Bautizacunayquipaj alapa shuyaraychu

1. ¿Imanirtaj bautizacuyta munanchi?

JEHOVÁ gamta cuyashushgayquiraycu lapanta camashga y cawaytapis goshushgayqui. Chauraga, ¿gampis paytaga cuyayta munanquicu? Bautizacuptinchi y paylapaj cawanapaj auniptinchi musyachicuycanchi alapa cuyashganchita. Chaycunata ruraptiquega Jehovapa familianno canquimi. Paypa wamranno y amigunno ricacunqui chaymi payga pushashunqui y cuyashunquipis (Sal. 73:24; Is. 43:1, 2). Manami chaylachu, bautizacushgayquipita imaycamapis cawayta tarinquipajmi (1 Ped. 3:21).

2. ¿Imapitataj yachacushun cay yachachicuycho?

² Capaz imalapis michäshunqui bautizacunayquipaj. Ama yarpachacuychu, manami gamlachu chay pruebacunapa pasaycanqui. Achca runacunami ima chapacuna captinpis, cambiucunataraj rurapäcurgan bautizacärinanpaj y cananga cushi cushilami Jehovata sirvircaycan. Canan yachacushun naupa tiempucho waquin runacuna imata rurapäcurgan bautizacärinanpaj, ima chapacuna captinpis. Gam mozularaj o edayashgana captiquipis paycunapita yachacunquimanmi.

SAMARIA RUNACUNAGA BAUTIZACÄRERGAN

3. Waquin samaritanucuna bautizacärinanpaj, ¿imataraj rurapäcunman cargan?

³ Jesuspa tiempuncho samaritanucuna religioso runacunami capäcurgan. Paycuna Siquem y Samaria marcacunapita ladunchomi tiyapäcurgan, y chayga cargan Judeapa norte cajchomi. Paycuna bautizacärinanpaj shumajraj Diospa Palabranta reguipäcunman cargan. ¿Imanir? Paycuna creyipäcurgan Genesispita Deuteronomiucama librucunala Diospa Palabran cashganta y capazchi Josué librutapis. Chayno captinpis musyapäcurgan Deuteronomio 18:18, 19, textucho Jehová aunishganta Mesías shamunanpaj cajta (Juan 4:25). Bautizacärinanpaj Jesús Cristo cashganta yäracunman cargan. Achca samaritanucuna Jesusman creyipäcurgan (Juan 4:39). Capazchi waquin samaritanucuna judiucunata chiquipäcurgan, cananga cuyapäcunmanmi cargan (Luc. 9:52-54).

4. Hechos 8:5, 6 y 14 nishganno, ¿imataj waquin samaritanucuna rurapäcurgan Felipe yachachishganta wiyar?

⁴ ¿Imata samaritanucunata yanapargan bautizacärinanpaj? Yachachicoj Felipe samaritanucunata Jesús salvamajninchi Cristo cashganta wilacuptin, paycuna “Diospa wilakuyninta” chasquipäcurgan (leiriy Hechos 8:5, 6, 14). Samaritano runacunaga Felipe runata, judío captinpis, wiyapäcurganmi. Capazchi payta wiyar yarpapäcurgan Jehová lapan runacunata cuyashganta (Deut. 10:17-19). Imano captinpis Felipe Jesuspita yachachicushganta shumaj wiyapäcurgan. Jina Felipe gueshyaycajcunata jampishganta y demoniucunata gargushganta ricar, runacuna tantiapäcurgan payta Dios cachamushganta (Hech. 8:7).

5. Samaritanucuna rurashganpita, ¿imataj yachacunqui?

⁵ Capaz samaritanucunapaj sasachi cargan bautizacärinanpaj, waquincunawan chiquinacärishganraycu o shumaj Bibliata mana tantiashganraycurpis. Chayno captinpis samaritanucuna Felipe yachachishganpita tantiaycur bautizacärirgan. Bibliaga wilacun: “Tayta Dios mandaykashqanpa ali wilakuyninta y Jesucristupita Felipe wilakuptinnami olqupis warmipis chaskikur bautizakärirqan” (Hech. 8:12). ¿Y gam? ¿Diospa palabran rasunpa cashgantacu yäracunqui? Capazchi ricashcanqui Jehovapa testiguncunata jucnin jucnin cuyanacärishganta, Jesús rasunpa cristianucunata mandashganno (Juan 13:35). Chauraga bautizacunayquipaj alapa ama yarpaychu. Bautizacuptiquega Jehová bendecishunquipajmi.

6. ¿Imata yachacunqui Ruben rurashganpita?

⁶ Ruben Alemania naciunpita, familiancuna Jehovapa Testigun capäcurgan. Pero mozularaj caycaptin ‘Dios canchuraj o manachuraj’ nir yarpargan. Chayno mana yarpananpaj Diospita más yachacunanraj cargan. Payga nin: “Calpachacurgä Bibliäta leishgä hora más yarpachacunäpaj y cutin cutinmi leyirgä más temacunata, ilajpitachu yurimushcanchi o juc camacoj camamashcanchi tantianäpaj”. ¿Existe un Creador que se interese por nosotros? nishgan libruta pay leyirgan y chayga yanapargan Jehová camacoj cashganman yäracunanpaj. Payga cayno wilacun: “Canmi juc Camacoj, paymi Jehová”. Jina Ruben Estados Unidoscho Warwick betelman visitaj aywargan, chaycho caycar alapami almiracurgan imano Diospa sirvejnincuna jucnin jucnin cuyanacärishganta ricar. Chaymi payga Alemaniaman yapay cutirna 17 watayoj caycaptin bautizacurgan. Yachacushgayqui hora shumaj mana tantiarga, publicaciuncunacho ashiy más tantiacunayquipaj rasunpa cajta o mana. Shumaj yachacurna yanapämäshun ali yäracoj cananchipaj (Efes. 4:13, 14). Jina entero pachacho caycaj hermanunchicuna imano cuyanacärishganta y juntula caycashganta ricar, gampis paycunataga más cuyanqui. Y congregaciuncunachopis chaynomi cuyanacärin.

TARSUPITA SAULO BAUTIZACURGAN

7. ¿Ima cambiucunataraj Saulo ruranman cargan?

⁷ Saulupita yachacushun, payga judío runa car ali reguishga, respetashga y yachaj runami cargan (Gál. 1:13, 14; Filip. 3:5). Chay tiempucho, judío runacunaga yarpapäcurgan cristianucuna Diospita lutanta yachachishganta. Chaymi Saulupis cristianucunata gaticachar galaycurgan. Chayta rurar payga yarpargan Diospa voluntänin ruraycashganta (Hech. 8:3; 9:1, 2; 26:9-11). Chauraga Pablo Jesusman yäracunan cargan bautizacunanpaj y musyarganpis gaticachashga cananpaj.

8. 1) ¿Imata Sauluta yanapargan bautizacunanpaj? 2) Hechos 22:12-16 wilacushganno, ¿imatataj Ananiasga rurargan Sauluta yanapananpaj? (Dibujutapis ricay).

⁸ ¿Imata Sauluta yanapargan bautizacunanpaj? Jesús cielupita Sauluta parlapaptin ilajpita chipchipyar achqui yuripar payta gaprachergan (Hech. 9:3-9). Quimsa junajcuna imatapis manami micurganchu y pasashganpita alapa yarpachacurgan. Y tantiarganpis Jesús Cristo cashganta y cristianucunapis Diospa rasunpa sirvejnincuna cashganta. Estebanta wanuchishganpita acuerducho caycashganta yarpar alapachi laquicurgan (Hech. 22:20). Quimsa junajcuna pasariptinna Ananías Saulupa wasinman watucamoj aywargan. Shacyächiylapa parlapargan y nawintapis aliyächergan yapay ricananpaj y bautizacunanpajpis nergan (leiriy Hechos 22:12-16). Sauluga ñanpu shongu car caway vidanpis cambiarganmi (Hech. 9:17, 18).

9. ¿Imata yachacunqui Saulo rurashganpita?

⁹ Saulo rurashganpita lapanchitami yachachimanchi. Payga orgulloso car y manchacoj car manami bautizacunmanchu cargan. Pero Saulo Jesús Cristo cashganta tantiar, humilde car y caway vidanchopis cambiucunata rurar bautizacurgan (Hech. 26:14, 19). Jina gaticachashga cananpaj musyarpis cristianuman ticrargan (Hech. 9:15, 16; 20:22, 23). Bautizacurirna sasacunapa pasarpis Jehovaman yäracur jinala payta sirvirgan (2 Cor. 4:7-10). Y gam Jehovapa testigunno bautizacuptiqui capazchi ima pruebacunapapis pasanqui, chay horacho Jehová y Jesusmi yanapäshunqui aguantanayquipaj (Filip. 4:13).

10. Ana rurashganpita, ¿imata yachacunchi?

¹⁰ Europa naciuncho tiyaj Ana hermanapita parlarcushun. Mamänin bautizacuptinna; taytanpa permisunwan, payga 9 watayojlaraj caycaptin Jehovapa testiguncunawan Bibliata estudiayta galaycurgan. Familiancunaga juc religiunniyoj cargan y paycunawan jinan wasilancho tiyapäcurgan. Ana Jehovapa testiguncunawan Bibliata estudiaycashganpita musyarna, familiancuna contranman churacärergan. Mana alinomi ricargan castancunapa religiunninta jaguirishganta. Anaga 12 watayojna caycaptinshi, bautizacuyta munar taytanwan parlargan, y taytan tapurgan: ”¿Quiquiqui bautizacuyta munanqui o pipis obligaycäshunquichu?” nir. Y Anaga caynomi contestargan: “Jehovata alapami cuyä”. Chayta wiyar, taytan alinopami ricargan bautizacunanpaj. Bautizacushganpitana Anataga familiancuna ashlipar chiquir siguirgan. Y jucnin caj familianpis caynomi nergan: “Jehovapa testigun cashgayquipita trucan más alimi canman jucwan jucwan cacuptiqui, cigarruta mucar caycaptiqui”. Chaycunapa pasarga, ¿imata yanapargan Anata? Payga cayno wilacun: “Jehová calpata gomargan aguantanäpaj y taytäcunapis alapami yanapämargan”. Anashi cuadernuncho guelgargan caway vidancho imano Jehová yanapashganpita y öraga escribishganta leyin mana gongananpaj. Gampis ama manchacuychu, pipis contrayquicho churacuptin Jehovami yanapäshunqui (Heb. 13:6).

CORNELIO BAUTIZACURGAN

11. ¿Imanir-raj sasa cargan Cornelio bautizacunanpaj?

¹¹ Cananga Corneliupita yachacushun. Payga Romacho 100 soldaducunapa capitanninmi cargan (Hech. 10:1). Chaymi capazchi marcancho y ejercitucho ali carguyoj car reguishga cargan. Bibliapis wilacun Cornelio ‘waktsacunatapis yanapashganta’ (Hech. 10:2). Chaymi Jehová apóstol Pedruta mandargan Corneliuta ali wilacuyninta yachachinanpaj. Chauraga Cornelio alto carguyoj carga, ¿bautizacuyta munanmanchuraj?

12. ¿Imata Corneliuta yanapargan bautizacunanpaj?

¹² ¿Imataj Corneliuta yanapargan bautizacunanpaj? Bibliaga wilacun: “Wayincho taqkunawanmi Corneliuqa Tayta Diosta mantsakur pay munashqanno kawapäkuq. Waktsakunatapis yanaparmi Tayta Diosta imaypis manakuq” (Hech. 10:2). Apóstol Pedro Corneliuta y familiancunata Diospa ali wilacuyninpita yachachiptin, paycuna Cristuman yäracur bautizacärergan (Hech. 10:47, 48). Capazchi Cornelio familiancunawan Diosta sirvinanpaj imayca cambiucunatarämi rurapäcunman cargan (Jos. 24:15; Hech. 10:24, 33).

13. Cornelio rurashganno, ¿imatataj gampis ruranquiman?

¹³ Sauluno, Corneliupis alto carguyoj car capazchi manami munanmanchu cargan bautizacunanpaj. Pero ima michacuna captinpis, payga bautizacurgan. Y gamtapis Jehovami yanapäshunqui ima cambiucunatapis ruranayquipaj, chaynopa bautizacunayquipaj. Payga bendecishunquimi Biblia nishgannola cawacuptiqui.

14. ¿Imatataj yachacunchi Tsuyoshi hermanunchipita?

¹⁴ Japón naciunpita Tsuyoshi hermanunchi aruynincho cambiucunatarämi ruranan cargan bautizacunanpaj. Patrunninshi waytacunapita coronacunata wanushgacunapaj rurargan y veloriucho caycaptinpis luta religiuncunapa costumbrincunata ruraj. Patrunnin aywayta mana puediptin Tsuyoshita mandaj chayta rurananpaj. Pero Tsuyoshi Bibliacho wanojcunapita yachacurna y bautizacuyta munarga luta religiuncunapa costumbrincunata manana ruranmanchu cargan (2 Cor. 6:15, 16). Chaypita Tsuyoshi patrunninwan parlargan lutan costumbrincunata manana rurananpaj. Patrunnin acuerducho caycar jaguirirgan jinala arunanpaj. Tsuyoshi Bibliata yachacushganpita tiempuwanmi bautizacurgan.a Gampis aruyniquicho ima cambiucunata ruranayquipaj captenga, ama gongaychu gamta y familiayquitapis nestashgayquita Jehovami camaripäshunqui (Sal. 127:2; Mat. 6:33).

CORINTO RUNACUNA BAUTIZACÄRERGAN

15. ¿Imanir-raj sasami cargan Corinto runacuna bautizacärinanpaj?

¹⁵ Corinto marcacho tiyaj runacunaga guellaylata cuyaj y melanaypaj ruraycunatapis rurapäcoj. Jehovapa ricaynincho ganra ruraycunata rurapäcurgan. Chaymi chay runacunapa chaupincho cawar sasachi cargan Diosta adurananpaj. Pablo Corinto marcaman chayar Diospa ali wilacuyninpita yachachiyta galaycurgan, chaymi waquin runacuna yachachishganta yäracurmi bautizacärergan (Hech. 18:7-11). Quiquin Jesuspis juc visiuncho Pabluwan parlar caynomi nergan: “Kay markacho salvanäpaq kaq runakuna atskaqmi karkaykan”. Chaymi apóstol Pablo juc watapitapis más chay marcacho predicananpaj quedacurgan.

16. ¿Imata Corinto runacunata yanapargan bautizacärinanpaj? (2 Corintios 10:4, 5).

¹⁶ ¿Imata Corinto runacunata yanapargan bautizacärinanpaj? (Leiriy 2 Corintios 10:4, 5). Dios Corinto runacunata Palabranwan y santo espiritunwanmi yanapargan cambiucunata rurananpaj (Heb. 4:12). Chaymi Corinto runacuna ali wilacuyninta yachacur upiacoj cashganta, suwacoj cashganta y melanaypaj rurashgancunatapis jaguirirganmi (1 Cor. 6:9-11).b

17. Waquin Corinto runacuna rurashganpitaga, ¿imata yachacunqui?

¹⁷ Waquin Corinto runacuna bautizacärinanpaj achca cambiucunata rurananpaj sasa captinpis manami guelanäcurganchu, ni ‘cayta manami rurayta puedëchu’ nirpis yarparganchu. Sinoga calpachacurganmi Jehová munashganno cawananpaj (Mat. 7:13, 14). Gampis, ¿calpachacuycanquicu mana alicunata jaguirinayquipaj? Sasa captinpis, ¡ama laquicuychu! Jehovata mañacuy yanapäshunayquipaj, payga santo espiritunwanmi yanapäshunqui.

18. Monica rurashganpita, ¿imata yachacunchi?

¹⁸ Georgia naciuncho tiyaj, Monicaga jipashlaraj caycaptin bautizacuyta munar calpachacurgan lisurata manana parlananpaj y internetcho o televisiuncho melanaypaj ruraycuna manana ricananpaj. Payga wilacun: “Diosta mañacushgäpita calpata gomaj, Jehová musyarganmi mana alicunata jaguiriyta munashgäta y yanapämargan ali cajta ruranäpaj”. Monica 16 watayoj caycaptin bautizacurgan. Y gam, ¿Jehovata sirvinayquipaj ima cambiucunatapis ruranayquipaj caycanchuraj? Chayno captenga Jehovata mañacuy yanapäshunayquipaj (Juan 3:34).

YARACOJ CARGA JIRCATAPIS CUYUCHINQUIMAN

19. ¿Imata yanapäshunqui bautizacunayquipaj ima chapa jatun jircano captinpis? (Fotutapis ricay).

¹⁹ Bautizacunayquipaj ima cambiucunata ruranayquipaj sasa captinpis cayman yarpay, Jehová cuyashunquimi y familian canayquipaj munan. Waquin discipuluncunata Jesús nergan: “Ñäpushpa murunno takshalapis yärakuyniki kaptinqa taqay jirkata witikunanpaq niptikipis witikunmanmi. Manami imapis aläpa sasatsu qamkunapaq kanman” (Mat. 17:20). Chay discipuluncuna walca tiempula Jesuswan caycar yäracoj runa capäcurgan, pero más ali yäracoj canman cargan. Jina Jesús aunirgan yäracuynin sinchi captenga Jehová yanapananpaj cajta ima chapa jatun jircano captinpis vencinanpaj. ¡Gamtapis Jehová yanapäshunquimi!

20. Cay yachachicuycho yachacushgayquipita, ¿imanotaj yanapäshushgayqui?

²⁰ Bautizacunayquipaj ima cambiucunata ruranayquipaj sasa captinpis jucla chayta ruray. Yachacushganchino unay y canan tiempo cristianucuna rurashganpita yachacur yanapämashwanmi. Paycuna rurashganman yarpar yanapäshunqui bautizacunayquipaj y Jehovata sirvinayquipaj. Chayno ruraptiquega, ¡imaycamapis cushishgala cawanquipaj!