Jehová y Jesusno yarpänanchipaj yachacushun

1, 2. 1) ¿Imata rurartaj Jehovata cuyananchi? 2) ¿Imata rurartaj Jesús musyachicurgan lapan yarpayninwan Jehovata cuyashganta?

JESUSGA yachachergan lapan Diospa mandamientuncunapita maygantaj más importante caycan rurananchipaj. Chaymi cayno nergan: ‘Tayta Diosta kuyanki lapan shonquykiwan, lapan voluntänikiwan, lapan yarpaynikiwan y lapan kalpaykiwanpis’ (Mar. 12:30). Chauraga Jehovata cuyananchi lapan cawayninchiwan, imano cashganchiwan, ima munashganchiwan, lapan calpanchiwan y lapan yarpayninchiwanpis. Jehovata cuyarga pay yarpashganno yarpäshun, lapan yarpaynincunata shumajraj mana tantiarpis. Jehovapa yarpashganta tantiananchipaj Jesús imano yarpashganta yachacunanchi, payga Taytan yarpashganno yarpargan (1 Cor. 2:16).

² Jesús Jehovata cuyargan lapan yarpayninwan. Payga musyargan Taytanpa voluntänin ima cashganta, chayraycu nacananpaj musyarpis calpachacurgan Jehová munashganno rurananpaj. Ima chapacuna captinpis Taytanta cuyashganraycu pay munashgannola rurargan.

3. ¿Apóstol Pedro imataj yachacurgan Jesuspita y imataj nergan cristiano masincunata rurananpaj? (1 Pedro 4:1).

³ Pedro y waquin apostulcuna Jesuswan caycar yachacurgan pay imano yarpashganta. Pedro punta caj cartancho cristianucunata shacyächir nergan camaricushgala caycar Jesusno yarpananpaj (leiriy 1 Pedro 4:1). Escribishgancho Pedro “kamarikushqa karkaykay” niycargan soldaducuna manaraj guerraman aywar riccha ricchala caycashganno cristianucunapis caycänanpaj. Noganchipis Jesusno yarpaptinchi camaricushgala caycäshun cay munduwan mana talucänanchipaj y Satanaspa trampanmanpis mana ishquinanchipaj (2 Cor. 10:3-5; Efes. 6:12).

4. ¿Imatataj yachacushun?

⁴ Cay yachachicuychoga Jesús imano yarpashganta yachacur yanapämäshun payno yarpänanchipaj. Canan yachacushun imata rurashwan 1) Jehová yarpashganno yarpänanchipaj, 2) humilde cananchipaj y 3) ali juiciuyoj cananchipajpis.

JEHOVÁ YARPASHGANNO YARPÄSHUN

5. Wilacuy ima cutichotaj Pedro Jehovano manami yarparganchu.

⁵ Juc cutichomi Pedro manami yarparganchu Jehová yarpashganno. Jesús apostulnincunata nergan Jerusalenman aywananpaj y chaychoshi chiquejnincuna ashlipar magarcur wanuchinanpaj cajta (Mat. 16:21). Ichanga Pedro musyarganmi Jesús Mesías car Jehovapa marcanta salvananpaj cajta. Y capazchi Pedro yarpargan Jehová manami permitingachu wamranta wanuchinanpaj cajta (Mat. 16:16). Chaymi Pedro Jesusta juc laduman apaycur anyapar cayno nergan: “¡Chaynuyga ama caycuchunchu, tayta! ¡Chaynuyga ama pasayculäshunquichu!” (Mat. 16:22, MT). Chay horacho Pedro manami yarparganchu Jehová yarpashganno ni Jesusnopis.

6. ¿Imata rurartaj Jesús Taytanno yarpargan?

⁶ Jesús taytanno yarpar Pedruta cayno nergan: “¡Nawpäpita witikuy, Satanás! ¡Ama tsapata churapämaytsu! Qam manami munankitsu Tayta Dios munashqanta ruranäta, sinöqa runa munashqanta ruranätami munaykanki” (Mat. 16:23). Jesús musyargan Taytan voluntäninta rurar nacar wanunanpaj cashganta. Chaymi Pedro nishganta cäsuparganchu. Chauraga Pedro cuentata gocurgan Jehová yarpashganno mana yarpaycashganta. ¡Mä ricärishun imata yachacunchi chaypita!

7. ¿Imata Pedro calpachacur rurargan Jehovano yarpänanpaj? (Dibujuta ricay).

⁷ Tiempuwanna Jehová munargan mana judío caj runacunapis payta sirvinanpaj, chaymi Pedruta cachargan Cornelio runata yachachinanpaj. Corneliuga manami judío runachu cargan. Chay tiempuchoshi judío runacuna juc nación runacunawan juntacärerganchu, chaymi Pedro judío car Cornelio runata yachachinanpaj sasachi cargan. Chayno captinpis Pedro Jehovapa voluntäninta ima cashganta tantiar, calpachacurgan jucnopa yarpänanpaj. Chaymi Cornelio Pedruta gayachiptin jucla watucamoj aywargan (Hech. 10:28, 29). Chaypitana Pedro Corneliuta y familiancunatapis yachachiptin bautizacärergan (Hech. 10:21-23, 34, 35, 44-48).

8. ¿Imata rurartaj Jehová yarpashganno yarpananchi? (1 Pedro 3:8).

⁸ Watacuna pasariptinna Pedro cristiano masincunata cayno consejargan: “Lapaykipis juk shonqula kuyapänakur y juk aylunöla kuyanakur pïmaywanpis shakya shakya kawapäkuy” (leiriy 1 Pedro 3:8). Jehovapa testiguncuna juc shongunola y juc yarpayla cananchipaj calpachacushwan, Biblia yachachimashganchino Jehová yarpashganno yarpänanchipaj. Bibliacho Jesús nergan Diospa Gobiernunta puntaman churananchipaj (Mat. 6:33). Chauraga maygan hermanulanchipis ‘lapan tiempöwan Jehová sirviyta munä’ nimaptinchi, ¿imatataj nishun? ¿Pedro Jesusta nishgannochu parlapashwan? Manami, ¿au? Más bienga dicidishganpita felicitaycushwan y imalachopis yanapananchipaj munaptin yanapaycushunmi.

HUMILDE CASHUN

9, 10. ¿Imata rurartaj yachachimashcanchi Jesús humilde cashganta?

⁹ Jesús wanunanpäna caycar discipuluncunata yachachergan humilde runacuna capäcunanpaj. Jesús manaraj wanur, Juanta Pedruta mandargan imaycacunata rurar Pascua Cenata alistananpaj junto micupäcunanpaj. Discipuluncuna alistapäcurganchi lavaturiuta toallata yacuta, watucamojcunata chaquincunata maylapäcunanpaj. Y ¿pitaj chaquincunata maylanman cargan?

¹⁰ Chay wichancho invitaducunapa chaquincunata ashmaycunalami maylapäcoj. Pero chay cuticho Jesús jamarashganpita jucla sharcurcur janan caj jacunta jorgurir toallata chejlaman wataycur y lavaturiuman yacuta garpur discipuluncunapa chaquincunata maylapargan (Juan 13:4, 5). Jesusga humilde runa car once apostulnincunapa y traiciunacoj Judaspa chaquincunata maylargan. Nircurpis pacienciawan cayno yachachergan: “¿Tantiyapäkunkiku imanir chakikikunata maylapashqäta? Yachatsikuq kashqäta y Señorniki kashqäta nimashpayki rasun kaqtami nipäkamanki. Noqa yachatsikuqniki y Señorniki kaykar qamkunapa chakikita maylapaykaptïqa qamkunapis jukniki juknikipis chakikikunata maylapänakunki” (Juan 13:12-14).

11. ¿Imata rurartaj Pedro musyachicurgan humilde cayta yachacushganpita? (1 Pedro 5:5; dibujuta ricay).

¹¹ Jesús humilde cashganpita Pedro yachacurgan. Jesús cielupa cutiycushganpitana, Pedro juc cuticho wishtu runata aliyächergan (Hech. 1:8, 9; 3:2, 6-8). Chay milagrucunata ricashganpita achca runacuna almirashga quëdacush (Hech. 3:11). Chay wichancho runacuna imalatapis rurar ali tucoj cärej, pero payga manami chay runacunanöchu cargan. Pedro humilde cargan, chaymi imalatapis rurar Jehovata y Jesusta alabaj. Jesuspita parlar cayno nergan: “Paymi kay reqishqayki runata aliyätsishqa. Jesucristuman yärakuptïmi rikashqaykinöpis kanan aliyashqana kaykan” (Hech. 3:12-16). Tiempuwanna, Pedro cristianucunata escribishgancho yachachergan humilde cananpaj. Capaz yarpächergan Jesús toallata chejlanman watarcur discipuluncunata maylashganpita (leiriy 1 Pedro 5:5).

12. Pedro rurashganno, ¿imata rurashwan humilde cananchipaj?

¹² Pedruno noganchipis humilde cayta puedinchimi. Humilde cananchipäga manami shimilapitachu canman, sinoga yarpayninchicho rurayninchichopis humilde cashganchita musyachicushun. 1 Pedro 5:5 texto nimanchi humilde cajcunaga Jehovata y runa masincunata cuyarmi waquincunata yanapan. Chaymi imatapis rurar manami ashinchichu waquincuna alabamänanchipaj cajta. Jehovata y waquincunata cushishgala sirviptinchi musyachicushun humilde cashganchita (Mat. 6:1-4).

ALI JUICIUYOJ CASHWAN

13. ¿Imata rurashwan ali juiciuyoj runa cananchipaj?

¹³ ¿Imata rurashwan ali juiciuyoj runa cananchipaj? (1 Ped. 4:7). Ali juiciuyoj cananchipaj Jehová yarpashganno yarpashwan. Y Jehovawan amistäninchita manami trucachishwanchu imawanpis. Ali juiciuyoj runa carga manami yarpäshunchu ‘nogaga ali yachajmi cä pipitapis’ nir. Jina humilde carga Jehovata mañacur yanapacuyninta ashishun pushamänanchipaj.a

14. Wilacuy imaytaj Pedro Jehovaman yäracurganchu.

¹⁴ Jesús manaraj wanur discipuluncunata cayno nergan: “Kanan tsakaymi lapayki kacharqärimankipaq”. Pero Pedro seguro caycar cayno nerqan: “Wakinkuna kacharishuptikipis noqaqa manami kachashaykitsu”. Chay chacaycho Jesús waquin discipuluncunata cayno nergan: “Rikchapäkuy. Tayta Diosta manakäriy” (Mat. 26:31, 33, 41). Pedro Jesusta cäsucurga, valurwan ninman cargan Jesuspa discipulun cashganta. Pero, Pedruga manami cäsucurganchu chaymi Jesusta niegargan. Nircurna alapa laquicur wagargan (Mat. 26:69-75).

15. Jesús manaraj wanur, ¿imata yanapargan ali juiciuyoj cananpaj?

¹⁵ Jesús juchaynaj runa carpis Jehovaman yäracurgan. Chaymi manaraj wanur Jehovata cutin cutin ruwacurgan yanapananpaj. Chaynopa Taytanpa voluntäninta valurwan rurargan (Mat. 26:39, 42, 44; Juan 18:4, 5). Pedro Jesusta ricargan lapan shongunwan Jehovata ruwacur mañacushganta, chaytaga imaypis gongarganchu.

16. ¿Imata rurartaj Pedro musyachicurgan ali juiciuyoj runa cashganta? (1 Pedro 4:7).

¹⁶ Tiempuwanna, Pedro yachacurgan Jehovata mañacur shongupita payman yäracunanpaj. Cawarircamurna Jesús Pedruta y waquin discipuluncunata nergan santo espiritunta chasquiycur predicapäcunanpaj. Manaraj santo espiritunta chasquir Jerusalén marcacho tiyapäcunanpaj nergan (Luc. 24:49; Hech. 1:4, 5). Chay tiempo chayanancama, ¿imatataj Pedro rurargan? Bibliaga wilacun Pedro y waquin cristianucunapis “Tayta Diosta manakunanpaq imaypis juntakaq” (Hech. 1:13, 14). Punta caj cartancho Pedro hermanuncunata shacyächir nergan ali juiciuyoj car Jehovaman yäracärinanpaj y payta mañacunanpaj (leiriy 1 Pedro 4:7). Pedro Jehovaman shongupita yäracunanpaj yachacurgan y congregaciuncho caycaj hermanucunatapis yanapargan (Gál. 2:9).

17. ¿Imatataj imaypis rurananchi caway vidanchicho? (Fotutapis ricay).

¹⁷ Ali juiciuyoj runa cananchipaj Jehovata mañacunanchi y imata ruranapaj fácil captinpis yanapämänanchipaj. Chauraga mana gongaypami Jehovata mañacunanchi manaraj imatapis rurar o decidir, paylami musyan imataj ali caycan noganchipaj chayno cushishga cawananchipaj.

18. Pedro yachacushganno, ¿imatataj noganchipis yachacushwan?

¹⁸ Jehovata alapa agradecido caycanchi pay nirajta camamashganchipita (Gén. 1:26). Juchayoj cashganchiraycu imaypis manami alicunalata rurashunchu (Is. 55:9). Pedro Jehová yarpashganno yarpänanpaj yachacurgan. Chaynolami noganchipis Jehová yarpashganno yarpänanchipaj, jina humilde y ali juiciuyoj cananchipajpis yachacushwan.