Jehovapa yanapacuyninwan may chaycho caycarpis cushishgala sirvipäcurgä

1979 watacho Mats y Ann-Catrin Galaad Escuelaman aywapäcurgan, chaypitana Irán, Mauricio, Myanmar, Tanzania, Uganda y Zaire naciuncunaman mandapäcurgan Jehovata sirvipäcunanpaj. Galaad Escuelacho caycar Jack Redford yachachicoj paycunata consejargan ima cambiucunapis captin cushishgala caycänanpaj. Paycunaga may sitiucunacho Jehovata sirvipäcurgan, chay cosejashganman yarpar may chaycho caycaptinpis yanaparganmi. Cananga chaypita wilashunqui.

Waugui panilä mä wilaparcamay imano Jehovata reguipäcushgayquita

Mats: Ishcay caj jatun guerra wichancho taytä Polonia naciuncho cawargan, y ricargan católico runacuna ishcay cara caycashganta. Chayno captinpis taytä nej ‘yarpämi waquin runacuna Diospita rasunpa cajta yachachishganta, pero manami musyächu maycho caycashganta’. Tiempuwanna Diospita rasunpa cajta yachachishganta cuentata gocurgä. Leiyta munar macwa librucunata rantipacamoj cä y juc cuticho La verdad que lleva a vida eterna nej libruta rantirgä. Chay librupita titulunta ricar leiyta munargä, chaymi chay chacaylacho chay libruta leiyta ushargä y waraycamuptinna cuentata gocurgä rasun caj religiunta tarishgäta.

1972 wata abril quillapita Jehovapa testiguncunapa publicaciuncunata leir galaycurgä, Bibliapita tapucuynëcunatapis respuestanta chaycho tarishcä. Bibliachopis Jesús parlargan juc negociantipita, chay negociantishi cuestaj perlasta rantinanpaj imayca cosancunata ranticurgan. Payno nogapis sienticoj cä y chayman yarpar universidächo medicupa estudianäpaj trucan Jehovata sirvinäpaj decidirgä (Mat. 13:45, 46). Chaymi 1972 wata 10 de diciembre quillacho bautizacurgä.

Juc wata pasariptinna taytäcuna y wauguëpis Bibliapita yachacur bautizacärergan. Y 1973 wata julio quillacho precursor regularno Jehovata sirvir galaycurgä. Congregaciunnëcho juc pani precursora regularno Diosta sirvirgan, Ann-Catrin jutiyoj payga buena moza y Jehovatapis cuyaj. Paywan reguinacur 1975 watacho casaracurgä, casaracärishgäpita chuscu watacunano Suecia naciunpita Strömsund marcacho Jehovata sirvipäcurgä, chay marcacho runacuna Bibliapita yachacuyta munapäcurgan.

Ann-Catrin: Estocolmo naciuncho taytä universidäta ushananpäna caycargan, chaycho caycar Jehovapita yachacurgan. Quimsa quillala yurishgäpita reuniuncunaman y predicaciunman taytä apamaj. Chayta ricar mamä rabiacur imaycacunata rurargan y nergan Jehovapa testiguncunapa yachachicuynin mana ali cashganta ricachinanpaj. Pero manami chayta rurarganchu, tiempuwanna Jehovapa testigunno pay bautizacurganpis. 13 watayojla caycaptë noga bautizacurgä y 16 watayojla caycar precursora regularno Jehovata sirvir galaycurgä. Y Umeå marcacho walca hermanucunala cashganraycu predicananpaj yanapar aywargä. Chay marcacho sirvishgäpita nipäcamargan precursora especialno Jehovata sirvinäpaj.

Mats runäwan casaracushgäpita achca runacunata Bibliapita yachachipäcurgä. Jucnin cargan Maivor jutiyoj jipash. Pay ali puclaj cashganpitapis, chayta jaguirgan y Jehovata sirvir galaycurgan. Chaypitana pay nanäwan precursora regularno sirvipäcurgan. Paycuna 1984 watacho Galaad escuelaman aywapäcurgan y cananga Ecuador naciuncho misioneracunano Jehovata sirvipäcuycan.

Gamcuna misionerucunano achca sitiucunacho Jehovata sirvipäcushgayqui. ¿Imata yanapäshushgayqui chay marcacunacho cushishgala capäcunayquipaj?

Mats: Achca sitiucunachomi Jehovata sirvipäcurgä, y cushishgala caycänapaj calpachacärishcä Jesusno humilde canapaj (Col. 2:6, 7). May chaycho caycarpis manami munapäcurgä nogacunano hermanucuna cananpaj, más bienga calpachacärerga imano paycuna cawapäcun y yarpapäcun tantiapäcunäpaj. Y Jesusno ruranapaj calpachacäriptë más ali y cushishga cawapäcoj cä (Sal. 1:2, 3).

Ann-Catrin: Chaylaraj plantashga arbulga winananpaj intitarämi necesitan, chaynolami mushoj marcaman Jehovata sirvinanpaj aywar Jehovapa yanapacuynintarämi necesitanchi (Sal. 84:11). Hermanunchicunapa cuyacuyninwan ricapäcushcä Jehová alapa cuyamashganchita. Teherán (Irán) marcacho hermanunchicunaga cuyapäcoj y posadachicojmi cargan unay cristianucunano. Irán marcapita aywayta munapäcurgächu, pero 1980 wata julio quillacho autoridäcuna manami munapäcurgannachu Diospita yachachipäcunäpaj. Chaymi nipäcamargan chay naciunpita ishcay junajla yargupäcunäpaj y pushacoj hermanunchicuna Zaire (África) naciunman Jehovata sirvir aywapäcunäpaj nipäcamarganpis.

Africapa aywanäpaj musyar wagar galaycurgä, noga mayashcä chaycho culebracuna gueshyacuna cashganta chayraycu manchacoj cä. Pero ishcay amigöcuna Africacho achca watapana Jehovata sirvipäcurgan, paycuna nipäcamargan: “Ama manchacuychu, chay marcachoga manami tiyapäcushganquirächu. ¡Gustashunquipajmi, aywapäcuy!” nir. Chayga rasunmi cargan, Africapita hermanunchicunaga cuyacojmi cargan. Pero sojta wata pasariptin autoridäcuna munapäcurganchu Diospita yachachipäcunäpaj. Chaymi Zaire marcapita yargupäcunä cargan, chay hora Jehovata mañacurgä Africacho quedacärinäpaj.

Achca watapami Jehovata sirvipäcuycanqui. Mä wilapäcamay cushishgala Jehovata sirvipäcushgayquipita.

Mats: May chaycho Jehovata sirvipäcushgäraycu may chay naciuncunapita misionero masëcunata reguir ali amigucunata rurapäcurgä. Y waquin marcacunacho runacunata Bibliapita yachachipäcurgä, ayvecisga cada uno hasta 20 runacunata Bibliapita yachachipäcoj cä. Jina imaypis gongashächu Africapita hermanucuna cuyapäcamashganpita y posadachicoj cashganpitapis. Tanzania marcacho congregaciuncunata watucamoj aywapäcuptë carrulächo punupäcoj cä, chay congregaciuncunapita hermanunchicuna waccha carpis imayca nestashgäcunata camaripäcamaj (2 Cor. 8:3). Cada pagascho warmëwan parlapäcarej cä imacunapa pasapäcushgäpita y Jehovata alapa agradecipäcoj cä yanapäcamashganpita.

Ann-Catrin: Waquin naciuncunapita hermanunchicunata reguir alapami cushicö. Yachacärishgä francés, luganda, persa y suajili rimaycunata parlapäcunäpaj, yachapäcushgäpis hermanunchicuna imano cawapäcushganta. Waquin chaylaraj bautizacoj hermanunchicunata yachachipäcushgäpis, paycunawan ali amigo capäcurgä y Jehovata juc shongunola sirvipäcurgä (Sof. 3:9).

Ricapäcushgäpis Jehovapa shumaj y cuyaylapaj camashgancunata. May naciunmanpis Jehovapita yachachicunapaj mandapäcamaptin ricapäcurgä imano Jehová yanapäcamashganta. Pay mana yanapämaptinchi manami imatapis rurayta puedipäcömanchu cargan.

¿Ima problemacunapätaj pasapäcushcanqui y imata yanapäshushgayqui aguantanayquipaj?

Mats: Imayca gueshyacunawan nacapäcurgä, malaria gueshyawanpis capäcurgä. Warmëtapis achca cutichomi operapäcurgan. Jina yarpachacärej cä taytäcunapis edayashgana caycashganta. Pero hermanöcuna pacienciawan y cuyacuywan taytäcunata cuidapäcurgan, paycunawan agradecido caycä (1 Tim. 5:4). Öraga caru captin taytäcunata mana yanapashgäraycu laquicärej cä.

Ann-Catrin: 1983 wata Zaire marcacho carcaycaptë, cólera gueshyaraycu alapa nacargä. Y juc doctor runäta nergan: “¡Cay naciunpita warmiquita rasla apacuy!”. Chaymi warannina Suecia naciunman aywacärergä juc cargata apaj aviunwan.

Mats: Chay médico nimashga warmilä gueshyanpita mana aliyananpaj cajta, pero gueshyanpita aliyarganmi. Chayno captinpis misioneruno manana Jehovata sirvipäcunäpaj yarpar wagapäcurgä. Ichanga juc wata pasariptin Zaire marcaman cutipäcurgä y Lubumbashi marcacho tacsha congregaciuncho suajili rimaycho Jehovata sirvir galaycärergä.

Ann-Catrin: Lubumbashi marcacho carcaycaptë chichuyashgä, pero pachälacho wamrä wanush. Tayta mama capäcunapaj manami yarpapäcurgächu, ichanga wamrä ograshgäpita alapa laquicurgä. Laquishga carcaycaptëpis Jehová shogapäcamargan y runacunata Bibliapita yachachir galaycärergä, chayga Jehovapita juc regalunomi cargan. Manaraj juc wata ushaptin Jehovapa bendiciunninwanmi congregaciuncho mirar galaycurgan, unayga 35 hermanucuna cargan nircur 70 hermanucunana cargan y reuniunchopis unayga 40 runacuna juntacärej cä nircur 220 runacunana juntacärej cä. Nogacuna Diospita yachacuyta munajcunata yachachir ocupado capäcurgä. Pero öraga wamräpa yarpar laquicärej cä, chay laquicuynëta Jehová chipyaypa ushacächinanpaj cajta shuyaraycä.

Mats: Tiempuwanna warmilä alapa uticashga caycargan. Nogatapis doctor nimargan fiyu cáncer gueshyawan caycashgäta y chaypita operacurgä. Cananga alinami caycä y warmiläpis puedishganmanno Jehovata sirviycan.

Musyapäco manami nogacunalachu imayca problemacunapa pasapäcuycä. 1994 wata Ruanda naciuncho chipyaypa runacunata wanuchipäcurgan, chay pasarishganchona hermanunchicunata watucamoj aywapäcurgä. Ricapäcurgä chaycunapa pasarpis hermanunchicuna aguantaycashganta, yäracuynin fuerte caycashganta y posadachicoj caycashgantapis. Chayta ricar cuentata gocärergä Jehová sirvejnincunata mana imaypis jaguishganta (Sal. 55:22).

Ann-Catrin: 2007 wata Uganda naciunman aywapäcurgä mushoj Sucursal ushashganpita shumaj discursuta wiyapäcunäpaj. Reunión ushariptinna 25 misiunerucunawan y betelitacunawanpis aywapäcurgä Nairobi (Kenia) marcaman. Kenia naciunman manaraj chayar juc camión ilajpita yurimur chocapäcamargan. Choferpis y pichga turicunapis chay hora wanupäcurgan y juc nanana hospitalcho wanurgan. ¡Paraisucho chay amigöcunata yapay ricayta munapäco! (Job 14:13-15).

Tiempuwanna chay tacacushgäcunataga aliyargänami. Pero runä, noga y waquincunapis chay accidentipita jinalarämi nacapäcurcaycä. Chacay punushgäpita riccharcur ilajpita manchacoj cä, chay hora imatapis mana rurayta puedir wanushganno sienticoj cä. Chay accidentiman mana yarpänapaj Jehovata mañacärej cä, Bibliacho gustamashgan textucunata leipäcoj cä y chayman yarpapäcoj cä. Jina psicologo doctormanpis aywapäcurgä chay problemäpita yanapämänanpaj. Yachacärishgä chayman manana yarparäcunäpaj y Jehovata mañacärej cä yanapämänanchipaj nogacunano pasapäcushganta yanapananchipaj.

Gamcuna wilapamashcanqui imayca sasacunapa pasashgayquicho Jehová chawa runtuno apashushgayquita. Chaypita, ¿wilapäcamanquimanchuraj?

Mats: Suajili rimaycho cay palabra caycan: “Tumebebwa kama mayai mabichi”, cay palabra ninanga: “Chawa runtuta apamashganchino caycan”. Pipis chawa runtuta aparga shumaj cuidadulawan apan mana paquinanpaj, chaynolami Jehová cuidapäcamargan may chaycho payta sirvishgäcunacho. Nestashgäcunata y maspis Jehová camaripäcamargan. Jina Jehovapa marcanta pushacoj hermanucunapis cuidapäcamargan, chaychopis ricapäcurgä Jehová alapa cuyapäcamashganta.

Ann-Catrin: Runä wilacushganga imano Jehová cuidamashganchipita, chayga yarpächiman juc cuticho imacunapa pasapäcushgäpita. Juc junajmi telefunupa gayamar nipäcamargan taytä hospitalcho alapa gueshyawan caycashganta. Runä chaylaraj aliyargan malaria gueshyapita chayraycu Suecia naciunman viajapäcunäpaj guellaypis carganchu, chaymi yarpapäcurgä carruta ranticärinäpaj. Chay hora juc turinchi warminwan telefunupa gayapäcamargan, paycuna mayargan pasaycashgäta y nipäcamargan juc pasajïta pagananpaj aviunwan aywapäcunäpaj. Nircur juc edayashgana nana gayamargan, pay juc cajacho guellayninta churashga cashgan nestajcunapaj. Chaycunawanmi Jehová jucla yanapämashga (Heb. 13:6).

Gamcuna 50 watacunano lapan tiempuyquiwan Jehovata sirvipäcuycanqui. Chaypita, ¿imata yachacushcanqui?

Ann-Catrin: Yachacushcä Isaías 30:15 texto nishganno ali cawapäcunanchipaj Jehovaman yäracur y pay yanapämänanchipaj jaucala shuyararmi. Aumi, Jehovaman yäracuptinchi paymi yanapämanchi (2 Crón. 20:15, 17). Jehovata lapan tiempöcunawan sirvishgäraycu achca bendiciuntami paypita chasquipäcurgä.

Mats: Yachacushcä imapitapis Jehovaman más yäracunäpaj, chaynopa ricashaj imano Jehová yanapaycämashganta (Sal. 37:5). Jehová aunimashganchino imaypis yanapäcamashga. Canan Myanmar Betelcho caycar Jehová yanapaycämanchipis.

Shongupita munapäco mozu jipashcuna Jehovata lapan tiempunwan sirvinanpaj, chaynopa nogacunatano paycunatapis Jehová cuidangami. Segurumi carcaycä paycuna may chaycho caycarpis Jehovata sirviptin y yaracuptin, pay cuyacuywan yanapanga cushishgala caycänanpaj.