Mozo, Timoteupita y Marcuspita yachacuyta puedinquiman

1, 2. ¿Imanirtaj Marcos y Timoteo manchacurganchi Jehovata más sirvinanpaj?

MOZO captiquega, ¿manachu Jehovapaj, hermanucunapäpis imaycacunata rurayta munanqui? Gam y achca mozucuna calpachacushgayquita ricar alapa cushicärëmi (Sal. 110:3). Chayga manami facilchu canman. Capazchi ‘Jehovata sirvir maymanraj mandamanga’, ‘imanoraj goyäshaj’ o ‘chayta ruranäpaj yachamanräcu’ nir yarpanquiman. Ama yarpachacuychu, manami gamlachu chayno sienticunqui.

² Marcuspis y Timoteupis chaynolachi sienticurgan, ichanga paycuna imano cawananpaj cajta mana musyarpis y yachaj mana carpis, mana manchacuypa Jehovata sirvinanpaj decidido caycargan. Pabluwan y Bernabé congregaciuncunata watucunanpaj niptin, Marcusga mamanwan shumaj wasicho tiyashganraycu sasachi canman cargan paycunawan aywananpaj (Hech. 12:12, 13, 25). Chayno captinpis Marcos lapanta jaguirgan Jehovata masraj sirvinanpaj, puntataga Antioquiaman aywargan nircurna Pabluta y Bernabetapis yanagargan juc marcacunaman aywananpaj (Hech. 13:1-5). Congregaciuncunata watucunanpaj Pablo niptin, Timoteupis taytancunawan tiyashganraycu capazchi ‘mana puedëchu’ ninman cargan, capazchi pay yarpargan ‘mozularaj caycä, chayta ruranäpaj yacharächu’ nir (1 Corintios 16:10, 11 y 1 Timoteo 4:12 textucunawan tincuchiy). Ichanga pay acrargan Pabluwan aywananpaj, y chaypita achca bendiciuncunata chasquirgan (Hech. 16:3-5).

3. 1) Marcusta y Timoteuta Pablo cuyar, ¿imata rurananpätaj munargan? (2 Timoteo 4:6, 9, 11; dibujucunatapis ricay). 2) ¿Ima tapucuycunapita yachacushun?

³ Marcos y Timoteo mozularaj caycarpis congregaciuncho aruycunata ali atendipäcurgan. Ali arucoj cashganraycu Pablo paycunata cuyargan, chaymi wanunanpaj caycaptin paywan caycänanta munargan (leiriy 2 Timoteo 4:6, 9, 11). ¿Imano rurashganpita Pablo cuyargan chay mozucunata? ¿Imatataj mozucuna yachacärinman paycunapita? Pablupa consejuncuna, ¿imanoparaj yanapanman?

MARCUSNO CANQUIMAN LISTO WAQUINCUNATA YANAPANAYQUIPAJ

4, 5. Waquincunata yanapayta munar, ¿imatataj Marcos rurargan?

⁴ Juc librucho niycan waquincunata yanapaptinchi “imaycacunata ruranapaj captinpis calpachacunanchirämi yanapanapaj”. Chaytami rurargan Marcos. Juc cuticho Pablo congregaciunta watucoj mana pushaptin alapachi payga laquicurgan (Hech. 15:37, 38). ¿Chaypita Marcos hermanucunata yanapananpaj guelanäcurganchu? ¡Manami!

⁵ Juc cuticho Marcos primun Bernabewan juc marcapa aywacärergan congregaciunta yanapananpaj. Chunca juc wata pasariptinpis Pablo carcelcho wichgarashga caycaptin pay ali yanapäcoj cargan (Filem. 23, 24). Yanapashganpita Pablo agradecido caycargan Marcuswan (Col. 4:10, 11).

6. ¿Ima bendiciuncunata Marcos chasquirgan pogush cristianucunawan caycashganpita? (Wilacuytapis ricay).

⁶ Marcusga ali bendiciuncunata chasquishgan pogush hermanucunawan caycashganpita. Pabluwan Romacho caycashganpita aywacurgan Babiloniaman Pedruwan caycänanpaj, y alapa cuyashganpita Pedro paytami nergan ‘wamralä’ nir (1 Ped. 5:13). Capazchi Pedro Marcusta wilapargan Jesuswan caycar imano yachachicushganta y imacunapa pasashgantapis, chaymi tiempuwanna escribergan Marcos libruta Jesuspa wilacuyninpita.a

7. Marcos rurashganno, ¿imatataj rurargan juc mozo cristiano? (Fotutapis ricay).

⁷ Marcusga imaypis Jehovata sirviycargan y pogushga cristianucunawan juntacargan. Y gam, ¿imatataj payno ruranquiman? Capazchi gam munaycanqui congregaciuncho más yanapacunayquipaj ancianuno o siervo ministerialno, ichanga chayta ruranayquipaj calpachacunquiman imalachopis mejoranayquipaj captenga, chaynopa Jehovata sirvir y hermanucunata yanapacur mastaraj ruranayquipaj. Mä ricärishun Seung-Woo hermanunchi imata rurashganta, pay cananga ancianunami caycan. Mozularaj car paymi ricargan mozo masincuna carguta chasquishganta, chaymi yarpachacurgan ‘¿imanirtaj nogata carguta gomanchu?’ nir. Chayno sienticushganpita ancianucunata wilapargan. Juc anciano shacyächergan calpachacunanpaj waquincunata yanapananpaj pilapis ali rurashganta mana ricaptinpis. Chaypita edayashga cajcunata yanapacur galaycurgan y mana carruyoj cajcunatapis Salunman apargan. Pay nin: “Chayno rurashgäpita canancama cushicömi”.

TIMOTEUNO CUYAPACOJ CANQUIMAN

8. ¿Imanirtaj Pablo acrargan Timoteuta yanagänanpaj? (Filipenses 2:19-22).

⁸ Chiquishgan marcacunaman yachachicoj cutimunanpaj, Pabluga munargan mana manchacoj cristianucuna yanagänanpaj. Puntataga acrargan Silasta, payga unaypitanami yachachicojmi cashga (Hech. 15:22, 40). Y nircur Timoteutapis nergan yanagänanpaj. ¿Imanirtaj payta acrargan? Pay ali mozo cashganta lapancuna musyargan (Hech. 16:1, 2). Jinamanpis Pablo musyargan Timoteuga runacunata shongupita cuyashganta (leiriy Filipenses 2:19-22).

9. Timoteo hermanucunaman yarpachacur, ¿imatataj rurargan?

⁹ Timoteuga Pabluwan yachachicur galaycushganpita, quiquilanman yarparäcunanpaj trucan waquincunaman más yarpachacoj. Chaymi Pablo payman yäracurgan Bereacho mushoj hermanucunata shacyächinanpaj (Hech. 17:13, 14). Timoteuga Silaspita alapa yachacurganchi, chay marcacho junto caycar. Tiempo pasariptinna Pablo Timoteulatami cachamurgan Tesalónica marcaman hermanucunata shacyächinanpaj (1 Tes. 3:2). Chay marcacho 15 wata pasarcuptin hermanucunata alapa cuyargan, hasta wagajcunawanpis wagargan (Rom. 12:15; 2 Tim. 1:4). ¿Imatataj mozo cajcuna Timoteuno ruranman?

10. ¿Imanopataj juc cristiano yachacurgan waquincunaman yarpachacunanpaj?

¹⁰ Woo Jae hermanunchi yachacurganmi waquincunaman yarpachacunanpaj. Mozo cashganpita sasami paypaj cargan edayashga hermanucunawan parlananpaj, chaymi Saluncho rasla saludarir witicoj. Juc anciano payta shacyächergan edayashga hermanucunawan parlar ali rurashgancunapita felicitarinanpaj, jina ima gustashgancunapita parlananpaj. Woo Jae chaytami rurargan, y canan ancianunami caycan. Pay nin: “Cananga facil-lami caycan tucuy edayoj hermanucunawan parlanäpaj, paycuna imano sienticushganta tantiänami. Chaymi musyä imano paycunata yanapänäpaj. Chaypita alapa cushicö”.

11. ¿Imanotaj mozo hermanucuna yachacunman waquincunaman yarpachacunanpaj? (Fotutapis ricay).

¹¹ Mozucuna, gamcunapis yachacuyta puedinqui waquincunaman yarpachacunayquipaj. Reuniuncunacho tucuy edayoj cajcunawan parlanquiman, ‘¿imanolataj caycanqui?’ nir tapucunquiman, y contestashushgayquita wiyanquimanpis. Chaynopa musyanqui imalachopis yanapanayquipaj. JW Library^® celularnincho utilizananpaj yanapacuyta puedinqui. Waquin edayashga cajcuna japalanmi predicaj yargun, paycunatapis nishwan junto predicaj yargunanchipaj. Waquincunata chayno yanapanayquipaj altanto captiqui, congregaciuncho ali yanapaj canqui.

PABLUPA CONSEJUNCUNAPITA YACHACUNQUIMAN

12. Pablo Timoteuta consejashganpita yachacunanpaj, ¿imatataj mozucuna ruranman?

¹² Pabluga wamrantano Timoteuta cuyar shumaj consejargan ali cawacunanpaj (1 Tim. 1:18; 2 Tim. 4:5). ¿Pablo consejashgancuna gamtapis yanapäshunquiman? Chaypäga Timoteuta cartacamushgancunata leir gamta parlapashushgayquitanomi wiyanayqui, y chayta imano cäsucunayquipaj yarpay. Cananga waquin Pablo consejuncunapita yachacushun.

13. ¿Imataraj ruranquiman Jehová munashganno cawacunayquipaj?

¹³ “Puklaqkuna físicata rurashqanno qampis Tayta Dios munashqanno kawanaykipaq yachakuy” (1 Tim. 4:7b). Tayta Dios munashganno cawananchipämi paylatami sirvinanchi y imaypis munashgancunalata rurananchi. Manami yurishcanchichu Diosta cäsucuycarna, sinoga chayta yachacunanchirämi. ¿Imanirtaj chayta ruranchi? Pablo nergan “puklaqkuna físicata rurashqanno” rurananchipaj. Pay cawashgan wichan puclajcuna waran waran calpachacurgan fisicata rurananpaj, chaynopa mayganpis ganananpaj. Chayta rurananpäga paycuna cada junajraj calpachacunanrämi y tiempunta jorgunanrämi cargan. Chaynolami noganchipis waran waran calpachacunanchirämi Jehová munashganno cawananchipaj.

14. ¿Imamantaj yarpashwan Bibliata leiptinchi? Juc ejempluwan tantiachicuy.

¹⁴ Alimi canman cada junaj Bibliata leiptinchi, chayta rurar Jehovapita yachacushun y payman más yäracushun. Imano cayta ruranapaj musyanayquipaj cayman yarpay: capazchi leishgayquicho tarishcanqui juc rico mandacoj mozuwan Jesús parlashganpita (Mar. 10:17-22). Cay rico mozo Jesusman creirpis mana munarganchu discipulun cayta, chayno captinpis Jesús payta laquipar munarganpis ali cajta acrananpaj. Jesús cuyacoj cashganta musyar, ¿imatataj Jehovapita yachacunchi? Paypis cuyacojmi caycan (Juan 14:9). Jinamanpis cay mozo pasashganman yarpar tapucunquiman: ‘¿Imataraj noga ruräman Jehovapa munayninta ruranäpaj y waquincunata más yanapänäpaj?’.

15. ¿Imanirtaj mozucuna calpachacunman waquincunapa ricaynincho ali caycänanpaj? (1 Timoteo 4:12, 13).

¹⁵ “Wawqi panikuna rikakunanpaq” ali cajta ruray (leiriy 1 Timoteo 4:12, 13). Pabluga Timoteuta manami nerganlachu ali yachachicoj y ali liej cananpaj, sinoga shacyächergan cuyacoj y yäracojpis cananpaj, y Dios munashganno cawacunanpäpis. ¿Imanirtaj Pabluga chayno consejargan? Pay musyarganmi parlashganchipitapis mas ali caycan rurayninchicunawan ricachicuptinchi, chaytami waquincuna más rican. Chayta tantianapaj cayman yarpay: capazchi nishunquiman reuniuncho yachachicunayquipaj imanirtaj predicanapaj calpachacunanchi, gam imaypis predicaj yarguptiqui más facil-lami canga cushi cushila chaypita yachachicamunayquipaj (1 Tim. 3:13).

16. 1) ¿Imacunachotaj mozo cristianucuna calpachacunman? 2) ¿Imatataj mozucuna ruranman ali shimilapa parlananpaj?

¹⁶ 1 Timoteo 4:12 textucho Pabluga yachachicun ima ruraycunachotaj mozucuna calpachacunman. ¿Bibliata estudiashgayqui hora chaypita yachacunquiman? Capazchi munanqui punta caj consejunta cäsucunayquipaj, “ali shimilaykipa pïmaywanpis” parlanayquipaj. Chaypäga yarpachacunquiman waquincunawan parlar imano shacyächinayquipaj. Taytayquicunawan tiyarga paycunata ‘gracias nogapaj lapan rurashgayquipita’ ninquiman. Reuniuncho caycar shumaj comentamunayquipaj calpachacunquiman, jina waquincunata ali yachachicushganpita felicitarinquiman. Ali shimilapa parlanayquipaj calpachacuptiqui lapancunami musyanga ali cristiano cashgayquita (1 Tim. 4:15).

17. ¿Imatataj mozucuna ruranman Jehová munashganno cawacunanpaj? (2 Timoteo 2:22).

¹⁷ “Wakin mözukuna lutankunata ruraptinpis qamqa ama ruraytsu. Tsaypa trukanqa Tayta Dios munashqanno kaway” (leiriy 2 Timoteo 2:22). Pabluga Timoteuta consejargan mana alicunata mana munananpaj, chaynopa Jehovapita mana raquicäcunanpaj y paypa munayninta imaypis rurananpaj. Capazchi waquin rurashgayquicunaga alinomi canman, ichanga tiempuyquita perdiycächishunquiman ali cajcunata ruranayquipaj. Capazchi puclacur o internetlacho jatiracunqui, chayraycu reuniunman aywanayquipaj, predicaj yargunayquipaj y imanopapis Jehovata aduranayquipaj tiempuyquipis aypanganachu. Chauraga tiempuyquita jorgunquiman Salunta alchachiycho yanapacunayquipaj o carritucunawan predicaj yargunayquipäpis, y chayta rurar ali amigucunata tarinquimi. Paycunami yanapäshunqui Jehovapa voluntäninta imaypis shongupita ruranayquipaj.

WAQUINCUNATA YANAPAPTINCHI BENDICIUNCUNATA CHASQUISHUN

18. Marcos Timoteuwan hermanucunata yanapacushganpita, ¿ima bendiciuncunata chasquipäcurgan?

¹⁸ Sasa captinpis Marcos y Timoteo hermanucunata yanapananpaj calpachacurgan, y chayno rurashgancunapita imayca bendiciuncunata chasquipäcurgan (Hech. 20:35). Marcusga Diosta sirvir tucuy marcacunamanpis chayargan, jinamanpis Jesús cawashganpita y yachachicushganpitapis juc libruta escribergan. Timoteuna Pabluta yanapargan mushoj congregaciuncunata camacächinanpaj, jina hermanucunata shacyächinanpäpis. Marcos y Timoteo ali calpachacushganpita Jehová ali nawilanwan ricargan y cushicurganpis.

19. ¿Imanirtaj mozucuna Pablo consejuncunapita yachacunman, y chaypita ima bendiciuncunata chasquinga?

¹⁹ Pablo Timoteuta cartacamushganpita, ¿imatataj yachacunchi? Payga Timoteuta alapa cuyargan, gamtapis Jehová alapa cuyashunqui y cushish cawanayquita munan. Chaymi gampis Pablupa consejuncunapita yachacunquiman y shongupita waquincunata yanapanquiman. Chayta ruraptiqui cushi cushilami cawacunqui, jina shamoj tiempuchopis “rasunpa ali kawayta” tarinqui (1 Tim. 6:18, 19).