Imanotaj ali consejashwan

1. ¿Pïcunataj consejucunata gonman, y imanir?

WAQUINCUNAPÄGA pilatapis consejananpaj manami sasachu, pero waquincunapäga sasami. Chayno captinpis lapanchimi consejashwan. ¿Imanir? Jesusmi nergan rasunpa caj discipuluncuna jucnin jucnin cuyanacärinanpaj cajta (Juan 13:35). Chaymi hermanunchicunata cuyar consejaycunchi. Bibliapis nin shongupita pilatapis consejashgaga ali amigumi cashun (Prov. 27:9).

2. ¿Imata musyapäcunan ancianucuna, y imanir? (“Imanotaj ancianucuna ali consejanman pulan semana reuniuncho” recuadrutapis ricay).

² Ancianucunaga musyapäcunan waquincunata ali consejananpaj. Jehová y Jesús ancianucunata encargashga congregaciuncho caycaj hermanucunata cuidananpaj (1 Ped. 5:2, 3). Chauraga ancianucuna, ¿imanotaj cristiano masincunata cuidapäcun? Paycuna reuniuncunacho discursaptin Bibliawan ali consejamanchi, cada ununchitapis ali consejamanchi y Jehovata jaguejcunatapis yanapan payman cutipäcamunanpaj. ¿Imanotaj ancianucuna y noganchicunapis ali consejucunata goshwan?

3. 1) Ali consejananchipaj, ¿imatataj rurananchi? (Isaías 9:6; “Pilatapis consejashgaga Jesusno consejashwan” recuadrutapis ricay). 2) ¿Imatataj cay yachachicuycho yachacushun?

³ Ali consejucunata gonanchipäga Bibliacho caycaj runacunapita yachacushun. Jesuspitami más yachacunanchi, paypita Bibliaga nin: “Almiraypaj tantiyachicoj” cashganta (leiriy Isaías 9:6, TDI). Cay yachachicuycho yachacushun: Imatataj rurashwan pilapis consejananchipaj mañacamaptinchi, y imatataj rurashwan pilapis consejanapaj mana mañacamaptinchi. Jina yachacushun imay y imano consejanapaj.

CONSEJANANCHIPAJ MAÑACAMAPTINCHI

4, 5. ¿Imata tapucushwan pilapis consejananchipaj mañamaptinchi? Tantiachicamuy.

⁴ Consejananchipaj mañacamaptinchi capazchi cushicushwan noganchiman yupachicushganpita o confiacushganpita. Chaymi jinan hora consejayta munanchi. Pero manaraj consejarga cayman yarpachacushun: “¿Pasashgancunapita alicu musyä consejanäpaj?” nir. Pero más alimi canman pay pasashganta tantiajcuna consejananpaj, chayta tarinanpäga yanapashwanmi.

⁵ Cayman yarpashun, capazchi cuyashga amigunchi fiyu gueshyawan gueshyacan. Juc cuti watucamoj shamur cayno nimashwan “achca jampicunatami tarishgä, ¿maygantaj gampäga más ali caycan?” nir. Capazchi musyanchi maygan jampi más ali cashganta, pero doctorpaj mana estudiashgayquiraycu manami yanapayta puedinquimanchu, más bienga ali doctorta ashinanpaj yanapanquiman payta yanapänanpaj.

6. ¿Imataraj rurashwan pilatapis consejananchipaj?

⁶ Pilapis consejanapaj mañamaptinchi capaz cayno yarpashwan ‘nogaga musyämi pasashganta’ nir, chayno carpis manami rasla consejashwanchu. ¿Imanir? Proverbios 15:28, nin “Ali runaqa shumaqraqmi yarpachakun imata ninanpaqpis”. Chaymi wilamashganchita shumaj tantiarpis alimi canman Jehovata mañacunapaj, jina publicaciuncunachopis ashishun pasaycashganpita y yarpachacunanchi imano consejanapaj. Chayno rurashgaga Jehová munashgannomi canga. Cananga yachacushun profeta Natanta pasashganpita.

7. ¿Imata yachacunchi Natanta pasashganpita?

⁷ Rey David profeta Natanta nergan Jehovapa templunta sharcachinanpaj y payga jucla nergan ‘alichäri canman’ nir. Pero Jehovaga manami munarganchu David templunta sharcachinanta. Natanga manaraj consejar Jehovata tapunman cargan imata ninanpaj (1 Crón. 17:1-4). Natanta pasashganpita yachacunchi, pilapis consejananchipaj mañacämaptinchi shumajraj yarpachacunanchi y mana rasla imatapis ninanchipaj (Sant. 1:19).

8. ¿Imanirtaj pilatapis consejanapäga aliraj yarpachacunanchi?

⁸ ¿Imanirtaj pilatapis consejanapäga aliraj yarpachacunanchi? Chayta mana rurashgaga, consejashganchi mana ali decisiunta acraptenga noganchipis culpayoj cashun. Chaymi pilatapis manaraj consejarga alirämi yarpachacunanchi.

IMANOTAJ CONSEJASHUN, MANA MAÑACAMAPTINCHI CONSEJANANCHIPAJ

9. ¿Ancianucuna pilatapis manaraj consejar imapitataj seguro caycänan? (Gálatas 6:1).

⁹ Öraga quiquin ancianucunami mana ali caminupa aywaycaj hermanucunata ashipäcunan consejananpaj Gálatas 6:1 (leiriy) texto nishganno. Capazchi pipis mana alita ruraycan y chay ruraycunaga tiempuwan juchaman chayachinman. Chayta ricarga ancianucunaga yanapanman juchaman mana ishquinanpaj, chaynopa Jehovata mana jaguinanpaj y mana ushacaj cawayta tarinanpajpis (Sant. 5:19, 20). Ancianucunaga musyan Jehovaga camamashganchi cada ununchita conciencianchi permitimashganchiraycu imatapis decidinanchita. Chaymi juc hermanuta consejananpäga ancianucunaga puntata seguro caycänan y yarpachacunan “cay hermano, ¿rasunpachu juchata rurashga o conciencian permitishgalantacu rurashga?” nir (Rom. 14:1-4). Ancianucuna cay hermano juchata ruraycashganta cuentata gocushpanga, ¿imanoparaj chay hermanuta yanaparcunman?

10-12. ¿Imatataj ancianucuna ruranman consejuta mana mañacojcunata consejananpaj? Tantiachicamuy (Dibujucunatapis ricay).

¹⁰ Ancianucunapäga sasami canman pilatapis consejananpaj mana mañacuptin. ¿Imanir? Apóstol Pabluga nergan pipis mana cuentata gocur juchalicuycanman, chayraycurmi capaz consejananta mana nestashganta yarpan. Chaymi ancianucunaga pitapis manaraj consejar shumarämi yarpachacunan yachanaylapaj consejananpaj, chaynorämi consejashgan chasquicunga.

¹¹ Cayman yarpäshun: Murucojga anaj alpacho manaraj murur puntataga ojtinrämi, nircur-rämi murun y pargunpis, chaypitana murushga winan. Chaynolami ancianupis ruranan hermano consejunta chasquicunanpäga. Chay ancianuga cuyacoj canan, y parlananpaj hermanuwan ashinan imay parlananpaj. Y parlapashganchoga paypaj yarpachacushganta musyachinan.

¹² Ancianuga parlacushgancho capaz cayno ninman: “lapanchi juchayoj car imalachopis pantashpanchi consejamänanchipaj nestanchi” nir (Rom. 3:23). Respetuwan y yachanaylapa Bibliawan tantiachinman mana alita ruraycashganpita. Hermano mana ali ruraycashganpita cuentata gocuptin, ancianuga tantiachinman imata ruranan rurashganta corriginanpaj. Jina ancianuga hermanuta ali rurashganpita felicitaycunman y paywan mañacunan, chayta ruraptenga más fácil canga chay hermano consejunta chasquicunanpaj (Sant. 5:15).

13. Consejunta tantiashganta musyananpaj ancianucuna, ¿imataraj ruranman?

¹³ Ayvecis juc anciano ‘cayno wacno’ nir consejanman, pero consejash hermanuga consejunta jucnopa tantianman. Chauraga chay mana pasananpaj, ¿ancianucunaga imata ruranman? Hermanuta respetuwan tapupanan musyananpaj consejunta tantiashganta, chaynopa cambiucunata rurananpaj (Ecl. 12:11).

IMAY Y IMANO CONSEJASHWAN

14. Rabiashga caycarga, ¿imanirtaj pilatapis manami consejashwanchu?

¹⁴ Juchasapa car parlashganchiwan o rurashganchiwan waquincunata ofiendiycushwanchi (Col. 3:13). Bibliaga nin öraga jucninchi jucninchi rabiachinacunchi (Efes. 4:26). Pero rabiashga caycarga pitapis consejashwanchu. ¿Imanir? ‘Rabyakurqa manami Tayta Dios munashqannötsu ruraykanchi’ (Sant. 1:20). Rabiashga caycar pitapis consejashgaga ofiendiycushwanmi. Chayno captinpis imano sienticushganchita ofiendimashganchipita nishwanmi. Pero ofiendimashganchi hermanuwan parlanapäga rabiashganchi pasanantarämi shuyaränanchi. Canan yachacushun Elihupita, payga Jobta ali consejashga.

15. Elihú rurashganpita, ¿imata yachacunchi? (Dibujutapis ricay).

¹⁵ Achca junajpa quimsa amiguncuna Jobta acusargan mana ali rurashganpita chaypita payga defendicurgan y Elihuga wiyaycashga. Elihuga Jobta laquiparpis paywan pasaypa rabiacurgan. ¿Imanir? Job quiquilanman yarpar Jehovapita rasunpa cajta manami parlarganchu. Chayno captinpis Elihuga shuyararganmi pacienciawan parlapänanpaj y Jobta consejashgan horaga mana rabiacuypa y respetulawanmi consejashga (Job 32:2; 33:1-7). Elihú rurashganpita yachacunanchi pitapis consejarga tiempuncho consejananchipaj shuyaränanchi y respetulawan cuyacuywan consejananchi (Ecl. 3:1, 7).

CONSEJASHUN Y CONSEJAMASHGANCHITA CHASQUICUSHUN

16. Salmo 32:8 textupita, ¿imata yachacunqui?

¹⁶ Cay yachacuycho acracämushgan textucho Jehová nimanchi: “Kikïmi tantiyatsishayki y yachatsishayki” (leiriy Salmo 32:8). Jehovaga consejamashpanchega altantumi caycan cawayninchicho ima cambiucunata rurananchipaj yanapämänanchipaj. ¡Jehová rurashganno noganchipis rurananchi! Noganchipis altanto caycänanchi consejashganchi hermanuta yanapänanchipaj, cawaynincho practiman churananpaj consejashganchicunata.

17. Ancianucuna Bibliawan consejamaptinchi, ¿imanotaj sienticunchi? (Isaías 32:1, 2)

¹⁷ Canan tiempo más nestanchi consejayta y consejamänanchita (2 Tim. 3:1). Ancianucuna Bibliawan consejamashganchega “tsaki jirkakunacho yakunömi” caycan (leiriy Isaías 32:1, 2). Amigunchicunata agradecicunchimi nestashganchicho shumaj palabrancunawan consejamashganchipitaga, shumaj parlacuyninga “qellaywan adornashqa qori manzänanömi kaykan” (Prov. 25:11). Ali consejucunata gonanchipaj y chasquicunapajpis yachacuycäshun.