Jehovano humilde cashun

1. ¿Imanirtaj Jehová humilde cashganga almiracuypaj caycan?

CAY MUNDUCHO runacuna ali reguishga cashganpita y carguyoj cashganpita orgulloso capäcun, ichanga Jehová alapa poderyoj carpis payga humilde caycan (Sal. 113:5-8). Ni pilapis Jehovano humilde canchu, payga ni ichiclapis ali tucunchu. Canan yachacushun Jehová humilde car imano tratamashganchita. Jina yachacushun imata rurartaj Jesús taytanno humilde cashga. Caycunapita yachacurmi Jehovaman más guelicushun y payno humilde cashun.

JEHOVÁ LISTUMI CAYCAN WIYAMÄNANCHIPAJ

2. Salmo 62:8 texto ¿imata yachachimanchi Jehovapita? (Garancho caycaj).

² Orgulloso runacunaga yarpapäcun pipitapis más ali cashganta, chayraycu waquincuna manami munapäcunchu paycunawan parlananpaj. Pero Jehovaga manami paycunanochu caycan más bienga pay humilde car imano sienticushganchita y yarpashganchitapis payta wilananchita munan, listo caycan wiyamänanchipaj (leiriy Salmo 62:8). Bibliacho wilamanchi unay Jehovapa sirvejnincuna mana manchacuypa payta mañacushganta y payga cuyacuywan wiyarganmi. Juc cuyacoj tayta wamran yarpachacushganta atentula wiyashganno Taytalanchi Jehovapis sirvejnincuna payta mañacuptinchi atentula wiyamanchi (Jos. 10:12-14; 1 Sam. 1:10-18). Pero capazchi yarpanquiman ‘achca cuti pantacushgäpita Jehová mana wiyamangachu’ nir. Chayno yarparga ¿imata yanapäshunqui?

3. Imalachopis pantacuptinchi ¿Jehová imatataj ruran?

³ ‘Pantashgäcunapita Jehová quevä cuyamanga’ nir yarparpis payta mañacuyta puedinchimi. Chayta tantiarinapaj Jesús hijo pródigo wilacushganpita yachacushun. Chay mozushi jatun juchata rurashganraycu pengacurpis wasinman cutirgan, ichanga taytan cuyapäcoj car wamran carulapita shamushganta ricar corrilapa payman aywargan y macalacuycur cuyapar muchargan (Luc. 15:17-20). Chay tayta wamranta carulapita ricar shogananpaj corrishganno Taytalanchi Jehovapis humilde cashpanmi laquishga caycaptinchi jucla shogamanchi, yanapämanchi y perdunamanchipis (Lam. 3:19, 20; Is. 57:15). ¿Imanotaj chayta ruran? Shacyächimanchi ancianucunawan, Testigo familianchicunawan y hermanunchicunawanpis (Sant. 5:14, 15). Chayta ruran payman guelicunanchipaj munar.

4. ¿Imano Jesús cargan?

⁴ Jesusga Taytan rurashgannomi rurashga. Jesús cay pachacho caycaptin runacuna confianzawan payta tapupaj y imano sienticushgantapis wilapaj (Mar. 4:10, 11). Jesús paycunata tapuptinpis paycunaga confianzawan wilapargan (Mat. 16:13-16). Waquincuna imalachopis pantacuptin manami manchacurganchu Jesús rabiananta ¿imanir? Pay laquipäcoj y pacienciacoj cashganta musyargan (Mat. 17:24-27). Chay wichan pushacoj religiosucuna orgulloso, chucru shongu, pitapis manami cuyapäcojchu. Pero Jesusga manami paycunanochu cashga, payga Taytanno humilde cashga. Chaymi runacuna Jesusta ricar musyapäcurgan Jehová humilde cashganta (Juan 14:9).

5. ¿Imanirtaj calpachacunanchi humilde cananchipaj?

⁵ Jehová rurashganno ¿imatataj rurashwan? Calpachacushwanmi humilde cananchipaj ¿imanir? Humilde car cuyapacoj, perdunacoj y pacienciacoj captinchi waquincunapäga más facilmi canga noganchiwan parlananpaj. Pero waquin runacuna orgulloso y rabiacojmi caycan, chaymi paycunaman pipis parlacuyta munanchu (Col. 3:12-14). Ancianucuna reuniuncunapaj telefunulapa conectacuptin, capaz hermanucunapäga manami facilchu canga paycunawan parlapäcunanpaj. Sinoga ancianucuna calpachacunman reuniunman aywananpaj, chayta rurar hermanucuna paycunawan imalapitapis parlapacuyta munapäcunga. Jina ancianucuna calpachacunmanpis wasin wasin lapan hermanucunawan predicaj yargunanpaj. Chayno ruraptenga hermanucunaga paycunata mas reguipäcunga y yanapacuyninta ashipäcunga.

JEHOVAGA ALI TANTIACOJMI

6, 7. ¿Unay sirvejnincuna mañacushganta Jehová wiyarganchu?

⁶ Orgulloso runaga yarpayninta cambiayta manami munanchu. Jehová ichanga manami chaynochu, pay lapanta yachaj carpis waquincuna yarpashganta cuentaman churar listo caycan decidishgantapis cambiananpaj. Chayno cargan Míriam Aaronwan mana alicunata Moisespita parlaptin. Paycunami chayta rurar Jehovapa contranman parlaycargan, chaymi Jehová paycunawan pasaypami rabiacurgan y Miriamtapis lepra gueshyawan castigargan. Chayta ricar Aarón Moisesta ruwacurgan yanapananpaj y Moisespis Jehovata ruwacurgan Miriamta aliyächinanpaj. Jehová humilde car Moisesta wiyargan y pay mañacushganno Miriamta aliyächirgan. Ichanga orgulloso runaga chaytaga manami ruranmanchu cargan (Núm. 12:1-15).

⁷ Jina Jehová humilde car Ezequías mañacushgantapis wiyargan. Ezequías alapa gueshyaycaptinshi juc profeta payta wilacurgan wanunanpäna caycashganta. Chauraga Ezequiasga Jehovata wagapayparaj ruwacurgan aliyächinanpaj y Jehová payta cuyapar mañacushganta wiyargan, chaymi 15 wata más cawananpaj permitirgan (2 Rey. 20:1, 5, 6). Yachacushganchino Jehová humilde car y runacunata cuyapar ima decidishgantapis cambianmi.

8. ¿Imatataj Jesús rurashga cuyapacoj cashpanmi? (Marcos 3:1-6).

⁸ Jesusga Taytan rurashgannomi rurashga. Cay pachacho caycar Jesús runacunata cuyashpanmi imaypis calpachacurgan yanapananpaj. Luta religiosucuna mana munaptinpis paymi sábado junaj runacunata gueshyancunapita aliyächirgan (leiriy Marcos 3:1-6). Canan wichanpis Jesús cuyacuywan congregaciunta pushaycan, chaymi juchata rurajcunatapis pacienciawan yanapan arrepenticunanpaj (Apoc. 2:2-5).

9. ¿Imacunata rurartaj Jehovano ali tantiacoj cashun? (Fotucunatapis ricay).

⁹ Jehová rurashganno ¿imatataj rurashwan? Calpachacunanchimi Jehovano humilde y ali tantiacoj runa cananchipaj (Sant. 3:17). Ali tantiaj taytacunaga wamrancunata juc caj wamrancunawan manami tincuchinmanchu, jina wamrancunata imata rurananpaj y imata mana rurananpaj niptinpis manami obliganmanchu mana puedishganta rurananpaj. Biblia nin Jacob chayno rurashganta, payga wamrancunata manami mañacurganchu mana puedishganta rurananpaj (Gén. 33:12-14). Jina humilde ancianuga waquin ancianucuna decidishgan munashganno mana captinpis humildawan chasquicunga, chay decidishganga Biblia nishganpa contrancho mana captin (1 Tim. 3:2, 3). Jina waquincuna noganchino mana yarpaptinpis lapanchimi calpachacushwan paycuna imano yarpashganta shumaj tantiananchipaj (Rom. 14:1). Aumi, Biblia nishganno lapancuna cuentata gocunman ali tantiacoj runa cashganchita (Filip. 4:5).

JEHOVÁ PACIENCIACOJMI

10. ¿Imata rurargan Jehová pacienciacoj cashpan?

¹⁰ Orgulloso runaga mana pacienciacoj car manami shuyarayta munanchu, pero Jehovaga manami chaynochu, payga alapa pacienciacojmi caycan. Chaymi Noepa tiempuncho fiyu runacunata ushacächinanpaj 120 watacuna Jehová shuyarargan (Gén. 6:3). Chay tiempucho Jehová shuyarargan Noepa wamrancuna winanancama y arcatapis sharcachir ushanancama. Tiempo pasariptinna Abrahán Jehovata tapurgan Sodoma y Gomorra marcacunata ushacächinanpaj cajta. Jehová manami orgullosuchu cargan chaymi Abrahanta manami nirganchu: “¿Imanirtaj chayno tapumanqui?” nir. Chaypa trucanga pay humilde y pacienciacoj car Abrahanta wiyargan (Gén. 18:20-33).

11. 2 Pedro 3:9 nishganno ¿imanirtaj Jehová fiyu runacunata manaraj ushacächinchu?

¹¹ Canan tiempupis Jehová pacienciacojmi caycan. Payga manami munanchu lapan runacuna ushacananta, sinoga juchancunata cacharir arrepenticunanta munan. Chaymi mana ali runacunata ushacächinanpaj pacienciawan shuyaraycanraj (leiriy 2 Pedro 3:9). Jehová pacienciacoj cashganmi achca runacuna paypita yachacushga, y más runacuna caycanraj paypita yachacunanpaj. Pero Jehová pacienciacoj y cuyacoj carpis fiyu runacuna imayyajpis cacunantaga manami permitingachu, tiempulanchomi mana ali ruraj runacunata ushacächinga (Hab. 2:3).

12. ¿Jesús imata shuyaraycan pacienciawan?

¹² Jesusga Taytan rurashgannomi rurashga. Achca watapami Jesús ricargan imano Jehovapita y Diospa sirvejnincunapita Satanás lulacur parlashganta (Gén. 3:4, 5; Job 1:11; Apoc. 12:10). Ricarganpis runacuna fiyupa nacaycashganta, chaymi lapan shongunwan munaycanmi “Diablu rurashqankunata ushakätsinanpaqmi” (1 Juan 3:8). Chayno captinpis Jesús pacienciawan shuyaraycan Jehová camacächishgan hora lapan Diablo rurashgancunata ushacächinanpaj cajta ¿imanir? Payga humilde car musyanmi Jehovapa maquilancho caycan lapan mana alicunata ushacächinanpaj (Hech. 1:7).

13. ¿Jesús pacienciacoj carga imatataj rurargan?

¹³ Cay pachacho caycar Jesús apostulnincunawanpis pacienciacoj cargan. Paycuna maygan más ali cashganta cada cadala rimanacuptinpis Jesusga manami rabiaparganchu, sinoga pacienciawan y cuyacuywan yanaparganmi (Luc. 9:46; 22:24-27). Jesús musyarganmi tiempuwan discipuluncuna payno humilde cananpaj cajta. ¿Y gam? ¿achca cuti imalachopis pantashcanqui? Chaycunapa pasar yarpay Jesús pacienciacoj y ali shongu car tantiashunquimi. ¡Chayta musyar alapa cushichimanchi!

14. ¿Imatataj rurananchi pacienciacoj cananchipaj?

¹⁴ Jehová rurashganno ¿imatataj rurashwan? Jehovano yarpänanchipäga y rurananchipäga Jesuspita yachacushun (1 Cor. 2:16). Calpachacushun Jesusno yarpänanchipaj ¿imanotaj chayta ruranchi? Bibliata leinanchi Jesuspa cawayninpita y pay rurashgancunaman yarpachacunanchi. Jina Jehovata mañacunanchi Jesusno humilde cananchipaj. Jesús rurashganman yarpaptinchi Jehovano pacienciacoj cashun noganchiwan y waquincunawanpis (Mat. 18:26-30, 35).

JEHOVA HUMILDE RUNACUNATA ALI RICAN

15. ¿Pïcunatataj Jehová ali nawilanwan rican? (Salmo 138:6).

¹⁵ (Leiriy Salmo 138:6). Jehová camacoj y poderyoj carpis humilde runacunata ali nawilanwan rican. Bibliacho tarinchi Jehová humilde runacunata ali nawilanwan ricashganta. Jucnin cargan Débora, payga 125 watapa Isaac y Jacobta sirvirgan y paycunapa wamranta cuidargan. Chay warmi rurashganpita alapa mana musyarpis Jehová Moisesta nirgan jutinta y runacuna payta alapa cuyashgantapis Bibliacho escribinanpaj (Gén. 24:59; 35:8). Watacuna pasariptin Jehová acrargan juc michicoj mozulata Israelpa reynin cananpaj, jutinmi cargan David (2 Sam. 22:1, 36). Jehovaga juc angelwan humilde michicojcunata wilapargan Belén marcacho Jesús yurishganta (Luc. 2:8-11). Jina José y María templucho caycaptin Jehová permitirgan Simeón y Ana edayashgana caycarpis wamran Jesusta ricananpaj (Luc. 2:25-30, 36-38). Caycuna yachachimanchi Jehová alapa poderyoj carpis ali nawilanwan rican humilde runacunata.

16. Taytan rurashganno ¿imatataj Jesús rurargan?

¹⁶ Jesusga Taytan rurashgannomi rurashga. Jesús ali shongu runacunata respetuwan tratargan Jehová rurashgannomi, chaymi waccha y mana estudiashga caj runacunata Diospa Gobiernunpita yachachirgan (Hech. 4:13; Mat. 11:25). Jina gueshyaycajcunatapis cuyacuywan y respetuwan aliyächirgan (Luc. 5:13). Manaraj wanur Jesús apostulnincunapa chaquinta maylapargan, chay tiempuchoga sirvejcunalami chayta rurapäcoj (Juan 13:5). Y Jesús cieluman manaraj wichar discipuluncunata nirgan Diospa Gobiernunpita wilacunanpaj, chayno runacuna imayyajpis cawayta taripäcunanpaj. Noganchipis canan wichan chaytami ruraycanchi (Mat. 28:19, 20).

17. Jehová rurashganno ¿imatataj rurashwan? (Fotutapis ricay).

¹⁷ Jehová rurashganno ¿imatataj rurashwan? Predicashganchi hora lapan runacunata ali nawilanchiwan ricananchi maypita captinpis, ima coluryoj captinpis, estudiashga o mana estudiashga captinpis lapancunata Jehovapita yachachinchi. Jina congregaciuncho ima carguyoj carpis lapan hermanunchicuna noganchipita más ali cashganta yarpänanchi (Filip. 2:3). Chayno humilde captinchi y hermanunchicunata imaypis respetuwan trataptinchi Jehová alapami cushicunga (Sof. 3:12; Rom. 12:10).

18. ¿Imanirtaj Jehovano gam humilde cayta munanqui?

¹⁸ Jehovano cananchipaj calpachacuptinchi runacuna noganchiman guelicuyta munanga, jina ali tantiaj y pacienciacoj cashun. Y Jehová runacunata tratashganno noganchipis waquincunata respetulawan tratashun. Chay lapanta ruraptinchi Jehovapa ricaynincho alapa valuryojmi cashun (Is. 43:4).