Nacashganchi hora Job librupita yachacushwan

1, 2. ¿Imanirtaj ali caycan Job librupita yachacunanchipaj?

WAQUIN runacunaga nipäcun Job libruta escribej runaga fácil tantiacänanpaj y cuyaylapaj palabracunawan escribirgan. Capaz chay libruta leishgayquicho cuentata gocushcanqui chayno cashganta. Chay librutaga 3.500 wata wichanmi Moisés escribirgan, payga manami escribirganchu quiquinpa yarpayninta sinoga Jehovapa yarpaynintami escribirgan (2 Tim. 3:16).

² Job libruga tantiachimanchi angelcuna y runacunapis Jehovata cuyashpanchi payta sirvinapaj decidinanchi. Y cay Job libruga yanapämäshunpis Jehovata reguinapaj, cuyacoj, yachaj, ali Dios y poderyoj cashgantapis. Bibliacho caycaj waquin librucunapitapis cay Job libruchoga más achca cutimi Jehovapita parlan “Lapanta puedej” cashganta, jina Job librupis wilacun imanirtaj Dios nacaycunata permitiycashganta y mascunapitapis yachachimanchi. Chaycunaraycu alapa ali caycan Job librupita yachacunanchipaj.

3. Job libruta estudiar ¿imata yachacushun?

³ Punta jananman wichashgaga lapanta ricanchi, chaynolami Jehová lapan problemanchicunata rican. Noganchipis Jehová ricashganno problemanchicunata ricanapaj Job libruta leishun. Chayraycu canan yachacushun imanotaj Job libro yanapämanchi nacaycunapa pasaycaptinchi. Yachacushunpis Job pasashganga imanotaj unaycho israelitacunata yanapashga y imanotaj noganchitapis yanapämanchi. Jina yachacushunpis imanopataj Job pasashganwan waquin runacunata yanapashwan.

DIOS PERMITIRGAN JOB NACANANTA

4. ¿Israelitacunaga pitataj adurapäcoj y Jobga pitataj aduraj?

⁴ Israelitacuna Egiptucho caycashgan wichanmi Jobga Uz marcacho tiyargan, chay marcaga Arabia naciunpita cerca caycargan. Chay wichanga israelitacuna idulucunata adurapäcoj, Job ichanga Jehovata shongupita aduraj (Jos. 24:14; Ezeq. 20:8). Chaymi quiquin Jehová Bibliacho nin Jobnoga cay pachacho pipis mana cashganta (Job 1:8).a Jobga rico runa y respetashga runa cargan (Job 1:3). Chayno carpis Jobga Jehovata shongupita sirvej, chayta ricar Satanás alapa rabiacurgan.

5. ¿Imanirtaj Jehová permitishga Job nacananpaj? (Job 1:20-22; 2:9, 10).

⁵ Satanasga nirgan Job nacashpan Jehovata sirvir jaguirinanpaj cajta (Job 1:7-11; 2:2-5). Chaywanga Satanás niycargan Job bendicishga cashganlapita Jehovata sirviycashganta. Chaymi Jobta alapa cuyarpis Jehová Satanasta nirgan rasun o mana rasun parlaycashganta musyachicunanpaj (Job 1:12-19; 2:6-8). Chayraycurmi Satanasga Jobpa uywancunata lapanta ushacächirgan, chunca wamrancunatapis wanuchirgan y Jobta manchanaypaj gueshyawan gueshyachirgan. Satanás pasaypa nacachiptinpis, Jobga Jehovata manami jaguirganchu (leiriy Job 1:20-22; 2:9, 10). Tiempuwanga Jehovaga Jobta gueshyanpita alchacächirgan, riquezancunatapis unay charashganpita masta gorgan, yapay cargan chunca wamrancunapis y Jobtaga yapay runacuna respetapäcurgan. Jinamanpis Jehovaga 140 wata más cawananpaj permitirgan, wilcanpa wilcancunatapis reguirgan (Job 42:10-13, 16). Job pasashganpita ¿imata yachacurgan israelitacuna? Y noganchipis ¿imata yachacushwan? Canan chaycunapita tantiarcushun.

6. Israelitacuna Job pasashganta musyapäcuptenga ¿imanotaj yanapargan? (Dibujutapis ricay).

⁶ ¿Imata yachacurgan israelitacuna? Josué y Caleb wamrala cashganpita lapan israelitacunawan Egiptucho esclavo car pasaypa nacapäcurgan. Nircur Egiptupita yargurirpis chunyaj jircacho 40 watapami purir nacapäcurgan. Chunyaj jircacho caycar israelitacunaga Job pasashganta musyapäcurganmi, chaymi cuentata gocärirgan Satanás nacachicoj cashganta, manami Jehovachu. Jinapis tantiapäcurgan imanirtaj runacuna nacananpaj Dios permitiycashganta. Y yäracurgan Jehová cuyacoj car payta mana jaguiypa y lapan shonguwan sirvejnincunata bendecishganta.

7, 8. Job librupita yachacuptin ¿nacaycaj runacunata yanapanchuraj? Juc warmi pasashganta wilacamuy.

⁷ Y noganchi ¿imata yachacushwan? Canan wichanpis ali runacuna nacashganta ricar waquincuna mana tantiapäcunchu imanir Dios nacananta permitiycan. Chayraycu yarpapäcun ‘Diosga manami imatapis ruranchu’ nir y payman manami creinnachu. Ricarcushun Ruanda naciunpita Hazel warmi pasashganta.b Pay Diosman creejmi, pero tucuy problemacunapa pasargan. Taytancuna raquicärirgan y mamanna juc runawan casacurgan, chay runaga Hazelta alapa nacachej. Jinapis juc runa payta violargan. Chayraycu Hazelga iglesianman aywargan Diospa yanapacuyninta ashej, pero consueluta manami tarirganchu. Chaymi Diosta juc cartata escribirgan, chaycho nishga: “Nogaga ali cajta ruraj calpachacö, pero gam nacachimashcanqui. Chaymi cananga decidishgä gamta mana aduranäpajna. Quiquë munashgäta ruracushaj cushicunäpaj”. Canan wichanpis Hazel pasashgannomi runacuna nipäcun ‘Diosmi culpayoj nacaycunapita’ nir, chayta ricashgaga alapa laquicuypämi.

⁸ Noganchimi ichanga Job librucho yachacushcanchi manami Dioschu nacachimanchi sinoga Satanasmi. Jina yachacushcanchi runacuna nacaycajta ricar manami nishwanchu juchancunaraycu nacaycashganta. Bibliachoga nimanchi ilajpitami lapanchita problemacuna chayamanchi (Ecl. 9:11; Job 4:1, 8). Yachacushcanchipis imayca problemacunapa pasashganchi hora Jehovata mana jaguiypa sirviycarga musyachicushun Satanás lulacoj cashganta (Job 2:3; Prov. 27:11). Caycunata Bibliacho yachacushganchipitaga alapa cushicunchimi, y musyanchipis noganchicuna y familianchicuna imanir nacaycashganchita. Hazel warmiga chaycunata yachacurgan, Testigucunawan estudiashgancho pay cuentata gocurgan Jehová nacaynincunapita mana culpayoj cashganta. Paymi cayno nin: “Shongöpita Jehovata mañacurgä y nirgä ‘manami rasunpachu gamta jaguiyta munargä’. Nogaga manami Jehovata reguirgächu, canan reguishgäpita cuentata gocö pay cuyamashganta, chayga alapami cushichiman”. Noganchicunaga alapami agradecicunchi imanir Dios nacaycunata permitiycashganta musyarga. Canan yachacushun nacashganchi hora imanotaj Job pasashgancuna yanapämanchi.

IMATA YACHACUNCHI JOB PASASHGANPITA

9. ¿Imacunapataj Job pasaycargan? (Santiago 5:11).

⁹ Mä yarparcushun Job imacunapa pasashganman. Payga uchpa janancho jamaraycargan. Uma pucshunpita chaqui puntanyaj gueripacushgan alapa nanachicurgan, y guerin chaquiptenga garan shicuaj. Chay gueshya payta uyuyachergan, fuerzanpis cargannachu imata rurananpäpis, jamacuycur guerin shejshiptin manca paquipawan rascacoj, y guerin nanaptin pay gaparaj. Chay nacaycunapa pasarpis, Job mana jaguiypa Jehovata sirviycashga (leiriy Santiago 5:11). ¿Jobtaga imata yanapargan Jehovata mana jaguiypa sirviycänanpaj?

10. ¿Job manchacurganchu imano sienticushganta Jehovata wilananpaj? Tantiachicamuy.

¹⁰ Jobga mana manchacuypa shongupita Jehovata wilapaj imano sienticushganta (Job 10:1, 2; 16:20). Job 3 caj capitulucho gueshyanpita alapa laquish caycashgancho quejacurgan, y nacaynincunaga Jehovapita shamushganta nirgan. Jina mana ali amiguncuna tumpaptin pay defendiycur Jehovata nirgan ‘nogaga manami juchata rurargächu’ nir. Chay nishganwanga Jobga tantiachicuycargan Jehovapita pay más ali cashganta (Job 10:1-3; 32:1, 2; 35:1, 2). Pero nircur payga cuentata gocurgan Jehovapita lutanta parlaycashganta (Job 6:3, 26). 31 caj capituluchopis Jobga Jehovata nirgan defendicushganta wiyananpaj y juchaynaj cashganta ninanpaj (Job 31:35). Job chaycunata niptinpis, Jehovaga manami obligaduchu caycargan imanir nacaycashganta tantiachinanpaj.

11. ¿Imanotaj Jehová Jobta corrigirgan?

¹¹ Job lapan nishgancunawanga musyachicurgan Jehovawan ali amigo cashganta, chaymi Jobga Jehovata wilapargan lapan sientishgancunata y segurumi caycargan aguantashganta Jehová cuentaman churananpaj cajta. Tiempuwanna Jehová Jobta wayra rurinpitami contestamurgan. Chaychoga manami nirganchu Job imanir nacaycashganta, ni lutancunata parlashganpita rabiaparganchu. Sinoga cuyacoj tayta wamranta corrigishgannomi Jobta cuyacuywan corrigirgan, chaymi Jobga humilde cashpan cuentata gocurgan mana lapanta tantiashganta y arrepenticurgan lutanta parlashganpita (Job 31:6; 40:4, 5; 42:1-6). Job pasashganpita ¿imata yachacurgan israelitacuna? Y noganchipis ¿imata yachacushwan? Canan chaycunapita tantiarcushun.

12. Moisés y israelitacuna ¿imatataj Jobpita yachacurgan?

¹² ¿Imata yachacurgan israelitacuna? Mä yarpäshun Moisés imapa pasashganta. Payga israelitacunata pushashgancho tucuy problemacunapa pasargan y ayvecisga laquishga sienticurgan. Problemacunapa pasar israelitacuna Jehovapita quejacuptinpis Moisesga manami quejacurganchu, sinoga Jehovatami imano sienticushganta pay wilapaj (Éx. 16:6-8; Núm. 11:10-14; 14:1-4, 11; 16:41, 49; 17:5). Jehová corrigishgan horapis Moisesga Job pasashganpita yachacurganchi. Chayno pasargan Dios aunishgan marcaman manaraj yaycur. Moisesta israelitacuna rabianachiptin, payga shumaj mana yarpachacur lutanta parlargan y Jehovata mana alabarganchu (Sal. 106:32, 33). Chaypitami Jehová Moisesta manana permitirganchu aunishgan marcaman yaycunanpaj (Deut. 32:50-52). Chayga Moisesta alapa laquichiptinpis payga humilde cashpan Jehová corregishganta chasquicurgan. Pero Job pasashganpita manami Moiseslachu yachacurgan, sinoga tiempo pasariptinna waquin israelitacunapis yachacurganmi. Israelitacuna yachacunan cargan Jehovata lapan yarpashgancunata y lapan sientishgancunata mana manchacuypa wilapänanpaj, y manami yarpapäcunanchu cargan juchaynaj cashganta. Jehová corrigiptin paycuna chasquicunan cargan shongupita.

13. ¿Imanopataj yanapämanchi Job pasashgan aguantananchipaj? (Hebreos 10:36).

¹³ Y noganchi ¿imata yachacushwan? Canan wichanga imayca problemacunapa pasaycanchi. Capaz gueshyaycanchi, alapa yarpachacuycanchi, familianchicunacho imayca problemacunapis caycan, familianchi o amigunchi wanupacushga. Y chay hora capaz pilapis imatapis niycämanchi masraj laquichimänanchipaj (Prov. 12:18). Chaycunapa pasaptinchega fuerzata nestanchi Jehovata mana jaguiylapa sirviycänapaj (leiriy Hebreos 10:36). Job libruga noganchitapis yachachimanchi imano sienticushganchicunata Jehovata wilapänapaj y payga lapan nishganchicunata wiyamäshunmi (1 Juan 5:14). Jehovata wilapashganchi hora avecis lutan cajta rimaycushwan, chayno captinpis Jehovaga manami rabiacungachu noganchiwan, chaypa trucanga fuerzata y yachayta gomäshun imaycatapis aguantanapaj (2 Crón. 16:9; Sant. 1:5). Jobno ayvecisga lutanta yarpashwan, chay hora Jehová corrigimanchi Bibliawan, publicaciuncunawan, ancianucunawan o juc amiguwanpis. Jobpa ejemplunga yachachimanchi Jehová corrigimaptinchi mana jaguiypa payta sirviycänapaj (Heb. 12:5-7). Jobga Jehová corrigiptin cäsucurgan y noganchipis humilde cashwan Jehová corrigimaptinchi cäsucunapaj (2 Cor. 13:11). Canancamaga yachacushganchi shumaj yachacuycunata Job librucho. Canan yachacushun imanopataj yanapashwan waquin runacunata Job pasashganwan.

WAQUINCUNATAPIS JOB LIBRUPITA YACHACHISHWAN

14. Predicashganchi hora ¿imanopataj runacunata tantiachinchi imanir nacaycashganta?

¹⁴ Predicashganchi hora runacuna manami musyapäcunchu imanir nacaycashganta, chaymi Bibliawan tantiachinchi Edén huertacho pasashganta. Chaypäga wilapanchi Adán Evata juc fiyu ángel Satanás jutiyoj lulapar engañashganta y chayraycu paycuna Diosta mana cäsucushganta (Gén. 3:1-6). Nircurna wilapanchi Adanwan Eva Diosta mana cäsucushganpita noganchipis nacar wanushganchita (Rom. 5:12). Chaypitana wilapanchi Jehovaga Satanasta manaraj ushacächishganta sinoga tiemputa goycan pay gobernananpaj, chaynopa lapancuna cuentata gocärinanpaj pay nishganga mana rasun cashganta. Jinapis wilapanchi Jehovaga lapan nacaycunata shamoj tiempucho ushacächinanpaj cajta, y paraisucho cushish cawacunanchipaj cajtapis (Apoc. 21:3, 4). Chayno yachachiptinchi runacuna tantiapäcun imanir nacaycashganta.

15. Nacaycajcunata ¿imanopataj Job librupita yachachishwan? (Fotucunatapis ricay).

¹⁵ Ayvecisga predicashganchicho tarinchi problemacunapa pasaycajta. Pilapis tapumashwan imanir nacaycashganta, chaypita agradecicushun y wilapashwanpis unay tiempucho Job pasashganpita. Chaypita yachacur predicashganchi runaga cuentata gocunga manami paylachu nacaycunapa pasaycashganta. Yachachishwanpis Jobga tucuy problemacunapa pasar yarparganmi Dios nacaycachishganta, pero chayga manami rasunchu cashga, Jobtaga Satanasmi nacaycachirgan (Job 7:17-21). Satanás nirgan Job y lapan runacunaga Diosta sirvipäcunchi paypa bendiciunninta chasquirlami y nacashganchi hora payta jaguinanchipaj cajta, chayraycu Satanás Jobta nacachirgan. Chauraga Jehová Jobta mana nacachiptinpis ¿imanirtaj Job nacananta permitirgan? Jehovaga musyan runacuna imayca problemacunapa pasarpis payta mana jaguirinanpaj cajta, chaynopa Satanás lulacoj cashganta musyachicunanpaj. Ushanapaj nishwan imayca nacaycunapa pasarpis Job Jehovata mana jaguishganpita achca bendiciuncunata chasquirgan. Chaynopa runacunata yachachishwan Jehová mana nacachishganta, y chayta yachacur paycuna alinami sienticunga.

16. ¿Nacaycajcunata Job libro yanapanmanchu? Wilacamuy juc runa pasashganta.

¹⁶ Cananga Mario jutiyoj runa pasashganpita yachacushun. Job librupita yachacushgan payta yanapargan. 2021 watacho juc hermana telefunupa predicashgancho Mariuta gayargan. Chay hermana Bibliawan yachachirgan Dios mañacuyninchicunata wiyashganta y paraisucho ali cawananchitapis munashganta. Chay textuta wiyar Mariuga wilapargan quiquin wanuchicunanpaj juc cartata escribiycashganta, jina nirganpis: “Nogaga Diosman creirpis cay tuta yarpargä pay mana cuyamashganta”. Hermananchi yapay gayashgancho Job pasashganpita wilapargan, y Mariuga Job libruta ushaypa leiyta munargan. Chaymi jw.org paginacho Bibliata leinanpäga hermananchi enlacita mandargan. Job librupita yachacur Mariuga decidirgan Bibliapita masta yachacunanpaj, y Dios payta alapa cuyashganta musyarir alapami cushicurgan.

17. ¿Imata yachacushcanqui Job librupita? (Job 34:12).

¹⁷ Segurumi caycanchi Bibliaga runacunata yanapashganta y nacaycajcunatapis shogashganta (Heb. 4:12). Chaymi alapa agradecicunchi Job pasashganta Jehová Palabranman escribichishganta (Job 19:23, 24). Job librucho tantiashganchi Diosga “manami imaypis lutanta rurantsu” (leiriy Job 34:12). Yachacushganchi imanirtaj Dios nacaycunata permitishganta y imanopataj yanapämanchi aguantanapaj. Jina yachacushganchipis nacaycajcunata shoganapaj. Juc caj semana Job librupita yachacushun imanopataj pilatapis ali consejananchipaj.