15 CAJ YACHACHICUY
30 CAJ CANCIÓN Amigö Dios jaguimangachu
Diosman guelicuptinchi alimi caycan
“Qamman yärakamushqäqa lapanpitapis mas alimi kaykan” (SAL. 73:28).
¿IMATATAJ YACHACUSHUN?
Imata rurashun Jehovawan amigo cananchipaj, y chaypita ima bendiciuncunata chasquishun.
1, 2. 1) Pilawanpis ali amigo cananchipäga, ¿imacunataraj rurashwan? 2) ¿Canan imapita yachacushun?
PILAWANPIS ali amigo canayquipäga, ¿imacunata ruranqui? Capazchi paywan achca tiempo pasanqui, yachacunqui pay imano cawashganta, imata gustashganta y imata mana gustashgantapis, jina ali cashganta reguir payno cayta munanquichi. Tiempuwanga payta cuyar más amigo canqui.
2 Ali amigo cananchipäga calpachacunanchiraj y tiempuraj pasanman, chaynolami Jehovawanpis amigo cananchipaj calpachacunanchi y tiempuraj pasan. Canan yachacushun imanotaj amigunchi Jehovaman más guelicunanchipaj. Puntataga parlarcushun imanirtaj Payman guelicushwan.
3. ¿Imanirtaj yarpachacushwan imaypis Jehovawan ali amigo cananchipaj? Juc ejempluwan tantiachicamuy.
3 Yarpachacunanchimi imanirtaj Jehovawan ali amigo cashwan (Sal. 63:6-8). Chayta tantiananchipäga cayman yarpäshun: maychicaj runacunami musyapäcun saludninpaj ima ali cashganta, sano cajta micunan, yacuta upunan, fisicata ruranan y aliraj jamanan. Chayta musyaycarpis runacunaga manami saludninta cuidanchu. Ichanga pilapis saludninman imaypis yarparga imaycacunatami ruranga ali caycänanpaj. Chaynolami Jehovawanpis ali amigo cananchipäga aliraj yarpachacunanchi cada cadala más payman guelicunanchipaj (Sal. 119:27-30).
4. Salmo 73:28 escribejga, ¿ima yarpashgantataj wilacurgan?
4 (Leiriy Salmo 73:28). 73 caj Salmuta escribejga Levipa miraynin y templucho musicata tucajmi cargan. Payga achca watacunapa Jehovata sirviycarpis cuentata gocurgan Jehovaman más guelicunanpaj cajta. Jina munarganpis waquincuna Jehovawan ali amigo cananpaj. Canan yachacushun imanirtaj Jehovawan ali amigo cananchi.
DIOSMAN MÁS GUELICUPTINCHI CUSHISHGA SIENTICUSHUN
5. 1) ¿Imanirtaj más cushishga cashun Jehovaman guelicuptinchi? 2) ¿Imanotaj yanapämanchi y chapämanchi Jehovapa yachaynin? (Proverbios 2:6-16).
5 Jehovaman guelicuptinchega masga cushishga cashun (Sal. 65:4). ¿Imanir? Biblia nishganman cäsucuptinchega noganchipaj alimi canga. Chay consejucunaga chapämanchi mana alicunapita, yanapämanchipis juchacunaman mana ishquinanchipaj (leiriy Proverbios 2:6-16). Chaymi Bibliaga nin: “Kushishqami kawanqa tantiyakuq y ali yarpayniyuq runaqa” (Prov. 3:13).
6. ¿Imanirtaj mana ali sienticurgan Salmuta escribej runa?
6 Cushishga carpis öraga Jehovapa amiguncuna calpaynajmi ricacun. Salmo 73 escribejga fiyu cajcunata ricar mana alimi sienticurgan. Fiyu runacunaga Diosta mana cäsucurpis ali cawacushganta ricar laquicurgan, y paycunano cayta munargan. Payga yarpargan ali tucoj y fiyu runaga ali saludyoj, guellay-yoj cashganta y mana imapis pasashganta, ichanga mana yarpashgannochu cargan (Sal. 73:3-7, 12). Chayno rabiacur Jehovata sirvishganpis yangalapaj cashganta yarpargan. Laquicur cayno nergan: “Noqaqa manakaqlapaqmi jutsata mana ruraypa kawaykä. Yanqalapaqmi lutanta mana ruraypa kawaykä” (Sal. 73:13).
7. Laquishgala caycarpis, ¿imataraj rurashun cushishga cananchipaj? (Garancho caycaj).
7 Salmistaga laquishgala mana cacunanpaj “Tayta Diospa templunman” yaycurgan, chaycho pay yarpashganta Jehová corriginanpaj (Sal. 73:17-19). Jehovaga ali amigunchi cashpanmi imano cashganchita musyan. Laquicushganchi hora mañacunanchi pay yanapämänanchipaj y pushamänanchipaj, Palabran Bibliawan y hermanunchicunawanpis. Alapa laquishga caycaptinchi payga shogamanchi y shacyächimanchipis (Sal. 94:19).a
Salmo 73 escribej levita runaga Jehovapa templuncho caycan (7 caj parrafuta ricay).
JEHOVAMAN GUELICUPTINCHEGA CUSHISHGAMI CASHUN Y ALI CAWAYTAPIS CHASQUISHUN
8. Jehovaman guelicuptinchega, ¿ima bendiciuncunatataj chasquishun?
8 Diosman guelicuptinchi bendecimäshun canan tiempo y shamoj tiempuchopis. Canan wichan Jehovawan ali amigo carga ali y cushishga cawanchi. Jina shamoj tiempuchoga chasquishun imaycamayajpis cawacuyta (Jer. 29:11). Chaycunapita canan yachacushun.
9. ¿Imanotaj sienticunchi Jehovaman guelicuptinchi?
9 Noganchega musyanchimi Jehovaman guelicuptinchi ali cawacunanchipaj cajta. Maychicaj runacuna ichanga yarpapäcun Dios mana cashganta, chaymi paycuna nin cawayninga imapäpis mana valishganta. Noganchicunaga seguro caycanchi Dios cashganta y payta ashejcunata yanapashgantapis (Heb. 11:6). Taytalanchi Jehovaga camamashcanchi payta sirvinanchipaj chaynopa cushishga cawananchipaj (Deut. 10:12, 13).
10. Salmo 37:29 nishganno, ¿imata chasquipäcunga Jehovaman yäracojcuna?
10 Achca runacunaga manami yarpanchu shamoj tiempucunapaj. Paycunaga yarpapäcun arunalanpaj, wamranta ashmananpaj y chachayay chayamuptin guellayninta shuntacushganlawan cawacunanpaj. Noganchicuna ichanga musyanchi Dios cuidamashganchita (Sal. 25:3-5; 1 Tim. 6:17). Amigulanchi Jehovaman yäracunchimi, y musyanchimi aunicushganta pay cumplinanpaj cajta. Aumi, shamoj tiempuchoga Jehovalatami adurar cushishgami cashun (leiriy Salmo 37:29).
11. ¿Imanotaj ricacunchi Jehovaman guelicuptinchi?
11 Jehovaman guelicuptinchega más bendiciuncunata chasquishun. ¿Imataj? Juchanchicunapita arrepenticuptinchi pay perdunamäshun (Is. 1:18). Chauraga juchanchicunalamanga manami yarparaycäshunchu (Sal. 32:1-5). Jina Jehovata cushichishun y noganchicunapis cushishga cashun (Prov. 23:15). Jehovapa amiguncuna car achca bendiciuncunata chasquinchi, ichanga ¿imacunataraj rurashun payman más guelicunanchipaj?
IMATATAJ RURASHWAN JEHOVAMAN MÁS GUELICUNANCHIPAJ
12. ¿Imata ruranquiman Jehovaman más guelicunayquipaj?
12 Gam bautizacushgana carga Jehovaman guelicushcanquina, paypita y Jesuspitapis yachacushcanquina. Juchayquicunapita arrepenticushgayqui, payman yäracur mandatuncunatapis cäsucuycanquina. Chaycunata rurar Diosman guelicushcanquina. Ichanga más Jehovaman guelicunanchipäga caycunatami mana guelanaypa siguir ruraycänanchi (Col. 2:6).
13. ¿Imacunata rurananchi Jehovaman más guelicunanchipaj?
13 ¿Imata rurananchi Jehovaman más guelicunanchipaj? 1) Bibliata leinanchi, y leishganchilawanga manami contentacushunchu. Chaypäga shumaj tantiashun noganchipaj Jehová imata munashganta y nishganta imano cäsucunanchipaj cajtapis (Efes. 5:15-17). 2) Más yäracoj cananchipaj yarpachacunanchi noganchipaj Jehová y Jesús imata rurashganman. Jina 3) Jehová chiquishgancunata chiquinanchi y mana alita rurajcunawanga mana juntacushwanchu (Sal. 1:1; 101:3).
14. ¿Imata rurananchi Jehová munashganno cawananchipaj? (1 Corintios 10:31; fotucunatapis ricay).
14 (Leiriy 1 Corintios 10:31). Alimi caycan predicaciunman reuniuncunaman aywaptinchi, chayno captinpis Jehová munashganno cawananchipaj lapan rurayninchiwan payta cushichishun. Jina honrado captinchi y piwanpis garacoj captinchipis ricacämunga Jehovalapaj cawashganchita (2 Cor. 8:21; 9:7). Jehovata cushichinanchipäga saludninchitapis cuidananchi. Chaypäga manami alapa micular y traguta upialar cacushwanchu, manami imalatapis ruranchichu cuerpunchita dañananpäno cajcunawanga. Chaycunata rurananchipaj calpachacuptinchi Jehová cushicungami y noganchipis cushishga cashun. Imaypis Diospa voluntäninta rurananchipaj calpachacuptinchega Payga masrämi cuyamäshun (Luc. 16:10).
Carruta ali manejar, fisicata rurar, ali cajta micur y waquincunata yanapacurpis Jehovata cushichiycanchi. (14 caj parrafuta ricay).
15. ¿Waquincunata imano ricananchita Jehová munan?
15 Jehovaga cuyacuywanmi ali runacunata y mana ali runacunatapis rican (Mat. 5:45). Chaynomi noganchipis runa masinchita cuyananchi. Jehová munan sirvejnincunaga “wasarima mana kananpaq, pitapis achäquita mana ashipänanpaq, ali shonqu kananpaq y pïmaywanpis ali kawapäkunanpaq” (Tito 3:2). Chaymi Diosta mana sirvej runacunapitaga noganchi más ali cashganchita manami nishwanchu (2 Tim. 2:23-25). Lapan runacunata cuyaptinchi Jehovaman más guelicushun.
PANTACUPTINCHIPIS JEHOVAMAN GUELICUSHWAN
16. Salmo 73 escribej runaga, ¿imanotaj sienticurgan?
16 Öraga yarpashwanmi Jehová noganchicunapita witicushganta. Chayno sienticuptinchi Salmo 73 escribej salmistaman yarpashwan, payga laquishga cayno nergan: “Nogami ichanga jucha rurayta yarpaycaräna. Ichicllanami pishisha jucha rurayman chayanäpaj” (Sal. 73:2, TDI). Payga rabiashga cashganpita Jehovapa ricaynincho uywanoraj sienticurgan (Sal. 73:21, 22). Payga yarpargan juchanraycu Jehovapa cuyayninta mana merecishganta.
17. 1) Salmista laquicushgan hora, ¿imatataj rurargan? 2) ¿Imatataj yachacunchi pay pasashganpita? (Fotucunatapis ricay).
17 Ichic tiempulami salmista yarpargan Jehová payta cacharishganta. Nircur cuentata gocurgan Jehovaman guelicunanpaj cajta, chaymi cayno nergan: “Tsayno kaptïpis qammi yanapamanki. Alawqa kaq makïpitami jancharämanki. Yätsimarmi shumaq tantiyatsimanki. Nirkurqa gloriamanmi pushakamankipaq” (Sal. 73:23, 24). Noganchipis laquicushganchi hora Jehovatami ashishun calpata gomänanchipaj (Sal. 73:26; 94:18). Imaylapis pantacush carga ama gongashunchu Jehovaman guelicuptinchi pay perdunamänanchipaj cajta (Sal. 86:5). Pasaypa laquicushganchi hora masraj Jehovaman guelicushun (Sal. 103:13, 14).
Calpaynaj ricacuptinchi calpachacunanchi Jehovaman más guelicunanchipaj, chaypäga cutin cutinmi Jehovata mañacunanchi y reuniuncunamanpis mana faltaypa aywananchi. (17 caj parrafuta ricay).
JEHOVAMAN GUELICUSHUN IMAYCAMAYAJPIS
18. ¿Imanirtaj Jehovaman imaypis guelicushun?
18 Jehovaman guelicushun imaycamayajpis, paypita yachacunapaj imaypis canga. Chaymi Bibliaga nin Jehovapa yachayninta y yarpaynintapis “manami pipis tantiyayta kamäpakuntsu” (Rom. 11:33).
19. ¿Imata nimanchi Salmos libruga shamoj tiempupaj?
19 Salmo 79:13 cayno nin: “Noqakunaqa kuyashqayki runakunami karkaykä. Majädaykicho kaykaq uyshaykikunami karkaykä. Imaypis agradëcikärishaykimi. Mana kachaypami imaypis alabapäkushayki”. Salmistano gampis Jehovaman guelicuptiqui payga imaypis bendecishunqui. Jehovaga juc gaga cuentanomi noganchipaj caycan, chaymi salmistano cayno nishun: “Kikikimi herenciä imayyaqpis kaykanki” (Sal. 73:26).
32 CAJ CANCIÓN ¡Diosninchilawan caycäshun!
a Pipis achca watapa laquishga carga alimi canman doctorman aywananpaj. Más yachachicuyta tarinqui cay revistacho: La Atalaya número 1 del 2023.