jehová juchanchita perdunamaptinchi caruman jitarin. Jina juc Bibliata liej cayno wilacun: “Dios juchanchita caruman apaptin seguro caycanchi juchanchi chipyaypa ushacashga caycashganta y Dios chayman manana yarparanganachu”. Ayvecisga imalapitapis unay pasashganchiman yarpar galaycunchi. Ichanga Jehová juchanchipita perdunamaptinchi manami yarparannachu juchanchita, ni manami nimäshunchu ‘noga perdonashgä cayno wacno rurashgayquipita’ nir (Ezeq. 18:21, 22; Hech. 3:19).

15. Juchayquipita Jehová mana perdunashushgayquita yarparga, ¿imata ruranayqui?

¹⁵ Jehová juchayquipita mana perdunashushgayquita yarparga Salmo 103 textuman yarpay. Cay texto yanapäshunqui seguro caycänayquipaj Jehová perdunashushgayquita. Jina cayno yarpachacuy: “Juchayoj cashgayquita, arrepentido cashgayquiraycu perdunashunayquita Jehová munaycan. ¿Manacu gampis chayno yarpanquiman? Jina Jehová jucha rurashgayquipita chipyaypa perdunashushpayqui, juchayquita manami yarparaycanganachu, ni ‘cayta wacta rurashcanqui’ nir yarpächishunquichu. ¿Manacu chayno gampis yarpanquiman?”. Jehovaga juchayquicunapita perdunashushgayquita payga manami yarparaycannachu, gampis chaycunaman manana yarpanquimanchu (Sal. 130:3). Jehová juchayquipita perdunashushgayquita seguro caycarga manana laquishgala caycanquichu sinoga cushishgala Jehovata sirviycanqui.

16. ¿Imanirtaj unaycho juchata rurashgayquiman mana yarpararla caycanquimanchu? (Dibujutapis ricay).

¹⁶ Cayman yarpay, pilapis carrunta manejaptin cada cadala guepapaj espejunta ricanman ima peligro cashgantapis ricananpaj, pero guepalaman espejunta ricar manejaptin peligrosumi canman, pilatapis jarurinmanchi. Ima accidente mana pasananpaj naupaman ricar manejanayqui. Chaynolami unay tiempucho juchata rurashgayquiman imaylapis yarpaptiqui alichi canman, yapaycho juchata mana ruranayquipaj. Pero juchalayquiman cada cadala yarpaptiqui laquishgala sienticunqui y Jehovata cushishgala sirvinquinachu. Chaypa trucan paraisucho shumaj cawacunayquipaj cajman yarparay, paraisucho “unay pasashqan kaqkunataqa pipis manami yarpanqanatsu” (Is. 65:17; Prov. 4:25).

IMAYPIS SEGURO CAYCAY JEHOVÁ PERDUNASHUSHGAYQUITA

17. ¿Imanirtaj Jehová cuyamashganchita y perdunamashganchita imaypis seguro caycänanchi?

¹⁷ Jehová cuyamashganchita y perdunamashganchita imaypis seguro caycänanchi (1 Juan 3:19). ¿Imanir? Satanás musyanmi walca tiempulana runacunata engañananpaj cashganta chaymi munaycan Jehová mana cuyamashganchita ni perdunamashganchita yarpänanchipaj, chaynopa Jehovata manana sirvinanchipaj. (Apoc. 12:12). Satanasta mana cäsupashwanchu sinoga Jehovalata imaypis sirviycäshun.

18. ¿Imata ruranquiman Jehová cuyashushgayquita y perdunashushgayquita seguro caycänayquipaj?

¹⁸ Pasaj yachachicuycho yachacushgayqui imata ruranayqui seguro caycänayquipaj Jehová cuyashushgayquita. Y cay yachachicuycho yachacushgayqui Jehová perdunashushgayquita seguro caycänayquipaj. Chaymi Jehová imano cashganta quiquin nishganman y Biblia wilacushganta Jehová perdunacoj cashganman yarpachacuy. Ama gongaychu Jehová juchasapa cashgayquita musyarmi cuyacuywan tratashunqui. Jina yarpay lapanchicunata jucha rurashganchita chipyaypa perdunamanchi. Cay lapancunata ruraptiquega Davidnopis cayno ninqui: ‘¡Graciaslä Jehová, mana ali rurashgäcunapita y juchäpita perdunamashgayquipita!’ (Sal. 32:5).