Diospita yachacuyta munajcunataga jucla yachachiy

1. Runacuna Diospa ali wilacuyninpita wiyaycur, ¿jucla yachacuyta munapäcun? (Hechos 13:47, 48; 16:14, 15).

NAUPA caj cristianucunapa tiempuncho runacuna Jehovapita Jesuspita mayaycur yäracushpan y cristianuman ticrayta munapäcurgan (leiriy Hechos 13:47, 48; 16:14, 15). Canan wichanpis Diospa ali wilacuyninpita wiyaycur waquin runacuna jucla masta yachacuyta munapäcun, pero waquincunana puntalapita mana yachacuyta munarpis tiempuwanga Jehovapita masta yachacuyta munapäcunman. Chauraga predicaciuncho pipis Bibliapita yachacuyta munaptenga, ¿imata rurananchi?

2. ¿Imanirtaj runacunata Bibliapita yachachiptinchi juc huertata cuidashganchinomi caycan?

² Runacunata Bibliapita yachachiptinchi juc guenchata o huertata cuidashganchinomi caycan. Huertanchicho pargur uriashganchi hora maygan plantapa wayuynin pogushganta ricar jucla shuntanchi. Chaynolami canan runacunata Bibliapita yachaycächinchi, y pipis Bibliapita yachacuyta munaptenga jucla payta yanapänanchi (Juan 4:35, 36). Chaypäga atentula caycashun cada runacunata imano Bibliapita yachachinanchipaj. Canan yachacushun imataraj rurashwan predicaciuncho caycar pipis Bibliapita yachacuyta munaptin y imanotaj paycunata yanapashwan Jehovata sirvinanpaj.

PILAPIS BIBLIAPITA YACHACUYTA MUNAPTENGA, ¿IMANOTAJ YANAPASHUN?

3. Predicaciuncho caycar, ¿imataraj rurashwan pilapis Bibliapita yachacuyta munaptin? (1 Corintios 9:26).

³ Predicaciuncho caycaptinchi pilapis Bibliapita yachacuyta munaptin, jucla yanapashun Jehovapita masraj yachacur payta sirvinanpaj. Predicaciuncho caycar runacunata nirishwan Bibliapita yachacunanpaj y invitashwan reuniunninchiman aywananpaj (leiriy 1 Corintios 9:26).

4. ¿Imata yachacunchi Canadá naciuncho juc hermananchita pasashganpita?

⁴ Runacunata Bibliapita yachachinayquipaj niriy. Waquincuna Bibliapita wiyashganlapita masraj yachacuyta munapäcun. Chayno pasargan Canadá naciuncho. Juc jueves junajcho juc hermana carrituwan predicaycaptin juc jipash chayargan y Cushishgala imaypis cawanapaj nej folletuta acrargan. Hermananchi chay jipashta nergan chay folletuwan Bibliapita gratisla yachachishganta, chaymi chay jipash yachacuyta munar ishcancuna celularninpa numerunta gocärergan. Chay junajla jipashga hermananchita mensajipa tapurgan ‘¿Imanotaj Bibliapita yachachipäcunqui?’ nir. Hermananchi nergan ushanan semanacho Bibliapita yachacur galaycunanpaj, pero chay jipashga nergan ‘wara tiempö caycan Bibliapita yachacunanchipaj’ nir. Y waranninla Bibliapita yachacur galaycurgan y chay ushanan semanacho reuniunmanpis aywargan, chaypita jipashga Jehovata sirvir galaycurgan.

5. ¿Imapita parlashwan runacuna Bibliapita yachacuyta munapäcunanpaj? (Fotucunatapis ricay).

⁵ Chay jipashno waquin runacunaga manami jucla Bibliapita yachacuyta munapäcunchu. Öraga Runacuna Bibliapita yachacuyta munapäcunanpaj paycunapa munashganpita y nestashganpita parlapashwan. Chauraga runacunaman yarpachacur y cushishgala yachachiptinchi paycuna Bibliapita yachacuyta galaycunga. Chauraga, ¿imata nirishwan Bibliapita yachachir galaycunanchipaj? Mä yachacushun imata nipäcun waquin hermanunchicuna Bibliapita yachachir galaycärishganpita.

6. ¿Imataj nirishwan runacunata Bibliapita yachacuyta munapäcunanpaj?

⁶ Waquin wauguinchi y paninchicuna runacunawan parlar ‘Bibliapita estudianayquipaj cutimushaj’ de frentila niptin, paycuna manchacur munapäcunchu. Mas bienga, ‘¿Maslata Bibliapita musyayta munanquimanchuraj?’ nipäcuptinga rasla Bibliapita yachacuyta munapäcun. Runacuna maslata parlayta munapäcunanpaj hermanunchicuna nimanchi cayno ninanchipaj: ‘Bibliacho achca temacunapitami yachachimanchi, manami Diospa leynincunalapitachu. Jina yanapämanchi caway vidanchicho imano cushishga cawacunanchipaj’ nir, y nishwanpis: ‘Ichiclatapis parlaptinchi yachacunqui ali cawacunayquipaj’. Pero ‘mana faltaypa cada semana shamushaj Bibliapita yachacunanchipaj’ niptinchega paycuna obligaduno sienticunman, ni Bibliapita yachacuyta munapäcungachu.

7. ¿Imaytaj runacuna Jehovapita mas yachacuyta munapäcun? (1 Corintios 14:23-25).

⁷ Runacunata reuniunman aywananpaj invitay. Apóstol Pablupa cawashgan tiempucho runacuna reuniunman aywar cuentata gocärergan rasunpa cajta yachachishganta y Jehovata sirviyta munapäcurgan (leiriy 1 Corintios 14:23-25). Canan wichanpis achca runacuna reuniunman aywar, chaycho yachacur Diosta sirvir galaycärin. Chauraga, ¿imaytaj runacunata invitashwan reuniunman aywananpaj? Cushishgala imaypis cawanapaj nej librucho 10 caj yachacuycho runacunata invitaycan reuniunman aywananpaj, pero manami shuyarashwanchu chay yachacuyman chayananchitaraj. Mas bienga predicaciuncho caycar runacunata puntalapita reuniunman aywapäcunanpaj invitashwan, nirishwanpis discursupa temanpita o Wilacamoj revistanchicho imata yachacunapaj cajta.

8. Pilatapis reuniunninchiman invitaptinchi, ¿imacunapita yachachinanchi? (Isaías 54:13).

⁸ Pilatapis reuniunman invitaptinchi wilapashwanmi imano reuniunninchicuna caycashganta y imano waquin religiuncunawan mana igual caycashganta. Juc cutichoshi juc warmi reuniunninchiman aywargan y Bibliapita yachachishganta hermananchita tapurgan: ‘¿Wilacamoj revista dirigej hermanuga lapancunapa jutintami reguin, au?’. Tapushganpita hermananchi nergan congregaciuncho juc aylunomi caycanchi y lapanchipa jutincunata reguinchi, chayta wiyar chay warmiga nergan iglesianchoga mana chayno caycashganta. Waquincuna manami musyapäcunchu imanirtaj reuniunninchicho juntacuycanchi, paycunata chaypita yachachishwan (leiriy Isaías 54:13). Noganchicuna juntacuycanchi Jehovata adurananchipaj, paypita yachacunanchipaj y jucninchi jucninchi shacyachicunanchipäpis (Heb. 2:12; 10:24, 25). Reuniunninchi ali camacashga caycan Diospita yachacunanchipaj manami lutan costumbrincunata rurananchipächu (1 Cor. 14:40). Jina Salunninchi ali achquiyashga canman Diospita shumaj yachacunanchipaj. Y politicaman mana talucashganchiraycu reuniunchopis manami chaypita parlanchichu ni gaparaypaj parlanchichu. Chaymi imano reuniunninchi cashganta runacuna musyananpaj ¿Imanötaj congregacärë? nej videuta ricachishwan.

9, 10. Pilapis reuniunman mana manchacuypa aywananpaj, ¿imata nirishwan? (Fotutapis ricay).

⁹ Waquin runacuna Jehovapa testigunno bautizacunanpaj yarpar manami reuniunman aywayta munapäcunchu. Chaymi pilapis reuniunman mana manchacuypa aywananpaj nishwan ‘reuniunninchiman testigo cajcuna o mana testigo cajcunapis aywanmanmi y chaycho manami pilatapis obliganchichu bautizacunanpaj’ nir. Jina nirishwan manami wamracunalapachu reunión caycan sinoga lapan familiacunapaj juntula yachacärinanpaj, chaynopa tayta mamacunapis wamrancunata ricananpaj y musyananpaj imacunapita yachacushganta (Deut. 31:12). Y Jesús nishganno ni guellaytapis ni diezmutapis pitapis mañacunchichu (Mat. 10:8). Jina nirishwanpis Jehová rican shongunchicho imano cashganta chaymi reuniunman aywarga manami cuestaj ropawan aywananchirächu (1 Sam. 16:7).

¹⁰ Pilapis reuniunman aywaptin cuyacuywan chasquinanchi. Hermanunchicunata y ancianucunatapis reguichishwanmi. Paycuna reuniuncho ali sienticäriptin yapaypis shamuyta munapäcunga. Reuniunchona caycaptin Bibliapa textucunata tarinanpaj yanapashwan y Biblian mana captin Biblianchita ricächishun. Y reuniunchö yachachishganpita shumaj tantiananpaj yanapashwan.

PILATAPIS BIBLIAPITA YACHACHIR GALAYCUPTINCHI, ¿IMATARAJ RURASHUN?

11. ¿Imanotaj runacunapa tiempunta respetashganchita ricächicushwan?

¹¹ Pilatapis Bibliapita yachachir galaycuptinchi tiempunta respetananchi. Capazchi marcanchicho pilapis ‘juc hora shamushaj’ niptin manami cumplipäcunchu, chaypa trucan noganchi pilatapis Bibliapita yachachiptinchi juc hora nimaptinchi chay hora aywananchi. Pitapis Bibliapita yachachirga galaycushganchicho walca tiempula canman yachachinanchipaj. Experienciayoj hermanunchicuna nimanchi pilapis Bibliapita más yachacuyta munapäcuptin o tapucuynincuna captin manami chaypita jucla yachachishunchu, sinoga ‘juc cuticho cutimuptë chaypita masla yachacushun’ nishwan. Jina manami noganchilachu parlashwan sinoga runacuna yarpashganpita y imano sienticushganpita más parlanman (Prov. 10:19).

12. Pilatapis Bibliapita yachachir galaycuptinchi, ¿imata rurashwan?

¹² Pilatapis Bibliapita yachacur galaycushganpita yanapashwan Jehovata Jesusta reguinanpaj y cuyananpaj. Chaymi manami yarpayninchilapitachu yachachinanchi sinoga lapanta Bibliawanmi yachachinanchi (Hech. 10:25, 26). Jehová Jesusta cachamurgan paypita yachachimänanchipaj chaynopa payta cuyananchipaj y sirvinanchipaj. Chaymi apóstol Pablo runacunata yachachir manami yarpayninlapitachu parlargan sinoga Jesuspitami (1 Cor. 2:1, 2). Apóstol Pabluplis nergan chaylaraj bautizacushgan cristianucunata yachachinanpaj ali yäracoj, ali tantiacoj y ali yarpayniyoj cananpaj y Jehovata respetananpäpis. Chayno paycuna captin gorino guellayno alapa valuryoj cangapaj (1 Cor. 3:11-15; Sal. 19:9, 10; Prov. 3:13-15; 1 Ped. 1:7). Apóstol Pablo rurashganno noganchipis Bibliapita yachacojcunata yanapashwan Jehovaman shongupita yäracärinanpaj y payta sirvipäcunanpaj (2 Cor. 1:24).

13. ¿Imanotaj Bibliapita yachacojcunawan pacienciacoj cananchi? (2 Corintios 10:4, 5; fotutapis ricay).

¹³ Jesusno Bibliapita yachacojcunata pacienciawan yachachinanchi, manami shuyarashwanchu Bibliapita lapanta rasla yachacärinanpaj. Juc temapita shumaj mana tantiaptenga juc caj yachacuypita yachachiy, y mana tantiashganpita juc cuticho shumaj tantiachiy. Manami tapupashwanchu imapis pengachinanpaj. Y Bibliapita yachacushganta manami chasquiyta munaptin manami obligashwanchu, tiemputa gonanchi chaycunaman yarpachacunanpaj y yachacushganpita shongunman chayananpaj (Juan 16:12; Col. 2:6, 7). Biblia yachachimanchi juc soldaduno luchaycanchi lutan yachachicuycunata vencinanchipaj (leiriy 2 Corintios 10:4, 5). Capazchi Bibliapita yachacojcunapa mana fácil canmanchu unaypita lutan yachachicuynincunata shongunpita jorgunanpaj. Chay luta yachachicuynincunaman mana yarpänanpaj paycunata yanapashun Jehovata más reguinanpaj y cuyananpäpis (Sal. 91:9).

PILAPIS REUNIUNMAN AYWAPTIN, ¿IMANOTAJ YANAPASHUN?

14. Reuniunman shamojcunata, ¿imanotaj chasquinanchi?

¹⁴ Pilapis may marcapita captinpis, guellayoj o waccha captinpis, ima rimayta parlaptinpis Jehová munan reuniuncho cuyacuywan chasquinanchipaj (Sant. 2:1-4, 9). Canan yachacushun imanotaj chayta rurananchi.

15, 16. ¿Imataraj rurashwan chaylaraj reuniunman shamojcuna ali sienticärinanpaj?

¹⁵ Waquin runacuna reuniunninchiman aywapäcun imano reuniunninchi cashgan musyanalanpaj o pilapis ‘reuniunman ayway’ niptin. Pilapis reuniunman aywaptin ali shimilapa y cuyacuywan chasquinanchi. Nirishwanpis reuniunman noganchiwan juntula jamacunanpaj. Yachacushganchi horacho yanapashwan Bibliapa textuncunata tarinanpaj y yachacushganchipita shumaj tantiananpaj. Calpachacushun paycuna ali sienticärinanpaj, juc cuticho juc runa reuniunman aywar mana Jehovapa Testigunno vesticushganta ricar alapa yarpachacur caycargan. Chay hora chasquicoj waugui nergan: ‘Ama laquicuychu, Jehovapa testiguncuna ali vistishga carpis gamno y waquincunanomi canchi’. Chay runa tiempuwan bautizacurgan, manami imaypis gongarganchu chay hermano nishganpita. Chaymi pilapis reuniunman aywaptin cuyacuywan chasquirpis, cuidacunanchi rimayninchicunawan mana pengachinapaj (1 Ped. 4:15).

¹⁶ ¿Imata mas rurananchi reuniunman shamojcuna ali sienticärinanpaj? Mana Testigo cajcunapita y paycunapa creenciancunapita parlaptinchi respetulawan parlananchi. Parlacuyninchiwan reuniuncho cuidacunanchi mana laquichinanchipaj, laquichiptinchi runacuna manana reuniunmanpis shamunganachu (Tito 2:8; 3:2). Waquincunapa creenciancunapita mana ali parlashwanchu (2 Cor. 6:3). Naupacho yachachicoj wauguipis parlaynincunawan cuidacunman, yachachishgan hora calpachacunman shumaj tantiachinanpaj chaynopa reuniunman shamojcunapis ali tantiananpaj.

17. ¿Imata rurashwan pilapis Bibliapita yachacuyta munaptin?

¹⁷ Canan tiempo runacuna Bibliapita yachacuyta munapäcun, chaymi calpachacunanchi runacunata yachachinanchipaj (Hech. 13:48). Predicaciuncho caycar runacuna Bibliapita yachacuyta munaptin nirishwan Bibliapita yachachinanchipaj y reuniunmanpis aywananpaj invitarishwan, chaynopa yanapashwan Jehovata sirvir galaycunanpaj (Mat. 7:14).