Ali consejananchipaj Job librupita yachacushwan

1, 2. ¿Imanirtaj Elihú y Jobpa quimsa amiguncuna shacyächinanpaj trucan manchacärish quedacurgan?

ACHCA marcacunapita runacuna Job nacaycunapa pasaycashganta wiyargan. Chaymi Elifaz, Bildad y Zofar amigun Jobta shacyächiyta munar Uz marcaman aywapäcurgan. Pero chayaycurna pasaypami manchacärirgan ¿imanir?

² Job laquishga caycar wagaycargan ¿imanir? Juc junajlacho jinayla quedacurgan: uywancuna wanucurgan, suwacunapis apacärirgan, jina lapan sirvejnincunatapis wanuchipäcurgan y chunca wamrancuna junto caycashgancho wasi juchucacuptin wanupäcurgan. Pero manami chaylachu, Jobga gueri nanay gueshyawanpis nacaycargan, chaymi uchpa janancho jamarash pasaypa laquish caycargan. Nacashganta ricarpis quimsa amiguncuna paypa laduncho ganchis junaj upälala quedacärirgan ni imalatapis nipäcurganchu (Job 2:12, 13). Nircur Elihú jutiyoj mozu chayargan y paycunapaj cercalancho quedacurgan. Chaypitana ‘imaparaj yurishcä, mejor wanucömanmi cargan’ nir, Job parlar galaycurgan (Job 3:1-3, 11). Chaycunapa pasar Job munargan amiguncuna shacyächinanpaj cajta. Cay runacuna Jobta rasunpa cuyar nacaycashganta ricar ¿imata rurapäcunman cargan? Mä ricärishun.

3. ¿Imatataj canan yachacushun?

³ Elihú y Jobpa quimsa amiguncuna rurashganta y parlashganta Jehová Moisesta nirgan escribinanpaj. Elihú nishgancunaga Jehovapitami shamurgan, pero Elifaz waquin nishgancunaga demoniupitachi shamurgan (Job 4:12-16; 33:24, 25). Chayraycu Job librucho alapa ali consejucuna captinpis, waquin mana ali consejucunapis caycan. Chauraga Jobpa quimsa amiguncuna mana ali consejashganpita y Elihú ali consejashganpita unay israelitacuna yachacurgan y noganchipis yachacushwan pilatapis ali consejananchipaj. Mä chaycunapita yachacushun.

ELIFAZ, BILDAD Y ZOFARPA CONSEJUNCUNA

4. ¿Imanirtaj quimsa amiguncuna Jobta shacyächirganchu? (Dibujutapis ricay).

⁴ Biblia wilacun quimsa amiguncuna “Jobta desgraciakuna pasashqanta mayaykurmi wilanakurkur aywapäkurqan shakyätsinanpaq” (Job 2:11). Pero paycuna manami shacyächirganchu, chaypa trucan Jobta nipäcurgan juchata rurashganpita Dios castigaycashganta ichanga chayga manami rasunchu cashga (Job 4:7; 11:14).a Jina waquin consejuncunaga manami yanaparganchu sinoga Jobpa shongunta nanachirgan, quimsa amiguncuna Jobta shacyächiylapa parlapayta munar laquichirganmi (Job 13:12). Bildadga ishcay cuti Jobta nirgan “imayyaqraq tsayno lutanta parlaykanki” nir (Job 8:2; 18:2). Zofarpis Jobpita nirgan “mana tantiyakuq runa” cashganta (Job 11:12). Quimsa amiguncuna Jobta mana gayaparpis ali tucur parlashganwan shongunta laquichirgan, chaynopa ricachicurganpis Jobta mana cuyashganta (Job 15:7-11). Cay runacuna Jobta shacyächinanpaj manami munarganchu, sinoga munapäcurgan Job lutanta rurashganta ricachinanpaj.

5. ¿Imanotaj Job sienticurgan Elifaz, Bildad y Zofar consejashganpita?

⁵ Elifaz, Bildad y Zofar runacuna consejashgancunawan Jobta laquichirganmi (Job 19:2). Chayraycu Job defendicuyta munar y quiquilanman yarpar lutanta parlar galaycurgan (Job 6:3, 26). Cay quimsa runacuna Dios munashgannochu parlapäcurgan, paycuna cuentata gocurganchu Satanás paycunata utilizashganta Jobta mana cuyapaylapa tratananpaj (Job 2:4, 6). Job pasashganpita ¿imata yachacurgan israelitacuna? Y noganchipis ¿imata yachacushwan?

6. Unay Israel juzgaj runacuna ¿imata yachacunan cargan Elifaz, Bildad y Zofar mana ali consejashganpita?

⁶ ¿Imata yachacurgan israelitacuna? Israelitacunapa tiempuncho Jehová ali tantiacoj runacunata acrargan pay munashganno juzgananpaj (Deut. 1:15-18; 27:1). Pilatapis manaraj consejar y manaraj juzgar cay tantiacoj runacuna shumajraj tantianan y wiyanan cargan (2 Crón. 19:6). Jina shumajraj tapupanan cargan runacuna nishganga rasunpa o mana rasunpa cashganta ali musyananpaj (Deut. 19:18). Pilapis yanapananpaj ashiptin paycuna cuyacuywan parlapanan cargan. Cuyacuywan mana parlapaptenga ni pipis wilapanmanchu cargan imano sienticushganta (Éx. 22:22-24). Job pasashganpita cay tantiacoj runacuna shumajraj yachacunan cargan pilatapis consejananpaj.

7. Israel naciuncho ¿pïcunataj consejanan cargan, y imatataj yachacunan cargan Job pasashganpita? (Proverbios 27:9).

⁷ Manami juzgaj runacunalachu israelitacunata consejanan cargan sinoga edayashgacuna, mozucuna, jipashcuna y lapan israelitacunapis. Paycuna ali amigo car amiguncunata yanapacunan cargan Jehovaman guelicunanpaj y lutancunata mana rurananpaj (Sal. 141:5; leiriy Proverbios 27:9). Pilatapis consejashgan hora israelitacuna shumajraj yachacunan cargan Elifaz, Bildad y Zofar parlashganta y rurashganta mana rurananpaj.

8. Pilatapis consejananchipaj ¿imatataj cuentaman churananchi? (Fotucunatapis ricay).

⁸ Y noganchi ¿imata yachacushwan? Hermanunchicuna imayca problemacunapa pasashgan hora yanapayta munanchi, pero Jobpa quimsa amiguncunano manami rurashwanchu. Chauraga pilatapis manaraj consejashganchi hora shumajraj imacunapa pasashganta musyananchi. Jina manami nanaparaylapa parlashwanchu sinoga cuyacuywan parlananchi. Y Bibliawanmi consejananchi, manami yarpayninchilapitachu Elifaz rurashganno (Job 4:8; 5:3, 27). Elifaz y ishcan amiguncuna waquin parlashgancunaga rasunmi cashga y apóstol Pablupis cartancho Elifaz nishganta escribirgan (Job 5:13 textuga 1 Corintios 3:19 textuwan tincuchiy). Pero paycuna Jehovapita parlashganga casi lapan manami rasunchu cashga y Jobtapis laquichirgan, chaymi Jehová nirgan “manami rasun kaqtatsu noqapita parlashqanki” nir (Job 42:7, 8). Chauraga, pilatapis consejashganchi hora tantiachinanchi paycuna pantarcuptinpis Jehová imaypis cuyashganta. Jina manami yarpachishwanchu pantashgalanta Jehová ricashganta, ni payta Jehová mana cuyashgantapis. Cananga Elihú nishgancunapita yachacushun.

ELIHUPA CONSEJUNCUNA

9. ¿Imanirtaj Job pilapis shacyächinanta nestargan, y Jehová imanotaj yanapargan?

⁹ Quimsa amiguncunawan Job rimanacärishganpita Bibliacho 28 capitulucunachomi yurimun. Paycuna rabiashgala caycar mana alicunata parlargan, chaychi Job laquishga y calpayninaj caycargan y nestargan pilapis shacyächinanpaj y corriginanpaj. Jehová chayta ricar Elihuta utilizargan Jobta consejananpaj. Pero ¿imanirtaj Elihú upälala shuyarargan? Chaypita quiquin cayno nergan: “Mözularaqmi kaykä. Qamkunaqa mas awkinnami karkaykanki. Tsaymi respitar yarpashqäta mana rimakushqätsu” (Job 32:6, 7). Elihuga shumaj musyargan auquincuna ali experienciayoj cashganta, chaymi Jobta y quimsa amiguncunata wiyargan y nircur parlar galaycurgan cayno nir: “Manami awkinkunalatsu tantiyakuq kaykan. Ni awkin kashqalanpitatsu ali kaqta ni mana ali kaqtapis yachan” (Job 32:9). Canan ricärishun Elihú imano parlashganta.

10. Jobta manaraj consejar ¿imata rurargan Elihú? (Job 33:6, 7).

¹⁰ Elihú manaraj consejar Jobta yanapargan rabiashgala mana caycänanpaj. Elihupis rabiashga caycargan lapan wiyashgancunapita, pero controlacurgan mana rabiashgala caycänanpaj (Job 32:2-5). Chaymi parlashgan hora manami rabiaparganchu sinoga ali shimilapa cuyacuywan parlapargan y caynomi nirgan: “Qampis y noqapis Tayta Diospaqqa iwalmi kaykantsi” (leiriy Job 33:6, 7). Jina Elihu Jobta yarpachirgan imacunapita parlashganta chaynopa Jobta musyachicurgan Job nishgancunata atentula wiyashganta (Job 32:11; 33:8-11). Y chayta rurargan achca cuticho manaraj consejacur (Job 34:5, 6, 9; 35:1-4).

11. ¿Imanotaj Elihú Jobta consejargan? (Job 33:1).

¹¹ Elihú Jobta consejashgan hora cuyacuywan y respetulawan parlapargan. Quimsa amiguncuna jutinpa mana gayaptinpis Elihú Jobta jutinpa gayarmi consejargan (leiriy Job 33:1). Capaz pay yarparargan Job quimsa amiguncunawan rimanacärishgancho parlayta munarpis mana puedishganta, chaymi Jobta nirgan parlayta munarga wilapänanpaj cajta (Job 32:4; 33:32). Jina Elihú Jobta consejargan shumaj yarparcur parlananpaj y cuyacuywan yarpachirganpis Jehová alapa yachaj, poderyoj y cuyacoj cashganta (Job 36:18, 21-26; 37:23, 24). Cuyacuywan Jobta consejashganpita pay listuna caycashga Jehovapa consejuncunatapis chasquinanpaj (Job 38:1-3). Elihú Jobta consejashganpita ¿imata yachacurgan israelitacuna? Y noganchipis ¿imata yachacushwan?

12. ¿Imata rurananpätaj Jehová profetancunata mandargan y imata paycuna Elihupita yachacärinan cargan?

¹² ¿Imata yachacurgan israelitacuna? Jehová israelitacunata yachachinanpaj y corriginanpaj achca profetancunata utilizargan. Juecescuna cawashgan wichan Jehová acrargan Débora profetisata y Samuel mozuta Jehovapa leynincunapita israelitacunata yachachinanpaj (Juec. 4:4-7; 5:7; 1 Sam. 3:19, 20). Jina reyescunapa wichan Jehová achca profetancunata mandargan pay munashganno runacuna adorapäcunanpaj, y pipis mana cäsucäriptin corriginanpaj (2 Sam. 12:1-4; Hech. 3:24). Cay profetacuna Elihupita yachacärinan cargan pilatapis corrigishgan hora imano rurananpaj.

13. Pilatapis shacyächinapaj ¿imata yachacunchi Elihú rurashganpita?

¹³ Y noganchi ¿imata yachacushwan? Elihú y naupa profetacuna rurashgannopis canan wichan Diospa voluntaninta Bibliawan runacunata yachachinchi. Jina hermanunchicunata ali shimilapa y shacyächiylapa consejananchi (1 Cor. 14:3). Capazchi pï hermanulapis problemacunapa pasashganraycu laquishga o rabiashga caycar lutanta parlanman. Chayno parlashganta wiyarga ancianucuna calpachacärinman ali shimilapa cuyacuywan parlapananpaj, y lapanchimi chaynola rurashwan (Job 6:3; 1 Tes. 5:14).

14, 15. Elihú imano consejashganpita ¿imata yachacunman ancianucuna?

¹⁴ Mä cayman yarpäshun: ishcay ancianucunashi laquishga caycaj hermanata shacyächinanpaj watucaj aywapäcun. Parlacushgancho cay hermana ancianuta wilapan reuniuncho y predicaciuncho caycar cushish mana sienticushganta. Chauraga ¿imata ruranman ancianucuna chayta wiyar?

¹⁵ Ancianucuna cay hermanata manaraj consejar shumajraj tantiapäcunman imacunapa pasashganta y imano sienticushgantapis. Capaz cay hermana alapa nacaycunawan cashganraycu laquicur yarpaycan Jehová mana cuyashganta. Chayta musyananpäga hermanata ancianucuna shumaj tapunman y contestashgantapis wiyanman (Luc. 21:34). Jina predicaciunman yargushganpita, reuniunman aywashganpita y ali rurashgancunapitapis felicitaycunmanmi. Chauraga ancianucuna cay hermana imacunapa pasashganta y imano sienticushganta shumaj tantiarcurraj Bibliawan Jehová alapa cuyashganta musyachinman (Gál. 2:20).

JOB LIBRUPITA IMAYPIS YACHACUSHUN

16. ¿Imata rurashwan Job librupita imaypis yachacunapaj?

¹⁶ Job librupita achcajmi yachacushcanchi. Pasaj semana yachacushganchi imanirtaj Jehová nacaycunata permitin y nacaycunapa pasarpis imano aguantananchipaj. Canan yachacushganchi pilatapis consejar Jobpa quimsa amiguncunano mana ruranapaj, sinoga Elihú shumaj consejashgancunano ruranapaj. Chauraga pilatapis consejashganchi hora Job libruta leishwan. ¡Job libruga alapa shumajmi! Chaymi achca tiempuna mana leirga calpachacunquiman yapay leinayquipaj, chayta rurarga imaycacunatami yachacunqui.