¿Imanirtaj consejucunata ashishwan?

1. ¿Imata rurananchi ali decidinanchipaj? (Proverbios 13:10; 15:22).

LAPANCHIMI ali cawananchipaj ali decisiuncunata acrayta munanchi. Y ali decidinanchipäga Biblia yachachimanchi consejucunata ashinanchipaj (leiriy Proverbios 13:10; 15:22).

2. ¿Imata Jehová aunimashcanchi?

² Taytalanchi Jehovalami ali consejucunata gomanchi, chaymi yachayninta mañacunanchi tantiacoj runa cananchipaj. Jehovami aunimashcanchi cayno nir: “Qamtaqa imaypis alimi rikashayki, [...] kikïmi tantiyatsishayki y yachatsishayki” (Sal. 32:8). Aumi, Jehová altantumi caycan imapitapis consejamänanchipaj y yanapamanchi practicaman churanapajpis.

3. ¿Ima tapucuycunapita cay yachacuycho yachacushun?

³ Cay yachacuycho Bibliaga yanapämäshun chuscu tapucuycunapita contestanapaj, y capazchi caycunaman yarpachacunchi: 1) ¿Shongupita humildecu cä ali consejuta chasquinäpaj?, 2) ¿Pitaj ali consejamanman?, 3) Listucu caycä, ¿ali consejucunata chasquicunäpaj? y 4) Nogapaj decidinanpaj, ¿imanirtaj waquincunata mana mañacömanchu?

¿SHONGUPITA HUMILDE RUNACU CÄ?

4. ¿Imano runataj cananchi consejucunata ali chasquicunanchipaj?

⁴ Pipis consejamänanchipaj y ali consejuncunata chasquicunanchipaj humildimi cananchi. Chauraga ali decidinapäga pogushga y experienciayoj hermanucunata ashinanchi consejamänanchipaj. Humilde mana captinchega Jehová manami yanapämäshunchu, y capazchi yarpashwan “Bibliapa consejuncunaga manami nogapächu caycan” nir, chayno yarparga manami cäsucushunchu (Miq. 6:8; 1 Ped. 5:5). Ichanga humilde carga Bibliapita ima consejucunatapis cäsucushunmi.

5. ¿Imanirtaj David orgulloso runano canman cargan?

⁵ David imano runa cashganpita yachacushun, payga imayca alicunata rurarpis humildimi cargan. Manaraj mandacoj rey carmi achca watapami David musicata ali tucaj cargan, chaymi rey Saulpa naupancho tocargan (1 Sam. 16:18, 19). Israelpa reynin cananpaj Jehová Davidta acrashganpita santo espiritunwan yanapargan (1 Sam. 16:11-13). Davidga Israelpa chiquejnincunata wanuchergan y jatuncaray runa Goliat-tapis, chaymi runacuna payta alabapäcurgan (1 Sam. 17:37, 50; 18:7). David orgulloso carga cayno ninmanchi: “Nogano manami pipis canchu, nogaga más yachajmi cä. Mana nesecitächu pipis consejamänanta”. Pero payga humildimi cargan.

6. ¿Davidga consejucunata ali chasquicojchu cargan? (Garancho caycaj dibujuta ricay).

⁶ David mandashgancho ali amigucunata acrargan consejunta ashinanpaj (1 Crón. 27:32-34). Payga manaraj rey carpis ali consejaptenga chasquicurganmi olgu cajcunapita y warmi cajcunapitapis. Chayno cargan Abigaíl consejaptin, Abigailpa runanga Nabalmi cargan, payga orgulloso runami, mana agradecicoj, ni pitapis respetajchu cargan. David ichanga humilde runami car Abigailpa consejuncunata cäsucurgan, chaymi mana lutanta rurashgachu (1 Sam. 25:2, 3, 21-25, 32-34).

7. ¿Imata yachacunchi Davidpita? (Eclesiastés 4:13; fotucunatapis ricay).

⁷ ¿Imata yachacunchi Davidpita? Yachaj carpis, imata musyarpis o imayca carguyoj carpis manami yarpashwanchu ‘noga manami necesitächu pipis consejamänanta’ nir. Davidno pipis consejamaptinchega cäsucushwanmi (leiriy Eclesiastés 4:13). Consejucunata cäsucushgaga yanapämäshun lutanta mana ruranapaj o waquincunata mana laquichinapaj.

¿PITAJ ALI CONSEJAMANMAN?

8. ¿Imanirtaj Jonatán Davidta ali consejashga?

⁸ ¿Imata más yachacunchi Davidpita? Payga consejucunata mañacurgan: 1) Jehovawan ali amiguyoj cajcunata y 2) pasaycashganpita tantiajcunatapis. Juc cuticho Davidga rey Saulwan amistänanpaj, Jonatanpa consejunta ashirgan, payga Saulpa churinmi cargan. ¿Imanirtaj Jonatanga Davidta ali consejargan? Payga Jehovapa ali amigunmi cargan y Saultapis shumajmi reguirgan (1 Sam. 20:9-13). Noganchipis, ¿imanotaj Davidno cashun?

9. Ali consejuta chasquiyta munarga, ¿pitataj mañacushwan? Juc ejempluwan tantiachicamuy (Proverbios 13:20).

⁹ Nestashganchi consejucunata munarga, ashinanchi: 1) Jehovawan ali amiguyoj cajcunata y 2) pasaycashganchipita tantiajcunatapis a (leiriy Proverbios 13:20). Cayman yarpäshun, juc mozu hermano casaracuyta munarga, ¿pïcunatataj consejucunata mañacunman? Mana casado caj amigunta consejuta mañacuptenga Bibliawan consejaptin alimi canman. Pero más ali canman casado caj amiguncunata consejuta mañacuptin, paycunaga casado vidanpita musyar y cushish Diosta cäsucushganraycu cawar ali consejucunata gongapaj.

10. Cananga, ¿imata yachacushun?

¹⁰ Canancama yachacushcanchi humilde canapaj y Jehovapa amiguncunata consejuta mañacunapaj. Y cananga yachacushun imanir consejucunata chasquinapaj listo caycäshun. Jinamanpis yachacushun, ¿alichu caycanman consejucunata mañacuptinchi noganchipaj consejamajninchi decidinanpaj?

LISTUCU CAYCÄ, ¿ALI CONSEJUCUNATA CHASQUICUNÄPAJ?

11, 12. 1) Consejucunata ashirga, ¿imata mana rurashunchu? 2) ¿Rehoboamga imatataj rurashga juc asuntupita decidiyta munar?

¹¹ Öraga pipis consejuta ashin consejuta chasquicuyta mana munarchu, sinoga decidishgannola ninalanpaj. Chayno rurajcunaga consejuta chasquicuyta munanchu. Rey Rehoboam mana ali rurashganpita lapanchimi yachacunanchi.

¹² Taytan Salomón wanuptin Rehoboamga Israelpa reynin ticrargan. Chay tiempucho Israel naciunga imaycayojmi cargan, pero israelitacuna taytanpita quejacurgan alapa aruchishganpita. Chaymi Rehoboamta ruwacurgan alapa mana aruchinanpaj, pero Rehoboamga paycunata nergan ‘tiempotaraj necesitä shumaj yarpachacunäpaj’. Chayno nishganga alimi cargan, payga taytanta yanapaj ancianucunapa consejuncunata ashirgan (1 Rey. 12:2-7). Pero consejashgantaga manami chasquicurganchu. ¿Imanir? Capazchi pay mayna decidirgan imata rurananpaj, ancianucunapa consejuncunata ashirgan yarpashgannola ninanpaj. Chaymi, Rehoboamga joven amiguncunapa consejucunata ashirgan paycunaga yarpashganwanmi acuerdo caycargan, chayga paypaj alimi cargan (1 Rey. 12:8-14). Rehoboamga amiguncuna nishgantami cäsucurgan, chaymi waquin caj israelitacuna paypa contran sharcurgan. Chayraycurmi gobiernunchoga problemacuna cashga (1 Rey. 12:16-19).

13. Rehoboam pasashganpita, ¿imata yachacunchi?

¹³ ¿Rehoboam pasashganpita imata yachacunchi? Imatapis rurananchipaj decidishgana caycarga consejucunataga ashishwanchu. Sinoga manaraj decidir consejuncunata ashishun chasquicunapaj. Cayman yarpachacushun: “Consejuta mañacuptë yarpashgäno mana nimaptenga, ¿chasquicöchu?”. Mä cayman yarparcushun.

14. ¿Imata mana gongashwanchu? Juc hermano pasashganpita wilacaramuy (dibujutapis ricay).

¹⁴ Capazchi juc hermano ali aruyta tarin pero chay aruywanga familianpita carucho caycanga. Chay aruyman manaraj yaycur ancianupa consejunta ashin, ancianuga chay hermanuta cayno consejan: “Imaycapitapis más ali caycan familiayquiwan Jehovata junto sirvinayquipaj” nir (Efes. 6:4; 1 Tim. 5:8). Pero chay hermanuga chay ancianupa consejunwan mana acuerduchu caycan. Chaymi jucnin jucnin hermanucunapa consejunta ashin y juc hermanuga ‘chay aruyman yaycuy’ nir consejan. Chay hermanuga, ¿consejutachu ashiycargan o mayna decidishganta ninalantachu ashiycargan? Ama gongashunchu runapa shongunga mana yäracuypämi caycan (Jer. 17:9). Ayvecisga mana munashganchitanomi consejamanchi, pero chay consejucunami más yanapämanchi.

¿PILATAPIS MAÑACÖMANCHU NOGAPAJ DECIDINANPAJ?

15. ¿Imatataj manami rurashwanchu y imanir?

¹⁵ Jehová munan quiquinchi imatapis decidinanchipaj (Gál. 6:4, 5). Yachacushganchinopis imatapis manaraj decidir Bibliacho caycaj consejucunata ashinanchi y pogushga hermanunchicunapa consejuncunatapis, pero manami shuyarashwanchu noganchipaj decidinanpaj. Chaurasga amigunchita manami tapucushwanchu: “¿Y gamga imata ruranqui cay asuntucho?” nir. Waquincuna imata decidishganlata ricarlachu ama decidishunchu, sinoga shumajraj yarpachacunanchi imatapis decidinapaj.

16. ¿Imata decidipäcunan cargan Corinto hermanucuna? (1 Corintios 8:7; 10:25, 26).

¹⁶ Cananga yachacushun imata pasashga Corinto cristianucunawan. Chay marcapa mercadunchoga aychata ranticärejcunaga capazchi puntata idulucunapaj apaj, chaymi Pablo nishga: “Musyashqantsinöpis ïdulukunaqa manami kawantsu ni munayniyuqtsu kaykan. Tsaynöpis musyantsimi Tayta Dios juklayla kashqanta” (1 Cor. 8:4). Ichanga waquin cristianucunaga decidipäcurgan chay aychata ranticur micupäcunanpaj y waquincunana juchata rurashganta yarpar micuyta munapäcurganchu (leiriy 1 Corintios 8:7; 10:25, 26). Quiquincunapitami cargan micunanpaj o mana micunanpäpis. Pabluga imaypis nirganchu waquincunapaj decidipäcunanpaj, ni waquincuna decidishganlata ricarlachu decidipäcunanpaj. Chaypa trucanga, Romanos 14:10-12 textucho escribergan: “Lapantsimi Tayta Diosta cuentata qoshun”.

17. ¿Yanapamäshunchuraj waquincuna rurashgalanta rurashgaga? (Fotucunatapis ricay).

¹⁷ ¿Corinto hermanucuna pasashganno noganchitapis pasamashwanchuraj? Aumi, yawar asuntupita parlarcushun. Yawarchoga caycan globulos rojos, globulos blancos, plaqueta y plasma nishgancunami, chaypita raquishga cajcunataga cada ununchimi decidinanchi churacunapaj o manapis.b Cay asuntupita shumaj mana tantiarpis quiquinchimi decidinanchi imata rurananchipaj (Rom. 14:4). Jucnin rurashgalanta rurarga manachi tantiacoj runa cashwanchu. Tantiacoj runaga cashun Biblia nishganta quiquinchi rurashgarämi (Heb. 5:14). Imatapis manaraj decidirga Biblia nishganta y publicaciuncunacho ima nishganta shumaj yachacunapaj ashinanchi y chay yachacushganchita mana shumaj tantiarga pogushga hermanunchipa yanapacuyninta ashinanchi tantiachimänanchipaj.

IMAYPIS CONSEJAMÄNANCHIPAJ MAÑACUNANCHI

18. ¿Imatataj Jehová gomashganchi ali decidinanchipaj?

¹⁸ Jehová noganchiman yäracunmi. Chaymi munan quiquinchi imatapis decidinanchipaj. Chaypäga Palabranta gomashganchi y pogushga hermanunchicunatapis, Bibliapa consejuncuna ali tantiachimänanchipaj. Chaynopami Jehovaga cuyacoj taytano cuidamanchi (Prov. 3:21-23). ¿Imanopataj agradecicushun Jehová gomashganchicunapita?

19. ¿Imatataj rurananchi Jehovata cushichinanchipaj?

¹⁹ Taytacunaga cushicärinmi wamrancuna winar Jehovata sirviptin y waquincunata yanapaptinpis. Chaynolami Taytalanchi Jehovapis cushicun noganchi pogush cristianucunaman ticraptinchi, ali consejucunata ashiptinchi, y ali decisiuncunata quiquinchi decidiptinchi.