Casaracushgayqui junaj Jehová munashgannola ruray

1, 2. ¿Imano capäcunayquipaj Jehová munan casaracushgayqui junaj?

¿NOVIUYQUIWAN o noviayquiwan auninacärishgayquina casacunayquipaj? Chayno carga ¡cushicuypämi! Chayraycu capazchi ocupado carcaycanqui. Pero ama gongaychu Jehová munan casaracushgayqui junaja cushish capäcunayquipaj y ishcayquicuna casaracushgana carga cushishga cawapäcunayquipaj (Prov. 5:18; Cant. 3:11).

² Casaracunanpaj caycaj noviucuna Bibliapa consejuncunata canan yachacunga imano casaracushgan junaj Jehová munashgannola rurapäcunanpaj. Pero cay consejucuna lapanchitami yanapämäshun noviucuna casaracushgan junajman invitamaptinchi o consejucunata mañamaptinchi.

IMANIRTAJ JEHOVÁ MUNASHGANNO RURAPÄCUNAYQUI

3. Novio cajcuna ¿imatataj cuentaman churanman casaracushgan junaj?

³ Jehová munashgannola rurapäcunanpaj cristianucuna casaracushgan junaj Bibliacho caycaj consejucunata cuentaman churanman ¿Imanir? Jehová matrimoniuta camacächirgan, quiquinmi Adanta Evawan casarachirgan, chaymi musyan casado cajcuna imano cushish cawacunanpaj (Gén. 1:28; 2:24). Chauraga noviucuna caycaptiqui gamcuna munashgayquinoga ama ruraychu sinoga Jehová munashganno rurapäcuy.

4. Casaracushgayqui junajpaj alistacushgayquicho ¿imanirtaj Jehová munashganta cuentaman churanquiman?

⁴ Jina Jehová cuyacoj taytayqui y ali amiguyqui cashganraycu, casaracushgayqui junajpaj alistacushgayquicho cuentaman churanquiman pay ima munashganta (Heb. 12:9). Jehovawan ali amigo carga, maycho caycarpis imata rurarpis paypa shongunta laquichiyta munanchichu (Sal. 25:14). Jehová imano yanapäshushgayquiman yarpar ¿manacu casaracushgayqui junaj payta cushichiyta munanqui? (Sal. 116:12).

IMACUNATA RURARTAJ JEHOVATA CUSHICHINQUIMAN

5. ¿Imataj Biblia nin casacuyta munajcunata?

⁵ Jehová Bibliacho manami nishunquichu casacushgayqui junaj imano ruranayquipaj. Chauraga gamcuna munashgayquino o marcayquicho rurashganno ruranquiman, chayno captinpis ama gongaychu autoridäcuna nishgancunata respetanayquipaj (Mat. 22:21). Casacushgayqui junaj gamcuna munashgayquino ruraptiquipis Jehová nishgancunata cuentaman churay, chayno ruraptiqui payta cushichingami. Mä yachacushun casacuypita Jehová ima nishganta.

6. Romanos 13:1, 2 nishganno ¿imanirtaj casaracuyta munajcuna autoridäcunata cäsucärinman?

⁶ Autoridäcunata cäsucäriy (Rom. 13:1, 2). Achca naciuncunachomi autoridäcunapa leynincunami caycan, pipis casaracuyta munar cäsucärinanpaj. Maycho tiyarpis chay leynincunapita shumaj musyapäcuy, mana musyarga ancianucunata mañacäriy yanapäshunayquipaj.b

7. ¿Imanotaj ruranquiman casacushgayqui junaj Jehová alabashga cananpaj?

⁷ Imata ruraptiquipis Tayta Dios alabashga cananpajno rurapäcuy (1 Cor. 10:31, 32). Casaracushgayqui junaj cay mundo runacuna rurashganno ama rurapäcuychu, sinoga Jehová munashganno rurapäcuy (Gál. 5:19-26). Chay junaj noviuga shumaj yarpachacunman ali camacächishga cananpaj. Chaypäga cristiano noviucuna juc ancianuta mañacun Bibliawan discursuta gonanpaj, pay cuyacuywan y shacyächiylapa yachachiptin chaycho caycaj runacuna musyapäcunga matrimoniuga Jehovapa regalunmi caycan y casaracushgan junaj alapa importante caycashganta. Chaymi alichi canman noviucuna Saluncho discursamojta wiyananpaj, chaypäga tiempuwan cartata escribinman ancianucunata Saluncho rurapäcunanpaj.

8. ¿Noviucuna imata ruranman casacushgan junaj fiesta ali yargunanpaj? (Romanos 13:13).

⁸ (Leiriy Romanos 13:13). Casaracushgayqui junaj fiestata rurar Diosta mana reguej runacunano ama ruraychu ¿imanir? Biblia nin: “Wakin runakuna juntakaykur aläpa mikuptinpis y upyaptinpis noqantsiqa ama tsayno kashuntsu”. Chaymi fiestayquicho ima tragutapis sirvinayquipaj o manapis ishcayquicunami decidinayqui, traguta sirviptiquipis ali camacächinquiman pipis mana shincacunanpaj.c Jina musicacunata shumaj acrapäcuy, chaynopa waquincunata letrancuna mana ofendinanpaj ni pengachinanpäpis y volumenpis waquincuna parlapacunanpajno canman.

9. Jehová munashganno fiestanta rurananpaj ¿imamantaj yarpachacärinman novio cajcuna?

⁹ Waquin marcacunacho noviucuna fotutapis y videutapis ricachipäcun, waquincunapa familiancuna y amiguncuna ichic palabrawan shacyächiyta munapäcun. Fiestayquicho chayno cananpaj munarga calpachacuy Jehová munashganno rurapäcunayquipaj (Filip. 4:8). Chaycunata ruraptiqui ¿invitaduyquicuna imanoraj sienticunga? ¿Casacushgayquita respetuwan ricangachu? ¿Jehová munashgannochu canga? Jina ima bromacunata ruraptinpis cuidacärinman lutanta mana parlapäcunanpaj (Efes. 5:3). Amiguyquicuna y familiayquicuna paycuna munashganno manami parlanmanchu, sinoga imalatapis parlar gamcuna munashgayquino parlapäcunman.

10. Casaracunanpaj caycajcuna ¿imanirtaj achca guellaytaraj ama gastanmanchu? (1 Juan 2:15-17).

¹⁰ Achca guellaytaraj ama gastaychu (leiriy 1 Juan 2:15-17). Casacojcuna manami quiquincuna ali ricashga cananlapajchu ruranman sinoga Jehová alabashga cananpajmi. Chaymi casacushgan junaj fiestata rurar ali juiciuyoj car walca guellaylawanmi rurapäcun. Chaycunata rurargan Noruega naciunpita Mike jutiyoj hermanunchi, pay cayno nin: “Manami jagamanpis jaticärishgächu, y precursor regularno siguircaycä. Casacushgä junaj walca guellaylawan rurarpis, chayman yarpar cushicärëmi”. India naciunpita Tabitha jutiyoj hermananchipis cayno nin: “Casacushgä junaj walca guellaylawan rurashgäcunapita manami rimanacärishgächu ni alapa yarpachacuywanpis capäcushgächu”.

11. Noviucuna visticushgan hora ¿imamantaj yarpachacunman? (Fotucunatapis ricay)

¹¹ ¿Ali vistishga canayquipaj yarpachacushcanquinachu? Unay tiempupis noviucuna yarpachacoj alinnin caj ropata jaticärinanpaj (Is. 61:10). Casaracushgayqui junajpaj manami cada junaj visticushgayqui ropacunata acranquimanchu, pero ali juiciuyoj car shumajraj yarpanquiman casacunayquipaj ropayqui mana jamurpaypaj cananpaj (1 Tim. 2:9). Chauraga imano visticushgayqui yarpaptiqui quiquilayqui munashgayquino manami canmanchu, sinoga Jehová munashganta cuentaman churay (1 Ped. 3:3, 4).

12. ¿Imanirtaj noviucuna Bibliapa contrancho caycaj costumbricunapita witicärinman?

¹² Bibliapa contrancho caycaj costumbricunapita witicäriy (Apoc. 18:4). Runacunaga casaracushgan junajcho waquin rurashgancuna luta religiunpitami caycan. Jehová claro wilamanchi paycunano mana rurananchipaj (2 Cor. 6:14-17). Marcayquicho costumbrincunata rurashganno capazchi gamcuna rurayta munapäcunqui, manaraj chayta rurar shumaj musyanayqui chay costumbricuna Bibliapa contrancho caycan o mana. Chaynopa casaracushgayqui junajpaj ali decidipäcunqui.

13. ¿Imanotaj noviucuna regalucunata Jehovano ricanman?

¹³ Capazchi tiyashgayqui marcacho invitaducuna regalucunata apapäcun. Guellayyojcunaga chaniyoj regalutami apapäcun, ichanga walca guellayta charajcunaga tacsha regalulatami apapäcun. Imano captinpis Bibliaga cristianucunata nin imapitapis más cushicuypajmi caycan shongupita goycuptinchi (Prov. 11:25; Hech. 20:35). Chaymi noviucuna invitaduncunata manami obliganmanchu ima regalutapis goycunanpaj, más bien Jehovano agradecicun waquincuna lapan shongunwan ima regalutapis apashganpita (2 Cor. 9:7).

SASA CAPTENGA JEHOVÁ MUNASHGANNO DECIDIPÄCUY

14. ¿Imanirtaj avecis noviucunapaj sasa caycan decidinanpaj?

¹⁴ Casacojcunapaj avecis sasa canman Jehová munashganno rurananpaj. Waquincunapäga fiestanta walca guellaylawan rurananpaj manami facilchu. Chaycunapa pasargan Islas Salomón marcapita Charlie hermanunchi, pay cayno wilacun: “Tiyapäcushgä marcacho lapancuna munapäcun invitapäcunäpaj. Achca amigöcunata charashgäraycu sasami cashga lapanta invitapäcunäpaj”. Párrafo 10 parlashganchi Tabitha hermananchipita, pay cayno wilacun: “Tiyashgä marcacho ima fiestapis captin achca runacunatami invitapäcö, chaymi manami facilchu cashga taytäcunawan parlapäcunäpaj 100 amigöcunalata invitapäcunäpaj”. Y India naciunpita Sarah cayno wilacun: “Marcächoga runacuna achca guellayyoj cashganraycu ali ricashga cananpaj munapäcun, chaymi waquin primöcuna casaracushgan junaj achca guellaywan rurashganta ricar waquincuna munapäcurgan nogacunapis casacushgächo más guellayta gastanäpaj”. Chauraga decidinayquipaj sasa captinpis ¿imaraj yanapäshunqui?

15. ¿Imanirtaj noviucuna casacushgan junaj ali yargunanpaj Jehovata mañacunman?

¹⁵ Casacushgayqui junaj ali yargunanpaj lapan shonguyquiwan Jehovata mañacäriy. Manaraj imatapis decidir y pasaypa yarpachacushgayqui hora Jehovata mañacäriy. ¿Imapitataj mañacunquiman? Mañacunquiman ali cajta decidinayquipaj, alapa yarpachacuylawan mana caycänayquipaj y waquincuna yarpashgantapis mana manchacunayquipaj (Filip. 4:6, 7; 1 Ped. 5:7). Mañacushgayquino Jehová yanapäshushgayquita ricar yäracuyniquipis más sinchi canga. Tabitha caynopis nin: “Manami munapäcurgächu noviüwan y familiäwan parlapäcushgä hora rimanacuyman chayanäpaj, chaymi imapitapis manaraj parlar Jehovata mañacärej cä. Chayno rurashgäpita Jehová yanapämashga jaucala carcaycänäpaj”.

16, 17. ¿Imanirtaj noviucuna cuyacuywan y respetulawan claro parlapäcunman?

¹⁶ Cuyacuywan y respetulawan claro parlapäcuy (Prov. 15:22). Manaraj casaracushgan fiestata rurar ishcancunami shumaj yarpachacurcur parlapacunan ayca guellayta gastananpaj, imay junaj cananpaj, ayca invitado cananpaj y mascunapitapis. Chaycunata ali decidinayquipaj Biblia nishganta y pogushga hermanucunapa consejuncunatapis cuentaman churay. Nircur familiayquicunata cuyacuywan y respetulawan decidishgayquita wilapay. Chay hora paycuna nishunquimanchi casacushgayqui imano ruranayquipaj y puedicaptenga nishushgayquino ruranquiman, pero mana acuerducho caycarga ali shimilapa y cuyacuywan paycunata nipäcuy (Col. 4:6). ‘Casacushgä junaj cushishga cayta y Jehovata alabaytapis munapäcö’ nir wilapäcuy.

¹⁷ ¿Y taytayquicuna mana Testigo captin? Chayno carga decidishgayquicunapita cuyapaylapa parlapay. Chaycunapa pasargan India naciunpita Santhosh hermanunchi, pay cayno wilacun: “Familiäcuna munapäcurgan religiunninpita costumbrincunata rurapäcunäpaj, y manami facilchu cashga paycunata tantiachipäcunäpaj casacushgächo chayno mana rurapäcunäpaj. Chaymi Jehová nishgancunapa contrancho mana captenga familiäcuna munashganno rurapäcurgä, gustashgan micuyta preparapäcurgä y paycuna manami cantayta ni tushuytapis yachaptin decidipäcurgä chaycuna mana cananpaj”.

18. Lapanpis ali yargunanpaj ¿imatataj noviucuna rurapäcunman? (1 Corintios 14:40; fotutapis ricay).

¹⁸ Lapan shumaj yargunanpaj ali camacächiy. Chayno ruraptiqui casaracushgayqui junaj alapa yarpachacuywan mana caycanquinachu (leiriy 1 Corintios 14:40). Taiwán naciunpita Wayne hermanunchi cayno wilacun: “Casaracunäpaj juc junaj pishiycaptin yanapacojcunawanmi juntacärirgä, paycunawanmi imano ruracänanpaj parlacärirgä chaynopa lapanpis ali yargunanpaj”. Jina invitaduyquicuna ali sienticärinanpaj acrashgayqui hora cumplipäcuy.

19. Casacushgan junaj ali yargunanpaj ¿imataraj más ruranman noviucuna?

¹⁹ Ali yarpachacurcur tiempuwan imatapis ruraptiqui alimi yargunga (Prov. 22:3). Capazchi tiyashgayqui marcacho casaracushgan fiesta captin mana invitaptiquipis runacuna quiquilan shacamun, chayno mana pasananpaj shumaj yarpanquiman imata ruranayquipaj. Jina mana Testigo familiayqui shamunanpaj invitaptiqui tantiachinquiman Testigucuna casacushgan junaj imano rurashganta. Chaypäga jw.org paginanchicho “¿Cómo son las bodas de los testigos de Jehová?” nishganta ricachiy. Y fiestayqui ali yargunanpaj juc pogushga hermanuta acranquiman casacushgayqui junaj lapanta encargacunanpaj, gamcuna yarpashgayquino wilapaptiqui yanapäshunqui bodayqui ali yargunanpaj (Juan 2:8).

20. ¿Imatataj noviucuna mana gonganmanchu?

²⁰ Casacushgayqui junaj ali yargunanpaj yarpaptiqui capazchi umayquipis nananmanraj. Pero ama gongaychu bodayqui juc junajlami caycan, ichanga ishcayquicuna Jehovata sirvishgayqui achca watapami canga. Casacushgayqui junaj Jehovaman yäracur pay munashgannola rurapäcuptiqui tiempo pasaptinpis chayman yarpar cushicuywan cayno nipäcunquipaj: “Casacushgä junajtaga imawanpis manami trucachëmanchu” (Sal. 37:3, 4).