Edayashgacuna alapa valuryojmi caycan congregaciunpaj
“Jipashla caycashgä wichan rurashgäman yarpar alapa cushicö, cananga edayashgana cashgäraycu unayno imatapis rurächu” (Connie, 83 watayoj).
Gampis edayashgayquiraycu Connie hermananchino capaz unayno imatapis rurayta puedinquinachu. Achca watapa Jehovata cushishga sirvishgayquita yarparpis, capaz ninquiman ‘cananga manami unaynochu Jehovata sirviycä’ nir. Chayno tantiar laquishga sienticunquiman. ¿Imata yanapäshunqui chayno mana yarpänayquipaj?
¿IMANO SIRVINAYQUIPAJ JEHOVÁ MUNAN?
Jehová munan Deuteronomio 6:5 nishganno payta sirvinanchipaj, cay texto nin: “TAYTA DIOSTA kuyanki lapan shonquykiwan, lapan voluntänikiwan y lapan kalpaykiwan”. Cay palabracuna shacyächimanchimi ¿imanir?
Cay texto nishganno Jehová munan puedishgalanchita rurananchipaj, chayta musyar waquincunawan mana tincuchicushwanchu, jina mana nishwanchu ‘unayno canan Jehovata mana sirviyta puedënachu’ nir.
Cayman yarpay: mozularaj o jipashla caycashgayqui wichan puedishgayquino lapan tiempuyquiwan y lapan calpayquiwan Jehovata sirvishgayqui. Canan edayashga caycarpis puedishgayquino Jehovata sirviycanqui lapan tiempuyquiwan y lapan calpayquiwan ¿au? Chauraga ichic o achca ruraptiquipis unayno cananpis lapan shonguyquiwan Jehovata sirviycanqui.
Mozu jipash caycashgayqui wichan Jehovata sirvishgayquino canan edayashgana caycarpis lapan shonguyquiwan Jehovata sirviycanqui.
GAM WAQUINCUNATA YANAPAYTA PUEDINQUIMI
Capaz gam yarpanqui ‘edayashgana caycä, unaynoga manami imatapis rurayta puedënachu’ nir. Pero gam edayashga caycarpis waquincunata yanapayta puedinquimi. ¿Imanopataj waquincunata yanapanquiman?
Jehovata sirvishgayquipita waquincunata yachachiy. Jehovapa sirvejnincuna David y Josué nishgancunaman yarpay:
David cayno nirgan: “Wamra kashqäpita awkinyashqäyaq manami imaypis rikashqätsu ali runa muchuqta. Tsaynöpis manami rikashqätsu wamrankunatapis manapakur puriykaqta” (Sal. 37:25).
Josué caynopis nirgan: “Noqaqa wanukunäpaqnami kaykä. Tsayno kaptinpis musyapäkunkimi lapan promitimashqantsikunata TAYTA DIOSNINTSI cumplishqanta. Tsayno cumplishqantaqa imaypis ama qonqapäkuytsu” (Jos. 23:14).
David y Josuepis achca watapa Jehovata sirvipäcuptin ricapäcurgan Jehová wilacushgancuna rasunpa cashganta, chaymi paycuna nishganga yäracuypaj cargan. Gampis paycunano achca watapa Jehovata sirvishgayquiraycu waquincunata nishgayquicunawan yanapayta puedinquimi.
Achca watapa Jehovata sirviptiqui imayca bendiciuncunata chasquishcanqui y Jehová lapan sirvejnincunata yanapashganta ricashcanqui. Chaycunata ricashgayquita ama upälacuychu, waquincunata shacyächinayquipaj wilapay. Chayta rurar cushishga paycunapis sienticäringa y gampis cushishgala sienticunqui (Rom. 1:11, 12).
Jina hermanunchicunata shacyächinayquipaj calpachacuy reuniunman aywanayquipaj. Chaycho caycar manami hermanucunalacho cushishga sienticäringa sino gampis. Connie hermananchi puntacho parlashganchipita cayno nin: “Reuniunman aywar laquishga sienticönachu. ¿Imanoparaj laquishga caycäshaj hermanucuna macalacuycur chasquimashganpita? Chaymi cuyamashganta ricar ima regalutapis rurä nogapis paycunata cuyashgäta musyachicunäpaj. Y calpachacö predicaciuncho y reuniunchopis paycunawan caycänäpaj”.
MANA JAGUIYPA JEHOVATA SIRVISHGAYQUIPITA PAY VALURANMI
Bibliacho tarinchi Jehovapa sirvejnincuna imacunapa pasarpis paycunata Jehová cuyashganta. Jesús yurishgan wichan juc edayashga israelita Simeón jutiyoj runa cutin cutinshi templuman aywaj, chaychoshi ricargan mozucunata arushganta. Paycunata arushganta ricar capazchi yarpachacurgan ‘edanëraycu Jehová manami cuyamannächu’ nir. Pero Jehovaga manami chaynochu ricargan, más bienga paypita nirgan alapa valuryoj runa cashganta y Jesús iti caycashgantapis ricananpaj permitirgan. Jina Jehová wilachirgan Jesús Mesías cashganta (Luc. 2:25-35). Jehovaga manami ricarganchu Simeón edayashga caycashganta, sinoga yäracuynin fuerte caycashganta.
Simeón Jesús iti cashganta ricananpaj Jehová permitirgan y Jesús Mesías cashgantapis wilacurgan.
Seguro caycay edaniquiraycu o imayca problemacunapa pasashgayquiraycu mana jaguiypa Jehovata sirviptiqui pay alapa valurashunqui. Chaymi payta sirvinayquipaj puedishgayquilata ruraptiqui Jehová cushishgami caycan (2 Cor. 8:12).
Caycunata musyarmi puedishgayquilata ruranayquipaj yarpachacunqui. Calpachacunquiman ichic tiempula o puedishgayquilata predicaciunman yargunayquipaj. Jina telefunulapa o cartapapis waquin hermanucunata shacyächiyta puedinquimi. Chaycunata rurar lapan shonguyquiwan paycunata yanapanqui mana jaguiypa Jehovata sirvinanpaj.
Gueshyaptiquipis Jehovata sirviyta puedinquimi. Recuadro “Mana wanuchicunanpaj yanapashga” nishgan parlaycamun África oriental naciunpita imano juc edayashga hermananchi rurashganta, paymi juc warmi wanucuyta munashganta Bibliawan yanapargan.
Gam achca watapa Jehovaman yäracur mana jaguiypa sirvishgayquiga waquincunatapis yanapangami. Imaypis yarparay Hebreos 6:10 textuman, chaycho nin: “Tayta Diosqa manami qonqanqatsu payta kuyar yärakuq mayikikunata yanapaykashqaykita”.
MANA YAMACAYPA WAQUINCUNATA YANAPAY
Estudioso runacuna nipäcun edayashgacuna waquincunata yanapar ali saludyoj, cuerpunpis ancashla sienticärin y masmi cawacärin.
Waquincunata yanaparpis jinalami auquinyashun. Pero Diospa Gobiernuncho manami pipis auquinyanganachu, juchacunapis y wanuypis manami canganachu (Rom. 5:12).
Jina lapan shonguyquiwan Jehovata sirviptiqui y waquincunata yanapaptiqui Jehovapa aunicuynincunaman más yäracunquipaj y saludniquipis más alimi caycanga. Chaymi edayashga hermanucuna, ama gongaychu Jehovata sirvinayquipaj calpachacushgayquipita Jehová y hermanunchicunapis alapa valuranmi.